eSefarad Noticias del Mundo Sefaradi
Keridos amigos
Mi emisyon de oy djueves va ser la kontinuasyon i el kavo de la de la semana pasada sovre las relasyones entre los sultanes osmanlis i los djudyos.
Edmond Cohen
Paris – Fransya
——————————————————————————————
LOS SULTANES OSMANLIS I LOS DJUDYOS (2)
Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Por empesar, vos tengo de dar, komo azen los medikos, una «punchada de rekodro» sovre la ekspozisyon i la konferensya ke va dar muestra amiga Nicole Polge el martes ke vyene 5 de junyo a las dos, en el Centre Communautaire, sovre el arte del ebru, i despues la prezentasyon de varyos livros, inkluyendo un miyo, i despues, puede ser esto vos va azer venir, un büfé.
Lo todo por el presyo muy barato de 5 euros de partisipasyon a los gastos, i la ovligasyon, por razones de siguridad, de rezervar de antes ande muestro amigo Marcel Hasday, sea por telefon (07 68 21 50 04) sea por email (marcel. hasday@gmail.com).
Syendo esto, el proksimo atelye de konversasyon de Vidas Largas se tendra el martes 19 de junyo, a las dos i medya, en el Centre Communautaire. Venid munchos.
Vos akodro tambyen ke las emisyones de Radio J se pueden oir por internet sovre el sityo de Radio J, de toda manera en direkto, i tambyen despues en la redifuzyon de la mediudiya entera.
http://www.radioj.fr/node/55
Oy tengo de eskapar lo ke empesi la semana pasada, kijo dizir kontarvos komo fueron los sultanes osmanlis kon los djudyos.
El djueves pasado vos deshi sovre el Sultan Beyazid II, el ke akojo los djudyos arrondjados de Espanya, ama ke, asigun un istoryano, indo a la kontra de su padre Mehmet el Fetih, izo sufrir a los djudyos de seryozas limitasyones de sus vida relijyoza (sin ke este istoryano mos diga las kuales).
Despues del sultan Beyazid II vino su ijo Selim, ke konkisto a Ayifton, i ke metyo fin a la ley romana ke aziya interdiksyon a los djudyos de irse en Erets Israel.
Despues de Selim vino el Sultan Suleyman el Magnifiko, ke permityo el establesimyento de miles de djudyos alderedor del lago de Tiberiade i tambyen al norte de Yerushalayim. Es del tyempo de este famozo sultan ke vinyeron en el imperyo osmanli Dona Gracia i Yosef Nassi.
Es la intervensyon de este Sultan ke salvo a los djudyos de Ancona ke el Papa Paolo IV keriya entregar a la Inkizisyon.
Munchos medikos i doktores djudyos sirvyeron en el saray o a la gerra. Dos de eyos muryeron a la gerra.
El Sultan ke vino despues fue Selim II, ke konkisto a Chypre i establesyo 500 famiyas djudiyas en esta isla. El es tambyen ke izo Yosef Nassi duke de Naxos.
Ande los sultanes ke vinyeron despues, Murad III i Mehmet III, uvo munchos medikos djudyos en el palasyo, i tambyen embashadores djudyos: Solomon Eskenazi (ke era tambyen mediko) en Venezia, Gavriel Buonaventura en Espanya, Abenyaes en Ingletyerra.
En vedra, no sé muncho sovre estos embashadores, i es pekado, porke, savyendo el odyo de los Espanyoles verso los Turkos, sus enemigos ereditaryos, i verso los djudyos, arrondjados o kemados bivos, toparse kon un embashador a la vez turko i djudyo deviya ser para estos espanyoles koza ke no era kolay!
Despues de Selim II vino Sultan Ahmet, el ke izo fraguar la meshkita ke tyene su nombre. Este sultan aferro una hazinura muy mala, la chika verola, i es la bivda de Solomon Eskenazi, Buha Eskenazi, ke lo kuro i lo salvo.
No ay muncho de dizir del tyempo de los Sultanes Mustafa Iero i Osman II. Despues de eyos vino el sultan Murad IV. Harry Ojalvo, en su artikolo, avla solo de un Rabi Yehuda Kovo ke vino de Selanik i fue akuzado de negra fabrikasyon de uniformes para las armadas i fue egzekutado por esto. Richard Ayoun, el, mos dize ke la entisyon atribuida a Murad IV de azer eksterminar a todos los djudyos de su Imperyo es un kavzo uniko i no tuvo segito. Esta entisyon, si la tuvo, es muy grave, ama no sé sovre ke dokumentos se fundo Richard Ayoun para avlarmos de esto.
Despues de Murad IV vino un Sultan Ibrahim ke tomo komo mediko el doktor Abravanel.
I despues de Ibrahim vyene el Sultan Mehmet IV, ke toma a Moshe Beberi komo embashador en Sueda, i su ijo Yehuda despues su muerte. Es durante su reyno ke afitaron, en los anyos 1648, las matansinas en Ukranya de los kozakos de Chmielnitski, ke mataron a unos 150.000 djudyos. El Sultan Mehmet IV permityo a los djudyos fuyidos de instalarse en varyas sivdades de su Imperyo. Es una djudiya refujyada de estas matansinas ke la izyeron uerfana, ke se kazo kon el famozo Shabetay Sevi, ke pensava ser el Mashiah, i lo dava a pensar a muncha djente ke kreiya lo mismo. Komo ya lo savesh, el Sultan Mehmet IV ovligo Shabetay a konvertirse al islam, lo ke izo kon todos los de su movimyento, i dainda oy biven komo dönmes (konvertidos) en Turkiya. Es el doktor Abravanel ke rogo klemensya para Sevi i la obtuvo, syendo ke Sevi no fue matado.
Los siglos pasan, ayegamos al siglo 18. Asigun los istoryanos, no ay muncho de kontar sovre la situasyon de los djudyos del Imperyo osmanli durante este siglo. Esto dicho, Moïse Franco mos ambeza ke «de manera jeneral, el siglo 18 fue una epoka negra para los djudyos».
Al empesijo de mi primera emisyon, la de la semana pasada, vos teniya dicho ke los sultanes se amostraron «avyertos i bastante tolerantes» kon los djudyos. Si tomi el byervo «bastante», es porke todo no fue syempre sin nuves.
En 1702, komo en 1757, los sultanes o sus grandes vizires aboltaron a las interdiksyones para los rayas, inkuyendo los djudyos, de yevar vistidos rikos i ermozos, kon amariyo o kolorado: deviyan yevar sovre kavesa i pye solo preto. Me vash a dizir ke si esto fue lo negro, pasado sea. Ama uvo peor: por egzemplo, en 1728, los djudyos baluk bazarlis, kijo dizir los ke moravan serka del charshi de los pishkados, i ke eran romanyotes, kijo dizir avlando grego i no espanyol porke eran de orijen lokala i no sefaradim venidos de Espanya, a tal punto ke asta oy los romanyotes son yamados baluk bazarlis, estos djudyos tuvyeron de vender sus kazas a muzulmanos, porke sus prezensya ensuzyava la meshkita Yeni Djami ke se topava al lado.
Por lo tanto, no kale pensar ke los sultanes del siglo 18 pasaron sus tyempo a aharvar a los djudyos. Por egzemplo, el sultan Mahmut Iero konkluyo tratados kon el Imperyo Alman asigun los kuales los sivdadanos de kada Imperyo eran liberos en el otro. De tal manera ke los djudyos turkos de Viena teniyan derechos ke los djudyos ostriakos no teniyan. Por esto aprovavan de obtener pasaportes osmanlis. I bueno izyeron porke un diya se disho ke la Imperatrisa Marie-Thérèse keriya ekspulsar a todos los djudyos osmanlis. El sultan Mahmud Iero embiyo un ultimatum a la Imperatrisa, ke respondyo ke era un yerro…
El tyempo pasa, i yegamos al siglo 19, ke va ser, a lo manko asta 1876, un siglo de veluntad de los sultanes de modernizasyon i de avyertura de la Turkiya.
Ama antes de esto kale akodrar ke, en 1826, el Sultan Mahmud II lucho kontra los janisaryos i los izo matar. Dos djudyos eran amigos de los janisaryos i lo pagaron de sus vidas. El uno se yamava Isaïe Adjiman, el otro Behor Carmona. Los dos fueron matados, estragunyados por orden del sultan.
La povlasyon djudiya lo arresintyo muy fuerte, i alguno eskrivyo en djudeo-espanyol una endecha ke se topa en el livro de Moïse Franco. Komo es bastante larga, no la vo darvos entera; solo vos daré unos kuantos versos:
Ajuntemos mis ermanos
A kantar esta endecha
Porke mos korto las manos
El Dyo en esta echa.
Banim yetomim kedimos
Komo uerfanos sin padre,
Los ojos al Dyo alsemos
Ke de mas mal mos guadre.
Chelebi Behor Carmona,
Afamado por el mundo,
De los djudyos korona,
I Adjiman el segundo.
De ver komo los mataron
A kada uno de una muerte,
De los ojos mos saltaron
Lagrimas komo la fuente.
(…)
La lagrima no mos se enchuga
Ni de noche ni de diya
De boltar i ver ke mos manka
Lo bueno de la Juderiya
Muncho sospiro i ansya
I ayuno i endecha
Mos vino a la Juderia
Mas i mas a la kompaniya.
No aviya mas ke esto bueno
En la Juderiya entera
Mo lo kito el Dyo presto
I lo echo en la tyerra.
(…)
Rogemos al poderozo
Ke en paz mos venga presto
I ternemos grande gozo
Kon el Bet aMikdash puesto
Shelamim ayegaremos
Dia kada diya
Al Mashiah lo veremos
Asentado en su siya
Tefilot a muestro padre
Ke molo aga alegriya
Presto ke no se detadre
I mos amostre maraviya.
El sultan Mahmud II, en mismo tyempo ke lucha kontra los Janisaryos, toma en 1826 un firman ovligando la djente de vestirse a la evropea i de yevar una fez en vez del turban, lo todo kon la idea, un siglo antes de Ataturk, de modernizar a la Turkiya.
El «tanzimat», ke va empesar en 1839, no es otra koza ke la kontinuasyon de la politika de modernizasyon i de avyertura de la Turkiya.
Es de fakto en 1839 ke el sultan Abdulmedjid tomo la desizyon de dar a los non muzulmanos, inkluyendo dunke los djudyos, los mismos derechos ke los de los muzulmanos. Esto kijo dizir de desde 1839, los djudyos no fueron mas tratados komo dhimmis.
Este mizmo sultan izo un firman en 1840 para la proteksyon de los djudyos de Damas i de Rhodes, akuzados por los gregos, empushados, kale dizir, por el Konsul de Fransya en Damas, de matar kristyanos para meter sus sangre en la masa de Pesah. El firman disho, avlando de los djudyos: «Dingun podra molestarlos en el libro egzersisyo de sus SANTA RELIJYON, ni en sus seguridad o trankilidad».
En 1847, el sultan (Abdulmedjid) vijita la Eskola Militar de Medikeriya, i se apersive ke, si ay elevos de todo modo de relijyon, djudyos no ay. Esto vyene kuryozo al sultan ke konose muy byen la tradisyon ande los sultanes de tener un mediko djudyo. Komo es posivle, demanda al direktor, ke le responde ke si no ay djudyos en la eskola, es porke la kozina no es casher; en sigundo, no kyeren lavorar diya de shabat; en treser, kyeren pueder azer sus orasyones kada demanyana.
Pishin el sultan ordena ke ayga kozina casher para los djudyos, i la eskola tomo a un gizandero djudyo i a un shohet; ke los estudyantes djudyos salgan de la eskola el vyernes demanyana para aboltar el alhad medyudiya; ke un haham sea tomado para azer un ofisyo kada demanyana para los estudyantes djudyos. Moïse Franco trava este haber de la gazeta El National, gazeta djudeo-espanyola de Vyena ke lo konto en 1867.
Es en vez en las chikas kozas ke se ve la avyertura de un kapo de Estado. A mi me parese ke esta istorya mos amostra ke, a la kontra de lo ke mos dizen munchos aki en Fransya, no es el Islam ke es por natura intolerante i antisemit: en vedra depende komo kada muzulmano entyende el islam. Ay unos ke toman en el islam su parte intolerante i antisemit; ay otros, komo el sultan Abdulmedjid, kalif del islam, ke tyenen una vizyon tolerante i umanista de este mismo islam. Ke bueno seriya si todos los muzulmanos eran komo fue Abdulmedjid…
Despues de Abdulmedjid vinyeron su ermano Abdulaziz i su ijo Murad V. Murad V fue echado a basho en 1876, i es su ermano Abdulhamid II, el tambyen ijo de Abdulmedjid, ke resivyo el poder en su lugar. Lo guadro asta su propya destitusyon por los Jovenes Turkos en 1909.
Abdulhamid, muncho mas konservador i tradisyonalisto ke su padre, metyo fin al tanzimat desde 1876. Se amostro tambyen intolerante a la kontra de su padre Abdulmedjid, i los ermenis lo supyeron vente anyos despues, en 1896, kuando uvo las matansinas de ermenis en toda la Turkiya. Mi papu i mi vava de la vanda de mi padre, ke moravan en Estambol, en la male de Halicioglu, fueron testigos de estas mantansinas ke se pasaron delantre sus ojos. Asigun los istoryanos, unos 200.000 ermenis fueron matados entre 1894 i 1896, lo ke va dar a Abdulhamid el nombre de «sultan kolorado».
Esto dicho, kale atorgar ke su krueldad verso los ermenis no se manifesto kontra los djudyos, salvo la kuestyon de los syonistos de Palestina.
Una koza muy importante en la istorya de las relasyones entre los sultanes osmanlis i los djudyos es la yegada del syonismo, i kon el de munchos djudyos venidos de Evropa del este en Palestina, ke del tyempo de Abdulhamid es una provinsya turka.
Por varyas razones, el sultan no ve la koza kon plazer. En 1881, el sultan Abdulhamid dechida ke los djudyos venidos de Evropa del este, fuyendo los pogromes, pueden instalarse ande kyeren en el imperyo osmanli, kon la sola kondisyon de obedeser a las leyes del estado i de azerse suditos otomanes, lo ke por siguro es una mueva preva de la ospitalidad de los sultanes verso los djudyos, ama yene ay una rejyon ande no tyenen derecho de instalarsen, es la Palestina. De otra parte, la vendita de tyerras a los djudyos ke ya son instalados en Palestina es proibida.
Theodor Herzl aprova munchas vezes de ir a ver el sultan, sin reushir, asta ke, enfin, en 1901, dunke vente anyos despues del empesijo de la politika antisonista de Abdulhamid, el sultan achete de arresivir a Herzl. La idea de Herzl es de aprovechar ke el estado turko no tyene mas dinguna para, para propozarle el ayudo finansyaryo de los djudyos ke son dispuestos a arrebivir las finansyas osmanlis en kambyo del akojimyento de djudyos en Palestina. Ma el sultan refuza la propozisyon.
Ama yene el sultan kombida a Herzl a venir a verlo en 1902, i le konfirma ke kontra paras es dispuesto a otorizar la instalasyon de djudyos en su imperyo, ama yene salvo en Palestina. Herzl no puede achetar.
Los syonistos tendran de asperar la desfecha de los osmanlis kontra los inglezes en 1917 i la deklarasyon Balfour para ke troken un tyempo las kozas.
Me vo kedar aki de mi emisyon, porke despues de Abdulhamid los sultanes no tyenen mas poder, asta ke de toda manera venga la republika en 1923.
El djueves ke vyene no vo pueder azer emisyon (porke estaré muy okupado, tenyendo munchas otras kozas de azer) i dunke vos digo al djueves 14 de junyo, si kyere el Dyo!
Edmond Cohen
Paris, Fransya
