eSefarad Noticias del Mundo Sefaradi
Ver todos los artículos de esta sección
Murir doz vezes (2)
por Albert Israel
Kon Niko Hofinger, eksperto de la istorya de los djudyos en el rejion Tyrol, moz enkontrimoz I moz konosimoz en el semitaryo djudyo de Innsbruck: «Na, aki esta la tomba de Ernst. Ernst Bechinski, prezidente de la komunita djudiya en Innsbruck i Tyrol..» me amostra. Tyene en la mano un dokumento de la munisipalidad: «Ernst Bechinski era kazado kon Ilse Foke. Ilse muryo en 1976. Djusto el anyo ke Ernst se izo prezidente de la komunita».
Moz fuimoz al arshivo de la komunita djudia en Viena. Wolf-erich Ekstein, el responsable, avre un livro grande. En el rango 1724 esta Ernst Bechinski: «Nasyo en Viena en el 12/7/1902 a las oras 9:50. Ijo de Ignaz Bechinski i Julia Jetti Pollak, de Adambergergasse 7 en Viena. Muryo en Innsbruck en 31/5/1987(???). En 31/5/1946 vino a la ofisina de la komunita i demando una kopya del sertifikato de su nasimyento (???)».
Avshalom Hodik, el prezidente de la komunita de Viena: «Kuando me enkontrava kon el se via ke no teniya dinguna konosensya kon el djudaismo. No savia nada sovre la ley. Me demandava a mi kestyones de kriaturas… Devemoz de supsonar ke no era djudyo…»
Torni a Israel.
Komo puede ser?? Mi nono se arebivyo i se fue a bivir en Innsbruck?? Se kazo dos vezes, kon mi nona en 1933 en Tel Aviv i kon Ilse en 1946 en Zagreb?? Tomo kopya del sertifikato de su nasimyento en 1946 para kazarse kon Ilse en Zagreb?? Bivyo una «doble vida» sin ke sepan unos a los otros?? O es possible ke aviyan dos Ernest Bechinski ke nasyeron en el mizmo dia, en mizmo luguar i en la mizma ora?? No puede ser! El uno deve de ser falso! Un nazisto ke se kijo eskonder… I puede ser ke los dos eran falsos i mi nono no era djudyo!! En supito mi madre se persive ke no save nada de su padre. No save nada de su istorya en Viena. Nunka le demando… Mi nono nunka viajo a Viena del dia ke vino a Israel. Mi madre se akodra ke un dia, kuando teniya dodje anyos i estavan paseando kon su padre en Tel Aviv, enkontraron a una mujer ajena i se fotografeyaron. Ken era esta mujer, Konosida/metresa??
Mil i un penseryo…
Moz fuimoz kon mi madre a ver la tomba de mi nono en el semiteryo de Tel Aviv, para asigurarmoz ke mi nono esta aya. Si! Aya esta la tomba. Mi madre dize ke sufriyiya de kanser ma se muryo de un atako de korason. En 1969. Las eskrituryas ya se enfasaron. Es posible ke la tomba esta vaziya??
Mandimoz demandas a diferentes arshivos. Del ashivo de la rejion Tyrol vino repuesta ke Ilse Foke esta enrejistrada aya. Moz fuimoz a ver kon Niko. Ay kashas enteras de dokumentos. Moz embelekimoz oras enteras i entendimoz ke toda la famiya, Foke, eran nazistos. El padre, la madre, los ermanos, todos!! Teniyan postos en el governo nazisto i sirvyeron en el SS. Dospues de la gerra uno de eyos, Erich Foke, fue metido en prezo por un anyo. El inyeto de Erich, Andreas Foke, bive en Innsbruck. Niko lo konose a Andreas.
Desidi de ir i avlar kon Andreas. Topi una persona en mi edad, muy agradavle. Kara de riza. Le amostri las fotos ke vide en la komunita.
Andreas: «Si, lo konosi a Bechinski. Era kazado kon Ilse. Ilse era la ermana de mi nono Erich. Esta es Ilse. I esta blonda es Klara Pollak. No, no se ke koneksyon familyar tenemoz kon klara. Ma bive aki serka. Se puede ir i verla. No, no tengo dingun dokumento del tyempo de mi nono. Mi madre destruyo todo. No se deke. Puede ser ke no se kijo akodrarse.»
No le dishe lo ke saviya por su nono…
Moz fuimoz kon Niko a la kaza de Klara.
Klara: «Ilse se kazo dos vezes. Emprimero se kazo kon Pollak i dospues kon Bechinski. Mozotros lo yamavamoz Mano. No se deke… Yo so la elmuera de Ilse i Pollak. La mujer de sus ijo Ernst Pollak. Si, dospues ke mi eshuegro muryo Ilse se kazo kon Mano. No, no tuvyeron kriaturas. Mano i Ilse moraron en esta kaza. Mozotros tambien morimoz aki, kon eyos endjuntos. Mano no metiya mano en nada. Ilse penava kon todo. La famiya de Ilse no lo kijyeron a mano. No lo akseptaron. No eran favorables por djudyos. En sus ojos los djudyos eran de grado basho. La madre de Ilse opozo muncho este kazamyento. No kijo ke Ilse se kaze kon djudyo. Ilse lo amava muncho a Mano. Sufriyo muncho del komporto de su famiya kontra Mano. Se entristava muncho por esta razon…»
Salimoz de klara.
A kontinuar…
Albert Israel
