eSefarad Noticias del Mundo Sefaradi
Ver todos los artículos de esta sección
EL SESTIKO DE LA MAMA
por Albert Israel
Akeyos diyas no aviya i-fon, i-ped, i-cell, i-pay, i i-nosekualo.
Ay, ay, ay…
Eramoz ijikos de kaye. Kuando viniyamoz de la eskola, antes de todo, echavamoz la chanta de la eskola en una koshe de la kaza i korriyamoz afuera para enkontrarmoz kon los amigos. Juguavamoz afuera oras enteras fina ke se aziya areskuro. tornavamoz a kaza suzyos pretos i firridos. Para kitar la suzyedad del puerpo aviya menester de tel de fregar. Si teniyamoz una lira para kada firida en los dizes, mos puediamoz azer rikinyones.
Akel tyempo no teniyamoz en kaza ni frijider ni frizer ni nada. Teniyamoz un almaryiko kon paredes i puertas de teles, en un luguar fresko i ferah del mupak, luguar ke no tokava sol. A este almaryiko se metiyan las kozas de komer ke no turavan muncho tyempo en la kalor. Los teles permitiyan al aver fresko de entrar aryentro del almaryo i arefreskar las kozas de komer.
Por esta razon, i por otras (ke no teniyamos paras), no se merkavan munchas kozas de komer enduna. Kada diya se markava un poko. No era komo oy, ke puedemos kedar en kaza mez entero i yene se topa kualo de komer.
Por este menester las madres teniyan un sestiko atado kon kuedra larga. La largura de la kuedra dependiya del etaj ke moravamoz. Kuando les viniyan a mankar kozas de komer, las madres avriyan la ventana i gritavan: «Albeeertt, Albeeertt!!!» No enportava en ke kaleja estavamoz, pishin oyiyamoz la boz de la mama i korriyamoz a kaza: «Albert, te esto echando kon el sestiko 2 liras, vate al bakkal i merka medyo pan, 200 gramos de kezo blanko i 150 gramos de azitunas!!!».
Akeyos tyenpos no aviyan supermarket, superdil, supersal, supermen i supernosekualo… Solo lo ke aviya era bakkal. La maraviya del mundo es ke los bakkales no se trokaron hich, de akel diya fina oy. Ladrones eran, ladrones kelaron.
Dospues ke merkavamoz lo ke es de menester, gritavamoz de abasho: «Mama, mama… echa el sesto!!». Metiyamoz en el sesto las kozas ke merkimoz i el resto de las paras. La mama travava el sesto ariva kon la kuedra.
Syempre, kuando kontava el resto de las paras se keshava: «Este lardon yene mos enganyo!! Moz dyo atraz 5 groshes mankos…». Por esto le diziyamoz: «Mama, lo ke no aze tu mano no te lo aze ni tu ermano!!!».
Los ijikos ke moravan allado del bakkal eran mazalozos. Las madres yamavan direktamente al bakkal: «Dursun efendiii, Dursun efendiii».
Aviya diyas fiksos ke pasavan de la kaye el zarzavatci, ke vendiya zarzavat i el vendelor de frutas. Viniyan kon azno ke teniya dos kufas en los dos lados o kon araba de kavayo i gritavan: «Zarzavatciii, meyvaciiii!!!». Las madres gritavan: «Te esto echando el sesto kon paras, meteme medyo kilo de bamyas…!!!».
Albert Israel
