eSefarad Noticias del Mundo Sefaradi
Keridos amigos
Emision del 18/1
Mi emisyon va ser sovre los djudyos de lo ke se yama agora el Irak, i ke era antes la Kaldea o la Babyloniya. Me kedo al Farhud (pogrom) de 1941. Eskaparé, si kyere el Dyo, la semana despues.
Emision del 25/1
Mi emisyon de radyo va ser la kontinuasyon i el kavo de lo ke teniya empesado la semana pasada sovre los djudyos de Irak. I despues vo avlar de Aharon Appelfeld, grande eskrivano djudyo ke mos desho la vida el 4 de janvier.
Saludos a todos
Edmond Cohen Paris Fransya
——————————————————————————————
LOS DJUDYOS DE IRAK (1)
Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Por empesar, vos akodro ke el proksimo atelye de konversasyon de Vidas Largas se tendra el martes ke vyene 23 de janvier, a las dos i medya, en el Centre Communautaire. Estos atelyes son avyertos a todos, venid munchos.
Vos akodro tambyen ke agora las emisyones de Radio J se pueden oir por internet sovre el sityo de Radio J, de toda manera en direkto, i tambyen despues en la redifuzyon de la mediudiya entera. http://www.radioj.fr/node/55
En la noche del 3 al 4 de este mez de janvier mos desho la vida un grande eskrivano djudyo de Israël, Aharon Appelfeld, i teniya la entisyon de avlarvos oy de el, ama komo vos kyero tambyen avlar de los djudyos de Irak, i ke esto me va tomar muncho tyempo, vo deshar Appelfeld por oy, i lo guadraré para una otra emisyon.
Es siguro ke misma una emisyon de vente minutos no va ser bastante para avlarvos de una de las mas vyejas komunidades djudiyas del mundo, la del pais ke se yama oy Irak, i ke se yamava antes Kaldea o Babilonia o Mezopotamiya.
La istorya de los djudyos de Irak empesa kon Avraham avinu, primero de todos los djudyos ke nasyo, asigun Bereshit, en Ur Kasdim, en Kaldea, ke se topa el sur del Irak de oy, ke despues se fue en Haran, al norte (no se save agora muy byen ande), i de aya en Kenaan, empesando por Shehem.
De tal manera ke el puevlo djudyo entero tyene su orijen leshana en la Kaldea de Ur. I asigun Leonard Woolley, el famozo arkeologo ingles ke paso una grande parte de su vida en bushedades en la antigua sivdad de Ur, no se puede entender la vida de Avraham (sovre el kual eskrivyo en 1936 un livro trasladado en franses i ke meldi al tyempo) sin akodrarse ke Avraham, mismo en Kenaan, keda un Kaldeano bivyendo asigun los uzos de Ur, su sivdad de nasimyento, i mismo asigun el kodigo de Hamurabi. Por egzemplo, mos dize Woolley, la manera de tomar una syerva komo Agar komo madre de su ijo, su mujer no puedyendo tener kriatura, esto, mos dize Woolley, es un uzo kaldeano.
Despues el Tanah mos konta la istorya de los djudyos en Ayifton, la salida de Ayifton kon Moshe Rabenu, la konkista de Kenaan kon Yeoshua Bin Nun, los Shofetim, i despues los reynos de Shaul, David i Shelomo, i despues la kortadura de Erets Israel en dos reynos, el reyno de Jeroboam i sus suksesores, yamado Israel, al norte, kon Shomron komo kapitala, i el reyno de Roboam i sus suksesores, yamado Yeuda, al sur, kon Yerushalayim komo kapitala. El el reyno de Yeuda ay solo tres trivos, Yeuda, Binyamin i Levi. Los diez otros trivos son en el reyno de Israel, ke va ser konkistado i destruido por los Asiryanos en 722 antes del Kristo, i sus moradores tomados, deportados, i dezaparesyeron. Son los dyez trivos pedridos de Israel.
En kuanto al reyno de Yeuda, va konoser dos siglos despues, en 586 antes del Kristo, la misma desgrasya, kon el imperyo neo-babilonyano de Nebuhadnetsar (Nabuchodonosor). La sivdad de Yerushalayim i el Bet Amikdash fueron destruidos, el rey Tsidkiyau vido sus ijos degoyados delantre de el, despues le arreventaron los ojos, lo ataron kon kadenas de bronzo, i lo yevaron en prezo en Bavel la kapitala de los Babylonyanos, i kon el la mayoriya del puevlo djudyo, kijo dizir del reyno de Yeuda.
Es en este tyempo ke los djudyos komposaron este psalmo 137 tan famozo, ke empesa por el pasuk «Sovre los rios de Babilonia, alli estuvimos, tambien lloramos, en nuestro membrar a Zion…(…)…Como cantaremos càntico de Adonay, sobre tierra estraña? Si te olvidaré, Yerusalaim, olvidese mi derecha. Apeguese mi lengua a mi paladar, si no te membrare; si no fiziere subir a Yerusalaim sobre cabeça de mi alegria».
El amor de Tsion, ama el odyo verso Babel. En este mismo psalmo, ay tambyen estos pesukim ke eskapan el psalmo: «Compaña de Babilonia la preada, bienaventurado ke pagare a ti el gualardon que gualardonaste a nos. Bienaventurado el que travare y desmenuzare (frakasare) tus chiquitos a la peña (roka)».
Ama, komo ya lo savesh, el imperyo neo-babylonyano kae delantre los Persos dirijidos por el rey Cyrus en 539. I este rey va permeter a los djudyos de aboltar en Yerushalayim i la Judea. Algunos aboltan, kon Zerubavel, inyeto del rey Yoyakin (sovrino de Sidkiyau, i ke aviya sido rey antes de el). Otros aboltan mas despues, kon Ezra i Nehemya. I el puevlo djudyo se va topar espartido en dos en el imperyo perso: los ke aboltaron en Judea (los primeros syonistos) i los ke kedaron en la Babyloniya agora persa. La istorya de Esther se pasa en Shushan, kapitala de la Persa. Otros djudyos kedaron en Bavel mismo.
En los anyos 330, vyene Alexandros de Makedonya, ke konkista el imperyo perso, i se kaza kon la ija del rey vensido Darius en 324, ama se muere un anyo mas despues, en 323, en Bavel, a la edad de solo 32 anyos. Sus kapos de armada se pelean entre eyos i es el jeneral Seleucos ke se guadra para el la Persa inkluyendo Bavel i tambyen Yerushalayim. Los djudyos de Bavel van a kedar basho la dominasyon de los Seleusidos, myentres los de Judea se van a topar entre los Seleusidos i los Lajidos, kijo dizir los desendyentes de otro jeneral de Alexandros, Ptolemeo, ke por su parte se tomo Ayifton. Al kavo, komo ya lo savesh por la fyesta de Hanuka, los djudyos de Judea van a echar a fuera los Seleusidos, i tener un reyno djudyo de los Hashmonaim, ke va surear un siglo, mas o menos de 163 a 63, kuando van a ayegar los Romanos en Djudea.
Ama por lo ke es de los djudyos kedados en Bavel, los ke mos interesan oy, la situasyon va ser diferente, porke en mismo tyempo ke los Seleusidos son echados afuera de Yerushalayim i la Djudea, son echados tambyen afuera de Bavel, ama esta vez no por los djudyos, ma por los Partes arsasidos. Los djudyos de Bavel kaen ansina basho la dominasyon de los Partos myentres ke los de Judea son independyentes. Rabbi Hillel, famozo haham de Bavel, se va bivir en Yerushalayim.
Los djudyos i los Partos, sovre todo despues de 63 antes del Kristo, tyenen el mismo enemigo, ke son los Romanos, i kuando los djudyos van a pedrer a Yerushalayim en 70 despues del Kristo, es kaji siguro ke munchos djudyos se fuyeron verso la Bavel de los Partos.
Yene Flavius Josèphe mos konta la istorya de dos ermanos djudyos nasidos en la sivdad de Neardea en Babyloniya, ke se yamavan Anilaios i Asinaios, i ke se rebueltaron kontra los Partos en medyo del primer siglo despues del Kristo, kijo dizir verso los anyos 50, i en un primer tyempo ganaron una syerta independensya komo aviyan echo los Makabim, i esto sureo durante unos kinze anyos, ama finalmente fueron matados i peryeron sus poder.
Los djudyos de Bavel son dirijidos por un ombre de la kaza de David (se dize ke el rey Yoyakin fue el primero) yamado resh galuta (kapo de egzilyo), en grego exilarkos. Uvo exilarkos durante 900 anyos, asta el siglo 11.
En 226, los Persos de la dynastiya Sasanida vyenen en lugar de los Partos. El rey Ardachir es koronado en Ctesiphon. Los Persos kontinuan a pelearse kontra los Romanos, kon el ayudo de los djudyos.
Ama despues los Sasanides kyeren ovligar los djudyos al mazdeismo. Yazdgard II proibe de observar el shabat, i en 468, el exilarko es matado, i las yeshivas son serradas. Los djudyos se rebueltan, i el Resh galuta Mar Zutra II dechida una independensa djudiya en Babyloniya ke va surear 7 anyos, ama eskaparse en 520.
Un siglo se pasa, esta vez los djudyos ayudan o los Persos kontra los Romanos i aprovechan la kaida de Yerushalayim entre sus manos para governar esta sivdad de 614 a 617.
Ama lo ke kale dizir sovre todo es ke estos siglos de Bavel basho los Sasanidos va ser el tyempo ande se va eskrivir el Talmud. La primera akademya (yeshiva) es fundada en Nehardea. Destruida en 260, es yevada en Pumbedita por Rav Yeuda. Ama desde 220, Rav funda otra yeshiva en Sura ke va turar 800 anyos i azer venir asta mil estudyantes.
Las yeshivot de Bavel son inspiradas de las de Palestina, i son a la vez lugar de estudyo (bet midrash) i tribunales (bet din).
Las yeshivot de Sura i Pumbedita resiven kuestyones de todas partes del mundo, i sus repuestas (teshuvot) azen a poko a poko la alaha, en varyos dominyos.
En trezyentos anyos, del empesijo del siglo 3 al kavo del siglo 5, se eskrive, en ebreo o en arameo, lo ke se yama el Talmud Bavli, konosido por ser mas kompleto i mijor ke el Talmud eskrito en mismo tyempo en Palestina, yamado Talmud Yerushalmi. Agora, kuando se avla del Talmud sin dizir el kual, kale entender el Talmud Bavli.
Otras ovras son tambyen eskritas en mismo tyempo, komo por egzemplo el targum de Onkelos, ke es mas ke una traduksyon del ebreo al arameo de la Tora. Es en mismo tyempo una interpretasyon.
Munchos piyutim (poeziyas relijyozas) son eskritas en mismo tyempo, komo por egzemplo la orasyon Alenu.
En 660, ayegan los konkistadores muzulmanos arabos, i una grande parte del mundo, i del mundo djudyo en mismo tyempo, ke va de la Espanya asta la Palestina i la Mezopotamiya, se topa basho la dominasyon del kalifato dicho de los Omeyades.
Las kozas se pasan byen para los djudyos, sovre todo los djudyos de Palestina, tresalidos de esbrochar de los Romanos kristyanos ke los tratavan mal. Los muzulmanos se amostran tolerantes, i las relasyones son buenas entre el poder muzulmano i los kapos de la komunitad djudiya.
En 750, vyenen los Abassides despues de los Omeyades, i de Damas, yevan la kapitala a Bagdad. Es el tyempo de los merkaderes djudyos dichos radhanitos, ke se enrikesen por el komdersyo internasyonal.
Los kapos de las yeshivot de Sura i Pumbedita, agora yamados geonim, traen las yeshivot en Bagdad, ke es en este tyempo el lugar el mas avyerto i intelijente del mundo. Entre 842 i 855, Paltoy Bar Abbaye, gaon de Pumbedita, embiya el Talmud Bavli a los hahamim espanyoles.
De la misma manera ke el yidisch se eskrive en karakteres ebreos, los eskrivanos djudyos de Bagdad eskriven en arabo kon karakteres ebreos.
El mas famozo de los Gaonim es Saadya Gaon (882 – 942). Es el solo ajeno (es nasido de Ayifton) ke sea metido kapo de una Yeshiva, la de Sura. Lucha kontra el karaïsmo, muy fuerte en estos tyempos.
Despues de Saadya, por varyas razones, la komunidad djudiya de Bavel, en vedra de Bagdad, eskae a poko a poko frente a los hahamim espanyoles i fransezes.
Esto dicho, kuando se melda Binyamin de Tudela ke konta komo el Kalif de Bagdad resive la vijita del resh galuta, akojido komo un muy alto benadam, si lo ke dize es vedra, se puede dizir ke en los anyos 1060, todo iva dainda byen en Bagdad para los djudyos.
Malorozamente, en 1258 vyenen los Mongoles ke konkistan Bagdad, azen una matansina terrivle de la povlasyon, inkluyendo, deke no, a los djudyos. Las bibliotekas de la sivdad son kemadas i Bagadad no es mas nada, afillu si es un djudyo, Saad al Dawla, ke va toparse en 1284 kapo de los vizires en la korte del khan mongol, ama va kaer en 1291.
En los siglos ke sigen, Bagdad va ser tomada dos vezes por Tamerlan, ke la sigunda vez, en 1401, va matar a toda la djente. Despues, entre 1410 i 1507, Bagdad va perteneser a los turkomanes de la oveja preta i de la oveja blanka. No se save lo ke fue de los djudyos en este tyempo, ama Bagdad, de toda manera, era poka koza.
En 1507, vyenen los Persanos safanides. I despues, en 1534, es Suleyman el Magnifiko ke toma Bagdad. Kon el los turkos osmanlis, konosidos por ser buenos kon los djudyos, ke agora son pokos i proves.
Al kavo del siglo 18, los djudyos Bagdadlis se amostran merkaderes por las Indyas. Se van aya i fundan la komunidad dicha de los Bagdadis.
En Bagdad vyene la Alyansa Israelita Universala ke funda una eskola para los ijikos en 1865 i en 1895 una eskola para las ijikas.
Al kavo del siglo 19, ay unos kuantos 54.000 djudyos en el vilayet de Bagdad, mas unos 4.500 en el vilayet de Bassora i unos 5.000 en el vilayet de Mossul. Esto todo aze el Irak de oy, ama en este tyempo estamos dainda en provinsyas del grande imperyo osmanli.
Los djudyos de Bagdad no son sefaradis. Avlan arabo. Ama kuando vyenen a Estambol, la kapitala del imperyo, topan los djudyos avlando espanyol. Un djudyo bagdadli ansina se kazo en Estambol kon una ermana de mi vava, i se izo sefaradi por kazamyento…Sus kriaturas avlavan espanyol.
Kuando vyene la Primera Gerra Mundyala, los Osmanlis se meten de la vanda de los Almanes, i pyedren la gerraen mismo tyempo. I no solo pyedren la gerra, ma tambyen pyedren immensos territoryos arabos, i entre eyos el territoryo del Irak, konkistados por los Inglezes, ke en 1920 resiven un mandato de la SDN. Los inglezes meten un rey arabo de la famiya de los Hashemi, Fayçal. Su ministro de las finansas va ser un djudyo, Sir Sassoon Eskell.
Kuando se funda el reyno de Irak, los djudyos no son muncho syonistos. Ama los arabos, eyos, son antisyonistos. Empesan matansas de djudyos aki i aya. Un atentato a la bomba kontra un kal el diya de kipur 1936, orozamente, no reushe.
Los nazis almanes, enemigos de los djudyos i de los inglezes, son byen akojidos por los nasyonalistos arabos de Irak. Baldur Von Schirah, kapo de las mansevezes hitleryanas, es resivido por el rey Ghazi i lo enkoraja de azer lo mismo. En 1939, el Irak akoje al Gran Mufti de Yerushalayim, Amin al Husseini, echado afuera por los Inglezes.
En 1941, se pasa el Farhud, ama no tengo bastante tyempo para kontarvos esta parte de la istorya de los djudyos de Irak, ke va ser el empesijo de los evenimyentos ke se van eskapar por la dezaparisyon entera, en pokos anyos, dela povlasyon djudiya del pais.
Vo lo kontaré al djueves ke vyene, si kyere el Dyo!
LOS DJUDYOS DE IRAK (2) y Aaron APPELFELD
Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Por empesar, vos akodro ke el proksimo atelye de konversasyon de Vidas Largas se tendra el martes 6 de fevrero, a las dos i medya, en el Centre Communautaire. Estos atelyes son avyertos a todos, venid munchos.
Vos akodro tambyen ke las emisyones de Radio J se pueden oir por internet sovre el sityo de Radio J, de toda manera en direkto, i tambyen despues en la redifuzyon de la mediudiya entera: http://www.radioj.fr/node/55
La semana pasada vos estava kontando la istorya de los djudyos de Irak, i empesi por avlarvos del nasimyento de Avram avinu en Irak, i de la deportasyon de los djudyos del reyno de Yeuda en Bavel. Son, si no me yerro, las solas dos vezes ke avli del Irak en el Tanah.
Despues de esta emisyon arresivi de mi amigo Jose Molho una video akodrandomos no solo lo ke vos dishe, ama tambyen ke munchas otras kozas del Tanah se pasaron en Irak.
Por empesar, mos dize la video, el Gan Eden se topava en Irak, i dunke Adam i Hava nasyeron en Irak. El Gan Eden? En Irak? D’ande par ande? La video no lo dize, ama si meldash el Kapitulo 2 de Bereshit, meldash en el pasuk 10 ke un rio sale de Eden, ke se esparte en kuatro. El pasuk 14 mos dize: «Y nombre del rio el tercero Hidekel, el el andante a oriente de Assyria; y el rio el quarto, el Euphrates.» La Biblia katolika de Yerushalayim traslada Hidekel por Tigre. La Biblia del Rabinato desha Hidekel, ama mete en nota: «deve ser el Tigre». I es vedra ke al oryente de Asyria, el Tigre parese konvenir. Entre el Tigre i el Euphrates, mos topamos en Mesopotamia, kijo dizir en Irak…De esto se puede travar ke todos semos, la umanidad entera, de orijen irakyana…
I Noah? ande fraguo su arka? En Irak, mos dize la video, ama esta vez no sé de ande lo trava.
Por lo ke es de la torre de Bavel, su nombre mos ambeza ke era en Bavel, dunke en Irak…
Por lo ke es de Ur i de Avram Avinu, esto ya lo dishe.
Es en Irak, su lugar de nasimyento, ke Avraham (Bereshit, XXIV, 4) embiya a su servidor Eliezer para bushkar una mujer para Itshak, i Eliezer topa a Rivka en la sivdad de Nahor. Rivka era irakyana.
Es en Irak, tambyen, en Haran (Bereshit XXVII, 43) ke fuyendo a su ermano Esav, Yakov va enkontrar a Rahel…i kazarse por yerro kon su ermana Lea. Rahel i Lea eran Irakyanas.
Es en Ninive, sivdad de Babylonia muy serka de Mossul, oy en Irak, ke se tyene de ir el profeta Yona, al mal de su pezar.
Es en Irak tambyen ke fueron yevados los 10 trivos pedridos de Israel en 722 antes del Kristo.
I, por siguro, es en Irak tambyen ke se topava la sivdad de Bavel, a unos 100 kilometros al sur de Bagdad, esto ya lo dishe munchas vezes. Es en Bavel ke fueron yevados los deportados djudyos por Nebuhadnetsar, i es en Bavel tambyen ke se tuvo el pranso de Baltazar, rey de Bavel i ijo de Nebuhadnetsar. Es tambyen en Bavel, ande vino el rey Darius despues de la matansa de Baltazar, ke Daniel fue echado en el pozo de los leones.
I es en Irak tambyen ke el Ezechiel, al lado de los djudyos deportados en Babylonia, izo sus profesiyas.
Esto todo mos amostra mas ke lo ke dishe la semana pasada, la importansiya del Irak en la istorya de la umanidad en jeneral i del puevlo djudyo en partikolar.
Es en 1956 ke el istoryano i arkeologo djudyo amerikano Samuel Noah Kramer eskrivyo el famozo livro History begins at Sumer (la Istorya empesa en Sumer, kijo dizir en Babilonia, kijo dizir en el Irak de oy).
Afillu si ya me topava en 1941 kuando eskapi mi ultima emisyon, me pensi ke valiya la pena de aboltar mas ke lo avviya echo la semana pasada sovre la istorya leshana del Irak.
I agora abolto a la istorya de los djudyos de Irak al empesijo de la sigunda gerra mundyala.
En 1941, se pasa el Farhud, ke va ser el empesijo de los evenimyentos ke se van eskapar por la dezaparisyon entera, en pokos anyos, de la povlasyon djudiya del pais. Kualo es el Farhud? Para responder a esta kuestyon, kale akodrar ke en avril 1941 Rachid Ali, amigo de los Almanes, echa al primo ministro Nuri Saïd i toma el poder por fuersa. Los inglezes dechidan de konkistar el Irak, antes ke vengan los Almanes. Durante la gerra de los Inglezes kontra los Irakyanos, una parte de la povlasyon araba se toma kontra los desmazalados djudyos, syendo ke es mas kolay de matar a una kriatura djudiya ke a un asker ingles. En el kazal de Sandur matan a 10 djudyos.
Entre el primer i el 2 de djunyo 1941, Rachid Ali se deve fuir, i los djudyos son tresalidos. Arravyados, los partezanos de Rachid Ali empesan el Farhud, byervo arabo por pogrom, i matan entre 135 i 180 djudyos. Meldi ke no muryeron solo djudyos, ama tambyen muzulmanos ke los kijeron protejar.
Egzistyeron djustos tambyen ande los muzulmanos. Mordehai Ben Porat, djudyo de Bagdad, konta ke durante el Farhud la djentorya se aserko de su kaza para atakar a su famiya, kuando la vizina muzulmana, mujer de un kolonel de la armada irakyana, vino para ayudarlos, kon una granada en la mano, menasando la djente de echarla si no se ivan. Se fuyeron, i la famiya de Ben Porat pudo ansina arrekojer 200 djudyos en su kaza durante estos diyas de espanto.
Unos mil djudyos se fuyen del Irak verso las Indyas (la Palestina es serrada a la vez por los Inglezes i el governo Irakyano. Los otros se kedan en Irak, basho Noury Saïd aboltado.
Afillu si los djudyos komunistos se dizen antisyonistos, unos kuantos de los kapos djudyos del partido son enforkados en 1947, komo …syonistos!
En vedra los syonistos no pueden azer muncho para los djudyos, i solo muy pokos pueden alkansar la Palestina entre 1942 i 1947. A la kontra, los djudyos, sovre todo los komunistos, manifestan kontra el syonismo i en favor de los arabos de Palestina. Ama yene un kal de Bagdad es kemado el 27 de avril 1948.
Despues del renasimyento del Estado de Israel el 14 de mais 1948, el Irak se mete en gerra kontra Israel. En agosto, un riko djudyo, Shafik Ades, es aferrado, kondenado a muerte i matado por vendita de armas a Israel.
Ama en marso 1950, una ley de desnaturalizasyon permite a los djudyos de irsen del pais. En 1951, atentados a la bomba matan a 6 djudyos. Son tres djudyos ke son aferrados komo kulpavles, i sin diguna preva, dos son matados. En mars 1951, a los djudyos desnaturalizados son tomados, diré arrovados, todos sus byenes. El Estado de Israel organiza la operasyon Ezra i Nehemya, i 110.000 djudyos de Irak son akojidos en Israel, en primero en kampos yamados maabarot, ama esto valiya para todos los olim.
En 1952, kedan solo unos kuantos miles de djudyos en Irak.
El 14 de julyo 1958, la povlasyon aze la revolusyon, i mata el mismo diya al rey mansevo i a su famiya. Nouri Saïd, el primo ministro, se eskonde, vestido de mujer, ama kon kalsados de ombre. El diya de despues, 15 de julyo, es topado, aferrado, matado i enterrado. La povlasyon lo sale de tyerra, lo arrastra en las kayes, lo enforka, korta i kema. Despues su puerpo es deshado en medyo de la kaye para ke su puerpo pueda ser majado por los otobuses.
Nouri Saïd era arabo i muzulmano. Vos desho a endevinar la sekana para los djudyos…El 27 de janvier 1969, por espyonaje verso Israel, 14 ombres, en los kuales 9 djudyos, son enforkados plasa de la Liberasyon en Bagdad, delantre 200.000 personas (otros dizen 500.000) tresalidas i baylando, kon diskorsos de los kapos del governo. Los puerpos van a kedar ansina mas de 24 oras.
Vos akodro ke el haliz kapo del Irak ya era Saddam Hussein, afillu si el kapo ofisyal era dainda Hasan al Bakr, i ke Saddam Hussein fue topado, djuzgado i enforkado el tambyen (el 30 de desyembre 2006).
Los ultimos djudyos son permetidos de fuirse en 1970. En 2008, kedavan manko de diez, eskondidos, azyendose pasar por muzulmanos. Penso ke agora no ay mas ni uno. La mas vyeja komunidad djudiya del mundo afuera de Israel no egziste mas.
Agora para ver djudyos de Irak, kale ir en Israel. El haham bashi dicho sefaradi de Israel, Ovadya Yosef, ke se muryo en 2013, era nasido de Bagdad.
En Israel, uno ke no es ashkenazi es yamado sefaradi, afillu si no tyene nada de ver kon la Espanya. Ansina es…
Otra djudiya de orijen de Irak por sus padres, afillu si eya misma nasyo en Yerushalayim, es Dalia Itzik, ke fue prezidente de la Knesset, i por esto prezidente del Estado de Israel por interim de janvier a djulyo 2007.
Kon esto me vo kedar de la muy larga istorya de los djudyos de Irak, i kon el tyempo ke me keda vos kyero avlar agora de este grande eskrivano djudyo de Israel ke mos desho la vida el 4 de janvier, Aaron Appelfeld.
Appelfeld nasyo en fevrero 1932 en la sivdadika de Jadova, serka de Czernowitz, ke en este tyempo era la Rumaniya (oy es en Ukranya). La mitad de los 300.000 moradores de Czernowitz en 1930, kijo dizir kaji al nasimyento de Appelfeld, son djudyos. Sus paryentes avlan alman, ama pueden avlar tambyen en rumano o en franses. Sus papu i vava, eyos avlan yidisch i se lo ambezan (lo ke es kolay para uno ke ya avla alman).
La madre de Appelfeld es matada en 1940 por Rumanos antisemites. El chiko tyene ocho anyos kuando le matan a su madre. No la vido matar, ama oyo el bruido del tufenk…
Kuando entran los Almanes, el chiko es yevado en un ghetto, i se topa separado de su padre. El mismo es deportado en un kampo a la frontera de la Ukranya, del kual reushe de fuir en el otonyo 1942: tyene 10 anyos. Se eskonde en las sharras de Ukranya durante el terrivle invyerno de 1942-1943. Topa abrigo ande kazalinos, sin dizirles ke es djudyo. En su livro Istorya de una vida, mos konta:
«Mas de sinkuenta anyos ya pasaron desde la fin de la Sigunda Gerra Mundyala. El korason se olvido muncho, sovre todo lugares, datas, nombre de las djentes, i yene syento akeyos diyas en todo mi puerpo. A kada vez ke ay luvya, ke aze friyo o ke sofla un ayre fuerte, me topo yene en el ghetto, en el kampo, o en las sharras ke muncho tyempo me abrigaron. La memorya, a lo ke veo, tyene raises profundas atadas en el puerpo. Abasta en vezes la golor de la paja pudrida o el grito de un pasharo para yevarme leshos i aryentro.»
Despues, i durante mueve mezes, es akojido por la Armada Korolada. Traversa la Evropa durante mezes kon un grupo de mansevikos uerfanos, ayega en Italya, i, grasyas a una asosyasyon djudiya, se va kon vapor a eskondidas asta la Palestina ande ayega en 1946.
La Alyat Anoar (Aliya de la Manseves) se okupa de el, i lo mete en primero en un kampo de manseves, i despues en una eskola agrikola. En 1949, tyene ke azer su askerlik. Es diplomado de la Universita ebraika de Yerushalayim. Wikipedia mos konta esto komo si era koza naturala…Este ijiko, ke bivyo en ghetto, kampos i sharras, ke no iva a la eskola, bivyendo una vida de uerfano, salyo diplomado de Universita, de una universita ebraika, ande kaliya avlar ebreo, i no alman o yidisch…No, no es koza naturala! Ashkulsun manseviko!
Esto dicho, lavora en el departamento de yidisch, kon profesores de la altura de Martin Buber o Gershom Sholem. Kuando se kaza, kon una djudiya de Argentina, su testigo va ser Samuel Joseph Agnon, ke fue Premyo Nobel de literatura. Nada no es…Al kavo de los anyos 50, empesa de eskrivir, en ebreo, su «lingua maternala de adopsyon», komo disho.
I, en 1957, se ambeza ke su padre sovrebivyo a la shoa, i ke no es mas uerfano. Se topa kon su padre…
Appelfeld eskrivyo unos 40 livros, trasladados en 35 linguas. Yo tuve el mazal de verlo kuando vino en Paris ay unos diez anyos de esto. Vino avlar en una enkuentra organizada en su onor por las dos libreriyas de mi kaleja (una de las dos syendo una libreriya protestanta)…no tuve de irme leshos. Appelfeld avlava avagar en ebreo, i, si me akodro byen, era Valérie Zenatti, la ultima ke traslado sus livros en franses, ke aziya ofisyo de tardjuman.
Appelfeld tyene esta partikularidad de ser un eskrivano djudyo ke biviya en Israel, ama ke no keriya ser konsiderado komo un eskrivano israelyano, i de fakto no eskrivyo sovre Israel, eskrivyo sovre la djente de Evropa en los tyempos pretos. Ama Appelfeld no keriya tampoko ser konsiderado komo un eskrivano de la Shoa. A la kontra, su eskopo era de azer arrebivir, una despues de otra, las personas de karne i de sangre de esta epoka.
De manera mas jeneral, frente a los ke kyeren el nasimyento en Israel de un ombre muevo, leshos de sus raises dyasporikas, el, a la kontra, keriya ke el djudyo no se olvide nada de su pasado, ni del egzilyo.
Esto dicho, afillu si Appelfeld pertenesiya a la syedra en Israel, no se mesklo de politika. I este ombre de syedra apresyava muncho el ebreo del Tanah. Esto no me enkanta porke ya konosko una mujer profesora de ebreo, ke es atea i en mizmo tyempo se tresale por la ermozura de la lingua del Tanah. I es vedra ke no es menester de ser sufu para tresalirse de la ermozura de la poeziya de estos antiguos tekstos. Appelfeld va mas leshos, i se interesa al hasidismo en jeneral i a Rav Nahman de Bratslav en partikolar.
Asigun lo ke meldi sovre Wikipedia, Appelfeld, amigo del eskrivano amerikano Philip Roth, fue influensado por eskrivanos komo Kafka, Proust i Tchekhov, i, komo lo dishe, el Tanah por su parte estetika.
Meldi ke kedan dainda unos trenta de sus livros para tresladar en fransez. Valérie Zenatti, eya misma eskrivana, disho ke no puede imajinar su vida de eskrivana sin kontinuar de trasladar la ovra de Appelfeld.
Kon esto me vo kedar para oy, i vos digo al djueves ke vyene, si kyere el Dyo!
Edmond Cohen
Paris, Fransya
