eSefarad Noticias del Mundo Sefaradi
Keridos amigos,
Mi emisyon de djueves va ser la kontinuasyon i el kavo de la ke empesi el djueves pasado sovre el konsul Radigales, i la salvasyon de 367 djudyos espanyoles selaniklis ke la Espanya no keriya akojer, afillu si ya saviya ke sus suditos eran menasados de muerte.
Los ke van a kerer oirme en direkto lo podran indosen a las 4 h 06 PM, ora de Paris, sovre www.radioj.fr Kale klikar arriva a la derecha sovre Ecouter Radio J en direct. I si no es en direkto, abasta asperar un diya o dos, i despues ir a oirme en redifuzyon sovre http://www.radioj.fr/node/145
Saludos a todos
Edmond Cohen Paris Fransya
SEBASTIAN ROMERO RADIGALES (2)
Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Vos akodro ke agora las emisyones de Radio J se pueden oir sovre internet. Si el tekniko lo kyere byen, mi emisyon se puede oir sea en direkto, sea kuando se kyere, eya sola, kale klikar en el sityo de Radio J, sovre Emissions, i irse en pajina 5, aya se topa la miya.
http://www.radioj.fr/node/145
La semana pasada, tuve de eskapar mi emisyon i kedarme de avlar afillu si no aviya kontado la istorya entera de lo ke afito al grupo de 522 djudyos espanyoles bivyendo en Selanik, i ke Sebastian Romero Radigales, konsul jeneral de Espanya en Atenaa, se esforsava de salvar de la deportasyon en julyo 1943.
Vos akodro ke kuando me kedi el djueves pasado, vos estava kontando ke, el 14 de julyo, el embashador akavida a su ministro ke el ministro alman de los echos ajenos «insista sovre el menester de dar a los djudyos espanyoles de Selanik un pasaporte kolektivo i aspera de resivir de mozotros una demanda de treno espesyal para el viyaje verso Espanya. Le arrespondo ke el ministeryo espanyol de los echos ajenos no tyene entisyon de azer un pasaporte kolektivo…No ize dinguna aluzyon a la propozisyon para un treno espesyal.»
Ke verguensa. Vos estash rendyendo kuenta, keridos oyentes: son los Almanes ke son prontos a salvar los espanyoles de la muerte, ama es el governo espanyol ke no acheta…Los papeles kedan, es bastante de meldarlos.
El mismo diya, el ministro responde al embashador: «el governo espanyol nunka tuvo la entisyon de rapatriar una muchedumbre de djudyos espanyoles».
El 24 de djulyo, el governo italyano otoriza su konsul jeneral en Selanik de embiyar a Atena, okupada por los Italyanos, los 522 djudyos espanyoles de Selanik, pensando salvarlos ansina de los Almanes. Los Almanes refuzan, i yene Radigales i el konsul italyano en Selanik, Giuseppe Castruccio, reushen de azer fuir de Selanik, por un treno militar italyano, 155 djudyos espanyoles ke van en Atena basho la proteksyon de los Italyanos. Kedan en Selanik 367 personas, entre los kuales el chiko Isaac Revah, ke tyene 9 anyos, i su famiya.
Vyendo esto, los Almanes dechidan de deportarlos a Bergen Belsen i no a Auschwitz, para deshar a los Espanyoles tyempo para pensar. Despues son destinados a ser embiyados en un otro kampo, este de eksterminasyon. Los Almanes lo eskriven a los Espanyoles los 20 i 22 de julyo 1943. No vide estos mesajes, ama esto siguro ke los Almanos no eskrivyeron el byervo eksterminasyon, ama yene deviya ser klaro.
Sin repuesta ni dinguna reaksyon de los Espanyoles, los Almanes reunen los kapos de famiya el 29 de djulyo 1943 en el kal Beth Shaul para darles instruksyones sovre sus vyaje – ansina yaman a la deportasyon – verso Espanya despues de «una kurta estansya», komo dizen, en Almanya, sin dizir, por siguro, ke Almanya kyere dizir el kampo de Bergen Belsen. Son otorizados a tomar kon eyos komida, vestidos, i mismo kozas de valuta. I son internados en el ghetto Baron Hirsch ande vyenen sus famiyas.
I el 2 de agosto, los 367 desmazalados son metidos en treno en vagones para behemot, kon tambyen 74 djudyos gregos, sin de bever ni de komer. Por siguro, todas las kozas yevadas kon eyos les son arrovadas por los Almanes.
El 4 de agosto, kuando ya se fueron los djudyos, la Espanya eskrive ke esta de akodro para tomar los djudyos 25 por 25, kada grupo una vez ke el de antes se fue de Espanya. Los almanes ven ke esto va tomar mas de un anyo, i refuzan; de toda manera, los djudyos ya se fueron. Radigales embiya a Espanya un telegrama demandando ke Madrid a lo manko tome los vyejos, las kriaturas i los hazinos.
El 9 de agosto, kuando el treno esta en Nuremberg (debasho de un bombardamyento de los alyados), los Almanes se ambezan ke la Espanya acheta de tomar los djudyos en transit por 3 mezes. El American Joint Distribution Coommittee pagara todos los gastes. Ama el haber ayega demazyado tadre, i despues de un viaje de 12 diyas, los djudyos ayegan a Bergen Belsen. Espanya demanda a los Almanes de «byen tratar» a los djudyos.
Los espanyoles son separados de los gregos i metidos en kuatro barakas en una parte espesyala del kampo de Bergen Belsen, menos dura ke ande va estar Anna Frank. Eyos no lo saven, i no pueden ser testigos de las atrosidades ke se pasen al lado.
Por lo tanto, si es vedra ke no ay lavoro forsado, ke no tyenen un numero tatuado sovre el braso, ke no yevan pijamas rayados, i ke guadran sus kalsados, las kondisyones no son las de un kampo de vakansas: aprovar de dormir en medyo de los piyojos i de las hazinuras ke van kon eyos, komo el typhus o la sarna, las yamadas interminavles kuatro vezes al diya, empesando a las sesh de la demanyana, en el friyo, ets. La sola bevyenda es un likido preto yamado «kavé», syendo ke la agua no se puede bever. En kuanto a komer, ay un poko de «supa». La ambre, syempre. Por lo ke es de lavarse, una ducha kada tres diyas, i para esto kale azer la kola durante oras enteras, i despues de la ducha la yamada en el frio de djente dainda mojada. Ama las famiyas no son separadas: Isaac Revah keda kon su padre, su madre, i su ermanika de 4 anyos.Se akodra ke teniya kursos de Tanah ambezados por syertos prezoneros, o ke el djugava al treno kon otras kriaturas, polakos ama de nasyonalidad arjentina, otro pais neutro i bastante amigo de los Almanes. Las kriaturas no se davan tanto kuenta de la pezgadez de la situasyon, ke les estava eskondida por los grandes.
Entremyentres, sin ke los djudyos lo sepan, Radigales no keda de ograshear kon el embashador en Berlin i el ministeryo en Madrid para eskabuirlos de Bergen Belsen. La lokura es ke los Almanes kyeren embiyar los djudyos en Espanya i es la Espanya ke no los kyere akojer!
Al kavo, en novyembre 1943, Madrid acheta, a kondisyon ke ayga dos grupos, i ke el sigundo grupo entre en Espanya solo kuando el primero se sera ido. De otra parte, esto todo no deve kostar una peseta a Espanya. Son los Amerikanos ke pagaran todos los gastes.
Es el 7 de fevrero 1944 ke los djudyos del sigundo grupo, el de de Isaac, se van de Bergen Belsen i, esta vez, viajen no en vagones para behemot, ama en vagones de viajadores, de tresera klasa. Traversan la Almanya en medyo de la gerra, pasan por Mannheim ke ven entera destruida, lo ke asigun mi no tuvo de azerlos yorar muncho, despues pasan por la Fransya okupada, i ayegan el 13 de fevrero en Cerbère, serka de Perpignan, a la frontera de la Espanya, i aya entran en Espanya, en Port Bou. Ayan son akojidos por el Prezidente del Joint, i resiven vestimyenta i un poko de paras. Al chiko Isaac le dan una banana.
(Esta banana me akodra ke despues de la Liberasyon miya, kuando estava en la eskola de Paris okupado por los Alyados, el direktor de mi eskola me eskojo, en tanto ke djudyo, komo kriatura tenyendo sufrido de la gerra, para una fyesta organizada por la armada canadyana. Al kavo de la fyesta, resivi komo regalo una portokal, fruta ke me akodri ke la aviya visto antes de la gerra, kijo dizir una vida antes…Me la yevi a kaza komo koza presyoza. Syerro esta paranteza personala).
La Espanya guadra a estos djudyos solo kuatro mezes, i el 14 de junyo 1944, son yevados en Cadix i de aya, en un vapor de gerra amerikano, en Casablanvca, en el Maroko. El solo otorizado a kedarse en Espanya es Salomon Ezratty, porke el mismo fue konsul de Espanya en Selanik.
Ama esto es otra istorya, ke mos alesha de Radigales, ke deshimos en Atena en oktobre 1943. Despues de la yevada de los 367 selaniklis de Selanik en Bergen Belsen, tyene de luchar tambyen en favor de los 155 djudyos espanyoles selaniklis ke se topavan en Atena, dainda okupada por los blandos Italyanos, fuyidos de Selanik a la fin de julyo 1943, komo vos konti un poko antes, grasyas a Radigales i al konsul de Italya. Ama los Almanes an entrado en Atena en septyembre 1943.
Radigales se esforsa de obtener para eyos tambyen la posibilidad de rapatriarlos en Espanya. I para eyos tambyen, la Espanya no aze nada, i kuando los Almanes azen en Atena el grande aferramyento de masa del 25 de marso 1944, los espanyoles refuzan de rapatriar a estos desmazalados porke tyenen dainda los djudyos venidos de Bergen Belsen (vos akodro ke el grupo ke vamos a yamar el grupo de Revah ayego en Espanya el 14 de fevrero, i dainda esta aya, i va kedar asta junyo). La Espanya no puede akojer otros 155 espanyoles…Ke asko. En avril 1944, son metidos en vagones de behemot i yevados a Bergen Belsen.
El 24 de junyo 1944, una vez ke el grupo Revah se fue a Casablanca, los Espanyoles demandan a los Almanes de rapatriar los 155, ama esta vez son los Almanes ke no kyeren, sözde ke el desbarkamyento alyado del 6 de junyo les impide el viyaje. Los 155 djudyos kedan en Bergen Belsen asta el 6 de avril 1945, despues son metidos en un treno viyajando en medyo de la Almanya bombardada. Son liberados por los Amerikanos el 13 de avril 1945, manko de un mes antes de la fin de la gerra.
Despues de la gerra, Radigales keda en Gresya. El 12 de avril 1945, en vedra no estamos dainda despues de la gerra ama yene manko de un mes de su kavo, es echo Embiyado Ekstraordinaryo i Ministro plenipotensyaro de Espanya en Gresya, i el 29 de oktovre de 1946, Enkargado de Negosyos. Este mismo anyos, es yamado prezidente de la komisyon kreada en Gresya para mirar las reklamasyones de los djudyos sefaradim ke desharon sus byenes antes de ser deportados. I el 10 de desyembre es nombrado Embashador de Espanya en Gresya.
A oir esto, puede pareser ke Radigales fue byen tratado por su governo afillu ke no se amostro obedesyente a su ministro durante la okupasyon almana. No es lo ke pensa Isaac Revah, ke me disho ke, al kontraryo, tuvo de asperar su nominasyon komo embashador asta kuatro mezes solo de su retiro, kuando los otros ivan adelantre muncho mas presto ke el.
Esto dicho, meldi ke el 21 de mayo de 1951 obtuvo un diploma del Prezidente de la Kruz Kolorada grega, por su aksyon en favor de la nasyon grega durante la okupasyon almana. Mozotros konosemos solo su aksyon en favor de los djudyos espanyoles de Selanik, ama si este ombre teniya un korason komo lo amostro para los djudyos, no ay de enkantarse si izo tambyen otras kozas ke no savemos en favor de otros desmazalados.
Radigales eskapo su karrera diplomatika en Gresya, syenso elijido myembro onoraryo de la asosyasyon kulturala grega Parnasos.
El 18 de julyo de 1954, obtyene la Gran Kruz del Orden del Merito Sivil (esta vez espanyol). Mora en su kaza de nasimyento en Graus, i se muere en 1970, a la edad de 86.
44 anyos despues de su muerte, kijo dizir el 26 de fevrero 2014, Radigales a sido yamado Djusto entre las Nasyones por el Governo de Israel, i esto, komo ya lo dishe el djueves pasado, gasyas al lavoro de Isaac Revah, ke konta komo, durante su manseves, el se kreiya ke el ombre ke los aviya salvado era Franco. I komo lo dize Isaac Revah, no era kolay de dar esto a entender, en la Fransya de los anyos 1950, a sus amigos estudyantes fransezes, indimas a sus amigos ijos de republikanos espanyoles.
Ama despues se dyo kuenta ke la haliz persona ke obtuvo su salvasyon era Sebastian Romero Radigales, konsul jeneral de Espanya en Atena en 1943. El es ke aprovo durante mezes de konvenser el Ministeryo de los echos ajenos en Madrid, opozado a sus aksyones i intervensyones, de ayegar a un akodro kon el governo alman para la liberasyon de los djudyos espanyoles de Selanik. Delantre de la opozisyon espanyola, Radigales da a entender a sus kapos, primo ke esto es una kuestyon de vida o muerte, sigundo ke los Amerikanos, ke estan, mismo si dainda estamos leshos de la vikorya final, a poko a poko ganando la gerra, no entenderan deke la Espanya no izo komo los Italyanos, portanto alyados de la Almanya, i ke eyos rapatrian sus suditos djudyos.
Es Radigales tambyen ke bushka varyas maneras de liberar a los djudyos: en primero verso la Turkiya, ke no acheta, despues verso la Espanya por mar por un vapor espanyol o suedano de la Kruz Kolorada, o embiyarlos a Atena, lo ke los Almanes refuzan.
Radigales aprova todo lo ke es posivle sin dinguna vez kedarse, afillu si sus kapos le ordenan de kedarse. I al kavo, el es ke reusho a obtener tanto de los Almanes komo de los Espanyoles de travar los djudyos de Bergen Belsen.
En junyo 2010 la Fundasyon Internasyonala Raoul Wallenberg demando para Radigales la medaya de los Djustos, ama Yad Vashem respondyo en janvier 2012 ke no pensava pueder rekonoserlo komo Djusto, porke no teniya la preva ke Radigales tomo rizikos personales para si mismo, lo ke es una kondisyon para obtener la medaya. Fue Isaac Revah ke embiyo en janvier 2013 un muevo dokumento be bushko i topo, amostrando komo sus kapos le ordenavan de kedarse de azer kualkyer koza en favor de los djudyos, i komo el, dezobedesyendo a los ordenes, nunka se kedo.
Es grasyas al lavoro de Revah ke esta medaya fue dada post mortem a Radigales en la persona de su inyeta Elena Colitto Castelli, venida por esto de Italya a Yerushalayim, ande se tuvo la seremoniya el 30 de septyembre de 2014, en prezensya de Isaac Revah, el venido de Fransya por la okazyon, i tambyen del embashador de Espanya en Israel.
Sovre esto tengo de desharvos agora, dezeando a vozotros i a vuestras famiyas una anyada buena i dulse, ugurliya i yena de buenas kozas.
Al djueves ke vyene, si kyere el Dyo!
Edmond Cohen
Paris Fransya
