Muestra lingua por Edmond Cohen: LA BATALYA DE STALINGRAD

edmond-cohen1Keridos amigos

Para el djueves ke vyene apareji una emisyon sovre la batalya de Stalingrad, ke paresiya a los Almanes kolay de ganar, i ke no solo no lo fue, ma ensima fue para eyos una grande desfecha ke sera el empesijo de munchas otras, asta la desfecha finala dos anyos mas despues. Dinguno puede dizir lo ke se seriya pasado si los Almanes aviyan ganado en Stalingrad. Puede ser todo trokava, i yo no seriya aki para kontarlo.

Saludes a todos

Edmond Cohen
Paris – Fransya

——————————————————————————————

LA BATALYA DE STALINGRAD

batalya de stalingrado

Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.

Por empesar, vos akodro ke el proksimo atelye de konversasyon de Vidas Largas se tendra el martes ke vyene 21 de mais, a las dos i medya, en el Centre Communautaire. Estos atelyes son avyertos a todos, venid munchos.

Vos akodro tambyen ke las emisyones de Radio J se pueden oir por internet sovre el sityo de Radio J, sea en direkto, à las 4 h 06 ora de Paris, o kuando se kyere, en klikando sovre las emisyones del djueves despues de mediudiya. http://radioj.fr/node/55

Asigun lo ke me disheron en esta radyo, agora va aver kadal diya una chika emisyon despues antes de eskapar las emisyones, i dunke el djueves sera despues de la miya, i por esto la miya va ser un poko mas kurta : 18 minutos en vez de 20, i puede ser manko, dainda no sé.

Esto dicho, aze pokos diyas, miri en la televizyon un largo dokumentaryo sovre la batalya de Stalingrad, i esto me dyo la idea de avlarvos de esta batalya, ke empeso el 17 de djulyo 1942 (para darvos una idea de en ke tyempo estamos, el 16 de djulyo empeso en Paris el aferramyento de masa del Vel d’Hiv, ande por la primera vez son aferradas mujeres i kriaturas) para eskaparse el 2 de fevrero 1943. Puede ser vash a pensar ke esto no tyene de ver kon la istorya de las batalyas o gerras djudiyas, ma si pensah esto, asigun mi es un yerro por dos razones. De una, komo lo eskrivyo kon muncha razon Pierre Van Paassen desde 1943 en su livro « The forgotten ally » (el alyado olvidado), fueron milyones de askeres djudyos kombatyendo kontra los nazis basho varyas bandyeras, serka de medyo milyon en la Armada korolada, i munchos fueron los kombatantes djudyos, askeres o zabites, ke djuzgaron sus rolo en la batalya de Stalingrad. De dos, kale pensar ke si Hitler teniya ganado esta batalya, no se puede saver si no uvyera sido el kavo de la defensa sovyetika. Kale akodrarse ke durante toda la gerra, los Almanes sufrieron de mankar de benzina. El manko de benzina es una de las razones de la desfecha de Rommel en Afrika. Los sovyetikos teniyan la benzina de Baku i si Stalingrad kaia entre las manos de los Almanes, el kamino de la benzina de Baku verso los Sovyetikos era kortado, myentres los Almanes puediyan atakar i tomar Baku. Una desfecha sovyetika en Stalingrad puediya signifikar el kavo de la rezistansya sovyetika, i sin la frente del este los Amerikanos no puediyan desbarkar en Fransya, ets. Los djudyos ke sovrebivyeron, komo yo, a esta gerra, saven ke sin la viktorya sovyetika de Stalingrad, puede ser no kedava ni un djudyo en Evropa. Estas dos razones ya son bastantes, ama ay una tresera razon : es ke ya ize munchas emisyones sovre las batalyas i gerras djudiyas, antes de la gerra kontra Hitler, durante la gerra kontra Hitler, i despues de la gerra kontra Hitler. I ize tambyen una emisyon sovre una otra batalya ke no era una batalya djudiya, el desbarkamyento, por lo mas amerikano, del 6 de Junyo 1944.

Stalingrad, ke oy, despues de la destalinizasyon, se yama Volgograd desde 1961, es una sivdad ke se topa sovre la vanda oeste de la Volga, el riyo de Rusiya ke aze la frontera entre la Evropa i la Asia. Stalingrad, antes yamada Tsaritsina, fue yamada Stalingrad en 1925, un anyo despues de la muerte de Lenin, kuando Stalin tomo el poder.

Despues de su desfecha delantre Moskva al empesijo de 1942, kuando vyene la primavera Hitler echa todas sus fuersas kontra los Rusos, i obtyene munchas viktoryas entre la primavera i el enverano 1942 (en Kharkov, Voronej, Sebastopol, ets). Vyendo esto, Hitler pensa ke los sovyetikos son aflakados, lo ke es vedra, ma no bastante par dechidar, lo ke es un yerro de Hitler, de atakar a la vez en direksyon de Stalingrad para kortar el kamino de la benzina a los Rusos, i de Baku para tomar esta benzina. Es un yerro porke, komo se dize en franses, on ne peut pas courir deux lièvres à la fois (no se puede kasar dos lyevres a la vez). Hitler korta sus fuersas en dos i no tendra bastante fuersas ni para ganar en Stalingrad ni para ganar verso Baku.

Es la sejena armada komandada por Paulus (i no Von Paulus, komo yo kreia) ke es kargada de tomar a Stalingrad. Por siguro, en mas de su interes stratejiko, ay tambyen su interes simboliko, syendo ke yeva el nombre de Stalin.

Paulus se topa verso el 17 de djulyo 1942 frente a los Rusos delantre del riyo Don, al oeste de la Volga ande se topa Stalingrad. De antes toda la povlasyon de Stalingrad, mujeres komo mansevikos, i no solo los militatares, se aparejan para la lucha. Komo se ve en el filmo Stalingrad kon Jude Law, los Rusos no tyenen bastante tufenkes, i algunos se van a dos kon un solo tufenk, i kuando el ke tyene el tufenk kae muerto o ferido, su kompanyero sin tufenk se lo toma de las manos…

Entre el 17 de djulyo i el 20 de agosto, Paulus, muy ayudado por los avyones de la Luftwafe, obtyene viktoryas kontra las armadas sovyetikas, afillu el orden de Stalin del 28 de julyo 1942 : « Ni shagu nazad ! » (no mas un paso atras ! ) . El 3 de agosto, Paulus resive el ayudo de la kuatrena Panzerarmee ke ataka al sur este i adelanta verso Stalingrad, ma se topa arrestada el 10 de agosto a unos 50 kilometros de la sivdad. El 21 de agosto Paulus traversa el Don, al norte, por dos pontes de naves. Los tankes almanes atakan el 23 de agosto i, burrakando las kuatro lineas de defensa sovyetikas en d’una, adelantan de 55 kilometros en 12 oras i ayegan a la Volga al norte de Stalingrad. Ma los tankes almanes kaminaron tan presto ke los askeres a pye no puedyeron segirlos, i los rusos atakan a los almanes. ama no reushen a arrepusharlos, i los almanes, el 10 de septyembre, okupan 15 kilometros al bodre oeste de la Volga, al norte de Stalingrad.

Al sur de Stalingrad, la kuatrena panzerarmee de Hoth ovliga los rusos, agora komandados por el jeneral Vassili Chuikov, a ir atras i toparse enserrados en la sivdad, ama no de todos los lados, porke al este ay la Volga, i los rusos de la otra vanda de la Volga, la vanda este, azyatika, pueden ayudar a los enserrados, a kondisyon de pueder traversar el riyo, lo ke es imposivle de diya por modo de los avyones almanes, i bastante yuch i sekanozo de noche.

El 23 de agosto, la luftwaffe aze kaer kon 600 avyones mil tonas de bombas en un solo diya sovre la sivdad de Stalingrad ande se topan dainda muy pokos militares, syendo ke luchan afuera de la sivdad para defenderla. 40.000 personas son matadas i la sivdad es rovinada a 80% en un solo diya. De un punto de vista militar, este bombardamyento no sirve de nada, ma va permeter despues batalyas en las rovinas ke los Almanes no van a reushir a ganar. Yene los bombardamyentos van a turar asta el 6 de septtyembre.

El 10 de septyembre 1942, la situasyon de los defensores de Stalingrad es dezesperada, solo defendida por le ke keda de dos armadas rusas ke ya peryeron 300.000 ombres. Paulus pensa, i lo eskrive, ke todo sera eskapado en unos dyez diyas. Es importante para los Almanes de ganar presto porke la rezistansya de Stalingrad ovliga los Almanes a konsentrar aya armadas ke no pueden toparse al sur para ayudar a los ke aprovan de atakar en el Caucase verso Baku.

Chuikov deve defender Stalingrad a lo manko dainda sesh semanas, el alto komandamyento ruso tenyendo menester de este tyempo para aparejar una kontra-ofensiva de enserramyento de los Almanes. Enserrar a los enserradores, esto es el eskopo. La frente aze unos 50 kilometros del norte al sur a lo largo de la Volga, ama solo unos tres a sinko kilometros del oeste al este, ke es la Volga. Los almanes pensavan eskapar la koza en unos dyez diyas, ma la batalya en la sivdad va surear unos sinko mezes, i no solo los Almanes no van a ganarla al kavo, ma ensima va ser una katastrofa para eyos. Los Almanes van a yamar esta batalya rattenkrieg, la gerra de ratones, por ke se pasa en los lagumes, en medyo de las rovinas, ande los tankes no pueden ayudar, los kanones tampoko. De tal manera ke, syerto los Almanes adelantan, ma mas i mas avagar, metro por metro, kamareta por kamareta, i kon un presyo mas i mas karo. El 13 de septyembre Paulus ataka para aprovar de konkistar la eskala, por la kuala ayegan los vapores rusos traendo ayudos de la vanda este. Chuikov toma todos los ombres, de los zabites del estado-mayor a los ovreros, i alkansa in extremis de salvar la eskala, por la kuala ayega la armada del jeneral Rodimtsev, ke pishin kontra ataka el 15 de septyembre. Empesa una bataya de una vyolensa ke no se puede imajinar. Los almanes reushen de tomar la estasyon sentrala, ama antes troko kinze vezes de kampo. Dos divizyones almanes tyenen de ograshear durante syete diyas para tomar un han yamado el asensor a granos. Los rusos pyedren miles de ombres ma resiven muevos kadal diya ke vyenen por vapores de la vanda este de la Volga.

Al kavo los Almanes ayegan a la eskala el 22 de septyembre, ma no reushen a impedir los rusos de guadrar una parte de la vanda oeste de la Volga. De otra parte, los Almanes aprovan de tomar una kolina yamada Kurgan Mamayev, de la kuala seriya posivle kanonar la sivdad, ma no reushen a suvir astal tepé, ni los rusos tampoko, por modo de los kanones de los dos kampos.

Al kavo de septyembre, Paulus anunsya a Hitler ke la bandyera almana flota sovre la plasa sentrala de Stalingrad. El 27 de septyembre, echa una ataka verso el norte i burraka la defensa rusa sovre 6 kilometros. El 8 de oktovre, alkansa de arrondjar los rusos de Orlovka.

Ama kale tambyen tomar los hanes industriales, fraguados en beton ke reziste a la artiyeriya. La avyasyon no puede ayudar, los kombatantes syendo demaziya serka los unos de los otros. Los sovyetikos toman mas i mas fuersa i rezistan metro despues de metro. Lo ke keda de Stalingrad no tyene mas, agora, una tan grande valor militar, ma Hitler ve en Stalingrad un eskopo psikolojiko.

La operasyon verso Baku es baldada para pueder embiyar mas ombres a Paulus. Entre el 14 i el 30 de oktovre, Paulus reushe de tomar dos fabrikas, la fabrika « Djerzinski » i la fabrika « Barrikada » i la mas grande parte de la fabrika « Oktovre korolado » .

En novyembre, Paulus resive 1.700 ombres de ayudo tomados sovre los ke defenden el Don. De muevo Paulus ataka el 11 de novyembre, ma solo reushe de tomar 600 metros mas sovre la Volga, i de kortar las defensas rusas en tres partes. Ma kadal diya los Rusos resiven ayudo, mas de 100.000 ombres entre el 15 de septyembre i el 8 de novyembre, lo ke sirve solo a remplasar los askeres matados en el mismo tyempo. Los askeres venidos en ayudo no tyenen mas de tres diyas de esperansa de vida. De otra parte, los rusos meten kanones sovre la vanda este de la Volga, i travan en sima de la kavesa de los rusos de la vanda oeste, kijo dizir de Stalingrad, sovre los Almanes, asta 500 obuzes al minuto.

Yene los Almanes an konkistado 90 % de la sivdad ma 10% reziste. I los Almanes son tan aflakados, kansados, sin bastante munisyones, ke no alkansan a reushir kon estos 10%. Hitler aze de la tomada de Stalingrad una kuestyon fundamentala sin renderse kuenta ke azyendo esto, aflaka todo el kusur de su armada. I los Rusos aprovechan este yerro de Hitler : el 19 de novyembre, empesan la operasyon Uranus, preparada en gran sekreto. La idea es de kortar la armada de Paulus del kusur de las armadas almanas, i por esto kale destruir las defensas almanas al oeste de Stalingrad, ke en vedra no son almanas, ma ungarezas , rumanas i italyanas. En pokos diyas las defensas rumanas son burakadas al norte i al sur. Los rusos aviyan aparejado una ofensiva muy importante, lo ke los Almanes no entendyeron pishin ; el 23 de novyembre, los rusos del norte i los rusos del sur se akojen en la sivdad de Kalach, a 80 kilometros al oeste de Stalingard. Esta vez, son los 300.000 enserradores almanes ke se topan enserrados.

Los Almanes dechidan de salvar los enserrados en embiyandoles por los ayres armas i de komer. Ma no tyenen bastante avyones, ke son atakados por los kanones rusos i la fuersa aeryana no puede ayudar bastante a los enserrados.

Los Almanes aprovan de burrakar las defensas rusas para salvar la armada de Paulus : es la operasyon Wintergewitter. Las batayas son terrivles ma los Rusos rezisten i mismo ataken i toman el aeroporto de Tatsinskaya ke serviya a los Almanes para traer armas i komida.

Los Almanes venidos en ayudo de los enserrados se topan arrepushados a mas de 100 kilometros de los enserrados, ke se topan agora kortados en dos en Stalingrad.

Los Almanes de Paulus no tyenen bastante armas, nada de komer en un invyerno de 30 grados basho zero. Mueren mas del friyo i de ambre ke de los kombates kontra los Rusos.

El 8 de janvier, el jeneral Rokossovsky ofrese a Paulus de renderse, ma los ordenes de Hitler son de kombatir asta la muerte. Paulus kontinua la lucha i es echo Mareshal por Hitler el 30 de janvier 1943, ama yene, el diya de despues, 31, se rende. Los Almanes del otro pedaso se renden el 2 de fevrero. Todo lo ke keda de la armada almana, 91.000 ombres, son yevados komo prezoneros, i kaji todos mueren en poko tyempo, sovre todo de no komer. Paulus, el, va sovrebivir asta 1957.

Esta desfecha almana, en mismo tyempo de la de Rommel en El Alamein, va ser la primera de un alay de desfechas ke se van eskapar por la kaida de Berlin dos anyos mas despues.

Astal djueves ke vyene, si kyere el Dyo !

Edmond Cohen
Paris, Fransya

Check Also

enkontros de alhad 15 flyer03 bryan rachel i hannah

ENKONTROS DE ALHAD – 31 MARSO 2024 :: UNA MUEVA ORGANIZACION EN LOS ESTADOS UNIDOS, LA LIGA AMERIKANA DEL LADINO – Balabay Dr. BRYAN KISCHEN – Musafiras RACHEL AMADO BORTNICK i Dra. HANNAH PRESSMAN – A las 13 oras (Arjentina) x Zoom – Mas orarios en el anunsio

Donativo para ayudar a Enkontros de Alhad ENKONTROS DE ALHAD Avlados en Djudeo-espanyol – Ladino …

Deja una respuesta

Tu dirección de correo electrónico no será publicada. Los campos obligatorios están marcados con *

Este sitio usa Akismet para reducir el spam. Aprende cómo se procesan los datos de tus comentarios.