eSefarad Noticias del Mundo Sefaradi
Teksto de la emisyon del programa de radio Muestra Lingua de djueves 29 de mayo, a las 4 06 pm, ora de Fransya.
La emisyon es sovre Shimshon i Delila, komo esta kontada en ladino en la Biblia de Ferrara.
El program se puede sintir por Internet kada djueves, indo al sityo RADIO – la fréquence juive
Kale tener pasensya i asperar un poko, no se oye pishin.
Saludos a todos
Edmond Cohen – Paris, Fransya
Para Ladinokomunita
SHIMSHON I DELILA
Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Komo a kada vez, vos akodro ke el proksimo atelye de konversasyon de la asosyasyon Vidas Largas se tendra el djueves 6 de mayo , de las dos a las kuatro i medya-sinko, en el Centre Communautaire, 119 rue Lafayette Paris (10°) métro Gare du Nord o Poissonnière, salvo ke esta vez, a las 2 i un kuarto, komo lo dishe la semana pasada, se va pueder mirar al filmo echo por Albert Rosilio i Gilbert-Sabetay Sagues a partir de los rekodros i komentaryos de los ke dyeron dokumentos i fotos al Memoryal de la Shoa, en su reunyon del 14 de desyembre 2006, organizada por la asosyasyon Judeo-espanyol a Auschwitz.
Oy vos kyero avlar de Shimshon i Delila, i esto por dos razones : la primera, es ke ya vos dishe ke me merki la Biblia de Ferrara, ke me tresalgo de meldarla en ladino, i ke vos kyero azer kompartir mi plazer. Ama deke Shismshon i Delila mas de otra koza ? Esto es en memorya de mi vava. Komo era sodra, antes entendiya los filmos mudos , ama despues no los entendiya mas desde ke avklavan, salvo Shimshon i Delila, el filmo de Cecil B. De Mille kon Victor Mature i Hedy Lamarr, un filmo en kolor de 1949. Mi madre, su ermuera, konosiya muy byen la istorya de Shimshon, ke se topa en el Tanah, i ke se aviya ambezado en la eskola protestanta ingleza de Estambol, i la aviya kontado a su suegra mi vava antes ke vea el fimo, de tal manera ke por una vez entendyo todo lo ke vido, i se tresalyo por el ke yamava el de los kaveyos, kale entender Shimshon.
Afillu si lo ago en memorya de mi vava, no vos kontare la istorya de Shimshon tal i komo era en el filmo ke vos dishe, la vo kontarvos tal i komo esta kontada en la Biblia de Ferrara. Ama por esto tuve de lavorar kon diez livros : por empesar el tanah en ebreo, ande la istorya esta kontada en el livro de los Shofetim, los juezes, uno. El diksyonaryo ebreo-franses de Marc Cohn, dos. El diksyonaryo ebreo-franses de Abraham Elmaleh, tres. La Biblia de Ferrara, kuatro. La Biblia de Konstantinopla de 1905, eskrita en djudeo-espanyol kon karakteres Rashi, sinko. Un diksyonaryo espanyol-franses, sesh. El diksyonaryo dicho ladino-espanyol de Pascual Recuero, syete. La traduksyon en franses de Chouraqui, ocho. La traduksyon en franses del Rabinato, mueve El diksyonaryo franses-djudeo-espanyol de Klara i Elie Perahya, diez.
I afillu kon esto todo, no pensej ke sea tan kolay de entender, en vezes. Un egzemplo, al kapitulo 14, pasuk 5.El tanah mos konta ke Shimshon esta kaminando en las vinyas de Timnat, i en supito kualo ve frente a el ? kefir arayot. Kualo es kefir, kualo es arayot ? Bushko kefir en mi diksyonaryo de ebreo de Marc Cohn, i me responde : leon. Kualo es arayot ? el plural de arie. Kualo es arye ? Ya lo se sin bushkar en el diksyonaryo : es un leon. Kefir arayot : leon de leones ? Kuryozo… Ke dize Elmaleh para Kefir ? Leoniko. Kualo dizen los traduktores, i por empesar la Biblia de Ferrara ? cadillo de leones ; Kualo es cadillo ? Bushko en mi diksyonaryo de espanyol : perriko. La Biblia de Konstantinopla ? kachorro de leones. Kualo es Kachorro ? Bushko en mi diksyonnaryo de espanyol : perriko, i por ekstensyon puede ser leoniko. Ah, agora empeso de entender mijor : leoniko de leones. Ansina lo traduze Chouraqui : lionceau de lions. I el rabinato ? un jeune lion : un joven leon. Ama deke leoniko de leones, i no solo leoniko ? Kuala es la diferensya ? Esto dainda no se…
Esto dicho, antes de vinir a la istorya de Shimshon i Delila, vos tengo de akodrar todo lo ke se paso antes, i en primero en ke tyempo estamos. Mos topamos, komo vos dishe, entre el livro de Yoshua, ke mos konta la konkista del pais de Kenaan por los ebreos al salir del Sinaï, i el livro de Shemuel, ke mos konta el nasimyento del reyno de Shaul i del rey ke va vinir despues, David.
Entre los dos, los trivos de Israel okupan la tyerra konkistada por Yeoshua, ama kon munchas gerras, porke los moradores konkistados dainda estan aki, los vizinos tambyen, i no kyeren a estos ebreos vinidos de Ayifton. Los trivos de Israel son dirijidos por kapos yamados Shoftim, juezes. Mas ke juezes, son sovre todo kapos militares, komo Gideon o Yiftah. El livro Shoftim es muy salvaje, kon munchas matansinas, no solo entre los ebreos i sus enemigos, ama entre los ebreos tambyen. El livro 20 de Shoftim mos konta, por egzemplo, un gerra sin piadad entre los Israelitos i los Binyaminitos. Los Shoftim eyos mismos son muy espesyales : Yiftah mata a su ija, Avimeleh a sus setenta ermanos, ets.
I entre tanto, el Tanah mos konta, en sus kapitulos 13 a 16 la istorya de Shimshon, ijo de un ombre del trivo de Dan, yamado Manoah. Este Manoah aze de Shimshon su ijo un nazir, kijo dizir un ombre ke no deve bever vino, ni kortar sus kaveos, i vamos a ver ke este detayo va ser muy importante, porke muestro Shimshon va ser muy fuerte i guadrara su fuersa tanto ke guardara sus kaveos. Esta fuersa, Shimshon la va uzar kontra sus enemigos los Pelishtim. Un diya, va aharvar a unos mil Pelishtim kon una sola kishada (mâchoire) de azno en la mano.
Ama, este mismo Shimshon tan fuerte kontra los ombres Pelishtim, se va amostrar muy tyerno i bastante bovanchon kon las mujeres Pelishtim. Toma ande eyos una primera mujer ke lo va enganyar. I despues de la muerte de esta mujer, va tomar a otruna ke lo va enganyar de la misma manera, i esta vez es la famoza Delila, ke le va kostar la vida.
Esta istorya kon Delila se topa en los pesukim 4 a 31 del kapitulo 16 del livro Shofetim, i la vamos a meldar en djuntos.
I fue despues assi, y amo muger en arroyo de Sorek, y su nombre Delilah. I subieron a ella senyores de Pelistim, y dixeron a ella : sombaye a el (en ebreo pati oto : séduis-le), y ve en que su fuerça grande, y en que podremos a el, y atarlo emos para afligirlo ; (aki una paranteza sovre atarlo emos ; meti muncho tyempo para entender ke kyere dizir ataremos lo, o lo ataremos ; el lo vyene en medyo del verbo i lo korta en dos) ; i nos daremos a ti cada uno mil y cien pesos de plata. Y dixo Delila a Simson :denuncia agora a mi en que tu fuerça grande, y con que seras atado para afligirte ? Y dixo a ella Simson : si me ataren con siete cuerdas (de vergas)verdes (en ebreo lahim, kijo dizir freskas, umedas) que no fueron secas, y enfermarme e (lo mismo ke atarlo emos : kale entender enfermareme, o mijor me enfermare, me azere flako) y sere como uno de los hombres (en ebreo keahad aadam : komo uno del ombre, un ombre ordenaryo). Y fizieron subir a ella senyores de Pelistim syete cuerdas (de vergas) que no fueron secas, y atolo con ellas. Y el asechador (le piégeur) estan a ella en la camara ( vos akodro ke estan no es el plural de estar ; es el partisipyo prezente al singular : estante, quedante, traduksyon del ebreo yoshev la : el asechador estante a eya, kijo dizir ke se keda kon eya) . Y dixo a el (Delila a Shimshon) : Pelistim sobre ti, Simson !Y arranco a las vergas (el mismo byervo ebreo yetarim ke al pasuk 7, ande estava trasladado cuerdas (de vergas) i no solo vergas) como es arrancado filo de estopa en su oler fuego, y no fue sabida su fuerça.
Asta agora Shimshon mos paresiya un ombre meoyudo ke, ambezado kon lo ke le afito kon su primera mujer ke lo aviya enganyado, enkasho mintiras a Delila para no darle el sekreto de su fuersa. Ama agora ya save ke eya lo kijo enganyar komo izo su primera mujer, i ke eya sola puediya averlo atado. I por tanto, se keda kon eya. A bovo !
Y dixo Delilah a Simson : he burlaste en mi, y hablaste en mi mentiras ; agora denuncia ruego a mi con que seras atado. Y dixo a ella : si atar me atassen con cuerdas nuevas, que no fue hecho con ellas obra, y enfermarme e, y sere como uno de los hombres. Y tomo Delilah cuerdas nuevas, y atolo con ellas, y dixo a el: Pelistim sobre ti, Simson ! Y el asechador estan en la camara ; y arrancolas de sobre sus braços como hilo.
Y dixo Delilah a Simson : fasta aqui burlaste en mi, y hablaste en mi mentiras ; denuncia a mi con que seras atado. Y dixo a ella : si texeres a siete guedejas de mi cabeça con el lizo. Mismo la Biblia del Rabinato eskrive ke este pedaso no es muy klaro. La idea es ke kale tesher komo teshido a las syete kokas de sus kaveyos, ama Shimshon adjusta : im a masahet, trasladado por kon el lizo. El lizo, es la trama del teshedor; se entyende ke kale tesher sus kaveyos kon los ilos de un teshido. La biblia en karakteres Rashi traslada : kon la tela. Y finco con estaca,(en ebreo va titka’ bayated.Es Delila ke finka, kyere dizir enkasha kon una estaka, kyere dizir un palo. La kuestyon es : kuako finco Delila kon su estaca, kualo enkasho kon un palo ? La tela echa kon los kaveyos de su marido). y dixo a el : Pelistim sobre ti, Simson ! Y despertosse de su suenyo, y movio a la estaca de la texedura y al lizo (kijo dizir al palo komo al teshido). Y dixo a el: como dizes te amo, y tu coraçon no comigo ?Estas tres vezes burlaste en mi, y no denunciaste a mi en que tu fuerça la grande. Y fue que apreto a el con sus palabras todos los dias y fatigolo, y acortosse su alma para morir. Y denuncio a ella todo su coraçon, y dixo a ella : navaja no subio sobre mi cabeça, que apartado (ansina es trasladado el byervo ebreo nazir) del Dio yo de vientre de mi madre ; si fuere trasquilado, ( no se si vos akopdraj, ama ya konosej este byervo si oyitej la emisyon ke ize ay unas pokas semanas sovre las mujeres del rey David, ande aparesiya el byervo traskiladores para las ovejas, aki no se avla de oveja ama de la kavesa de Shimshon, ama la koza es la misma, kortar el pelo a la rais) y apartarse a de mi(se apartara de mi) mi fuerça, y enfermarme e, y seré como todo los hombres. Y vido Delilah que denuncio a ella a todo su coraçon, y embio y llamo a senyores de Pelistim, por dezir : subid esta vez, que denuncio a mi a todo su coraçon. Y subieron a ella senyores de Pelistim, y subieron la plata en sus manos. Y hizolo adormecer sobre sus rodillas, y llamo al varon y trasquilo a siete guedejas (kokas) de su cabeça, y empeso de afligirlo, y tirose su fuerça de sobre el. Y dixo : Pelistim sobre ti, Simson ! Y despertosse de su suenyo, y dixo : saldre como vez en vez (komo a kada vez), i sacudirme e (i me sakudire). Y el no supo que Adonay se tiro de sobre el. Y travaronlo Pelistim, y arrancaron a sus ojos, y fizieron descender a el a Hazzath (la sivdad de Gaza), y ataronlo con farropeas (kadenas) ; y fue molien (izo tornar la muela del molino) en casa de los encarcelados.
Y empeço cabello de su cabeça de hermollecer (kreser) despues que fue trasquilado.
Y senyores de Pelistim se apanyaron (se adjuntaron) para sacrificar sacrificio grande a Dagon su Dio, y por alegria, y dixeron : dio nuestro Dio en nuestra mano a Simson nuestro enemigo. Y vieron a el el pueblo, y alabaron a su Dio, que dixeron : dio nuestro Dio en nuestra mano a nuestro enemigo, y a destruyen nuestra tierra (el destruidor de nuestra tierra) y el que muchiguo a nuestros matados. Y fue como aboniguandosse (alegrandose) su coraçon, y dixeron : llamad a Simson, y trebejara a nos (mos va englenear). Y llamaron a Simson de casa de los encarcelados , y reyo (djuguo) delante ellos, y hizieron estar a el entre los pilares. Y dixo Simson al moço el travan por su mano : dexa a mi, fazeme apalpar a los pilares que la casa compuesta sobre ellos, y asufrirme e(me asufrire, me apoyare) sobre ellos. Y la casa llena de varones y mugeres, y alli todos senyores de Pelistim, sobre el techo como tres mil varones y mugeres, los veyentes en escarnio (mirando el djuego) de Simson.
Y llamo Simson a Adonay, y dixo ; mi Senyor Adonay, miembrame agora (akodrate de mi), y esfuerçame agora, de cierto la vez esta el Dio (af apaam aze : solo esta vez), y vengarme e (me vengare) vengança una de dos mis ojos de Pelistim.Y abraço Simson a los dos pilares del medio, que la casa compuesta sobre ellos, y fue asufrido (apoyado) sobre ellos, uno en su derecha y uno en su izquierda. Y dixo Simson :muera mi alma con Pelistim.Y acostosse con fuerça, y echo la casa sobre los senyores y sobre todo el pueblo que en ella, y fueron los muertos que fizo morir en su muerte muchos mas de los que fizo morir en sus vidas (haim es al plural en ebreo).
Y descendieron sus hermanos, y toda casa de su padre, y llevaron a el ; y subieron y enterraron a el entre Zorhah y Estaol, en fuessa de Manoah su padre ; y el djusgo a Ysrael veinte anyos.
Ansina se eskapa la kuryoza istorya de Shimshon, shofet de Israel, i penso ke vozotros tambyen, keridos oyentes, topaj esta istorya a la vez muy ermoza, mismo dire romantika, no es por nada ke se eskrivyeron un opera i tantos filmos sovre esta istorya, i a la vez muy kuryoza, por munchas razones : vos vo dizir ke los komentaryos ke vo azervos agora son los miyos, porke no tuve tyempo de ir a bushkar los komentaryos de muestros grandes hahamim, i por empesar Rashi i muestro Meam Loez, sovre estos pesukim. Puede ser un diya me aboltare verso vos para darvos a entender lo ke meldaré de lo ke pensaron i eskrivyeron. Oy van a ser solo mis penseryos personales.
Por empesar, la primera koza ke me enkanta, es ke no entyendo ke teniya este ombre para ser shofet, a parte de su fuersa muskular. Un shofet, mismo komo kapo militar, se deve de tener meoyo, i el teniya un leblebi en lugar de su meoyo. Tres vezes Delila le demanda kualo era el sekreto de su fuersa, tres vezes le enkasha una mintira, i tres vezes ve ke eya kijo enganyarlo, i el le dize despues su sekreto. A propozito de este sekreto, una fuersa sovreumana eskondida en sus kaveyos, penso ke kale akodrar ke no estamos en kozas de echizeriya, ama en kozas de relijyon : tanto ke Shimshon se keda nazir, i fiel a su neder de nazir, el Dyo esta kon el i le da fuersa. Ama kuando avla a Delila, syerto es Delila ke le korta los kaveyos, ama Shimshon es tan bovo de averle avlado ke es komo si la kulpa de rumper el neder era suya. I por esto el Dyo lo desha. En derecho romano, se dize culpa lata dolo equiparatur : la kulpa pesgada, afillu ke no es maksus, es komo si lo era. No son los Pelishtim ke asyegaron a Shimshon, lo ke asyego a Shimshon es por empesar su amor por esta mujer ke eya no lo ama i lo enganya por paras.
Orozamente, los enemigos Pelishtim eran a lo manko tan bovos komo Shimshon el mismo. Ya saven, i lo pagaron karo a Delila en moneda de plata, ke el sekreto de Shimshon teniya de ver kon sus kaveyos, i lo deshan tener muevos kaveyos sin espantarsen. I no avlo del moso pelishti, al kual Shimshon demanda kualos son los pilares ke sostyenen la kaza, i el le dize sin demandarse porke esta kuestyon…
No se save si Delila era o no kon los Pelishtim ke Shimshon, el primer kamikaze de la istorya umana, por lo ke se, mato en esta kaza.
Antes de eskapar la emisyon, otruna remarka : Ke dize Shimshon antes de destruir la kaza ? Tamot nafshi im Pelishtim, lo ke la Biblia de Ferrara, fiel komo syempre, traslada por : Muera mi alma kon Pelishtim. La Biblia del Rabinato, eya, traslada :Muera mi persona kon Pelishtim. Ya entendimos ke va morir la persona de Shimshon, ama no es lo ke disho : nafshi kyere dizir mi alma. Shimshon no dize muera mi puerpo, syendo ke mi alma es eternal. Dize muera mi alma. Esto me da a pensar, esto es mi idea personal, no se lo ke disheron los hahamim sovre este punto, ke , a lo manko del tyempo de Shimshon, los ebreos no pensavan ke la alma sovrebiviya al puerpo.
Al djueves ke vyene, si kyere el Dyo!
