Muestra lingua: TIZKU LESHANIM RABOT por Edmond Cohen

Keridos amigos, aki toparash el teksto de la emisyon ke ize el 23/6, i ke no vos pude embiyar mas antes, syendo ke mi ordinador era roto. Para azer la emisyon, fue un suspense a la Hitchcock: aviya eskrito mi teksto, ama dainda no lo aviya imprimado kuando se bozdeo mi ordinador myerkoles a la tadre. Enfin vino uno djueves demanyana para enderecharlo, i lo tomo i se fue kon el. Reusho a salir mi teksto de emisyon i imprimarlo. I vino kon moto a mi kaza para traerlo a 15 y 30h. Tuve djusto el tyempo de tomar el metro para toparme a las 16 a la radyo para azer mi emisyon… i  vyernes vino traerme el ordinador reparado, salvo ke todos mis emails se muryeron. Kapara…

El program se puede sintir por Internet kada djueves, indo al sityo RADIO – la fréquence juive. Kale tener pasensya i asperar un poko, no se oye pishin.

Saludos a todos
Edmond Cohen
Paris, Fransya

TIZKU LESHANIM RABOT

Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.

El myerkoles ke vyene, 28 de septyembre, mos vamos a topar en noche de Rosh Ashana, i naturalmente el djueves ke vyene syendo diya de Rosh Ashana, no va aver emisyones i no me oiresh.

Es dunke de oy ke vos dezeo a todos, keridos oyentes, una anyada buena i dulse, kon salud i kon vida.

Yo, si kyere el Dyo, tendre a kaza , de myerkoles asta alhad mis dos ijos, mi ermuera,  mi inyetiziko de kuatro anyos i medyo i mi inyetizika de 20 mezes. Vo djugar al papu al kavo de la meza, i ya me tresalgo de antes solo de pensarlo.

La semana pasada vos dishe ke, no syendo haham, no vos avlariya de Rosh Ashana este anyo. Ama komo es posivle, en tyempo de Rosh Ashana, de no avlar de Rosh Ashana ?

Topi la solusyon kuando meldi en el Amaneser de este mes de septyembre un muy ermozo artikolo eskrito por el Senyor Moshe Shemuel Palacci de Estambol, intitulado Tizku leshanim rabot (meresash para munchos anyos) ande mos avla de Rosh Ashana i del shofar. Ansina es : de vez en kuando, El Amaneser me aze el onor de meter en artikolo para su gazeta syertas de mis emisyones, i esto es lo ke izyeron este mes kon la emisyon ke aviya echo sovre mi padre, i yo, por mi vanda, ago syertas emisyones kon artikolos ke meldo en esta maraviyoza gazeta.

Esto dicho, aboltaremos a Rosh Ashana i al shofar. Vos akodro ke oir el shofar en diya de Rosh Ashana es una Mitsva. Malorozamente, komo la meldadura del artikolo del Senyor Palacci me tomariya mas de los 20 minutos ke tengo, vo ser ovligado de azer unas kuantas kortaduras en su teksto, i vos demando pedron por esto, i indimas demando pedron al senyor Palaccci.

Agora empeso mi meldadura ; desde agora no so mas yo ke avlo, es el senyor Palacci :

Keridos ermanos,

Ya nos topamos aserkados a el tyempo de el djuzgo. Lo asemejo yo a los elevos ke eskaparon el liseo i se estan aparejando a los egzamenes de estudyos altos, de universita. Se topan entre dos sentimyentos : el espanto de no reushir en los egzamenes i la Alegria de pensar ke van a ser elevos para ayegar a un nivelo alto. Ansi es la epoka ke mos topamos. El mes de Elul lo yaman los savyos hodesh rahamim, mez de piadades. Anyo entero bivimos sigun asopla el ayre. Komo toda persona, desviamos de kamino i entramos en kalejas mas truvyadas. Bivimos a la savor de muestro paradar. Non pensamos muncho en el korso del anyo. Ma kuando vyene Elul, ya nos da bake de korason. Nos alevantamos, kada uno sigun su posibilidad, atorgamos nuestras kulpas i demandamos perdonansa al Padre Piadozo.

(…)

Porke azemos este fuerte aparejo ? Ya es byen savido ke en dia de Rosh Ashana, los ijos del ombre pasan delantre de El Kriador, komo ovejas delantre de el pastor.

(…) Ya es byen savido de todos ke despues de la meldadura de la Tora, se espera kon despasensya la boz del shofar.

(…) No kreo ke ninguno de nuestros ermanos ke se topan en la keila no resyenta una retembla en su kuerpo i en su alma.

(…)

Kero kontarvos dos pasajes konsernando el shofar, ke son de tyempo serkano.

En Siberia estava el invyerno muy duro akel anyo. Las furtunas de nyeve i los ayres ke entezavan la sangre, pasavan aryento de el kuerpo, por las vestimyentas delgadas ke les aviyan dado a los prizonyeros. Viktor Natornov pensava ke el no va ayegar a la primavera ; su kavo ya se estava aserkando. Sus rinyones los teniya hazinos i estava vertyendo sangre. Sus karas palidas i sus ojos sin briyo diziyan ke el ya esta para murir.

Akontesyo esto en el mueven anyo de su aprezamyento. Estava kansado, desfuersado, demoralizado i hazino. El era una persona renomada de alta pozisyon en la sivdad ke nasyo, en el sentro de la Rusia. Era de los komandantes eskojidos en la armada. Mansevos ke se selaron de el posto ke okupava este judyo, lo kalomniaron a la polisia sekreta. « Tu organizates rebuelta » le disheron los juezes i lo kondenaron. El syendo komunisto fidel a el partido, defendyo su kavzo dizyendo ke ay yerro en la akuzasyon i es una Alila de los ke le keren su mal. El djuez ya se kreo en su inosensya i lo desho en vida, ma lo kondeno a ser mandado  a la Siberia, a el kampo de lavoro. El rogo a el djuez de ser mandados djuntos su mujer i su ijo, lo ke ya fue akseptado. Los rondjaron de sus kaza, sus livros los metyeron en la biblioteka de la sivdad. El dinero grande no teniya, visto ke era komunisto fidel.

Despues de un viaje duro de unos kuantos dias, ayegaron a la sivdad onde fue egzilado i les dyeron una chika kamareta para toda la famiya. El pensava ke el governo ya se va apersivir de el yerro i le van a demandar ekskuzas, en lo kualo el se yerro. No se rijeron kon piadad kon eyos : su mujer fue mandada a lavorar en una galeria debasho de tyerra, i su ijo Vasil fue yevado a una maternidad por ser engrandesido sigun la doktrina komunista. Su mujer no alargo dias. La dureza de el frio i las malas kondisyones le tomaron sus fuersas, i una demanyana no se alevanto mas biva de su kama. Viktor kedo bivdo i solo porke su ijo no teniya libertad de pueder vinir syempre. El ya se sintyo ke era para murir. Kuando vino el ijo Vasil a verlo, avryo la validja ke trusho atras 9 anyos. Topo ayi un Shofar. Estonses se akodro ke el era djudyo. Su fidelidad a el komunismo le izo olvidar su kreensa. Esforso sus rekodros, i le vino delantre de los ojos djentes aedadas, kuvridas kon una ropa blanka, tambyen unas bozes estranyas ke salian de el shofar. Su nono le avia aregalado esto i enkomendado ke lo guadre kon muncho kudyo. Sus manos tremblando de desfuersa i de hazidad, kito de debasho de su vestimyenta el shofar i le disho a su ijo : « sera posivle ke non nos veremos mas. Toma esto komo rekodro de mi parte. Esto se yama shofar i tu sos Judyo. Si kombina ke renkontras Judyos, azeles ver el shofar. Guadralo mas ke kualkyer koza i akodrate ke se yama shofar. »

Pasaron anyos. Viktor se avia espartido de entre los bivos pokas oras despues de el renkontro kon su ijo. Vasil adelanto en sus estudyos. En primero fue sospechado porke era ijo de prizonyero. Ma kon tyempo gano la konfiensa, reusho a ser enjenyor de makinas en la armada kon grado de kolonel. En la sivdad ke el morava no savia ka ay moradores Judyos. Rosh Ashana se estava aserkando i eyos se organizaron por azer Tefila en sekreto. Malgrado todas sus bushkidas shofar no estavan topando.

Vasil salyo del lavoro, fue a el lokal de los ofisyeres i se metyo a meldar jurnal todo en bevyendo su vodka. Sintyendose kansado, salyo por irse a echar. La bevyenda i el frio lo trusho en si, i subitamente su padre le vino al tino. Resintyo komo ke le estan tokando la espalda i el eskarinyo le incho todo su kuerpo. Un sentimyento semejante el no resintyo de munchos anyos para aki. Tambyen de akodro de las palavras de al kavo ke le avlo su padre : « Esto es shofar, tu sos djudyo. »

De unas de las kazas  salyo un grupo kantando una melodia muy dulse. Se tomaron de las manos i avlaron uno a el otro unos byervos estranyos. Resintyo Vasil en si ke eyos son Judyos. Sus pyes lo yevaron al lado del grupo. « Es djusto ke vozotros sosh Djudyos ? I yo so djudyo. Es ke se okazyono de oir el byervo shofar ? » Uno de eyos se enkorajo i le respondyo : « Ya tenemos sintido. Ken dyera i lo tuvyeramos. Oy es Rosh Ashana i non tenemos shofar. » « Yo ya tengo shofar. Vini vos daré ».

El no pudo entender : Porke el se aserko de eyos ? Porke el se los yevo a su kamareta ? Porke tomo el shofar i se los dyo a eyos ? Porke se fue a la manyana a akea kazika chika ke estavan rekojidos por oyir las bozes estranyas i differentes ke salian del shofar ? I malgrado esto se sintyo aryento de si mesmo una flama ke incho toda su alma. El vido klaramente enfrente de si la prezensya de su padre, en las palmas de su mano  resintyo la kayntura de los dedos de el. De sus ojos koryeron lagrimas i kaintaron su korason.

Vinyendo a el segundo pasaje, konserna el ke vos prezenta estas linyas. Nuestro maestro, Ribi David Eskenazi zl, ombre de karakter muy rezyo, muy savyo, ensenyador de primer rango , taniya shofar, ke la boz retoniya en la keila de Hemdat Israel. De su tanyer, me entro en la alma el amor de tanyer shofar.Mi madre teniya un tio bendicho el hassid Sinyor Avraam Baruh zl. Me kontaron ke el posedava un shofar muy alavado. Antes ke se esparta de entre nozotros, le konti el dezeo ardiente ke teniya de tanyer shofar .

Me prometyo de aregalarmelo kuando yo me vo ambezar a tanyer. En 1950 el mas no biviya. Yo me estava egzersando en la keila kon un shofar preto. A mi ya me saliyan las tripas, del shofar no saliya boz. Desidi de ir a la kaza del tio. Le konti a su mujer, la Tant Luiza, la promesa ke me aviya echo su marido. Sin dizir nada, avriyo el kashon del almaryo de vestidos, kito un objeto emburujado en un panyo blanko. « Este shofar aspera a ti, a ke lo demandes ! » Sali a la sala grande, meti el shofar en mi boka, los vidros de las ventanas empesaron a temblar. Ya vos puedesh imajinar mi alegriya. Akel anyo, antes de Rosh Ashana, Ribi Ye shua Salvador Habib, ke biva munchos anyos, disho a los dirijentes ke se esta kansando de ser en mesmo tyempo ministro ofisyante i tokea (el ke tanye shofar). Nos yevo a Ribi Adoni i a mi a el Gran Rabinato por pasar egzamen, Ribi Adoni por ser hazan i yo por tokea. Asperando muestro torno en la entrada, se aserko un rabino zl i me demando porke vine. A mi repuesta disho si tengo shofar i si lo puedo aprovar. Lo metyo en su boka, del shofar boz no ay salir. Me lo rendyo dizyendome : «  Ijiko, no tanyas kon este shofar, ke te azes rezil. » Yo no respondi nada. Aryento, en la sala de Bet Din, estavan pasando egzamen los hazanim (ministros ofisyantes) i los shohatim (los ke egzersan el degoyido).  Me vido el Rav Saban zl i le demando a el rav Benhabib : « Ke bushka este ijiko ? » Le respondyo ke su ermuera es prima miya i ke vine por pasar egzamen de tokea. Disho el rav Saban : « ke Tanya ». A penas tanyi 4 letras de las 30, me izo kedar, aboltandose a Ribi Rofe zl : Eskrivelo por tokea a la keila de Hemdat Israel ! Tanyi shofar del anyo 1950 asta el anyo 1980. Kreevos en mis palavras : malgrado ke ya era tokea de munchos anyos, antes de tanyer empesava  a tremblar de emosyon. Si El Kriador me lo Resivyo kon veluntad i pude kitar a mis ermanos de Hova (ovligo) es la mas grande rekompensa para mi chika persona.

Rogo de todo mi korason ke el Padre Piadoz se alevante de trono de djuzgo i se asente en trono de piadades, ke aga boltar nuestros korasones a su Kamino, ke nos takse en el anyo nuevo sanedad, vidas largas kon todos nuestros keridos, reushita, mantenimyento ancho i prosperidad.

Eskapo mi eskrita kon el auguro de Ahot ketana, poema eskrita por el savyo Avraam Hazak, ke metyo kada lettra de su nombre en presipyo de kada kompla : Tihle shana vekilelotea (se eskape el anyo i sus maldisyones) tahel shana uvirhotea (empese el anyo i sus bendisyones). Amen.

Ansina s’eskapa el artikolo del Senyor Palacci, i yo no veo nada de adjustar a lo ke disho. I no vos dire, komo kada semana, al djueves ke vyene, syendo ke el djueves ke vyene sera diya de fyesta, vos dezeo de muevo anyada buena i vos digo : al djueves 6 de oktovre, si kyere el Dyo!