eSefarad Noticias del Mundo Sefaradi
Keridos amigos,
Syendo ke djueves va ser Yom Haatsmaut, me pensi de aparejar una emisyon sovre Yitzhak Shamir, ke se muryo en 2012, i ke fue dos vezes primo ministro de Israel. Por dizirvos la vedra, este ombre tuvo una vida tan yena i rika ke no pude todo apretar en 20 minutos de avla, i tendre de eskapar el kusur el djueves de despues.
Los ke van a kerer oirme en direkto lo podran indosen a las 4 h 06 PM, ora de Paris, sovre www.radioj.fr Kale klikar arriva a la derecha sovre Ecouter Radio J en direct. I si no es en direkto, abasta asperar un diya o dos, i despues ir a oirme en redifuzyon sovre http://www.radioj.fr/node/145
Saludos a todos
Edmond Cohen Paris Fransya
Yitzhak Shamir
Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Por empesar, vos akodro ke el proksimo atelye de konversasyon de Vidas Largas se tendra el martes 24 de mayo, de las dos a las kuatro i medya, en el Centre Communautaire.
Vos akodro tambyen ke agora las emisyones de Radio J se pueden oir sovre internet. Si el tekniko lo kyere byen, i estos tyempos lo kyere byen, mi emisyon se puede oir sea en direkto, sea kuando se kyere, eya sola, kale klikar en el sityo de Radio J, sovre Emissions, i irse en pajina 5, aya se topa la miya.
http://www.radioj.fr/node/145
Oy, djueves 12 de mayo, es el Yom Atsmaut, i de la misma manera ke ya vos ize emisyones sovre David Ben Gurion o Moshe Dayan, vos kyero avlar oy de Yitzhak Shamir, i un otro diya vos avlaré tambyen de otros kapos israelyanos ke no son mas en vida oy, komo Golda Meir, Menahem Begin o Yitzhak Rabin.
Ay dos partes en la vida de Yitzak Shamir: la parte sekreta, porke fue un kapo de una organizasyon klandestina, el Lehi, i kuando uvo el Estado de Israel, lavoro munchos anyos a eskondidas para el Mossad. I de otra vanda, tuvo tambyen su parte a la luz, syendo ke fue despues un ombre politiko, deputado, prezidente de la Kneset, ministro i dos vezes primo ministro.
Empesaremos por el empesijo: el nasimyento, el 22 de oktovre 1915, en la sivdadika ke tyene el nombre yidisch de Rozshinoy, en lo ke era kuando nasyo la Polonya okupada por los Rusos, i ke oy se yama Ruzhany i se topa en Byelorusia, de un ijiko yamado Yitzhak Jazernicki, ke mas tadre se yamara Shamir.
Tuve la kuryozidad de bushkar sovre Wikipedia lo ke se dize sovre esta sivdadika. Poko. Ama yene dizen ke kaji toda la povlasyon djudiya de esta sivdadika (unos 3.500 djudyos), ke eran, esto no lo dize el artikolo, la mayoriya de la povlasyon de la sivdad, fueron matados por los Almanes, sovre todo en Treblinka. Esto dicho, kuando kale nombrar djente famoza de esta sivdad, son kaji todos djudyos, i el mas konosido es Yitzhak Shamir.
Su padre teniya una fabrika de kuero. El chiko Yitzhak se fue estudyar en la sivdad polaka de Byalistok en una eskola ebraika. I despues estudyo el derecho en la Universidad de Varsovia, i en mismo tyempo entro en el movimyento de manseves yamado en 1923 Betar (Brit Trumpeldor, Aliansa de Joseph Trumpeldor, del nombre de este gibor kaido kon syete otros en 1920 defendyendo la kalé de Tel Haï kontra arabos venidos de Levanon). Este movimyento syonisto i antikomunisto se va ir en 1925 de la vanda de Jabotinsky kuando va fundar su partido revizyonisto opozado a los syonistos de la syedra marxista.
En 1935, a los 19, Yitzhak desha sus estudyos i se va en Palestina, lo ke va salvarle la vida, syendo ke su famiya entera, kedada en Polonya, va ser aferrada i matada kuando vyenen los Almanes: su madre i una de sus ermanas matadas en los kampos, su otra ermana matada por kurshum; en kuanto a su padre, asigun lo ke konto Yitzhak, se fuyo del treno yevandolo a los kampos de la muerte, i abolto a su sivdadika de Rozshinoy, i aya fueron kazalinos polakos, ke aviyan sido sus amigos de chikez, ke lo mataron.
Shamir disho un diya a un gazetero ke los Polakos chuparon el antisemitismo kon la leche de sus madres. «Esto es una konfidensya, no lo vo eskrivir», le disho el gazetero. «No es una konfidensya, le respondyo Shamir, lo puedesh eskrivir.» El gazetero lo eskrivyo, los ofisyales de Polonya protestaron, Shamir no troko su avla.
Disho un diya a Ehud Olmert ke kuando supo ke los djudyos ivan a ser todos matados, su padre aviya respondido: «Yo tengo un ijo en la tyerra de Israel, i el me va vengar». (Puedesh pensar ke Shamir lucho solo kontra los arabos i no kontra los Almanes, ama vash a ver mas leshos ke el mismo organizo atentados kontra los savyos nazis de Nasser en Ayifton).
Shamir, ayegado en Palestina, lavora ande un kontavle. Troka de alkunya, i eskoje Shamir, porke, asigun lo dyo a entender a su mujer, shamir es sea una espina ke entra komo un kuchiyo, sea una pyedra dura ke rompe el fyerro. Esto solo abasta para amostrarmos ke la dulsor no era la primera kualita de este ombre.
Vos avli de su mujer. Se yamava Shulamit, vino en Palestina de Bulgariya kon vapor en 1941, i a su yegada fue echada en un kampo por los Inglezes, syendo ke vino en Palestina de manera illegal. Aya la konosyo Shamir, i se kazo kon eya en 1944. De eya tuvo un ijo, Yair, i una ija, Gilada.
Yitzhak Shamir, venido del Betar, entra en la organizasyon militarya i sekreta Irgun, dirijida por David Ratziel, ke lucha kontra los Inglezes, i en 1941, topando ke el Irgun no es bastante radikal, entra en la mueva organizasyon dirijida por Abraham Stern, yamada Lehi (Lohamei Herut Israel, luchadores para la libertad de Israel) ke los Inglezes van a yamar the Stern gang, el grupo Stern, afillu despues de la muerte de Abraham Stern en 1942. En este grupo, Shamir va tomar el nombre de Michael, en memorya del irlandes Michael Collins, muerto matado en 1922.
Este mismo anyo 1941, Shamir es aferrado por los Inglezes i metido en prezo en el kampo de Mazra’a (serka de Ako). En 1942, despues ke Stern fue matado por un zabit ingles una vez aferrado, Shamir i su kompanyero Eliahu Giladi reushen una noche de fuir del kampo.
Shamir, kon Giladi i tambyen dos otros kompanyeros, Anshell Shpillman i Yehoshua Cohen, se okupan de reorganizar el movimyento muy aflakado por los Inglezes i kon la muerte de Stern. Malorozamente, un anyo mas despues, en 1943, Shamir va ordenar de matar a Giladi, estimado demaziya sekanozo: Giladi kyere matar a Ben Gurion, i tambyen empushar los Inglezes a matar munchos djudyos para apesgar el odyo de los Inglezes en la povlasyon djudiya. I Shamir no topa otra manera de azer para impedir a Giladi de azerlo ke tomarle su vida…
Al kavo de 1943, tres ombres, tres polakos venidos del Betar, toman el komandamyento del grupo: Nathan Yalin Mor, responsavle politiko, Yitzhak Shamir, responsavle de las operasyones, i Israel Eldad, responsavle de la propaganda. Nathan Yalin Mor mereseriya a el solo una entera emisyon: este ombre, ke aprovo de topar un akodro kon los nazis para arrekojer a los djudyos almanes, ke aprovo un akodro kon los rusos para lavorar kontra los Inglezes, ke fue un kapo del grupo Stern, ke no eran anjeles, va eskapar por azer parte de la syedra partezana de un akodro kon los arabos, i por aunarse kon el famozo pasifisto Uri Avneri. En kuanto a Israël Eldad, a la kontra, va kedar asta su muerte, en 1996, a la edad de 86, no solo partezano del Israel lo mas grande posivle, kon la Cisjordaniya, Gaza i el Golan, ama tambyen de fraguar de muevo el Treser Templo….
Ama dainda no estamos en esto. Estamos en 1943, i para los tres kapos del Lehi, el enemigo es Ingletyerra, afillu si lucha kontra los Almanes, komo enemiga por modo del treser Livro Blanko, el del 17 de mayo 1939, ke no va trokar kon la gerra, i ke va kaji serrar la entrada de Palestina a los desmazalados djudyos fuyendo los Almanes. Livro Blanko ande esta eskrito: «El Governo de su Majestad deklara oy sin dopyo senso ke no es en dinguna manera en sus intensyones de transformar la Palestina en un estado djudyo».
Kale akodrar el batireo del vapor Struma, el 24 de fevrero 1942, ande se muryeron 768 djudyos fuyendo la gerra, ke los Turkos no desharon entrar en Turkiya i los Inglezes no desharon entrar en Palestina. Los responsavles Inglezes eran Sir Harold MacMichael, Governador de Palestina, i ensima de el Lord Moyne, Ministro de las Kolonias. Nunka los djudyos del Lehi pedronaron a Moyne i a MacMichael.
Poko despues de esta trajediya, i en tyempo de tantas otras ke aharvan el puevlo djudyo, Lord Moyne vyene dizir el 9 de djunyo 1942, en un diskorso en la Kamara de los Lords, ke los djudyos no son los desendyentes de los Ebreos, i ke no tyenen dinguna «revendikasyon lejitima» sovre la Tyerra Santa.
En 1944 Lord Moyne es el reprezentante de Ingletyerra en Ayfton, lo ke aze de el el kapo de los Inglezes en el Medyo oryente. Esta razon es bastante para los kapos del Lehi de aharvar Ingletyerra a la kavesa.
La desizyon es tomada en 1944 de matar a Lord Moyne, i es Yitzhak Shamir ke es kargado de organizar la koza. Lo konto despues i se puede meldar (en ingles) sovre internet en el sityo del Times of Israel:
http://www.timesofisrael.com/yitzhak-shamir-why-we-killed-lord-moyne/
Dos ombres del Lehi van a matar a Lord Moyne el 6 de novyembre 1944, i, aferrados i djuzgados, seran enforkados el 22 de marso 1945.
En djulyo 1946, malgrado su travestimyento en haham, Shamir es rekonosido por modo de sus godras sejas (un poko komo las miyas), por un militar ingles yamado Martin, aferrado, i embiyado en un kampo de Eritrea, en Afrika. (Martin va ser matado por los ombres del Lehi dos mezes despues, en septyembre 1946).
En kuanto a Shamir, el kon kuatro myembros del Irgun, en janvier de 1947, kavakan un tunel de unos 60 metros. Se eskonden tres diyas en un kamyon de benzina, i ansina se azen yevar en la Somaliya franseza ande son topados i yene aferrados, ama esta vez por los fransezes, ke dan a Shamir el derecho de azilyo en Fransya. Despues de la Independensya de Israel, i kon un falso pasaporte embiyado por el Lehi, abolta en Israel.
De muevo se forma el «sentro» de los tres ombres Shamir, Yalin Mor i Eldad, i son eyos ke van a azer matar en septyembre 1948 el reprezentante de la ONU en el Medyo Oryente, el konde Folke Bernadotte. Deke? Porke, asigun eyos, sus propozisyones de paz eran desgrasyadas, sin tener kuenta ke el Governo de Israel, kijo dizir los ombres de Ben Gurion, ya teniyan refuzado estas propozisyones el diya antes.
Despues de esto, el Lehi dezaparesyo, sus askeres entrando en Tsahal. Los kapos politikos fundan un partido dicho de los luchadores, ke obtyene un solo sityo, el de Nathan Yalin Mor, a la Knesset en las eleksyones de janvier 1949.
El mueve partido tyene su primer i uniko kongreso en marso 1949, ama se patladea poko despues, Los unos kon Eldad de derecha ekstrema, otros de sentro komo Shamir i Yalin Mor, otros de syedra pro-sovyetika.
Unos kuantos anyos Shamir lavora en varyos echos komersyales, asta ke, entre 1955 i 1965, entre en el Mossad, manera de empesar de muevo kon la klandestinidad.
En el Mossad el es, yamado «el dervish», ke komanda la Operasyon dicha Damocles. Kualo es esta Operasyon? Israel se ambeza en 1962 ke Nasser izo venir en Ayifton varyos savyos i injenyeres almanes ke lavoran komo nazis a la fragua de 900 misiles balistikos, i ke los Ejipsyanos tyenen la idea de embiyar estos misiles sovre Israel, kon materya radyoaktiva o kimika. El patron del Mossad Isser Harel karga Shamir de azer todo lo ke kale para eskapar kon esta menasa de muerte.
Ya vos dishe ke el padre de Shamir era siguro ke su ijo lo vengariya. Shamir organizo los atentados kontra kada uno de estos savyos i injenyeres, todos nazis. Lo mas kuryozo es ke unos de los ombres ke van a lavorar para el Mossad fue el famozo SS Otto Skorzeny, el ke teniya liberado kon su komando a Mussolini en 1943, i ke lavorava kon otros nazis para Nasser. El Mossad reusho a trokarlo de vanda i a azerlo lavorar para…Israel, al punto, a lo ke parese, de matar el mismo a Heinz Krug, uno de estos savyos
Dos ombres del Mossad fueron aferrados en Suisa, por tener menasado a la ija de unos de estos savyos, i la Operasyon Damocles se supo mas o menos, ovligando Ben Gurion, para guadrar sus buenas relasyones kon los Almanes, de dar el orden al Mossad de kedar kon la Operasyon. Isser Harel se vido ovligado de travarse, i vyendo esto, Shamir, i otros kon el, se travaron eyos tambyen por solidaridad kon Isser Harel.
Yene las menasas de una parte, las diplomatikas de otra parte, van a azer ke los savyos nazis van a irse de Ayfton al kavo de 1963, i Nasser no va pueder echar sus misiles sovre Israel.
En 1969, Shamir entra en el partido Herut de Menahem Begin, venido del Irgun. En 1973, es elijido komo deputado del Likud a la Knesset, i se va mismo topar prezidente de la Knesset en 1977, de tal manera ke el sera ke akojera a Sadat el diya de su famoza vijita a la Knesset, ke dinguno se olvido.
Ama kuando despues va tener de votar sovre los akodros de Camp David i el tratado de paz kon Ayifton, se va abstener.
Yene Shamir va ser ministro de los echos ajenos en 1980 en el governo de Menahem Begin, i komo tal, el es ke va negosyar kon Ayfton, en 1981 i 1982, la normalizasyon de las relasyones entre Israel i Ayfton.
De la misma manera, el es ke va dirijir las negosyasyones kon Levanon, despues de la gerra de 1082, asta el akodro de paz del 17 de mayo 1983 ke va ser votado por el parlamento libanes, ama el governo libanes, empushado por los siryanos, lo va baldar el 5 marso 1984.
El 10 de oktovre 1983, despues del retiro de Menahem Begin, Shamir vyene a ser el mismo Primo Ministro de Israel, i lo va kedar onze mezes, asta el 13 de septyembre 1984, ande, despues de las eleksyones, vyene un governo de unyon nasyonala, kon Shimon Peres primo ministro. Shamir es d’akodro para ser primo ministro del mismo governo dos anyos mas tadre, lo ke va ser en oktovre 1986.
En las eleksyones de 1988, el governo es mantenido i Shamir keda primo ministro. En 1990, los travayistos de Peres se van del governo, i Shamir se va ansina kedar primo ministro asta el 13 de djulyo 1992.
Veo ke no vo pueder eskapar kon la vida tan rika de Shamir en una sola emisyon, i vos diré el kusur al djueves ke vyene, si kyere el Dyo!
Edmond Cohen
Paris Fransya
