eSefarad Noticias del Mundo Sefaradi
Keridos amigos,
Esta semana pensi de azer mi emisyon de djueves sovre los livros dichos deuterokanonikos, ke son los livros djudyos ke no azen parte del kanon bibliko djudyo ni protestanto, ama ke fueron adjuntados por los katolikos a lo ke yaman el Antiguo Testamento. Por egzemplo los livros de los Makabim, de ande sale muestra fyesta de Hanuka, se topan en una Biblia katolika, ama no en una Biblia djudiya…
Saludes a todos.
Los ke van a kerer oirme en direkto lo podran indosen a las 4 h 06 PM, ora de Paris, sovre www.radioj.fr Kale klikar arriva a la derecha sovre Ecouter Radio J en direct.
I si no es en direkto, abasta asperar un diya o dos, i despues ir a oirme en redifuzyon sovre http://www.radioj.fr/node/145
Saludos a todos
Edmond Cohen Paris Fransya
——————————————————————————————
LOS LIVROS DEUTEROKANONIKOS
Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Por empesar, vos tengo de dizir ke en lugar del proksimo atelye de konversasyon de Vidas Largas ke deviya de tenerse el martes 25 de avril, en el Centre Communautaire, tendremos este diya, a las 15, una projeksyon de un filmo en djudeoespanyol de muestro amigo Shabetay Sagues sovre Rhodes. Vos diré mas sovre este filmo la semana proksima.
Vos akodro tambyen ke agora las emisyones de Radio J se pueden oir por internet sovre el sityo de Radio J, de toda manera en direkto, i en vezes despues…depende del tekniko. http://www.radioj.fr
Aze dos semanas, avlandovos del tanit de tres diyas ke izo Ester antes de ir a ver al rey, vos dishe ke, en la biblia de los katolikos (ama no de los protestantes) ay pedasos del livro de Ester ke se topan en las biblias katolikas, i ke no se topan en el Tanah de los djudyos, por egzemplo el desmayo de Ester delantre del rey.
Esto me dyo la idea de avlar oy de lo ke se yaman los livros deuterokanonikos del Antiguo Testamento.
Muncha djente, sovre todo los ke tyenen biblias protestantas, la Biblia de Second, por egzemplo, kreen ke los byervos «Tanah» (Tora, Neviim, Ketuvim: El Pentatoko, los Profetas, los (otros) Eskritos) i «Antiguo Testamento» son dos maneras, una djudiya, la otra kristyana, de yamar la misma koza, kijo dizir la Biblia de los djudyos. Es vedra por lo ke es de los protestantes. Ama es un yerro para lo ke es de los katolikos.
En una Biblia protestante komo la de Second, ke es de leshos la traduksyon al franses la mas konosida desde un siglo, los livros del dicho «antiguo testamento» son los del Tanah, no ay diferensya dinguna, salvo la manera de yamar muestra Biblia, byervo grego para yamar el Livro. Mozotros dizimos la Biblia en franses, o el Tanah en ebreo, olvidando ke para un djudyo, la Biblia es el Tanah i nada mas, kuando, para un kristyano, la Biblia es un Livro en dos partes ke no son de la misma valor: «el antiguo testamyento», si, ama sovre todo el «Muevo Testamento». El byervo testamento, ke vyene del latino testamentum, es la traduksyon del byervo ebreo Edet, ke se diriya oy testimonyo. Ama lo ke es yamado Edet en la Tora es munchas mas vezes yamado Berith, trasladado oy por Alyansa, ama en ladino por firmamiento. Por egzemplo (Shemot, XXXI, 16: «Y guardaran hijos de Israel al Sabbath, por hazer al Sabbath a sus generancios, firmamiento perpetuo (berith olam)».
Asigun los Kristyanos, afillu si el Dyo prometyo a los ijos de Israel «berith olam» (firmamyento perpetuo, aliansa para syempre), uvo kon la umanidad, i no solo kon Israel, una «mueva aliansa» o «muevo testamento» kuando vino Jesus. En mismo tyempo, de toda manera, la Iglesya se disho ser el «Verus Israel» (haliz Israel), lo ke no eran mas los djudyos…
Por esto es ke tal djudyo ke me olvidi diziya: «Para mozotros, lo ke se yama el Antiguo Testamento ni es un testamento (es una aliansa), ni es antiguo tampoko (syendo esta aliansa no troko)».
Esto todo para dizirvos, keridos oyentes, ke, kual ke sea la manera de yamarlos, el Antiguo Testamento o el Tanah, es la misma koza para los protestantes i los djudyos, ama no para los katolikos, ke adjuntaron al kanon de los djudyos, en el Antiguo Testamento, livros o pedasos de livros, por siguro djudyos i eskritos por djudyos, ama no azyendo parte del Tanah.
Kualo ay en muestro Tanah?
5 livros de la Tora: Bereshit, Shemot, Vayikra, Bamidbar, Devarim.
21 livros de los Profetas, sea 9 dichos de los profetas, i 12 dichos de los chikos profetas (estos 12 eran kontados komo un solo livro del tyempo de Flavius Josephe).
Los 9 livros de los Profetas son: Yeoshua, Shoftim, Shemuel 1, Shemuel 2, Reyes 1, Reyes 2, Yeshayau, Yrmiyau, Yehezkel.
Los 12 chikos profetas son: Oshea, Yoel, Amos, Ovadya, Yona, Miha, Nahum, Habakuk, Tsofonya, Hagay, Zeharya, Malahi.
Los 13 livros de Eskritos son: Teilim (los Psalmos), Mishlé (Proverbios), Iyov, Shir hashirim (el Kantar de los kantares), Ruth, Eha (Las Lamentasyones), Koelet (Eklezyastes), Esther, Daniel, Ezra, Nehemya, Divre Ayamim I (Kronikas I) Divre Ayamim II.
Asigun la tradisyon, es la Yeshiva de Yavne, fundada por Yohanan Ben Zakay despues de la kaida de Yerushalayim en 70, ke arrekojo i eskojo, verso el anyo 90, estos 39 livros en todo, komo azyendo el kanon bibliko. Estos 39 livros del Tanah son ansi dichos kanonikos.
Komo ya vos dishe al empesijo, los Katolikos adjuntaron a lo ke yaman el Antiguo Testamento otros livros. Komo vinyeron despues del kanon djudyo, son yamados Deuterokanonikos, lo ke kyere dizir kanonikos de sigunda parte (la rais deutero, en grego, kere dizir sigundo. Por egzemplo el byervo Deuteronome, para el livro Devarim, en ebreo Palavras, kyere dizir en grego sigunda ley).
Kuales son estos livros (o pedasos de livros) deuterokanonikos? Los livros de Judith, Tobie, el primer i el sigundo livros de los Makabim, la Savidurya, el Eklezyastiko (de no konfundir kon el Eklezyastes), el livro de Baruch, los kapitulos 13 i 14 del livro de Daniel, enfin unos pedasos aki i aya en el livro de Esther.
Komo vos dishe, afillu si estos livros no entraron en el kanon djudyo, yene son djudyos, i yene son interesantes.
Empesaremos muestra lista por el livro de Judith. Asigun lo ke meldi en la Biblia katolika dicha de Jerusalem, fue eskrito en ebreo en Erets, entre el kavo del siglo 2 i el empesijo del siglo 1 antes de la era kristyana, «en la epoka grega», dizen estos katolikos, ama no entyendo esto, syendo ke el kavo del siglo 2 i el empesijo del siglo 1 korresponden a la epoka djudiya i no grega de los reyes hashmonaim. El teksto ebreo dezaparesyo i solo keda el teksto grego. Esto solo abasta para ser una razon deke no aze parte del kanon djudyo, ke solo eskojo tekstos en ebreo.
El livro de Judith no tyene valor istorika. Mos konta komo el rey Nebuhanetsar kijo ovligar (un poko komo Antiochos Epiphanes) los djudyos a deshar sus relijyon para la del rey, i embiyo sus armadas, yevadas por su jeneral Holophernes, para destruir a los djudyos, ke se defendyeron, i fueron enserrados en una sivdad yamada Betulia. Holophernes korta a los djudyos la yegada de agua, i se van a morir de sed. Pensan renderse al kavo de sinko diyas kuando se prezenta una bivda ermoza i manseva, yamada Judith (Yeudit: la djudiya) ke apromete de ir sola a ver los enemigos para kombatirlos…a su manera. Se va ver a Holophernes, kapo de los enemigos, se amostra ermoza, el la kyere en su tyenda, eya acheta i lo emborracha, i una vez el emborrachado, le korta la kavesa i se fuye kon su kavesa. Los djudyos atakan a la armada enemiga, ke, sin kapo, se fuye. Judith, onrada de todos, se keda bivda i se muere a los 105 anyos.
Al lado del livro de Judith, ay el de Tobiya. Asigun André Chouraqui, «el livro de Tobiya es una de las djoyas de la literatura ebraika…Esto mos da a eskarinyarmos de la pedrita del orijinal en ebreo o arameo, i de su ekskluzyon del kanon de la Biblia ebraika». Asigun la Biblia de Jerusalem, el livro fue eskrito ande los djudyos de la diaspora, puede ser en Ayifton, en el siglo 4 o 3 antes de la era kristyana.
Es un syerto Tobit, del trivo de Neftali, ke empesa por kontar su propya istorya a la primera persona (ama esto es solo al empesijo, despues va trokar). A la diferensya de la istorya de Judith, istorya militar i de muerte, la istorya de Tobit i de su ijo Tobiya es una istorya de amor ande todos son djente buena i se kyeren. Tobit ama a su mujer i a su ijo Tobiya, ke ama a sus padre i madre. Tobit se echa en el patyo de su kaza i se durme al lado de una pared. Vyene un pashariko ke le kaga sovre los ojos i lo aze syego.
En el mismo tyempo, un syerto Raguel, morando en Ecbatane, en Mediya, teniya una ija yamada Sarra, i a kada vez ke su padre Raguel keriya kazarla, el demonyo Asmodeo matava a su marido. Lo izo syete vezes en sira, i por siguro dinguno keriya mas kazarse kon Sarra.
Es el angel Refael ke va tener por lavoro de kurar los ojos de Tobit de una parte, i de kazar Sarra kon el ijo de Tobit de otra parte.
Tobit embiya su ijo Tobiya en Ecbatane ande un syerto Gabael para tomar atras paras suyas ke tyene en depozito. Su padre le demanda de toparse un kompanyero para el viyaje, i Tobiya topa a el anjel Refael sin saver ke es un anjel.
En viaje, Refael ayuda Tobiya a aferrar un pishkado, dizyendole de guadrar la fyel, el korason i el ligado, porke la fyel kura los ojos i kemar el korason i el ligado alesha los demonyos komo Asmodeo.
Ayegados a Ecbatane, se van ande Raguel, i Tobiya demanda i obtyene el akodro de Raguel para kazarse kon su ija, afillu la sekana del demonyo Asmodea. I grasyas al korason i al ligado del pishkado kemados, Asmodea se va, i Tobiya puede kazarse kon Sarra, depues se va rekovrar el depozito ande Gabael, abolta a su kaza, i kura a su padre kon la fyel del pishkado. I Tobit puede ver de muevo. Todos azen orasyones, i bendizen a Yerushalayim. I el livro se eskapa por la estruisyon de Ninive la negra.
Komo lo vesh, es un livro ke asemeja un poko a los kuentos de las mil i una noches. De esto a dizir, komo Chouraqui, ke es «una de la djoyas de la literatura ebraika»…vos desho meldarlo i azer vuestra propya opinyon…
Vos tengo de avlar agora de los dos livros de los Makabim, ke son muy interesantes de un punto de vista istoriko, porke estos dos livros mos ambezan komo empeso la rebuelta djudiya kontra Antyochos Epifanes, rey Seleusido, i komo los djudyos, yevados por los ijos de Matatyau el Cohen, de la famiya de Hashmon, arrondjaron a los Gregos Seleusidos de Djudea, lo ke fue el nasimyento del reynado de los Hashmonaim en Djudea, i de la independensya djudiya en Djudea.
En vedra los dos livros son muy diferentes, i eskritos por dos autores diferentes. El primer Livro, afillu si solo kedo la traduksyon grega, fue eskrito en ebreo. Es un livro istoriko ke mos konta kuarenta anyos de istorya, empesando por la suvida al trono de la Syria inkluyendo Erets Israel, de Antiochos IV, dicho Epifanes, en 175 antes de la era kristyana, i eskapandose a la muerte de Shimon, ijo de Matityau, en 134, kaji kuaranta anyos mas despues. Entre estos dos evenimyentos munchas kozas se pasan, i sovre todo, en 165, ay Yeuda dicho Makabi, uno de los ijos de Matityau, ke konkista el Bet Amikdash i le permete de ser de muevo el templo del Dyo, esto va darmos la fyesta de Hanuka.
Afillu si el primer livro konta la istorya de estos 40 anyos de un punto de vista relijyozo, yene keda un livro istoriko, i es siguro ke sin el seriya una parte fundamentala de la istorya djudiya ke mos mankariya. De la misma manera ke la istorya djudiya deve muncho a Flavius Josephe, deve tambyen muncho al autor anonimo del Livro I de los Makabim, un djudyo ke lo eskrivyo verso el anyo 100 antes de la era kristyana.
El sigundo Livro de los Makabim es, komo lo dishe, diferente del primero; no es su kontinuasyon: konta la misma istorya, ama sovre un tyempo mas kurto, unos 15 anyos, kontados en grego de un punto de vista muncho mas relijyozo ke istoriko. El livro es prezentado komo un kondensado (oy diriyamos un digest) de una ovra de un syerto Jason de Cyrena.
Otro Livro deuterokanoniko, el livro de la Savidurya de Shelomo, sözde eskrito por el rey Shelomo, en vedra por un djudyo ke, asigun Chouraqui (i no el solo) deviya bivir en Alexandria i lo eskrivyo en la primera parte del primer siglo de la era kristyana, puede ser en los anyos kuarenta, del tyempo de los Emperadores Caligula o Claude.
Este livro empesa por konsejos de vida, un poko komo los provierbos de Shelomo, i despues mete en valor la Savidurya, savidurya del Dyo i ke vyene del Dyo.
Los kristyanos izyeron de la Savidurya mas ke un atributo del Dyo, la izyeron una persona distinta del Dyo el mismo, i la yamaron Espiritu Santo. Vos akodro ke, en el kristyanismo, el misteryo dicho de la Santa Trinidad es ke el Dyo es uniko en tres personas diferentes: el padre, el ijo, i el espiritu santo. Vos akodro esto todo porke los kristyanos ven en el livro de la Savidurya ke esta empesariya de dezatarse del Dyo de ande vyene. En vedra me parese ke es ir muy leshos ke meldarlo ansina, ama es vedra ke en el livro, es la Savidurya del Dyo ke aze esto i esto.
Otro Livro deuterokanoniko, el livro yamado el Ekleziastiko, ke, komo lo dishe, no kale konfundir kon el Eklezyastes. Este livro Eklezyastiko fue eskrito, verso el anyo 190 antes de muestra era, i antes de la rebuelta de los Macabim, por un djudyo yamado Jesus ben Sira, ke lo eskrivyo en ebreo, ama mismo en ebreo su livro no fue tomado en el kanon djudyo. Los katolikos lo tomaron en su traduksyon en grego.
Komo el livro de los Proverbyos, empesa por sentensyas i konsejos de vida, una vida bushkando la savidurya.
Otro livro deuterokanoniko, el livro de Baruch, ke se prezenta komo eskrito por Baruch Ben Nerya, el sekretaryo i amigo del profeta Yirmiyau, ama, asigun Chouraqui, i no el solo, parese ke fue eskrito por munchas personas de ideas diferentes, de tal manera ke este livro de profesiya no fue tomado para entrar en el kanon djudyo. Es un livro de enkorajamyento a los egzilados.
El famozo fabulisto franses La Fontaine se enamoro por este livro kuando lo meldo, i demandava a todos los ke enkontrava: «Tenesh meldado Baruch?» al punto ke kedo famozo por esta kuestyon. I komo la djente, en jeneral, le respondiya no, el diziya: «Es muy pekado, porke aya ay muy ermozas kozas…»
Veo ke no vo pueder eskapar oy lo ke vos keriya dizir sovre los deuterokanonikos, no embarasa, el kusur va ser para el djueves ke vyene, si kyere el Dyo!
Edmond Cohen
Paris Fransya
