eSefarad Noticias del Mundo Sefaradi
Ver todos los artículos de esta sección
Koensidensya?
por Albert Israel
Munchos artikolos fueron eskritos por «Mishkanot Shaananim», el adifisyo primero fraguado afuera de las murayas en Yerushalayim (la sivdad ke moro yo). Notaremoz en kurto ke a lo largo del sieglo XIX la situasion sanitaria i sosial de la populasyon djudia en la sivdad vyeja estava de aogar. Las kondisyones de salud agravaron a kavzo de la densidad asumportavle i la mankura de infrastrukturas sanitaryas komo kanalizasyon i agua korriente. El puevlo estava sufriyendo de epidemias. La nesesidad de kreser afuera de las murayas era una ovligasyon.
En 1860, Moshe Montifyori, aristokrato i filantropo inglez ke teniya en su dispozisyon el fondo de ereda del filantropo djudio-amerikano Judah Touro, merko un kampo enfrente de «Har Tsiyon» (La monte de Tsiyon) ke oy se yama el kartye «Yemin moshe» i fraguo un adifisyo largo de 12 apartamentos. Kada apartamento teniya kanal espesyal para arekojer las aguas de luvyas i transferarlas a un pozo fraguado por este propozito.
Ademas fraguo un Molino grande de ayre ke seya una Fuente de mantenimyento para los moradores. En el empesijo la entision era ke las famias djudias vengan a morar en estos apartmentos por tres anyos i ke se troken kon otras famias. Ma las famias refuzaron a morar en estas kazas por espanto de los bandidos ke estavan liberos afuera de las murayas. A la fin Moshe les entrego los apartamentos debaldes, sin limitasyon de anyos i kon ayudo finansyel. Durante los anyos se fraguo el kartye entero de Yemin Moshe kon moradores ke salyeron de la sivdad vyeja. En 1947, durante la gerra de independensya de Israel, los jordanyos bonbardearon el kartye muy fuerte i kaji todas las kazas se destruyeron. Dospues de la gerra vino de Turkiya un grupo grande de emigrantes ke aresivyeron estas kazas del governo, las restoraron i bivyeron aya kaji 19 anyos. Dospues de la gerra de 6 dias, en 1967, el governo los forso a los abitantes de abandoner las kazas (kon una kompensasyon de bavajadas o «por un kulo de pipino», lo ke keresh) fraguo kazas muevas i modernas i trusho abitantes, artistos etranjeros, ke merkaron estas kazas kon presyos altos.
Antes dos anyos, kuando yo i mi famia aresivimoz la suditansya i los pasaportos espanyoles, mos demandaron en el konsulato espanyol: «En ke sivdad de Espanya keresh estar registrados?». Yo no entendi la demanda, me vinyeron al tino las «Ramblas» i el «Paseo de Grasya», dunke les dishe «Barselona». No me dyo el meoyo ke en akel momento mizmo me ize Katalan… De prova ke me mandaron avizo ke venga a votar en el referendum ke tomo luguar el otro anyo en Katalonya.
Porke voz esto mensyonando esto? Dospues ke entendi ke «so Katalan» dishe meldare un poko por Barselona. I kualo ven mis ojos?
«A lo largo del sieglo XIX la situasion sanitaria i sosial de la populasyon en la sivdad vyeja de Barselona estava de aogar. Las kondisyones de salud agravaron a kavzo de la densidad asumportavle i la mankura de infrastrukturas sanitaryas komo kanalizasyon i agua korriente. El puevlo estava sufriyendo de epidemias. La nesesidad de kreser afuera de las murayas era una ovligasyon.
En 9 de junyo 1859 el governo de espanya, por medyo de orden real, konfirmo el «Plan Cerdá» desinyado de parte del ingeniero Ildefonso Cerdá sovre la ancheadura de la sivdad i en 8 de julyo 1860 ordeno la egzekusyon de este plano. En el 4 de septembre 1860 la reyna Isabel II apozo la primera pyedra de la ancheadura, djusto en la aktuala plaza de katalunya de oy.»
Si keresh ver las murayas de 1860:
I la sivdad Barselona de oy:
Ke dizish? Esto es koensidensya?
Albert Israel
