MUJERES VALUTOZAS MA DESKONOSİDAS por Forti Barokas (Teksto+audio)

En meldando la istorya djudiya vemos ke munchos ombres famozos desharon sus nombres inolvidavles. Komo Theodor Herzl, Davit Benguryon, Moses Menderlson etc.

Por siguro ke ay i mujeres muy presyozas komo Golda Meir, Hanna Rovina, Donna Gracia… eyas i munchas.

Ma ay otras mujeres djudiyas ke estan en sigundo plano, ke no se konosen tanto ma ke eran presyozas en la istorya mondial, i desharon sus valutozas palavras. Unas kuantas de eyas…

JUDITH LEIBER (1921-2018)
“la reyna de las chantas”.
Nasyo en Budapest 1921. en la sigunda gerra monidal, su famiya fue ovligada a kuzir uniformas de soldados ma eya prefero a azer chantas i las empeso a vender a los soldados Amerikanos. Fue muy reushida, de sorte ke empeso a azerles chantas a las artistas de sinema komo Greta Garbo, Elizabeth Taylor. Entro en munchas koleksyones de arte, kazada kon Gerson Leiber, muryo a los noventa anyos en una kriza de korason.
Su palavra de alkavo fue: grasyas a Hitler achakes de el me ambezi a azer chantas.

HEDY LAMARR (1914-2000)
Hedy Lamarr era una emigrante i una estreya de Hollywood. Eya era la mas ermoza i tambyen la mas seksual. Aparte de su karyera de sinema, era eksperimantada en muevas teknolojiyas i eventos. Lo mas emportante, lavoro enriva GPS i WİFİ. Ma syempre fue konosida komo artista ermoza i seksual.
Su palavra de alkavo: los analises ke ize, me dyo libertad me sinti ke estava bivyento en otro sieklo.

FRANCESKA MANN (1917-1943)
Franceska era una balerina ke muryo en Auschwitz a la edad de 26 anyos. Eya se konose komo la balerina ke mato a los nazis. Eya mato a un ofisyal de la SS antes de entrar a la kamareta de gaz.
Su palavra de lakavo: malorozamente nada no keda en el mundo.

EMMA GOLDMAN (1869-1940)
Sigun el arshivo de mujeres djudiyas, en el siglo XX. Emma fue una anarshista aktiva en la politika Amerikana. Syempre defendyo la libertad de avlar, la libertad seksual, la independensya de las mujeres, la edukasyon radikal, la djustisya i los derechos de los lavorantes.
Sus palavras de alkavo: el trokamyento de ideas no se realisa sin revolusyon. La revolisyon es la aksion del pensamyento libre.

EMMA LÁZARO (1849-1887)
Emma Lazarus fue eskritora i poeta.
Eya es el otor del poema ‘The New Colossus’ (la manyifika estatua de Apolo en Rodes, una de las syete maravillas del mundo) eskrito en la Enstitua de la Libertad. Syempre dezeo ke los emigrantes tengan una vida mijor. En su poema fue sus palavras de alkavo:
Dame a mi a los dezmazalados
Ke estan afritos de respirar
A los miserables…en esta tyerra
No ay lugar.

FORTİ BAROKAS

Fuente: turkisrael.org.il