eSefarad Noticias del Mundo Sefaradi
Keridos amigos
Oy me fui por la ultima vez a la radyo, porke kijeron kortarme 30% de mi tyempo de avla, no por una sola vez, ama por syempre. No lo acheti i me fui. Mi idea es de avlar sovre youtube…salvo ke yo no sé komo se aze. Nense, me ambezaré…Si alkanso a azerlo, me puedresh ver i no solo entender, i yo podré avlar kuando kyero i el tyempo ke kyero.
Saludes a todos
Edmond Cohen
Paris – Fransya
——————————————————————————————
DEKE ESKAPO KON LA RADYO
Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha ke la prezento durante 25 anyos, i prezentada despues, asta agora i desde unos katorze anyos, por vuestro servidor Edmond Cohen, kon Philippe en la kabina.
Por empesar, vos akodro ke el proksimo atelye de konversasyon de Vidas Largas se tendra el martes 4 de junyo, a las dos i medya, en el Centre Communautaire. Estos atelyes son avyertos a todos, venid munchos.
Antes de venir a mi emisyon de oy, vos tengo de azer tres anunsyos :
El primer anunsyo es para akavidarvos ke, el 30 il el 31 de este mes de mais, una delegasyon de Vidas Largas sera resivida por la komunidad djudiya de Selanik ansi ke por el konsul de Fransya en Selanik.
El sigundo anunsyo es para ambezarvos ke el livro memoryal sovre la deportasyon de los djudeo-espanyoles de Fransya, editado por la asosyasyon Muestros Dezaparesidos, a sido dado a la basmaané (imprimeriya), i si kyere el Dyo, puedra salir en junyo proksimo. Al empesijo, el livro deviya ser kaji solo la lista de los 5.300 djudeo-espanyoles deportados de Fransya, i kaji todos asasinados, i deviya tener 250 pajinas. Ama a poko a poko, el livro se engodro mas i mas de entrevistas kon varyos djudyos kontando lo ke fue la vida durante la Okupasyon, i tambyen de los lavores de munchos istoryanos avlando de los djudeo-espanyoles de Fransya antes i durante la gerra, de los veluntaryos en la armada franseza, de los Rezistantes, ets. I de 250 pajinas, el livro se izo de 750. Es un momumento ke kada djudeoespanyol se deve de tener en kaza, en memorya de muestros poveretos dezaparesidos inosentes, ombres, mujeres i kriaturas.
Sovre el sityo de Muestros Dezaparesidos, toparesh todas las informasyones de menester.
https://muestros-dezaparesidos.org/
Lo ke puedo dizir de agora, es ke, salvo para los ke ya pagaron para la suskripsyon, el presyo de venta sera de 29 €, lo ke, para un tal livro, es de baldes.
El 13 de junyo se va tener una seremoniya en la kripta del Memoryal de la Shoah en Paris, ama syendo sus chikas dimensyones, se va azer solo sovre invitasyones.
El treser anunsyo es para akavidarvos ke el alhad 15 de septyembre à las dos i medya la asosyasyon Vidas Largas va fyestar su kuarenten aniversaryo en el Centre Communautaire, kon bayles i kantes djudeo-espanyoles ansi ke un bufé. Para tomar las rezervasyones, tendresh en poko tyepo las informasyones dovre el sityo de la asosyasyon Vidas Largas.
https://sites.google.com/view/vidaslargas/
I agora vengo a mi emisyon de oy.
La semana pasada, tuve de kedarme en medyo de mi emisyon, i por esta razon en medyo de la batalya de Stalingrad ke vos estava kontando, en un momento, verso la mitad de novyembre 1942, ande la situasyon es kaji dezesparada para los Rusos : los Almanes, despues de tener el 11 de novyembre kortado las defensas rusas en tres partes, an konkistado 90 % de la sivdad de Stalingrad, ma yene los 10% ke kedan kontinuan de rezistir. I los Almanes son tan aflakados, kansados, sin bastante munisyones, ke no alkansan a reushir kon estos 10%. Hitler aze de la tomada de Stalingrad una kuestyon fundamentala sin renderse kuenta ke azyendo esto, aflaka todo el kusur de su armada. I los Rusos aprovechan este yerro de Hitler : el 19 de novyembre, empesan la operasyon Uranus, preparada en gran sekreto. La idea es de kortar la armada de Paulus del kusur de las armadas almanas, i por esto kale destruir las defensas almanas al oeste de Stalingrad, ke en vedra no son almanas, ma ungarezas, rumanas i italyanas. En pokos diyas las defensas rumanas son burakadas al norte i al sur. Los rusos aviyan aparejado una ofensiva muy importante, lo ke los Almanes no entendyeron pishin ; el 23 de novyembre, los rusos del norte i los rusos del sur se akojen en la sivdad de Kalach, a 80 kilometros al oeste de Stalingard. Esta vez, son los 300.000 enserradores almanes ke se topan enserrados.
Los Almanes dechidan de salvar los enserrados en embiyandoles por los ayres armas i de komer. Ma no tyenen bastante avyones, ke son atakados por los kanones rusos, i la fuersa aeryana almana no puede ayudar bastante a los enserrados.
Los Almanes aprovan de burrakar las defensas rusas para salvar la armada de Paulus : es la operasyon Wintergewitter. Las batayas son terrivles ma los Rusos rezisten i mismo atakan i toman el aeroporto de Tatsinskaya ke serviya a los Almanes para traer armas i komida.
Los Almanes venidos en ayudo de los enserrados se topan arrepushados a mas de 100 kilometros de los enserrados, ke se topan agora kortados en dos en Stalingrad.
Los Almanes de Paulus no tyenen bastante armas, nada de komer en un invyerno de 30 grados basho zero. Mueren mas del friyo i de ambre ke de los kombates kontra los Rusos.
El 8 de janvier, el jeneral Rokossovsky ofrese a Paulus de renderse, ma los ordenes de Hitler son de kombatir asta la muerte. Paulus kontinua la lucha i es echo Mareshal por Hitler el 30 de janvier 1943, ama yene, el diya de despues, 31, se rende. Los Almanes del otro pedaso se renden el 2 de fevrero. Todo lo ke keda de la armada almana, 91.000 ombres, son yevados komo prezoneros, i kaji todos mueren en poko tyempo, sovre todo de no komer. Kale dizir ke la suerte de los prezoneros rusos kaidos antes en las manos de los Almanes no fue mijor. Paulus, el, va sovrebivir asta 1957.
Esta desfecha almana, en mismo tyempo de la de Rommel en El Alamein, va ser la primera de un alay de desfechas ke se van eskapar por la kaida de Berlin dos anyos mas despues.
Ansina se teniya de eskapar mi emisyon del djueves pasado si la radyo no me teniya kortado la palavra.
A kada vez ke la radyo me demando de antes, sea por modo de los haberes, sea por modo de las fyestas, de azer mas korto o de no azer del todo, por una vez, mi emisyon semanala, syempre acheti.
Ama esta vez, las kozas no se pasaron ansina. Sin akavidarme, la radyo me disho,kuando vine para azer una emisyon ya aparejada para 20 minutos, ke desde agora mi emisyon deve ser mas korta, porke metyeron una senyora para avlar despues de mi.
Despues de unos kaji kuarenta anyos de benevolensya entre el Profesor Sephiha i yo, me parese ke esta manera de azer es un manko de korteziya, sino para muestras personas, en todo kavzo para muestra lingua i sus oyentes, i no me syento la gana de achetarla. Por esto, venitesh de oir mi ultima emisyon aki.
Lo ke vo aprovar, si so kapache, va ser de azer mi propya emisyon sovre Youtube, i de esta manera no solo me oiresh, ma ensima me veresh. Ama dainda no estamos en esto, i kuando estaré pronto, vos daré mas informasyones sovre el sityo de Vidas Largas, muy kolay de topar sovre Google, ke vos kombido de vijitar de vez en kuando.
https://sites.google.com/view/vidaslargas/
Ya sé ke tengo oyentes ke no tyenen ordinador, i para eyos no se kualo azer. Veremos…
Entremyentres tengo de desharvos, i vos diré solo ke fue un grande onor i un grande plazer para mi, durante unos katorze anyos, de toparvos kada semana i de avlarvos en muestra kerida i dulse lingua. Me kedo aki, ma no tengo del todo la entisyon de desharvos para syempre.
A vermos en otro lugar, si kyere el Dyo !
Edmond Cohen
Paris, Fransya
