eSefarad Noticias del Mundo Sefaradi
Keridos amigos,
Mi emision de djueves va ser yom ashoa, i por esto apareji una emisyon sovre lo ke afito a los djudyos de la sivdadika de Champigny-sur-Marne, serka de Paris, en los diyas pretos de la gerra. I antes de esto vo akodrar la memorya de tres djudyos ke se fueron el mes pasado: Ronit Elkabetz, Walter Kohn i Martin Gray.
Los ke van a kerer oirme en direkto lo podran indosen a las 4 h 06 PM, ora de Paris, sovre www.radioj.fr Kale klikar arriva a la derecha sovre Ecouter Radio J en direct. I si no es en direkto, abasta asperar un diya o dos, i despues ir a oirme en redifuzyon sovre http://www.radioj.fr/node/145
Saludos a todos
Edmond Cohen Paris Fransya
Shoa en Champigny
Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina
Por empesar, vos akodro ke el proksimo atelye de konversasyon de Vidas Largas se tendra el martes 10 de mayo, de las dos a las kuatro i medyo, en el Centre Communautaire.
Vos akodro tambyen ke agora las emisyones de Radio J se pueden oir sovre internet. Si el tekniko lo kyere byen, i estos tyempos lo kyere byen, mi emisyon se puede oir sea en direkto, sea kuando se kyere, eya sola, kale klikar en el sityo de Radio J, sovre Emissions, i irse en pajina 5, aya se topa la miya.
http://www.radioj.fr/node/145
Oy, djueves 5 de mayo, es el Yom ashoa, i por esta razon me pensi de avlarvos del lavoro ke izo mi amiga Angèle Saül sovre lo ke afito durante la gerra a los djudyos de una chika sivdadika serka de Paris, yamada Champigny-sur-Marne.
Ama antes de ayegar a esta istorya, me tengo de eskapar en primero lo ke no tuve el tyempo de eskapar la ultima vez ke estava aki, aze kinze diyas, avlandovos del grande savyo selanikli Joseph Nehama.
Tuve de kedarme kuando vos estava avlando de su dictionnaire du judeo-espagnol, adjustando ke era muncho mas ke un diksyonaryo, era una haliz ensiklopediya. I vos estava dando egzemplos de la koza.
Por egzemplo, al byervo esjwegra (pronunsyar eshuegra), Nehama no se olvida la dicha «lo ke ve la esjwegra». Lo traslada por «ce qui est apparent» (lo ke se ve). Ama aya no se keda. Adjunta (en franses, so yo ke traslado): «Se dize de un lavoro echo kon deskuydo, echo a la kuturu, sin konsyensya, echo solo para no tener keshas. Las esjwegras son travadas a despresyar sus ermueras, a akuzarles de haraganut, de indolensya. Por esto, munchas vezes, las ermueras se kontentan de kumplir el lavoro ke tyenen de azer, ke pareska byen de leshos sin mirar kon tino, sin korason ni kalor.»
Otro egzemplo? Kabadayi (matamoro). Nehama no se kontenta de trasladar. Avre una paranteza para kontarmos kualo era un kabadayi. Era la terror de su male i kada male teniya el suyo. Egzijiya paras de los ke kaminavan dainda en la noche. Despues Nehama mos konta kon detalyos komo era vestido. Dava espanto kon su kuchiyo. Unos le davan una semanada parar kedar kyetos. La polisiya serrava los ojos…Vo lo konti korto, ama Nehma toma todo su tyempo…Por esto es ke vos dishe ke su lavoro no es solo un diksyonaryo: es una ensiklopediya de grande valuta.
Joseph Nehama se muryo el 29 de oktovre 1971, a la edad de 90. Es una grande pedrita para mozotros.
Ansina se eskapa lo ke aviya aparejado para el djueves 21 de avril.
Agora, antes de empesar mi istorya de Champigny, vos tengo tambyen de akodrarvos la memorya de tres djudyos (dos ombres i una mujer) ke mos desharon la vida estos diyas, kyero avlar de la aktrisa israelyana Ronit Elkabetz i del savyo amerikano Walter Kohn (los dos el 19 de avril), i del eskrivano Martin Gray (el 25 de avril).
Ronit Elkabetz era de orijen marokiya, ama asigun mi deviya venir de una famiya djudeo-espanyola, syendo su alkunya, ke mos akodra un haham Espanyol muy famozo nasido en Selanik en 1505, a kyen devemos, entre otras munchas kozas, la orasyon «leha dodi «, en onor de la yegada del shabath, i ke se yamava Shlomo Alkabetz.
Ronit nasyo en Beer Sheva el 27 de novyembre 1964, i se keriya azer stilista. Vino al sinema en 1990 sin bushkarlo, a los 25, kreyendo prezentarse por una reklam, i era un filmo (El predestinado). Obtyene el primer rolo sin tener nunka ambezado el lavoro de aktrisa.
Va djugar munchos otros rolos, i despues es eya misma ke va realizar, en djuntos kon su ermano Shlomi, tres filmos entre 2004 i 2014, ke son Velakahta leha isha (Te tomaras mujer), Shiva (los syete diyas de luto) i Get, amishpat shel Vivian Amselem (Get, el djusgamyento de Viviane Amselem). Estos tres filmos tuvyeron una fama internasyonala.
Ronit djugo en Fransya, sea teatro, sea filmos de sinema.
Estos ultimos mezes, estava lavorando sovre un filmo ke keriya azer sovre el ultimo anyo de vida de Maria Callas, ke muryo a los 53. Malorozamente, eya mizma, Ronit Elkabetz, estava lunchando desde dos anyos kontra un kanser, i es el kanser ke gano. Ronit se fue el 19 de avril. Teniya 51 anyos.
En kuanto a Walter Kohn, nase en Vienne en 1923, es una de las ultimas kriaturas ke pudyeron fuir de Austria verso Ingletyerra unas kuantas semanas antes de la gerra. Sus padre i madre, kedados en Austria, muryeron de la Shoa, i el mismo, despues de un tyempo en varyos kampos, pudo irse al Quebec en 1940; tyene 17 anyos i no save dainda ke va ser uerfano antes poko. Lavora komo ovrero en las sharras i, ayudado por varyas asosyasyones, se puede merkar livros syentifikos. El ultimo anyo de la gerra entra en la armada kanadyana.
Despues va pueder estudyar en la Universidad de Toronto, i de aya se va ir en universidades amerikanas.
Obtuvo en 1957 la nasyonalidad amerikana, i se retiro ofisyalmente en 1991 a los 68, sin kedarse de lavorar en vedra. En 1998 obtyene un premyo Nobel de kimika por sus lavoros sovre su teoriya de «la funksyonala de la densidad». No kale demandarme a mi de darvos a entender de kualo se avla, si lo saviya siguro ke vo lo diriya, ama…no sé.
Se muryo, komo vos dishe, el 19 de avril, el mismo diya ke Ronit Elkabetz.
I agora vos tengo de avlar de Martin Gray, nasido Mieczyslaw (dicho Mietek) Grajewski en 1922 en Varsovia. Su padre es guantero. En 1939 vyenen los Almanes, Mietek tyene 17 anyos. Kuando son todos enserrados en el ghetto de Varsovia, aze komo munchas kriaturas, sale a eskondidas del ghetto para topar de komer para su famiya. Aferrado, torturado, se fuye, ama se desha tomar de muevo para akompanyar su madre i sus ermanos yevados en Treblinka ande van a ser pishin asasinados, komo 1120 personas de su famiya. El no es asasinado i tyene por lavoro de ser totenjude, «djudyo de los muertos», sonderkomando ke trava los muertos de la kamara de gaz i los echa en la foya. Otra vez se fuye, otra vez esta aferrado, otra vez se fuye, i se aune kon los partezanos. Aya va topar su padre, ke lucha en la rebuelta del Ghetto, i lo ve delantre de el kaer matado por los nazis. El entra en la armada kolorada komo lugartenyente i kon eya entra en Berlin en mayo 1945. Va suvir al grado de capitan en 1946
En 1947 desha tan la armada sovyetika komo la Evropa i se va en 1947 ande una vava suya ke mora en los Estados Unidos. Empesa mueva vida en los Estados Unidos. En 1952, es echo amerikano i su nombre es amerikanizado en Martin Gray. Lavora komo antikadji. En 1959, se kaza kon una amerikana de orijen olandeza, Dina Cult, i en 1960 vyenen los dos instalarsen en Fransya, en una sivdadika del sur yamada Tanneron, i Martin se aze agrikultor.
Malorozamente, dos anyos mas despues, en 1970, su mujer i las kuatro kriatura ke tuvo kon eya se mueren kemados un grande fuego de sharra. Al empesijo pensa Martin de matarse, i despues dechida de luchar al nombre de una Fundasyon Dina Gray para ke no ayga mas fuegos de sharra.
En mismo tyempo, kon el ayudo del eskrivano i istoryano Max Gallo, konta la istorya de su vida en un livro: Au nom de tous les miens (En nombre de todos los miyos) ke va tener un sukseso planetaryo (30 milyones de livros vendidos en 26 linguas).
Robert Enrico va azer un filmo de este livro en 1983.
Syertos istoryanos fueron kritikos kontra el livro komo kontenyendo yerros. Parese ke es vedra ke ay syertos yerros, ama esto, si tengo byen entendido, tendriya mas al talento literaryo de Max Gallo ke a mintiras de Martin Gray. No kale olvidar ke Martin Gray no se sentiya el talento literaryo para eskrivir solo sus rekodros, i ke demando a Max Gallo de ayudarlo, i Max Gallo es un eskrivano ke tyene la manya de trokar en vezes la istorya para ke sea mas ermoza.
Martin Gray se va de muevo kazar, i mismo dos vezes: una primera vez kon Virginia ke le va dar tres kriaturas, Barbara, Larissa i Jonathan, i una otra vez kon Béatrice ke le va dar dos otras kriaturas: Gregory i Tom.
Martin Gray va eskrivir unos diez livros de filozofiya de vida. Komo diziya Irme Kertesz, lo ke pasaron les da «una syerta eksperyensa de la vida»…
Kon las paras ganadas kon sus livros, Martin puede fundar varyas organizasyones i luchar kontra la barbariya i el antisemitismo. El eskopo de su vida va ser de ambezar a la djente la fuersa del amor i de la vida, arriva del odyo i de la muerte. En mas de trenta anyos, resivyo unas 800.000 letras de meldadores de todos paizes.
Martin Gray eskapo su vida en su kaza de Ciney, en Beljika, el 25 de avril, a la edad de 93.
I agora vengo a la istorya ke vos kyero kontar oy, diya de la shoa, la istorya de los djudyos de una sivdadika serka de Paris ke se yama Champigny sur Marne. Deke esta sivdadika? Porke mi amiga Angèle Saül, ke ya konosen los oyentes ke se akodran por egzemplo kuando vino aki para meldar sus konsejikas sovre Djoha i Djohaya, eskrivyo un estudyo sovre eyos, i pensi ke vos puediya interesar.
Kyen eran los djudyos de Champigny i kuantos eran del tyempo de la gerra?
Todos no eran djudeo-espanyoles. Aviya djudyos lehlis venidos en los anyos 1900 de Evropa del sentro o del este, fuyendo los pogromes i la mizerya. Alkilaron una kazika para azer un kal, ande se topa dainda el kal de oy.
Ama la otra parte de los djudyos de Champigny veniya del imperyo osmanli: Turkiya i Gresya, travados verso la Fransya desde el empesijo del siglo vente por varyas razones: las gerras balkanikas, el fuego de Selanik de 1917, la mizerya ekonomika, el espanto del nasyonalismo kemalisto, i de otra parte la edukasyon a la franka resivida en las eskolas de la Alyansa Israelita Universala. Estos djudyos fueron unas 40 famiyas (150 a 200 personas). Al empesijo, se fueron al kal de los lehlis, ama kada komunita tenyendo su espasyo, syendo ke los ritos eran diferentes. A poko a poko los lehlis desharon el kal a los djudeo-espanyoles solos.
Aviya alrededor del kal terrenos para fraguar. Los djudeo-espanyoles se arrekojeron de esta manera en kazas fraguadas las unas al lado de las otras, serka del kal, formando una kaye. Komo yamarla? demando el secretaryo de la mayoriya. «Edmond Rostand (el autor de Cyrano de Bergerac) respondyo uno de los djudyos, tanto me plazyo este eskrivano ke me ambezi en Turkiya». I la kaye se yamo Edmond Rostand i dainda se yama ansina.
Deke eskojer esta sivdadika de Champigny para morar? Munchas razones: el aver, la kampanya, el riyo (la Marne) kon una playa, i lo todo serka de Paris kon un treno yevando al sentro de Paris, i sovre todo a la «chika Turkiya», la male del onzen arrondissement ande biviyan i lavoravan tambyen los djudeo-espanyoles antes de la gerra, ande se puediya merkar komida kasher i a la turka, i tambyen la ropa para vender (en jeneral chamashir).
Malorozamente, para eyos komo para los otros, vino la gerra i kon eya los Almanes i sus amigos del governo franses.
Angèle Saül nasyo, komo dize eya misma, «sovre las sinizas dainda kayentes de la gerra». Sesh myembros de su famiya fueron deportados i entre eyos tres de Champigny, ande bivyo su famiya durante 70 anyos.
Por esto estudyo lo ke fue la shoah en Champigny. Los shifros son estos:
99 ombres, mujeres i kriaturas fueron deportados.
90 no aboltaron, entre eyos 24 kriaturas.
5 fueron liberados, inkluyendo una kriatura. 4 reusheron a fuirse.
Los dos tyersos eran djudyos lehlis de Evropa sentrala i del este. Un tyerso eran djudeo-espanyoles. Uno era de Afrika del Norte. 2 o 3 eran djudyos fransezes de Fransya. 15 deportados djudeo-espanyoles (ke no aboltaron) inkluyendo 3 kriaturas moravan kaye Edmond Rostand. Una kriatura de esta kaye fue liberada.
Rachel Strub-Meyokas, nasida en 1929, en una famiya venida en Champigny en los anyos 1924-1925, da su testimonyo ansina, en 2001:
«Syempre morimos en Champigny. Lavoravamos komo adovadores de tapetes de Oryente. El 24 de djunyo 1944, tres semanas despues del Desbarkamyento, pensando ser kyetos, estamos lavorando, mismo yo, Rachel (15 anyos) i mi ermana Claudette, ke no mos fuimos a la eskola para ayudar al adovamyento de un tapet. De leshos, veo ayegar a los pulises. Pishin digo a mis dos ermanikas de irse ande una prima. Ama mi padre, mis dos ermanos i yo somos aferrados (por denunsyasyon) i yevados kon araba al karakol. De aya somos yevados en prezo durante dos diyas, i de prezo a Drancy. La djente echava sus djoyas por las ventanas para ke no vayan a los Almanes.
«El 30 de djunyo, somos embiyados en treno (n° 76, uno de los ultimos de la deportasyon de Fransya, ama no el ultimo) a Auschwitz, lo ke va tomar kuatro diyas. No puedo avlar de esto, es demaziya duro, era una angusya .
«Kuando ayegi al kampo, me demandaron mi edad. No entendi la kuestyon. Una mujer respondyo 20 anyos. Esto me salvo. En vedra teniya djusto 15, ama era «fuerte komo una turka». Me embiyaron al lavoro, i no a la kamareta de gaz. Mos embiyaron en Almanya para lavorar en las fabrikas de armas.
«Despues mos embiyaron en el kampo de Terezin, ande fui liberada por los Rusos el 5 de mayo 1945. Yo era hazina del typhus.
«Kuando abolti en Fransya, topi mi madre i mis dos ermanas. Ama mi padre i mis dos ermanos nunka aboltaron.
«Despues me kazi i tengo dos ijos i tres inyetizikos.
«Asta 1956, dainda adovava tapetes, a la turka.»
Ansina s’eskapa el testimonyo de Rachel.
Syempre, kuando se avla de estos tyempos tan pretos, es bueno de avlar de los ke ayudaron a los djudyos, sin los kuales no aviya salvasyon posivle para dingunos. Varyas personas de Champigny izyeron lo ke pudyeron para salvar a djudyos. Mme Quinquet, por egzemplo, eskondyo 17 kriaturas djudiyas en su pensyon de famiya Bella Vista.
Me vo kedar por oy sovre estos djustos, i vos digo al djueves ke vyene, si kyere el Dyo!
Edmond Cohen
Paris Fransya
