eSefarad Noticias del Mundo Sefaradi
Keridos amigos,
Mi emisyon de djueves va ser sovre Shimon Peres. Ke deskanse en paz.
Los ke van a kerer oirme en direkto lo podran indosen a las 4 h 06 PM, ora de Paris, sovre www.radioj.fr Kale klikar arriva a la derecha sovre Ecouter Radio J en direct. I si no es en direkto, abasta asperar un diya o dos, i despues ir a oirme en redifuzyon sovre http://www.radioj.fr/node/145
Saludos a todos
Edmond Cohen Paris Fransya
SHIMON PERES
Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Vos akodro ke agora las emisyones de Radio J se pueden oir sovre internet. Si el tekniko lo kyere byen, mi emisyon se puede oir sea en direkto, sea kuando se kyere, eya sola, kale klikar en el sityo de Radio J, sovre Emissions, i irse en pajina 5, aya se topa la miya.http://www.radioj.fr/node/145
Afillu si ya lo ize la semana pasada, es syempre bueno de dezearvos de muevo una anyada buena i saludoza, para vozotros, keridos oyentes, i para toda vuestra famiya.
Agora de kualo avlarvos oy? Ya aviya pensado de aparejar una emisyon sovre Haïm Arlozorov, kuando me ambezi el muy triste haber de la muerte, el 28 de septyembre, de Shimon Peres, ke fue premyo Nobel de la Paz, i Prezidente del Estado de Israël asta aze poko.
Troki dunke de idea, i vos avlaré oy de Shimon Peres. Por syerto no seré el solo ke vos avlara de Peres estos tyempos, ama seran un poko manko los ke vos avlaran de el en muestra lingua. Mi lavoro es de ser unos de estos.
Shimon Peres nasyo Szymon Perski en agosto 1923 en la sivdadika de Wiszniew, en lo ke era la Polonya kuando nasyo, ama ke es en Bielorussia oy kon el nombre de Vishnyeva. En su kaza se avlava yiddish, ruso i ebreo, i el chiko Shimon se ambezo el polako a la eskola. Es despues ke se ambezo a avlar fransez i ingles. Yo lo oyi munchas vezes avlar franses, lo avlava bastante byen, ama kon un aksento yiddish muy fuerte. Me akodro de tenerlo visto dando en franses una konferensya en Paris, i avlando de Yerushalayim i de lo ke iva ser kon esta sivdad, mos disho en franses kon su boz kyeta: «Jérusalem, c’est terminé» (Yerushalayim, es koza eskapada). Ama lo pronunsyava «Jerizalem, c’est terminey», i yo syempre me tresali de su boz, de su manera tan kyeta de avlar, i de su aksento.
Vos dishe ke su primer nombre fue Perski. Halbuki, el haliz nombre de la aktrisa amerikana de sinema Lauren Bacall era Betty Joan Perske, djudiya de padre i de madre, lo digo para los ke dainda no lo saviyan. Su papu Perske era nasido komo Shimon en lo ke es agora la Bielorusia. Una vez los doz, Shimon i Lauren, se vyeron, se peshkuzaron, i se apersivyeron ke eran primos, algunos dizen mismo primos ermanos, ama esto me parese mas shupeli.
El chiko Shimon nasyo en una famiya ke no era pratikante, afillu si su papu de la vanda de su madre era el haham Zvi Meltzer, inyeto de Haïm de Volozhin (1749-1821), famozo haham, el mismo elevo del Gaon de Vilna (ke era, entre otras kozas, el kapo de los mitnagedim, kijo dizir los opozantes al hasidismo). A la kontra de sus padre i madre, el chiko Shimon era muy influensado por su papu haham, i era muy relijyozo. «Yo no sonyava de azerme prezidente de Israel, me sonyava de ser pastor de ovejas o poeta de estreyas». Es este papu haham ke le dyo a konoser i a agradar la literatura franseza.
En 1932, el padre syonisto de Shimon se va en Tel-Aviv, i en 1934 aze venir su famiya. Shimon tyene onze anyos.
Aya se va en las eskolas de Tel Aviv i en una grande eskola de kommersyo, ama no se keda aya, i a la edad de 15 anyos se va en Ben Shemen en una eskola de agrikultura, i de aya al kibuts Geva ande va kedar unos kuantos anyos antes de ser uno de los fundadores del kibuts Alumot, ande va lavorar komo i agrikultor i pastor.
En 1941, a la edad de 18, ya se aze elijir sekretaryo de un movimyento de mansevez syonisto sosyalisto, HaNoar Ha Oved VeHa Lomed (La mansevez ke lavora i estudya). Esto va ser el empesijo de su karrera politika, porke de aya va entrar komo sekretaryo del partido Mapai, el partido de Ben Gurion. De este diya, Peres, ke troko su nombre de Perski en Peres (agila) va kedar, komo lo disho el mismo,» benguryonisto», i va kedar fyel a Ben Gurion asta su muerte.
En Bielorussia, toda la famiya de Peres es matada por los Almanes, inkluyendo el papu, el haham Meltzer, kemado bivo en su kal.
En 1944, Peres komanda una ekspedisyon en el Negev, zona ande es defendido de entrar, para azer planos para un establesimyento aya. Esta ekspedisyon a sido dechidada por Ben Gurion i Itshak Sadeh, kapo del Palmach (no vos olvidesh ke Ben Gurion va eskapar su vida en Sde Boker, en el Negev. Ben Gurion kreiya muncho a la importansya del Negev para Israel).
Peres i su grupo son aferrados por beduinos sovre gameyos kon un kapo ingles, i metidos un tyempo en prezo.
En 1945, Peres, ke tyene 22 anyos, se kaza kon Sonya Gelman, i kon eya va tener tres kriaturas.
En 1946, el i Moshe Dayan van al kongreso syonisto de Basel komo embiyados del partido Mapai.
En 1947, kuando empesa la gerra kon los arabos, Peres entra en la Hagana, i Ben Gurion le da el lavoro de bushkar armas de merkar. Vos akodro ke los Inglezes, en 1947, proibiyan de tener armas, indimas de merkarlas, i ke todo deviya ser echo a eskondidas, las armas syendo merkadas a kyen achetava de venderlas, i yevadas a la Hagana en sekreto, en vapores de noche.
Kuando Israel obtyene su independensya, Peres es echo kapo de la marina i despues, en 1949, embiyado en Amerika para merkar armas. Aya Peres se ambeza en ingles i entra en las universidades de New York i Harvard para estudyar.
Kuando abolta en Israel en 1952, Ben Gurion lo mete Direktor del ministeryo de la Defensa. Su lavoro, komo syempre, va ser de bushkar i topar armas para la armada de Israël. Esta vez, Peres se torna verso la Fransya, por dos razones: primo, va ser sosyalistos komo Guy Mollet ke van a toparse a la kavesa del pais, i komo Peres tambyen es sosyalisto, se entyenden byen. Sigundo, la Fransya se va topar desde novyembre 1954 en gerra kontra los arabos en Aljerya, i se va presto apersivir ke los rebeldes aljeryanos son ayudados en paras i en armas por el grande enemigo de Israël, Ayifton dirijida por Nasser. Esto tambyen va muncho aserkar la Fransya de Israel, i Peres va obtener dos kozas muy importantes: los avyones Mirage III, unos de los mijores i mas modernos en todo el mundo, i el ayudo de la Fransya para fraguar en Dimona un Sentro atomiko, en prinsipyo sivil, ama todos saven ke en vedra es militar tambyen.
Es tambyen el ke va ser embiyado por Ben Gurion por tener en sekreto kon los Fransezes entrevistas preparando una alyansa militar. Kale dizir ke el ministro franses de la Defensa en 1954, en el governo de Pierre Mendes-France, es un famozo gibor i famozo amigo de los Djudyos, el jeneral Koenig, konosido komo el ombre de Bir Hakeim. Aya kombatyo los almanes al lado de djudyos de Palestina, i de este tyempo nasyo en su korason una amistad para Israel ke va guadrar asta su muerte.
Koenig aze saver a Peres ke la Fransya le puede vender todas las armas ke kyere. Es en este tyempo ke Israel va merkar los famozos Mirage III.
En 1956, es Shimon Peres ke, al lado de Ben Gurion i de Moshe Dayan, se va el 22 de octobre en la sivdadika franseza de Sèvres, al lado de Paris, para tomar kon los fransezes (Bourgès-Maunoury, Christian Pineau i Maurice Challe) i los Inglezes (Selwyn Lloyd i Patrick Dean) un akodro sekreto kontra Ayifton. La gerra de Suez pudo empesar poko despues, i permetyo a Israel de echar los Ejipsyanos afuera del Sinaï, ama komo ya lo savesh, tanto los Estados Unidos komo la URSS menasaron muy fuerte a los tres alyados, ke tuvyeron de retirarse. Lo ke kedo para Israel es una fuersa de la ONU a la frontera entre Israel i Ayifton, salvo ke, a la primera demanda de Nasser en 1967, la ONU se travo, amostrando ansina ke no serviya de nada.
En 1959, Peres se presenta a las eleksyones para la Kneset, es elijido sovre la lista del partido Mapai, i va kedar deputado syempre reelejido asta ke sea elijido Prezidente del Estado de Israel en 2007, kijo dizir ke fue deputado durante 48 anyos en sira.
Ama no va ser solo deputado, va lavorar tambyen en los governos de Israel, en primero al lado del ministro de la defensa (Ben Gurion i Levi Eshkol) de 1959 asta 1965. Es en este tyempo ke Peres trata kon el Prezidente Kennedy i obtyene de merkar a los Estados Unidos misiles Hawk anti avyones, i el anyo despues, el es ke trata para merkar a los Amerikanos tankes Patton i avyones Skyhawk. Kon esto van a empesar las venditas de armas por los Estados Unidos a Israel. Oy oygo gazeteros dizyendo ke, por un ombre ke obtuvo despues el premyo Nobel de la paz (dainda no estamos en esto), Peres no fue syempre un ombre de paz, la preva es ke merko armas. Estos gazeteros avlan komo si no saviyan ke Israel es arrodeado de enemigos ke lo kyeren matar. Es byen de kerer la paz, ama kale tambyen ser fuerte, sino el pasifisto puede eskapar komo el papu de Peres kemado bivo en su kal, komo vos dishe. Peres syempre kijo la paz, ama es vedra tambyen ke syempre se esforso de enforteser su pais i su puevlo en dandole las armas ke teniya de menester para defenderse. Son las armas amerikanas i fransezas merkadas grasyas a Peres ke permityeron a Israel de ganar en sesh diyas la gerra de 1967. El koraje i la kapachedad de los ombres de Tsahal fueron por siguro en la viktorya, ama sin las armas obtenidas grasyas a Peres, es ke el koraje i la kapachedad uvyeran sido bastante? Esto no es siguro.
Esto dicho, para aboltar a la karrera politika de Peres, vos tengo de kontar ke kuando Ben Gurion, entre otras razones por modo de la istorya Lavon, sale del partido Mapai i funda el partido Rafi en 1965, el «bengurionisto» Peres se va kon el (i kon Moshe Dayan).
En 1969, Peres empesa por ser ministro de la immigrasyon, un anyo despues de los trasportes, despues de la informasyon, i en 1974, entra komo ministro de la defensa en el governo Rabin, i es ansina ke va tener en 1976 de lavorar al lado de Rabin a la operasyon de Entebbe. No se lo pueden olvidar los ke vyeron Burt Lancaster djugar despues el rolo de Shimon Peres en el filmo Victory at Entebbe (Viktorya en Entebbe).
La istorya de la vida politika de Peres es muy entrafikada, ama esto tyene a la demokrasiya israelyana: es entrafikada para kada uno, kon alyansas de un tyempo, viktoryas i desfechas en las eleksyones. Peres peryo munchas eleksyones, ama nunka se esvacheo, i de esta manera fue tres vezes primo ministro de Israel, en 1977, de 1984 a 1986, i de 1995 a 1996.
No tengo aki el tyempo de kontarvos esto todo en detaye, ama ay una koza esensyala ke kale dizir, es su rolo en las negosyasyones kon los Palestinyanos, kuando el era ministro de los echos ajenos en el governo Rabin, negosyasyones ke se eskaparon kon los akodros de Oslo en 1993. Estas negosyasyones fueron tan sekretas ke el rolo de Peres se supo en vedra kuando obtuvo, al lado de Rabin i de Arafat, el premyo Nobel de la paz en 1994 (la vida de Peres, ya lo vitesh, es un alay de negosyasyones sekretas, fue un «ombre de la solombra» komo se plazen oy a dizir los gazeteros. Entre munchas dichas de Shimon Peres, ay una ke kedo famoza: » el proseso de paz se asemeja a una noche de boda en un kampo de minas»).
Es tambyen kuando Peres era ministro de los echos ajenos de Rabin ke Israel i la Jordaniya firmaron en 1994 un tratado de paz ke vale dainda asta oy.
En el anyo 2000 Peres aprova de azerse elijir komo prezidente del Estado, ama es el kandidato del Likud, Moshe Katsav, ke va ser elijido. Este eskojimyento no va ser la mijor koza, syendo ke si no me yerro, oy en diya Moshe Katsav esta dainda en prezo por razones seksuales.
En 2005, Peres se trava del partido del Lavoro para entrar en el partido Kadima (Adelantre!) de Ariel Sharon. Es el tyempo ande Israel se trava de Gaza.
I en 2007, Peres se prezenta de muevo para ser elijido prezidente del Estado, i esta vez al primer torno obtyene 58 bozes sovre 120, ama al sigundo torno obtyene 86 votos, i es elijido.
En su diskorso komo Prezidente, Peres dize ke Israel deve ser una kaza kayente para los djudyos ke no son israelyanos, komo para los Israelyanos ke no son djudyos…I adjunta: «Deshadme kedar un optimisto. Deshad me ser un sonyador de su puevlo. Si en vezes el tyempo es de otonyo, i tambyen si oy los diyas paresen grizos en supito, el Prezidente ke Israel eskojo no va kedar de enkorajar, espertar i akodrar, porke la primavera mos aspera. La primavera vendra para syempre.»
Es vedra ke Peres, afillu si ya teniya 84 anyos kuando empeso komo Prezidente i 91 kuando eskapo, se amostro un ombre mirando delantre i nunka atras.
Meldi alhad pasado sovre JForum ke dos gazeteros del Jerusalem Post azen saver agora ke, en 2014, tuvyeron una entrevista kon Shimon Peres, ke veniya de eskapar su Prezidensya del Estado, i le demandaron de kualo era lo mas orguyozo en su lavoro de Prezidente. El respondyo: «Kuando reushi a azer trokar Netanyahu de su idea de ir a bombardar las instalasyones atomikas irayanas» No solo no kijo dar mas detayes, ma ensima demando de avlar de esto solo despues de su muerte. Por esto es ke solo agora lo salyeron los gazeteros.
Komo ya lo savesh, Peres se muryo el 28 de septyembre pasado, i fue enterrado el 30 de septyembre en prezensya de unos syen kapos de estado del mundo, inkluyendo los mas grandes, komo fue para Rabin, ke el aviya sido asasinado. Mahmud Abbas el mismo vino a la seremoniya ke fue mirada en la televizyon komo un evenimyento mundyal. Todos disheron ke el era el ultimo ke kedava de los fundadores istorikos del Estado de Israel.
Ke deskanse en paz.
Sovre esto vos desho i vos digo: al djueves ke vyene, si kyere el Dyo!
Edmond Cohen
Paris Fransya
