eSefarad Noticias del Mundo Sefaradi
Keridos amigos,
Mi emisyon de djueves va ser bastante nekrolojika, syendo ke va tratar de tres ombres muertos los diyas pasados: el ombre politiko i kapo de orkestra Lionel Stoleru, el desenyador Gotlib, i el diktator Fidel Castro.
Los ke van a kerer oirme en direkto lo podran indosen a las 4 h 06 PM, ora de Paris, sovre www.radioj.fr Kale klikar arriva a la derecha sovre Ecouter Radio J en direct. I si no es en direkto, abasta asperar un diya o dos, i despues ir a oirme en redifuzyon sovre http://www.radioj.fr/node/145
Saludos a todos
Edmond Cohen Paris Fransya
STOLERU, GOTLIB, CASTRO
Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Por empesar, vos akodro ke el proksimo atelye de konversasyon de Vidas Largas se tendra el martes ke vyene 13 de desyembre, a las dos i medya, en el Centre Communautaire.
Vos akodro tambyen ke agora las emisyones de Radio J se pueden oir por internet sovre el sityo de Radio J, de toda manera en direkto, i en vezes despues…depende del tekniko. http://www.radioj.fr
La semana pasada, komo la de antds i komo munchas vezes estos tyempos, tuve la palavra a las 4 i ocho en vez de las 4 i sesh, i no pude eskapar los vente minutos de avla ke vos teniya aparejado sovre la amistad entre djudyos i muzulmanos.
Empesaré dunke mi emisyon de oy por la eskapasyon de la del djueves pasado, ande vos estava avlando de las asosyasyones ke ovran oy para esta amistad entre djudyos i muzulmanos.
Empesi por avlarvos de la asosyasyon Fraternité d’Abraham (ermandad de Abraham) fundada en 1967, i kuando tuve de kedarme vos estava avlando de la asosyasyon Coexister, dizyendovos ke nasyo entre kristyanos, djudyos i muzulmanos aze solo syete anyos, en 2009. El empesijo fue, kontra los pletos entre djudyos i muzulmanos en Fransya durante la operasyon kurshum enduresido en Gaza, un akojimyento de orasyon entre la djente de la iglesya Saint-Léon en Paris, la meshkita de la rue de Javel i el kal massorti Adath Shalom. Al kavo de este akojimyento, un manseviko kristyano de 16 anyos, Samuel Grzybowski, propone de fundar un grupo de dialogo interrelijyozo para los mansevos.
Ansina empeso la asosyasyon, se yamo CoeXisTer, la C dando la medyaluna de los muzulmanos, la T la kruz kristyana, i en medyo la X es eskrita en forma de magen David. Agora, solo syete anyos mas despues, el grupo se enfortesyo i engrandesyo, kovra agora la Fransya entera, i se esfuersa de promover la konvivensya entre todos los mansevos i mansevikos de las tres relijiyones, i tambyen los ateos.
Egziste tambyen una otra asosyasyon, eya solo entre djudyos i muzulmanos, es la asosyasyon yamada Amitié judeo-muzulmane, fundada en 2005, aze dunke onze anyos, por el haham Michel Serfaty i el imam Djelloul Seddiki, Direktor del instituto de teolojiya de la Grande Meshkita de Paris. Por dizir la vedra, Seddiki se fue de la asosyasyon en 2009 para protestar kontra el silensyo de Serfaty sovre los bombardamyentos de Gaza. Ama la asosyasyon a kontinuado, Seddiki syendo remplasado por el imam Mohamed Azizi.
Michel Serfaty se va en la Fransya entera a ver los mansevos de las males ande biven munchos arabos. No va solo. En su otobus yeva tres mansevos muzulmanos ke lo akompanyan en sus vijitas.
Kualo dizir para eskapar despues de esto todo?
La primera koza es ke afillu kuando todo va mal, i mismo diré sovre todo kuando todo va mal, no es una razon para eskapar la lucha. Estos ombres de los kualos vos avli pensan ke djustamente deven de azer lo ke pueden para no achetar ke la gerra sea mas fuerte ke la paz.
I yo dezeo ke un diya sean eyos ke van a venser.
Ansina teniya de eskaparse mi emisyon de la semana pasada.
Para esta semana, vos kyero dizir unos kuantos byervos sovre dos djudyos ke se muryeron esta semana, i uno ke no era djudyo ke muryo un poko antes: Lionel Stoleru, Marcel Gotlib i Fidel Castro.
Empesaremos por Lionel Stoleru, ke mos desho la vida el 30 de novyembre, a la edad de 79, syendo ke nasyo en la sivdad de Nantes, en Fransya, un anyo antes de mi, el 22 de novyembre 1937, en una famiya djudiya i, a lo ke se, sufu. Por los ke no lo konosen byen, les akodro ke Stoleru fue a la vez matematiko, ekonomisto, ombre politiko, ministro (komyendo kasher mismo en viajes ofisyales), prezidente de la Kamara de komersyo Fransya-Israel, pyanisto, kapo de orkestra i kompozidor.
El padre de Lionel, Elie, era nasido de la sivdad de Vaslui, en Rumania. Su mujer Fernande Blum, la madre de Lionel, eya nasida en Strasbourg, era Franseza. Elie Stoleru era direktor tekniko en las Brasseries de la Meuse, fabrika de bira.
Kuando vyene la gerra i kon eya los Almanes, la polisiya franseza eskrive los Stoleru en su tefter de los djudyos, i los Stoleru se eskonden i meten sus dos kriaturas, Lionel i su ermano Yves, ande una famiya, los Trillat ( agora medayados komo djustos) i aya se kedan komo azyendo parte de la famiya (la misma istorya ke fue la miya i la de tantas kriaturas djudyas en estos tyempos).
Una vez venida la Liberasyon, el chiko Lionel aze sus estudyos i entra en 1956 en Polytechique, a 18 anyos, lo ke kyere dizir ke era muy manseviko komparado a los otros, i yene salyo sigundo de esta eskola, el primero syendo otro djudyo, ejipsyano, Asher Levy, ke se va yamar despues André Lévy-Lang i sera patron de banka.
Despues Stoleru entra en la Eskola de las Minas, i va ser despues injenyor jeneral de las Minas. I es despues doktor en ekonomiya en la Universidad de Stanford, en Palo Alto, en California.
En 1966 se kaza kon Francine Wolff, i de eya va tener en 1972 una ija, Emmanuelle Wargon.
Despues va lavorar en la banka, i azerse profesor de matematika i de ekonomiya en las eskolas de las Minas i Polytechnique.
Politikamente, se syente del sentro, ama en 1976, entra komo ministro (sekretaryo de estado) en governos bastante de derecha, Los de Barre i Chirac, kargado de lavoradores manuales i imigrados. Krea una indemnidad de 10.000 frankos (1.500 euros) a los ke aboltan en sus pais, i 100.000 lavoradores se van ansina de Fransya.
Se aze elejir deputado del departamento de la Oise en 1988. En 1992, se mete kon los ekolojistos, i en 1996, entra en el partido de los radikales de syedra. I el ke aviya sido ministro de governos de derecha, va entrar komo ministro (sekretaryo de estado) al plano en el governo sosyalisto de Rocard. Aya se va okupar del revenido minimum de insersyon, un ayudo muy importante para los ke tyenen lavoro.
Kon Robert Badinter, lavora tambyen a la reinsersyon sosyala de los prezoneros, kon estudyantes ke van en los prezos para ambezar a los prezoneros.
Al lado de esto se aze en 1991 el kapo redaktor de la gazeta de Robert Maxwell The European.
En 1993, entre komo prezidente de la Kamara de komersyo Fransya-Israel.
No solo lavora en Fransya, ama va tambyen ser konsejero ekonomiko de Petre Roman en el governo rumano, i del prezidente Leonid Kravtchouk en Ukrayna.
En 2006, va de la vanda de Dominique Strauss-Kahn, ama es Segolène Royal ke es elejida para reprezentar los sosyalistos. Vyendo esto, se fuye i va de la vanda de Sarkozy, ke va ser elijido komo prezidente de la Republika en 2007. I Stoleru va resivir de Sarkozy misyones, komo en 2007 misyon para el desvelopamyento de las chikas emprezas, o en 2010 sovre el dezekilibro del komersyo entre Oryente o Oksidente.
A parte ke eskrivyo munchos livros, Lionel Stoleru era un muy buen pyanisto, i no se kontentava de djugar pyano: se izo tambyen kapo de orkestra. En 1993, dirijo el orkestra de Ukranya en el opera de Kiev, el orkestra de la republika tcheka en el festival Menuhin de Reims, en Fransya, el orkestra del Rhin en el opera de Mulhouse, el orkestra Pasdeloup en Paris, el orkestra filarmoniko de Rumania en Bucarest, ets, i mismo salyo un disko del konserto por piano de Schumann i de la sinfoniya trajika de Schubert.
Despues, en 1996, funda el Orkestra Romantiko Evropeo, ke va dirijir asta 2013.
I es en 2010 ke kompoza la Sinfoniya djudiya, bazandose sovre pedasos de la liturjiya djudiya. El mismo la dirijo en publiko en novyembre 2010 en la Salle Gaveau en Paris. Los ke son interesados de verlo i oirlo dirijir esta sinfoniya lo podran ver sovre internet: abasta de ir sovre Google i demandar Danilette Stoleru.
http://www.danilette.com/article-un-62083914.html
Sovre esta ermoza muzika me vo kedar sovre este ombre ke se muryo del korason el 30 de novyembre, despues de una vida muy yena.
I agora vo kyero dizir unos kuantos byervos tambyen en memorya de un otro djudyo de Fransya ke se muryo el alhad pasado 4 de desyembre, kyero avlar del dezenyador Gotlib, muy konosido en Fransya por las gazetas ke fundo el mismo: l’Echo des savanes o Fluide glacial.
Marcel Gottlieb nasyo el 14 de djulyo 1934 en Paris. Su padre Ervin Gottlieb, pintor de paredes, i su madre Regine nasida Berman, kuzendera, son djudyos ungarezos. Kuando empesan las deportasyones, kijo dizir en 1942, el chiko Marcel tyene 8 anyos. Se ambeza ke es djudyo kuando ve su madre kuzirle una estrella amariya sovre su palto. Es tambyen en 1942 ke su padre, afillu ke fue veluntaryo en la armada franseza, es aferrado por la polisiya franseza i yevado no se save ande. Se van a ambezar despues de la gerra ke a sido fuziyado en Buchenwald.
Su madre lo toma i lo yeva en una kampanya ande se topa eskondido ande kazalinos. Despues de la Liberasyon su madre lo toma atras i se okupa de el komo puede, kedando sola i asperando el ritorno de su marido asta ambezar ke no vendra mas.
Gotlib va kedar ateo, malgrado ke su madre se akodro kuando el teniya 14 anyos ke teniya de azer su bar mitsva. Nunka se fue en Israel ni en Ungariya i disho ke se sentiya franses antes de djudyo. Esto es una koza ke syempre me enkanta. Komo uno ke vido su padre ke aviya sido veluntaryo en la armada franseza, toparse aferrado por los fransezes i dado al enemigo alman ke lo mato, esto todo solo porke era djudyo, komo este ijo se puede sentir franses antes de djudyo? Ya se ke, komo dize el profesor Sephiha, kada uno kon su djiz i kon su shishit, yene me enkanto.
Gotlib ke aviya fumado demaziya era hazino i no puediya respirar. Kreo ke es de esto ke se muryo.
Vos avli de Stoleru, vos avli de Gotlib. Agora kon el tyempo ke me keda vos kyero avlar de Fidel Castro. Puedesh pensar: deke avlar de Fidel Castro, ke no era djudyo i no teniya tanto de ver kon los djudyos? Vos daré tres repuestas: primo, en los dos milyones de cubanos ke tuvyeron de fuir la isla por modo de Castro i de su rejimen, ay munchos djudyos. Sigundo, Fidel Castro fue un enemigo de Israel ke syempre voto kontra a la ONU. I en tresero, de vez en kuando, tengo la gana de avlar de kozas ke no tokan direktamente a los djudyos.
Lo ke me intereso kon la muerte de Fidel Castro, es la syegedad veluntarya de una parte de la syedra sovre lo ke fue Castro.
En Fransya, en las gazetas de derecha, no me akodro ke los gazeteros tuvyeran palavras favorables a kapos de governo o de estado komo Batista, Pinochet, o los koroneles gregos o arjentinos. Nunka estas gazetas se amostraron syegas sovre lo ke se pasava en los paizes bivyendo basho sus diktaturas.
A la kontra, kuando estas mismas gazetas de derecha kritikavan a diktatores komo Staline, Mao Tse Tung, Menghistu, Pol Pot, Khadafi, o Fidel Castro, uvo syempre, a lo manko en Fransya, djente para defenderlos i akuzar los gazeteros de ser fasistos pagados por el gran kapital i los Estados Unidos.
Antes del raporto Khrouchtchev en 1956, Staline, asta tres anyos despues de su muerte, fue konsiderado por los komunistos del mundo en jeneral i de Fransya en partikolar komo «el padreziko de los puevlos», un jenyo ke nunka se yerrava, ets. Por tanto los testimonyos sovre los krimenes de Staline ya eran munchos desde antes de la gerra, por egzemplo el livro de André Gide «Retour d’URSS» ke fue puvlikado en 1936. Despues de la gerra, en 1946, Boris Kravchenko puvliko el livro «Eskoji la libertad», ande munchas kozas ya se puediyan saver. Ama no ay peor sodro ke el ke no kyere oir.
Kuando Castro fue resivido por el Prezidente de la Republika François Mitterrand en 1995, su mujer Danielle Mitterrand fue orguyoza de darle un bezo delantre los fotografos, i disho a los gazeteros: «Ay prezoneros en Cuba. Politikos? No se…»
La InterAmerican Human Rights Commission eskrivyo el 7 de avril 1967, asigun un artikolo de Mary Anastasia O’Grady en el Wall Street Journal del 30 de desyembre 2005 http://www.wsj.com/articles/SB113590852154334404
“El 27 de mayo 1966, 166 Cubanos – siviles i militares – fueron kondenados a soportar prosesos medikales de ekstraksyon de sangre en una kantidad de syete pintas por persona. Esta sangre fue vendida al Vietnam komunisto al presyo de 50 dolares por pinta kon el doble eskopo de obtener muncha para i de kontribuar a la agression vietkong komunista.
Una pinta de sangre es medyo litro. Tomar esta kantidad (tres litros i medyo sovre sesh en todo) de sangre de una persona kondenada a muerte le da anemya serebrala i un estado sin konsensya i paraliziya. Una vez la sangre travada, la persona fue tomada por dos milisyanos sovre una anda (brancard, stretcher) astal lugar ande uvo la egzekusyon”.
Meldi ke en el livro «Cuba, una revolusyon», el istoryano Miguel A. Faria eskrive (pajina 405) ke, asigun las estimasyones las mas kreivles, unas 40.000 personas an sido asasinadas por razones politikas desde ke Castro tomo el poder en 1959.
I oy, asigun Christophe Deloire, prezidente de Reporters sin frontera, Cuba okupa el 171emo sityo (sovre 180) en el klasamyento mundyal de la libertad de las gazetas.
Ama Segolene Royal, ministra del Governo franses ke se fue a Cuba para las funerales de Fidel Castro, disho ke es un «monumento de la Istorya» , ke en Cuba vido «libertad de konsensya», i ke los Cubanos «se inspiraron de la Revolusyon franseza sin por lo tanto konoser la terror ke uvo durante la Revolusyon franseza.»
La syegedad de una parte de la syedra kontinua asta oy.
Astal djueves ke vyene, si kyere el Dyo!
Edmond Cohen
Paris Fransya
Es ke Fidel Castro eraTurko?
El djornal Radikal ke sale kada dia lo demanda. Konta lo ke disho Alina Fernandez, ija del «Lider Maximo» cubano, Asigun eya el Nono -avuelo- de Fidel Castro era un djidio de Istanbul ke se fue à Cuba.