eSefarad Noticias del Mundo Sefaradi
Ver todos los artículos de esta sección
Estas oyendo??
por Albert Israel
– Ke salamon, ke haber?
– No demandes Moshon. Ayer, yene me esperti en medyo de la noche i empesi a pensar… Asi bivas tu, meteme un vaziko de raki i dos borrekitas de berendjena…
– Ya te dishe, no penses!! La tansyon…
– Desha agora la tansyon! La oyida, la tyenes buena?
– Yo se? Comme ci comme ca…
– Ke sepas, 90% del puevlo no estan oyendo bueno… La djente se esta ensodresendo…
– Kualo es la razon?
– Ay terroristos. Estan eskondidos. Mozotros no metemoz tino a eyos… Estos bandidos, avagar avagar, a gota a gota, moz estan azyendo sodros. Mankos ke los veyga!!
– ???
– Antes, te ivas a una boda, a un Bar Mitsva, una alegriya… Te gozavas de azer muhabbet kon la famiya… Te gozavas de oyir las kantikas… Te alegravas… Oy, el sono de la orkestra, no solo te patladea la tela del oyido, te buraka la kavesa, te trembla el korason i te trembla los pumones, ke tambien te da un sar de murir… Solo el sar ya abasta para akurtarte la vida! Kuando vyenes a una fiesta, solo keres topar el burako de la kashika, enkashar el bastadro de chek de regalo en el burako i fuyir afuera del ginnam de bruido!!
– Tyenez muncha razon. No solo fiestas. Lo mizmo esta en los konseres. Dospues ke salgo del konser i me vo a echar, noche entera tengo chuflete en el oyido!! No me durmo fin la demanyana…
– I las ambulansias ke pasan… Kuando un shofor piza a la sirena del otomobil…
Me vyene una dolor fuerte de oyidos … Me kero travar los kaveyos
– Afilu de mi para mi, si alevanto la boz para gritar, esto sufriyendo… Esta situasyon no esta de suportar…
Ken son los terroristos ke dishites?
– Estos son komo «Miembros del Mosad». Ni ke los ves… Se eskonden i no saves afilu ke estan en la sala. Se yaman: «Soundman» (persona del sono). Los dedos tyenen en una kashika de botones. Emprimero el sono lo azen flosho para enganyarte. Dospues de 5 minutos, kuando ya te auzates i sin ke tengas haber, lo meneyan el boton para ariva. De akel momento en delantre estas en las manos de estos negromazales!!!
– No se, deke lo azen esto?? No se espantan ke los vamoz a dar al djuzgo??
– Este «sabotaj» del oyido akontese avagar, avagar. Kada fiesta ke te vas, kada konser ke partisipas, la oyida te se amingua por 2-3%. Agora ven i prova ken es el kulpante de tu situasyon en los 25 anyos de alkavo…
– No es ke ay «Ley de bruido»??
– Ya ay, ya ay. La ley dize ke «Si el bruido en la sala pasa a los 85 Db’les, kale ke se ensyenda luz korolada i ke, otomatikamente, se korte el elektrik de los oparlores…». Tu tyenes visto en tu vida ke se ensendyo luz korolada en la sala i ke se korto el elektrik de los oparlores???
– Puedeser ke el bruido nunka paso a los 85 Db’les…
– Asi bivan tus pulgas!!!
– I de ke lo azen esto??
– Los primeros kulpantes semoz mozotros, el puevlo. Mas moz azen sodros, mas moz vamos a estos evenimyentos. Mas moz azen sodros, mas moz aserkamoz de los oparlores. Mas moz tremblan los korasones i los pumones, mas baylamoz en la shena… Este modo los kantadores pagan mas muncho a los teroristos para ke suvan los botones i amplifiken el volumen. Agora se esta investigando si ay un kontrato sekreto entre la federasyon de los teroristos i las federasyones de los doktores de oyidos i los institutos ke analizan la oyida.
– Entreval de esto kualo ke agamos?
– Syempre ke te se tope en la aldikera tapones de oyidos!! Ay agora taponez de musisyenes. Te lo azen asigun la mizura de tu oreja. Estos tapones te aminguan el bruido por 25%.
Ande estan las borrekitas de berendjena?
– Kualo?
– Las borrekitas…
– Kualo? No te esto oyendo…
– Ye se entendyo, i Moshon se ensodresyo…
Albert Israel
