eSefarad Noticias del Mundo Sefaradi
Ver todos los artículos de esta sección
Eli Kohen, el espiyon muestro en Siria (2)
por Albert Israel
En 18/5/1965 a las 2:00 de dmanyana lo trusheron a Eli a una baza de polisiya. El granrabino de Damasko izo las orasyones nesesaryas (eli le ayudo al rabino mas ke el rabino le ayudu a Eli) i a la demanyana lo enforkaron en la plaza sentral de Damasko, Marjeh. Lo desharon enkolgado dia entero para ke la djente pase i lo veyga. Sus guesos no tornaron a Israel fin a oy en dia. En 2007 el shefe del ofisyo del prezidente de Siria disho ke ensima de la tomba de Eli Kohen se fraguo un kartye muevo de kazas i butikas, ansi ke no se puede saver ande Eli esta enterrado. Dospues de su muerte Eli fue promovado en Israel al rango de Mayor General.
No se save, egzaktamente, komo los Sirianos metyeron la mano a Eli. Se pueden notar unos kuantos faktos:
1. Los Sirianos kijyeron trokar el kamino del Rio Banyas para sekar a Israel. La armada israelyana atako el ekuipamiento en el muy empesijo de los lavoros. Esto los trusho a los Sirianos a supsonar ke ay espiyon Israelyano.
2. Del konsolato de india se kesharon ke sus transmisyones a India se estan disturbando.
3. Los Sirianos ke estavan suivando detras de ajanes amerikanos supsonados, entre eyos Magd Sheih El Ard ke torno a Siria endjuntos kon Eli, vyeron ke estos ajanes tyenen relasyones kon Eli.
4. Los sirianos aresivyeron apareyes muevos de Rusya para bushkar i lokalizar tranmisores de espiyones. Una noche serraron todos los transmisores militaryos i empesaron a arodearsen en el kartye ke morava eli para aprovar estos apareyes muevos. Eli ke no saviya esto kontinuo a transmisar.
5. Eli estava enrejistrado en las dosyas de los ejipsyanos, del tyempo ke lo investigaron sovre «El Negosyo Malo».
Uno o mas de estos faktos kavzaron a ke Eli se aferre. Entraron brutalmente a su kaza. Emprimero toparon el eksplosivo i dospues el transmisor.
Una parte de los djuzgadores de Eli eran sus amigos antes ke se aferro. Eli no los entrego pensando ke el veredikto no sera «muerte». Ma los djuzgadores lo kondanaron a muerte para ke en el futuro no avre la boka i los entrege.
Todos los esforsos ke se izyeron para salvar a Eli, entre eyos esforsos de lideres emportantes en el mundo entero, enkluye el papa de roma, no reusheron. Eli fue enforkado en la plaza El Marjeh de Damasko. Antes de su muerte lo desharon a eskrivir una letra a su famiya i rejistrar una rejistrasyon de su boz. Lo enforkaron sin taparle sus ojos.
Aki puedesh oyir su boz rejistrada:
«Kerida Nadia, kerida famiya,
Vos esto eskrivyendo ultimos biervos kon esperansa ke vash a estar syempre aunidos. Le rogo a mi mujer ke me perdone. Ke se mire i ke de edukasyon buena a las kriaturas. Va vinir dia ke van a ser orgolyozos de mi.
I ati, kerida Nadia, sos permetida de kazarte kon otro ombre para ke seya padre a muestros ijos. Sos enteramente libra. Te rogo ke no kedes en dolyo por lo ke paso i ke mires al futuro. Te esto mandando bezos ultimos, aze orasyon por la levanta de mi alma.
Eli»
Nadia no se kazo demuevo.
En 2011 vino a Israel un «Aktivo» de Kurdistan i testigo ke estuvo en el kompartamento ke Eli estava aprezado i vido en las paredes eskrituryas en ebreo»: «No regreto por lo ke ize. Regreto por lo ke no ize.»
La memorya de Eli Kohen esta eternizada en Israel entero. Sivdad a su nombre, Eliad. Kalejas a su nombre en Yerushalayim, Tel Aviv, Heyfa, Hertseliya, Ramat Hasharon, Ashkelon i mas… Estatuas, muzeos, medalya governal i mas. A lo manko dos livros fueron eskritos a su vida: «Eli Kohen, muestro ombre en Damasko» i «El espiyon Israeli en Damasko». En 1987 salyo a los ekranes el filmo de sinama, «The impossible spy» kon Eli Wallach. En estos dias se esta 
tomando al filmo una serya de televizyon de 6 partes por Netflix.
En estos tyempos de embarasatina en siria, los miembros barraganes del Mosad izyeron otra una operasyon eroika i trusheron a Israel la ora ke Eli yevava en su braso. Nadia se emosyono muncho i les rogo ke la enkolgen en el koridor del adifisyo del Mosad pare ke los miembros mansevos se ambezen el patrimonio ke moz desho Eli.
Aki tenemoz un filmo ke deskrive su vida i sus ovras:
Los ke entyenden Ebreo pueden ver aki un filmo muevo, travado de parte de su ermano chiko, Avraham:
Albert Israel
