eSefarad Noticias del Mundo Sefaradi
Keridos amigos, vos do el teksto de la proksima emisyon del programa.
El program se puede sintir por Internet kada djueves, indo al sityo RADIO – la fréquence juive . Kale tener pasensya i asperar un poko, no se oye pishin.
Saludos a todos
Edmond Cohen – Paris, Fransya
UN REYNO DJUDYO ANDE LOS KURDOS
Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Komo a kada vez, vos akodro ke el proksimo atelye de konversasyon de la asosyasyon Vidas Largas se tendra el djueves ke vyene 16 de desyembre, de las dos a las kuatro i medya-sinko, en el Centre Communautaire, 119 rue Lafayette Paris (10°) métro Gare du Nord o Poissonnière.
El djueves pasado, no pude eskapar, por modo de los haberes negros de los fuegos en Israel, barminan, la meldadura del artikolo ke aviya travado de la Gazeta El Amaneser, eskrito por Hernan Fisse, ke mora en Santiago de Chile, i intitulado «Pujados i no aminguados, Djudezmo ambezado kon amor».
Me teniya kedado meldando varyas dichas de su famiya en kaza, en Santiago. Vo kontinuar mi meldadura i aprovar, esta vez, de eskaparla.
«Soylema por modo de la bulema» era el sinyal ke uzavan los grandes para ke las kreaturas no oigan lo ke se avla. «La gaile ke me kedo» para no dar importansia a una koza, si indimas no vale nada, «aznedad en trushi» o «guevos de rana». Para el ke se atavano, «fuyido de la kuedra» o «charpeado de la kavesa». El ke te aze danyo es «lodo kon kanyo» o un «mazalbasho». Mesklarse en kada koza, «alfinete ke en todo se mete». Si indemas se ve ke no aze dingun provecho a los otros, es «arvole sin solombra». Los kazalinos de Chile dizen: «es un puerko ke no da manteka».
Otra paranteza de mi, Edmond Cohen : avlando de la SDN, Albert Cohen diziya: «une ruche qui bourdonne, mais ne donne pas de miel» (un bizbar ke aze ruido, ama ke no da myel). I agora abolto a Hernan Fisse:
Keres tener los dientes alimpiados? «Mashka almastiga de la Isla de Kio ». Kieres ke el musafir pesgado se vayga de kaza? « Mete detras de la puerta de kaye una eskova de ariva abasho». Rompites una koza i te se izo sinizas? Kale dizir «kapara» (en los lehlis es akapure) i en turko, «geshmish olsun».
Una paranteza de mi, Edmond Cohen, medyo lehli : kapure, por siguro, es el mismo byervo ebreo kapara, ama asigun mi no kon el mismo sentido ke para los sefaradim. Seriya mas lo ke mozotros yamamos un kilipur… Agora kontinuo kon Hernan Fisse:
Si vites ke alguno estreno kostumes muevos, se le da un «kon salud» o «muncho i bueno ke te merkes». Kuando te meten mala kara porke te dio un sarnudo, dizes «no t’espantes, solo es abashada».
No te soflames si te keren vender una koza ke no te plaze, le azes esta kestion: «a ken te parese ke estas enkashando esta bamya?» Entrates a kaza i demandas kualo ay de komer, la repuesta puede ser: «la de Hananel en papel». Agora me va «tomar un keyf» i en otro artikolo kontinuaremos. «Asi biva yo». «Vidas largas i mazal bueno para todo».
Ansina s’eskapa este muy savrozo artikolo de Hernan Fisse. Savrozo porke ansina era la avla tambyen en mi kaza. No la misma, teniyamos otras ekspresyones i ay unas kuantas ke no entendi muy byen, ama esta savrozor de avla me izo akodrar komo se avlavan mi padre kon su ermano, i las rizas ke se tomavan…
Sovre estas rizas de djente ke no son mas se deviya eskapar mi emisyon de djueves pasado, i malorozamente los fuegos de Israel izyeron kortar mi emisyon mas presto ke previsto.
I de kualo avlarvos oy? Aviya pensado avlarvos de la istorya de los djudyos de Bayonne, i kon bueno lo azere, ama mi amigo Renaud Souhami, si, Renaud Souhami, no puede ser a kada vez Jose Molho, Renaud tambyen me puede dar una idea, Renaud Souhami, dunke, me ambezo la istorya ke yo no konosiya del todo del rey Izates i de su konversyon al djudaismo, esta istorya me tresalyo, i tuve la gana de azer una emisyon sovre un reyno djudyo ke no fue el de los Khazares, del kual ya vos avli. Esta vez vos kyero avlar de un otro reyno ke egzistyo antes de los Khazares, no tan leshos de la Khazariya.
Esta istorya esta kontada en el livro de Flavius Joseph intitulado Istorya antigua de los Djudyos, livro 20, kapitulo 2. Empesa verso el anyo 2 despues del Kristo (el kual , avro la paranteza, seriya nasido, asigun lo ke se dize oy, verso el anyo 4 antes… del Kristo, syerro la paranteza) kon el nasimyento de un bebiko yamado Izates en el palasyo del rey Monobazos, su padre, i Elena, su madre, ke seriya, asigun Flavius Joseph, a la vez la mujer i la ermana de Monobazos. Mujer i ermana a la vez, aze pensar a la mitolojiya tan de los ejipsyanos (Isis i Osiris) ke de los gregos (Zeus i Hera). Monobazos era rey de un pais ke se yamava Adiabene, entre la Azia Minor, ke ya era de los Romanos, al norte, i del reyno Partho, ke eran persos, al sur. Para saver ande se topava el reyno de Adiabene a su empesijo , kale tomar una karta del Irak de oy, i mirar al norte, ande estan oy los Kurdos . No leshos de Mossul se topa una rejyon entre dos afluentes del Tigre, el grande Zab i el chiko Zab, kon una sivdad yamada oy Erbil, al tyempo Arbeles, ke era la kapitala del reyno de Adiabene, ke aya se topava.
Izates no es el bohor. Tyene un ermano bohor de la misma madre, ke se yama Monobazos komo su padre, dunke Monobazos II. I komo Monobazos I tenya otras mujeres ke Elena, tyene otros ermanos por estas mujeres. Halbuki, el rey Monobazos I prefyere a Izates sovre todos sus otros ijos, i por siguro esto puede dar selo a los otros ermanos. Estamos un poko en la istorya de Yosef i de sus ermanos. Para protejarlo de sus ermanos, el rey Monobazos embiya a su ijo Izates en un otro reyno, el reyno de Spasines, ke tyene por rey un syerto Abennerigos, ke toma Izates en tan grande amistad ke le da por mujer a su ija Symacho.
I Flavius Josef mos konta ke, vyendose vyejo, el rey Monobazos yamo a su ijo Izates para verlo una ultima vez, i le dyo una provinsya yamada Ceron, ande se puede ver dainda oy, mos dize Flavius Josef, lo ke keda de la Arka de Noah, kijo dizir el monte Ararat, ke es oy en Turkiya, en la parte ermeniya de la Turkiya. Izates se fue aya asta la muerte de su padre. La reina Elena su madre lo izo elejir por los grandes del pais komo rey despues de su padre.
Mos pudiyamos demandar deke Flavius Josef mos konta esto todo. Ke mos sale a mozotros la istorya de este reyno tan leshos de la Judea de este tyempo, okupada, ya lo savesh, por los Romanos.I agora lo vamos a entender. Del tyempo ande Izates morava en el palasyo de Spasines, un merkader djudyo yamado Ananias ambezo a unas kuantas damas de la korte la konosensya del haliz Dyo, i grasyas a estas damas, pudo ver a Izates i ambezarlo a el tambyen en la relijyon djudiya. En el mismo tyempo, un otro djudyo, Flavius Josef no dize el kual, konvinsyo a la reyna Elena, madre de Izates, eya tambyen de azerse djudiya. De tal manera ke, kuando Izates abolto a su pais para tomar el poder a la muerte de su padre, dechizo el tambyen de azerse djudyo, i por esto de azer mila.
Ama su madre s’espanto ke si su povlasyon se ambezava de esto, lo iva echar ahuera, i Ananias el tambyen, por las mismas razones, lo konvinsyo de no azer mila. Izates acheto, ama despues vino de Galil otro djudyo yamado Eleazar, ke vino dizir a Izates ke si se diziya djudyo, era ovligado de azer mila. I esta vez, nada ni dinguno pudo azer trokar de idea a Izates, se fue a su kamareta, yamo a un mediko, i pishin se izo mila. Kuando se lo ambezaron, Elana i Ananias se espantaron muncho, ama vyendo ke esto no troko al poder de Izates sovre su povlasyon, se trankilizaron, al punto ke Elena dechizo de irse al Bet Amikdash (el Templo) en Yerushalaïm.
Kuando Elena ayega a Yerushalaïm, se apersive ke la djente esta muryendo de ambre en Djudea. Pishin embiya djente para merkar trigo en Alexandria, i igos sekos en la isla de Chypre, para dar a komer a los proves. I Izates, su ijo, ambezado de esta ambre, embiya el tambyen munchas paras a los grandes de la sivdad para espartir a los proves. No es menester de dizir ke esto rendyo muy populares en Yerushalaïm tanto la madre ke su ijo.
Entremyentres, el rey de los Parthes, ke se yamava Artaban, muy konosido de los fransezes por su orguyo, kon la ekspresyon fier comme Artaban, orguyozo komo Artaban, teniya dertes grandes kon los suyos, i vino a demandar konsejos i ayudo a Izates, ke le izo grandes onores, i se mesklo de sus echos, se entremetyo, i tanto izo ke Artaban pudo grasyas a Izates tomar atras su korona ke ya aviya sido dada a un otro. I Flavius Josef mos konta ke Artaban fue tan agradesyente a Izates de tener su trono grasyas a el, ke le dyo la provinsya de Nisibes, ke aviya pertenesido al rey de Armenia, i ande se topava la sivdad de Antioche.
De su lado, Monobazos II, el ermano bohor de Izates, dechizo el tambyen de azerse djudyo komo su ermano, i kuando lo supyeron, los grandes del pais se arravyaron, al punto ke eskrivyeron a Abia, rey de los Arabos, para ke aga la gerra kontra Izates. Lo izo, ama no reusho, peryo la gerra, se mato, i los grandes del pais ke aviyan traisado a Izates fueron byen kastigados. Ama el kastigo no abasto, i yene demandaron a Vologese, rey de los Parthes muncho despues de la muerte de Artaban su padre, de azer el tambyen la gerra a Izates. Vologese vino para gerrear kontra Izates, ke rogo al Dyo de ayudarlo, i el Dyo lo ayudo, mos konta Flavius Josef : Vologese se ambezo ke, en el tyempo ande se fue para gerrear, sus enemigos entraron en su pais, kemando todo. I pishin Vologese se tuvo de deshar la gerra kontra Izates para aboltar a su pais i luchar kontra sus halizes enemigos.
Poko tyempo despues, a la edad de 55 anyos i despues de 24 anyos de reyno, el rey Izates se muryo, dunke verso el anyo 57 despues del Kristo.
Es su ermano Monobazos II ke tomo el reyno , i poko tyempo despues, la reyna Elena, madre tan de Izates ke de Monobazos II, se muryo eya tambyen. Ama antes savemos por Flavius Josef ke Monobazos II i su madre Elana no solo bivyeron en Yerushalaïm un syerto tyempo, ama mismo fraguaron kada uno un palasyo en la sivdad. I ay kaji tres anyos djusto, el 6 de desyembre 2007, los arkeologos israelyanos dirijidos por Doron ben Ami toparon unas ruinas en Yerushalaïm kon munchas kozas ke les azen pensar ke fue el palasyo de la reyna Elena de Adiabene.
En kuanto a la muerte de Elena, kale ke sepaj ke ay, al norte de Yerushalaïm, un monumento, yamado Tomba de los Reyes, ke es konsiderado komo syendo en vedra la tomba de Elena, i ke los ermanos Pereire merkaron en 1878 i lo ofresyeron a la Fransya « para konservarlo a la syensya i a la venerasyon de los fieles ijos de Israel ». De fakto, el derecho osmanli no konosyendo las personas moralas, lo ofresyeron al Consul jeneral de Fransya en Yerushalaïm. Lo ke es siguro, es ke de este tyempo la tomba, afillu si se topa en Israel, pertenese a la Fransya.
Kale saver tambyen ke antes de esto, en 1863, los fransezes dirijidos por Ferdinand de Saulcy, toparon adyentro de la tomba un sarkofaj kon la inskripsyon Tsada Malhata (Sada reyna). Se pensa ke es el de la reyna. Fue embiyado al muzeo del Louvre, ama si vos vash oy al Muzeo del Louvre para verlo, no lo toparash. Deke ? Porke la Fransya, a traves el Ministro de la Cultura Frederic Mitterrand, , desde el 21 de septyembre de este anyo 2010 i por kuatro mezes, lo empresto al Muzeo de Israel en Yerushalaïm, ande se topa en estos diyas.
Ishalla kon bueno, en fevrero 2011 me ire al Muzeo del Louvre para ver este sarkofaj ke nunka teniya visto asta agora.
Esto dicho, mi istorya no se eskapa kon la muerte de Izates i su madre. Porke vos akodro ke esta muerte se pasa en los anyos 58, dunke solo unos ocho anyos antes de la Rebuelta de los Djudyos, ke empeso en 66 i se eskapo en 70 (salvo en Masada, ke kayo en 73). Halbuki, savemos por Flavius Josef ke Monobazos II i los ijos de Izates, ke eyos tambyen se izyeron djudyos, partisiparon a la rebuelta i lucharon desdel empesijo astal kavo al lado de los Djudyos de Yerushalaïm kontra los Romanos.
En su livro La Gerra de los Djudyos,livro sigundo, kapitulo 37, Flavius Josef mos konta komo empeso la lucha en 66 i eskrive ke Monobazos i Kenedeos, de la famiya de Monobazos, rey de Adiabene, se senyalaron de la vanda de los djudyos.
I al kavo, kuando Flavius Josef mos konta los ultimos momentos de Yerushalaïm, en 70, livro sejen, kapitulo 36, mos konta ke « los ijos i ermanos del rey Izates…arrogaron a Titus de achetar ke se rendan a el », ke Titus acheto, los izo prezoneros i los embiyo a Roma komo prezoneros.
Esta vez, era el kavo del reyno de Adiabene ke kayo basho la dominasyon de los Romanos ke no eran leshos al norte.
Me kedava de dizirvos le ay unos ezoteristos asigun los kuales Elena era Maria Magdalena. No kyero azervos pedrer tyempo kon tales bavajadas ; si algunos se interesan a esto, ke bushken sovre internet, aya lo toparan.
Ansina s’eskapa esta istorya ke mos aze un poko pensar a la istorya de los reyes Khazares, eyos tambyen konvertidos al djudaismo, lo ke no kyere dizir ke todos los khazares eran djudyos, syendo ke los reyes Khazares, si eyos eran djudyos, deshavan kada uno kon la relijyon ke keriya. La diferensya es ke la Khazariya sureo un siglo i medyo de los 800 asta 965, kuando fue konkistada por los rusos. Ke se izyeron despues los djudyos khazares? Es una kestyon sovre la kuala ya avli kuando ize mi emisyon sovre eyos el 3 de septyembre 2009.
Vos akodro tambyen, a propozito de reyes konvertidos al djudaismo, ke el Yemen tuvo en 525, del tyempo en Fransya de Clotaire, ijo de Clovis, un rey konvertido al djudaismo yamado Yosef Dhu Nuwas. Su reyno no sureo muncho i se eskapo trajikamente.
Puede ser uvo en otro lugar i en otro tyempo otros reyes djudyos, esto no se, ama me parese ke mismo si uvo solo estos tres reynos, es interesante de akodrarselo, porke poka djente lo save.
Kon esto me vo kedar, i vos digo al djueves proksimo, si kyere el Dyo!
