New book: YAKAR MIDAY – Mas ki Prissiozou de MALCA LEVY

Yakar Miday, es el muevo i sigundo livro de Malca Levy, ande mos konta la tiena istoria de esta kriatura, asigun se la kontava su padre, el Rabi Moise Levy, orijinario de Rodes. El uzava de kontar  kuentos i istoryas a su famiya y konosidos i lo azi kon grande grasia, komo un aktor de teatro, aziendo el rolo de kada personaje. Esto kedo en la memoria i el korason de la famiya entera i Malca tomo este rekodro para eskrivir este livro en dos linguas: frasez i ladino.

Dize Malca al empesijo del livro:

«Mi padri tiniya oun livrou kil souyou li dio. Era iskritou in djoudezmo, koun las letras rachi. Era la istoria de Yakar Miday. Eya mous toukava mountchou i mous aziya yourar. Era koun mountchous ditalious, ki el mous kountava il drama di esta kriatoura i di sous parientis, sous orassionis, koumo soufriyan di ser separadous i sous esperansas di ser riounidos di muevou.»

Aki lo meto este mizmo teksto eskrito al modo de mozos los turkanos :

 «Mi padre tinya un livro ke el suyo le dio. Era eskrito en djudezmo, kon letras en rashí. Era la istoria de Yakar Miday. Eya mos tokava muncho i mos azia yorar. Era kon munchos delayos, ke el mos kontava el drama de esta kriatura i de sus parientes, sus orasiones, komo sufrian de ser separados i sus esperansas de ser reunidos de muevo.»

Sus parientes avlaban en «ladino ou in espaniol», ke es ansi ke yamavan sus lingua, i tinian el uzo de dizir las «o» komo «ou» i las «e» komo «i». en su kaza podian sintirlos dizir la mizma koza de manera diferente, por ekzemplo «todou buenou tengas» o » todo bueno tengas i tambien «letchi» o «letche» por leche.

Eya dechizo de eskrivir el ladino kon la lingua de sus parientes, la lingua de los Rodeslis asigun eya, kon los «ou» i los «i» pensando en azer kolay la meldadura para sus sovrinos, sovrinas, bis-sovrinos i bis-sovrinas a ken eya dedika el livro para ke no se olviden del «Papu Rabin».

Este modo de eskritura , asigun yo se, no es al uzo de los Rodeslis, sino al modo de Los Balkanes, sera porke su famiya mora en Brukesles, ke fue zona ande moravan djudios de orujen Portokes, ma se entiende bueno i la istoria es una delisia, no perdash de meldarlo! .

Para merkarlo:
Yakar miday – Plus que précieux
Illustré par Anna Lauwaert et Beni Turiel
Editions Orpheu, Bruxelles – www.orfeu.be
84 pages
€ 20
ISBN 978-2-87350-053-9