eSefarad Noticias del Mundo Sefaradi
Keridos amigos
Dos djueves en sira no embiyi aki teksto de emisyon, syendo ke el djuves 13, kon Rosh Hashana i mis inyetizikos en kaza, komo aparejar kualkyer koza? I el 20 arresivi a Evelyne Lagardet, una eskrivana ke no avla djudeo-espanyol, i la entrevista se paso en franses. Ama para este djueves apareji una koza ke a mi me intereso, a vozotros no se si vos va interesar. Vo avlar tambyen de la muerte de dos mujeres sovrebivyentes de Auschwitz, Marceline Loridan-Ivens i Ida Grinspan.
Edmond Cohen
Paris – Fransya
——————————————————————————————
MARCELINE LORIDAN IVENS, IDA GRINSPAN KADOSH, TSADIK HASSID
Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Muestros atelyes de konversasyon van a empesar por de muevo, en jeneral dos martes al mes, al Centre Communautaire, rue Lafayette, el primer de este anyo djudyo se tendra el 9 de oktovre, de las dos i medya a las kuatro i medya-sinko, i si kyere el Dyo so yo ke lo animaré. Vos akodro ke estos atelyes no son kursos, i yo no so profesor. Kada uno avla komo puede, dinguno se va burlar de el porke dinguno avla tan byen, syendo ke kaji todos los partisipantes, salvo uno o dos, nasimos afuera de lo ke era el imperyo osmanli. Vos kombido a venir munchos, a lo manko una primera vez para ver komo es, i esto siguro ke vos va plazer, porke, a parte del plazer de toparse entre amigos, vash a akodrarvos de byervos ke kreiyash tener olvidado, i ke van a salir kon grande emosyon del fundo de vuestra memorya.
Esto es lo ke se esta pasando tambyen kon mi mujer lehliya ke, eya, se va partisipar a atelyes de konversasyon en yidisch, i le salen byervos ke se kreiya tener olvidados, o mismo ke no kreiya saver.
Dunke vos kombido de venir munchos el martes 9 de oktovre, 119 rue Lafayette, sigunda tabaka, sala 221. Indimas ke es de baldes !
Vos akodro tambyen ke las emisyones de Radio J se pueden oir por internet sovre el sityo de Radio J, de toda manera en direkto, i tambyen despues en la redifuzyon de la mediudiya entera. http://www.radioj.fr/node/55
Esto dicho, de kualo avlarvos oy ? Me pensi de avlarvos de tres byervos en lashon, ke son kadosh, tsadik i hasid, i de sus sentidos syerto serka el uno del otro, ama yene diferentes.
Ama antes, afillu si me desplaze empesar una emisyon por nekrolojiya, komo no avlar de Marceline Loridan Ivens, ke mos desho la vida el martes 18 de septyembre, kijo dizir a la entrada de Kipur. Sovre los 76.000 djudyos deportados de Fransya, solo 2.500 sovrebivyeron. Oy son menos de 200. Marceline era una de estos dozyentos sovrebivyentes entre los sovrebivyentes. I martes a la tadre, kuando esta emisyon era kaji aparejada, me ambezi ke Ida Grinspan, otra sovrebivyente de Auschwitz, vyene de desharmos tambyen la vida. Teniya 89 anyos. Vo aprovar de avlarvos de eya tambyen, ama aboltaremos a la primera, Marceline.
Marceline Rozenberg nasyo en marso 1928 en Epinal, sivdadika al este de la Fransya, famoza por su basmaane de imajenes, en una famiya de djudyos venidos de Polonya en 1919, kijo dizir mueve anyos antes.
En 1940, kuando los Almanes entran en Fransya, eya tyene dodje anyos. Su famiya se va en el Vaucluse, serka de Avignon, en la zona non okupada asta novyembre 1942. En 1944, a la edad de 15 anyos, i para azer komo su ermana mas grande, entra en la Rezistansya, ma el 29 de fevrero se topa afferrada kon su padre por la Gestapo, i embiyada a Auschwitz el 13 avril 1944. Konto ke ya aviya sido akavidada ke aviya una sekana de ser aferrada esta noche, i su padre ya teniya aparejado una kazika afuera para eskonderse, ma por kanseryo pensaron ke una noche mas puediyan durmir en kaza…En el mismo treno ke eya se topa Simone Veil, ke tyene eya tambyen 16 anyos, ma yene mas aedada de eya de unos kuantos mezes (nasida de 1927). Las dos mansevikas se azen a poko a poko muy amigas, i esta amistad va surear vida entera, afillu si las dos mujeres van a ser de vandas politikas muy opozadas. Marceline yamava Simone « mi buchuka kontradiktorya »…
Marceline konosyo la marcha de la muerte, i se topo en Bergen Belsen i despues en Theresienstadt de ande fue liberada por los Rusos el 10 de mayo 1945, dos diyas despues de la fin de la gerra…
Aboltada en Paris, Marceline se kaza kon Francis Loridan i divorsya unos kuantos anyos despues. Se va kazar de muevo en 1963, esta vez kon el sineasto Joris Ivens, de trenta anyos mas aedado de eya (el nasido de 1898, eya de 1928).
Marceline i su marido son sineastos, sovre todo de dokumentaryos, i komo son de syedra i muy serka del komunismo – Marceline va entrar en el partido komunisto en 1955, ma va kedar aya un anyo solo – los dos van azer, munchas vezes en djuntos, dokumentaryos sovre la vida en los paizes komunistos, komo la Kina.
Ma Marceline va azer tambyen en 2003, muncho despues de la muerte de su marido en 1989, un filmo de fiksyon, la Petite prairie aux bouleaux (la traduksyon en franses del nombre de Birkenau)
I no kedo de ir a dar su testimonyo sovre lo ke fue la deportasyon.
I agora unos kuantos byervos sovre Ida Grinspan. Nasyo en 1929 en Paris en una famiya venida de Polonya 5 anyos antes. Su madre fue aferrada el 16 de djulyo 1942, en el grande aferramyento de masa yamado La Rafle du Vel d’Hiv, una grande reushita de la polisiya franseza. Ida era refujyada en el oeste de Fransya, ma fue aferrada al kavo de janvier 1944, a la edad de 14 anyos, eya tambyen por la polisiya franseza, embiyada en Drancy i de aya deportada el 10 de fevrero 1944, para tres diyas de viaje de infyerno, asta Auschwitz. Marcha de la muerte a fin janvier, se va topar en Ravensbruck i Neustadt ande va ser liberada, ma muy hazina. Sa sovrebivir, i kontar esto todo, inkluyendo en las eskolas. Ay munchas videos de eya sovre internet. Si bushkash sovre Google Ida Grinspan Voyage en enfer, la veresh avlando en una eskola (en franses, por siguro) :
I agora, despues de estas dos nekrolojiyas, vos kyero avlar de los tres byervos ebreos ke vos dishe : kadosh, tsadik i hassid. Komo trasladar estos tres byervos en ladino i en muestra lingua ?
Para trasladar kadosh en ladino, abasta de bushkar en la Tora kuando vyene este byervo, i de ver komo esta trasladado, por egzemplo, en la Biblia de Ferrara. Si bushkamos Vayikra XIX, 2, meldamos en ebreo : « Kedoshim tiiyu ki kadosh ani Adonay eloehem ». I esto es trasladado por : « Santos seredes que santo yo Adonay vuestro Dio ». De esto vemos ke el ladino traslada kadosh por santo, i para el djudeo-espanyol avlado es lo mismo. La Biblia de 1905 en Constantinopla, eskrita en djudeo-espanyol, traslada este mismo pedaso de pasuk ansina : « santos seresh, porke santo soy yo, Adonay vuestro Dyo ».
El pasuk mos ambeza dos kozas : la una ke ya saviyamos, o a lo manko ke ya teniyamos endevinado sin ke mo lo diga : el Dyo es santo.
Ama la otra koza es ke el Dyo mos ordena a mozotros tambyen, « toda compaña de hijos de Israel », de ser santos mozotros tambyen. No es tal i tal, son todos mozotros los ijos de Israel ke tenemos de ser santos. I deke ? Porke el Dyo es santo, i mozotros devemos ser lo mismo.
Podriamos responder al Dyo : « de lo ke Tu tyenes kualidades, no es una razon bastante para ke tengamos las mismas. Tu sos todopoderozo, mozotros no ! » Ama si el Dyo avlo ansina, es para dizirmos : todopoderozos no puedesh, ama santos puedesh ser, i estonses devesh ser.
Bueno, ama kualo es la santedad ? Kualo ay detras de este byervo ? Komo yo no so haham, me fui sovre internet para ver kualo dizen los hahamim, i ansina es ke topi un artikolo muy interesante en el sityo (en franses) UniversTorah.com.
http://www.universtorah.com/ns2_dossier-1366-la-saintete-une-exigence-universelle.htm
Vos vo solo trasladar el empesijo i el kavo :
« La santedad parese ser transandente, leshana i intokavle, koza de los solos djustos, i aleshada de mozotros, demaziya enkangados en el mundo materyal. La Tora mos dize ke es djusto el kontraryo…
(…)
La santedad es posivle para todos, i esto es lo ke mos ambeza la Thora : el ombre puede syempre alsarse i aserkarse del Dyo, desvelopando en si la haliz santedad, la ke le permetera de bivir este mundo, no para su propyo gozo, ma para render mijor la umanidad entera. »
Kadosh, kada uno puede serlo, i mismo lo deve, es el Dyo ke lo demanda : «kedoshim tiiyu, santos seredes ».
Bueno para ser kadosh, ama tsadik ? Komo es trasladado tsadik en ladino ? Kale bushkar lo ke mos dize Bereshit sovre Noah, « ish tsadik : varon justo ». Lo mismo en djudeo-espanyol. Tsadik se traslada por djusto.
Ama una vez esto dicho, kualo es un djusto ? De muevo me fui a bushkar sovre internet. Topi una repuesta sovre el sityo (franses) de los lubavitch FR.Chabad.org vinyendo de un syerto Tzvi Freeman.
https://fr.chabad.org/library/article_cdo/aid/2373890/jewish/Tsadik.htm
I kualo mos ambeza ? « Lo ke ay de mas esensyal ande un tsadik, es ke es el mas umano de los seres umanos.
(…)
Estonses na lo ke es un tsadik : alguno en el kual vemos muestra haliz natura, ke mos permite de entender ke kualkyer de mozotros es fundamentalmente divino. I dunke, por su sola egzistensya, ama mas muncho a traves muestro atadijo a el, mos ata kon el Dyo, este Dyo ke bive en kada uno de mozotros. »
Si entendi byen, el ombre puede ser kadosh i deve serlo, puede ser tsadik i deve serlo.
Esto dicho, no es tan kolay de topar un tsadik. Despues de lo ke obtuvo Avraham, el Dyo bushko diez djustos en la sivdad entera de Sedom, i no los topo. Si uvyera topado diez tsadikim en Sedom, la sivdad entera uvyera sido salvada (« no dañaré por los diez (tsadikim)» Bereshit, XVIII, 32)
El Talmud mos ambeza mismo ke el mundo entero, la umanidad entera, biven grasyas a 36 tsadikim. Sin eyos, seriyan destruidos.
En los tratados Sukka 45b i Sanhedrin 97b, meldamos ke Abaye, famozo direktor de la yeshiva de Pumbedita, ke biviya en el treser siglo, disho : « el mundo no tyene manko de 36 ombres tsadikim permetidos de tener una vista de la Shehina (Prezensya divina) kadal diya, asigun esta eskrito (Yeshayau XXX, 18): bienaventurados esperantes « en El » (lo en ebreo, lamed vav) i la valor numerika de lo es 36 ».
Personalmente, yo ya me enkanto ke a partir del byervo ebreo « lo », kijo dizir « en el », uno pueda travar ke son 36 tsadikim ke pueden ver la Shehina. Ama la tradisyon mistika djudiya no se keda aya. Asigun la tradisyon mistika, estos 36 – en yidisch lamedvavniks – son las kolonas del mundo i son tan umildes ke no saven ke lo son, no se konosen entre eyos, son eskondidos (nistarim en ebreo) para todos, i si alguno se dize ser uno de los 36, es siguro ke es una mintira. Eyos son ke (komo lo izo Avraham para Sedom) avlan al Dyo i le demandan piyadad por la umanidad.
Me akodro ke me ambezi esta istorya de los 36 djustos en 1959, kuando salyo el livro de André Scharz-Bart, le Dernier des justes (el ultimo de los djustos) i estos djustos eran los lamedvavniks.
Estos son los djustos. Agora ayegamos al ombre hasid. En ladino, hasid es trasladado por bueno : Teilim XVIII, 26 Con bueno seras bueno…CXLVIII, 14 loor a todos sus buenos, ets
El byervo hasid se topa tambyen en el Talmud, ama por lo ke sé, el Talmud no fue trasladado en ladino.
En Baba Bathra 15b, esta eskrito en ebreo : Hasid aya beumot aolam veIyov shemo. La sola traduksyon ke topi sovre internet es en ingles, por el haham Joseph Herman Hertz, ke fue hahambashi de Ingletyerra de 1913 asta su muerte en 1946 . El traslada ansina: There was a certain pious man among the heathen named Job (aviya un syerto ombre sufu entre los paganos yamado Job). Para Hertz, umot aolam, las nasyones del mundo, si no son los djudyos, son paganas, i ansina traslada. I en kuanto a hasid, lo traslada por pious, ke yo traslado del ingles komo sufu.
Sufu, es otra koza ke bueno. Sufu es relijyozo. Ma relijyozo ande los paganos…
Esto todo para amostrarvos ke un byervo ebreo uniko puede dar dolores de kavesa a los traduktores. Porke ay tambyen tres otros sentidos del byervo hasid, en mas de bueno i de sufu.
Los hasidim, en los livros de los Makabim, son los ke se rebueltan kontra los Gregos i la relijyon de los Gregos.
Los hasidim, despues del Baam Shem Tov, son los djudyos ke sigyeron su manera de ver. Los mas konosidos entre los hasidim de oy son los Lubavitch del movimyento Habad.
Ama yo kyero avlarvos tambyen, por siguro, de los hasidé beumot aolam, los ke el haham Hertz, avlando de Job, trasladava por sufu entre los paganos.
El hahambashi Hertz, komo vos dishe, se muryo en 1946. I en 1953, la Kneset de Yerushalayim kijo dar onor a los non djudyos, ke tomando el riziko de sus vidas, salvaron a djudyos durante la Okupasyon almana. Eskojo el titolo de hasid beumot aolam (hasid entre las nasyones del mundo). I esta vez, la traduksyon en ingles fue diferente : en vez de pious among the heathen, fue righteous among the Nations (djusto entre las Nasyones). I aki vemos ke hasid, despues de ser trasladado por bueno i por sufu, es trasladado por djusto, komo el byervo tsadik.
Ama si el sentido del byervo hasid es djusto, and’esta la diferensya kon el byervo tsadik ?
Dolor de kavesa, vos digo !
El grande profesor i teolojyano Léon Askenazi, tambyen yamado Manitou, de bendicha memorya, aprovo de dar una repuesta, i esta tambyen la topi (en franses) sovre internet :
http://manitou.over-blog.com/article-noah-1995-suite-fin-37943511.html
Vos diré la vedra, no entendi todo lo ke eskrivyo Manitou, ma una koza entendi : el tsadik aze el byen porke es la ley i el eskojo de obedeser a la ley. Si no es djudyo van a ser las syete leyes de Noah. Djudyo o no, el tsadik aze el byen porke acheto de obedeser a la ley.
Asigun Manitou ke se refyere a Rambam, el hasid be umot aolam es uno ke aze el byen sin obedeser a kualkyer ley. Lo aze de si para si, i esto lo mete mas alto ke el tsadik.
No sé si despues de esto todo entenditesh mijor las diferensyas entre kadosh, tsadik i hasid, ama me parese ke lo ke es importante, es de aprovar se ser a lo manko uno de los tres…
Al djueves ke vyene, si kyere el Dyo !
Edmond Cohen
Paris, Fransya
