eSefarad Noticias del Mundo Sefaradi
Keridos amigos, aki toparash el teksto de la emisyon de esta semanada.
Akavido los ke me oyen sovre internet desde paizes ajenos ke aki en Fransya entrimos el alhad pasado en la ora de invyerno, i atrazimos muestras oras de una ora
El program se puede sintir por Internet kada djueves, indo al sityo RADIO – la fréquence juive. Kale tener pasensya i asperar un poko, no se oye pishin.
Saludos a todos
Edmond Cohen
Paris, Fransya
UN ANYO DE RADYO 2011
Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Komo a kada vez, vos akodro ke el proksimo atelye de konversasyon de la Asosyasyon Vidas Largas se tendra en 2012, el martes 3 de janvier, de las dos i medya asta las sinko, al muevo adereso del 17 rue Pierre Semard Paris (9°), arriva del Square Montholon, métro Cadet. La entrada es la del lokal i no la del han.
El anyo 2011 ya mos s’esta eskapando, i komo a mi uzo desde unos kuantos anyos, vino el tyempo de akodrarmos en djuntos de las emisyones ke vos ize durante el anyo 2011. En jeneral vos ago esta emisyon al empesijo del muevo anyo, una vez eskapado el anyo de las emisyones, ama esta vez tuve de trokar , porke mi proksima emisyon, la primera de 2012, vos tendre de avlar de una koza ke no puede asperar, la manifestsyon del Sentro Cultural Djudeo espanyol – Al syete, ke se va tener el alhad 22 de janvier en la Mayoriya del onzen arrondissement de Paris. Es una manifestasyon importante, ke deve de arrekojer sino a todos, a lo manko a syenes de los djudeo-espanyoles de Paris, i de esto vos avlaré el djueves ke vyene.
Dunke es oy ke mos vamos a akodrar de las 36 emisyones del anyo 2011. Deke 36 i no 52 ? En primero porke uvo un djueves, el 3 de fevrero, ande estuve hazino, en sigundo porke un otro djueves, el 5 de mayo, Radio J teniya menester de mi tyempo de avla. De otro parte, no uvo emisyon el 9 de junyo por modo de Shavuot, i despues uvo las vakansas del 30 de junyo astal 1 de septyembre, lo ke mos aze 10 djueves ande pasaron redifuzyones. Despues uvo tres djueves sin emisyon por modo de las fyestas, el 29 de septyembre por modo de Rosh Ashana, el 13 de oktovre por modo de Sukot, i el 20 de oktovre por modo de Shemini Atseret. Esto todo mos aze 16 djueves sin emisyones. De 52, kedan 36 emisyones inkluyendo la de oy.
Los ke son interesados de topar el teksto de mis emisyones pasadas de las kualas vos vo avlar agora las podra topar ( salvo tres que fueron improvizadas porke resiviya djente) sovre el sityo Ladinokomunita, ama kale ser myembro (la inskripsyon es de baldes) . Una vez en el sityo, kale ir sovre Files, i aya sovre Edmond Cohen. Mis emisyones se topan tambyen en mayoriya sovre el sityo eSefarad.com, aya no es menester de ser myembro. Kale meter mi nombre i clikar sovre Go. Ay tambyen unas kuantas de mis emisyones sovre sefarad.org. Kale bushkar djudeo-espanyol, i aya las emisyones de Edmond Cohen.
Kale dizir ke de vez en kuando, indome sovre sityos djudyos de Amerika del Sur, tengo la sorpreza muy agradavle de ver syertos de mis tekstos. Ansina es internet.
Esto dicho, la primera de mis emisyones de 2011 fue, komo oy, sovre las 34 emisyones ke ize en 2010.
El djueves de despues vos avli de las jenerasyones de hahamim ( tanaïm, amoraïm, géonim, para sitar solo unos egzemplos). Tenemos tantos grandes hahamim de todas epokas ke era menester de klasifyarlos un poko.
El djueves de despues kaiya el 20 de janvier, una semana antes del diya mundyal del olokosto, el 27 de este mismo mes. Tomi estos dos djueves para meldarvos los rekodros de muestro amigo Sabi Soulam, ke tuvo su padre i despues su madre aferrados delantre de el (ke reusho a fuir kon su ermanika) i deportados. Su madre pudo aboltar biva de Auschwitz, i vyendo a su ijo s’esmayo. En estas dos mismas emisyones, meldi tambyen una lettra eskrita de Drancy el 8 de agosto 1942 por un syerto Nisim de Toledo a su mujer Rica, sivdadinos espanyoles ke no fueron salvados, ni el ni su mujer aferrada i deportada eya tambyen un poko despues.
Eskapi mi emisyon del 27 avlando de lo ke izo i no izo la Suisa en estas oras pretas.
El djueves 10 de fevrero avli de los djudyos de Crimea, ke avlavan una lingua muy partikolar, el djudeo-tatar o krimshak, una lingua muy serka del turko. Dezaparesyeron del tyempo de la gerra, asasinados kaji todos por los Almanes, i los muy pokos ke kedaron se fuyeron en Israel.
El djueves de despues, avli de nominasyon i de Bat Mitsva, estas fyestas de ijikas ke son el pendyente de la mila i de la bar mitsva para los ijikos. I despues eskapi mi emisyon meldando una konsejika de Rivka Abiry, ke travi de la gazeta El Amanaser, intitolada El Tostador.
El djueves de despues, avli de muevo de la nominasyon, ke yami esta vez el nombramyento, porke me vinyeron informasyones sovre la noche antes, yamada la viola. Despues, en la misma emisyon, kanti la Hatikva kon las palavras en muestra lingua , las unas ke me dyo Sabi Soulam, i las otras ke me dyo el Profesor Haïm-Vidal Sephiha. Kanti las dos versyones, ke eran diferentes. I eskapi mi emisyon avlando de la muy triste istorya de los Djudyos de la isla de Rhodes, ke fueron kaji todos aferrados el mismo diya, el diya preto del 19 de julyo 1944.Kaji todos, ama no todos : los sivdadinos turkos fueron salvados grasyas a la aksyon korajoza del Consul de Turkiya, Selahattin Ülkumen, unos kuantos diyas antes ke la Turkiya rome sus relasyones diplomatikas kon l’Almanya.
Los dos djueves de despues, vos avli de dos Albert Cohen, nasidos kaji en mismo tyempo, el uno en Estambol en 1897, fue mi padre, el otro en Corfu en 1895, fue el famozo eskrivano.
El djueves de despues, ize una emisyon kon la kantadera Rosy Morali, ke mos kanto kon su boz de soprano varyos kantos djudeo-espanyoles.
El djueves de despues, vos meldi una poeziya de Haïm Vidal Sephiha intitolada Aguas/Vidas, i aprovi de azervos su komentaryo. Una poeziya ande el poeta kompara el korso de la vida, las vidas en ladino, kon el korso de las aguas, ke en vezes se azen chorros de sangre – i ke se izyeron para el, en Auschwitz, de ande reusho de sovresalirse.
El djueves de despues, vos konti estos 10 mezes ke van del 11 de novyembre 1942 al 10 de septyembre 1943, diez mezes ke fueron los de la okupasyon italyana en el sur-este de la Fransya . I vos akodri un fakto istoriko, es ke durante estos 10 mezes, no solo los italyanos no tokaron a djudyos, ama al kontraryo los protejaron kontra la polisiya franseza ke izo munchos esfuersos para aferrarlos i darlos a los Almanes.
El djueves de despues, avli de la politika de Mussolini verso los djudyos en Italya, i komo eskapo, kuando fue en las manos de los Almanes, no solo por aferrarlos, lo ke ya aziya de antes, ama tambyen de darlos a los Almanes.
El djueves despues, 14 de avril, kaiya pokos diyas antes de Pesah, i kije azer una emisyon sovre lo ke dizen los istoryanos i los arkeologos, en jeneral muy shupelis, sovre lo ke mos esta kontado en el livro de Shemot.
El djueves despues, avli del Omer entre Pesah i Shavuot, i dishe unas kuantas kozikas sovre la fyesta de Lag Baomer, ke korta el medyo luto del Omer.
El djueves de despues, meldi dos konsejikas de Rivka Abiry, la primera, intitolada Afikoman, la travi del sityo eSefarad.com ; i la sigunda, intitolada El Timbre, la travi de la gazeta El Amaneser.
El djueves de despues ize una emisyon intitolada Kozas i otras del Tanah. Aya avli de un pasuk terrivle del profeta Tsefenya, el pasuk 15 del primer kapitulo, ande se topan los byervos dies irae, titolo de un filmo, yom shoa, titolo de otro filmo, eskuridad i nuvle, titolo de un treser filmo. Este pasuk es tan fuerte ke inspiro los titolos de tres filmos.
Despues, en esta misma emisyon, avli de Avraham resivyendo los tres ombres pasando delantre de su tyenda, i ke en vedra son anjeles embiyados para anunsyarle ke iva tener un ijo de Sara . El pasuk 3 del kapitulo 18 de Bereshit es yeno de kestyones interessantes, de las kuales avli en mi emisyon, aprovando de dar syertas repuestas.
El djueves despues, meldi varyos artikolos i konsejikas travadas del Amaneser, una konsejika de Israel Benyakar intitolada Djente d’Anderne ; un artikolo de Aslan Palachi intitolado La Kaza del Dyo, sovre los djudyos de Albaniya durante la gerra ; una shaka de Rosy Hemmo, intitolada Kavayos, un artikolo de Gad Nassi sovre La savidurya del Rabino Hillel ; i del mismo Gad Nassi, una shaka :Djoha i el kochero.
El djueves de despues, meldi un komentaryo de muestro amigo José Poveda sovre la perasha Haazinu, ke avla del kastigo de Israel por sus pekados, i despues di mi propyo komentaryo sovre el komentaryo de Poveda.
El djueves de despues, arresivi a Mireille Valero ke vino a kantar varyas kantikas djudeo-espanyolas, akompanyada a la gitara.
I el djueves despues de Shavuot, ize una emisyon sovre mis rekodros de mi vida de avokato, lo ke fui durante 45 anyos.
I el djueves de despues, ke era el del 23 de junyo, el ultimo antes de las vakansas, meldi dos kuentos del Meam Loez, travados del komentaryo de Ruth por el Haham Rafael Isaac Meir Benveniste. El primer kuento es el de la rana i del raton, el sigundo es el de la persona buena i el haham.
I me fui en vakansas. Kuando abolti, el djueves 8 de septyembre, ize una emisyon sovre el terrorismo kontra los djudyos en el mundo (Paris, Djerba, Estambol, Buenos Aires, Casablanca, Bombay, ets) todos atentados kometidos por muzulmanos kontra djudyos ke no teniyan nada de ver kon el Estado de Israel. Eran atentados de puro antisemitismo. Ya estamos kansados ke mos digan syempre ke no kalé konfundir antisemitismo i antisyonismo. Una vez por todas, kale akodrar a la djente ke el antisyonismo i el antisemitismo son una sola i misma koza, syendo ke el antisyonismo es la opinyon politika asigun la kuala todos los puevlos tyenen derecho a un estado i una tyerra, salvo los djudyos.
A la roves, el djueves de despues, avli de polakos salvadores de djudyos durante la gerra, i entre eyos sovre todo de la famoza Irena Sendler, ke salvo unas 2.500 kriaturas djudiyas, salyendolas del Ghetto de Varsovia, i ke fue aferrada por la Gestapo i torturada asta ke kede enferma el kusur de su vida, ke se eskapo aze poko. Avli tambyen de dos otros polakos, Jan Zabinski i Wladislaw Kowalski, ama antes konti sovre un italyano, el korredor de velo Gino Bartali, i un alman, Ernst Leitz, el patron de la firma Leica.
El djueves de despues, 22 de septyembre, aserkandomos de Rosh Ashana, meldi un artikolo de Moshe Shemuel Palacci, travado de la gazeta El Amaneser i intitolado Tizku leshanim Rabot, konsagrado al shofar.
El djueves de despues de Rosh Ashana, ize mi emisyon sovre los veluntaryos ajenos vinidos en Erets Israel durante la gerra de Independensya. Todos no eran djudyos. Entre los veluntaryos kristyanos el mas famozo era un franses, Thadée Diffre, ke kombatyo en la Hagana kon el nombre de Teddy Eytan. Konti su istorya.
El djueves despues de la semana de Sukot, avli de los djudyos de Libiya, o por ser mas presizo de lo ke fueron los djudyos de Libiya, syendo ke agora no ay mas ni un djudyo en Libiya, i ke kuando un djudiyo echado de Libiya por Khadafi , kijo aboltar estos diyas en Libiya para orar en el kal en ruina de Tripoli, fue echado afuera kon una punta de pye por los Libyanos.
El djueves de despues , meldi varyos reflanes djudeo-espanyoles travados de un livro de Matilda Koen Sarrano.
El djueves de despues arresivi a la radyo a Selim i Eliz Gatenyo, dos djudyos venidos d’Estambol en Paris, i ke yo konosiya solo por internet. Tuvimos una konversasyon sovre la situasyon de los djudyos de Turkiya en estos tyempos de agora. A mi esta konversasyon me paresyo interesante, afillu si me di kuento despues ke aviya tomado demaziya la palavra, no deshandolos avlar bastante. Ansina es kuando es un avokato ke tyene el mikro…
I el djueves de despues, ize una emisyon sovre un haham yamado Yehuda Alkalay, un haham nasido en Serajevo (Bosniya) en 1798, i ke tyene la partikularidad de tener eskrito en muestra lingua en 1840 el primer livro syonisto en el mundo, asigun munchos istoryanos. 56 anyos antes del livro de Theodor Herzl, Der Judenstaat.
Despues, en dos emisyones, aprovi de kontar la muy larga istorya de Yerushalayim, del empesijo asta oy.
I el djueves de despues, ize una meldadura de un pedaso del Meam Loez, un komentaryo de Bereshit por Yaakov Huli, travado de lo ke Yosef, salido de prezo para ir delantre del Paro, empeso por araparse i trokar de vestidos antes de venir delantre del Paro. De esto Huli, komo los otros hahamim antes de el , trava ke kuanto mas kale ser limpyo i byen vistido indose al kal, delantre del rey de los reyes.
I el djueves de despues ize mi emisyon sovre la istorya de la OSE, esta organizasyon nasida en Rusiya aze syen anyos, i ke salvo de la muerte a miles de kriaturas djudiyas de Fransya durante la gerra, eskondyendolas o fiyandolas a kristyanos, o yevandolas en Espanya o sovre todo en Suisa .
Enfin, mi ultima emisyon antes de la de oy fue konsagrada a una fyesta de Hanuka, muy espesyal, la Hanuka fyestada por Natan Sharansky en el Gulag. I despues konti la vida de este Sharansky, komo fue liberado, i komo se fue a morar en Israel ande estuvo munistro en varyos governos.
I kon esto s’eskapa mi emisyon de oy, la ultima de 2011. Antes de desharvos, vos dezeo una anyada buena kon salud i kon vida. Astal djueves ke vyene, en 2012, si kyere el Dyo!
Edmond Cohen
