eSefarad Noticias del Mundo Sefaradi
Keridos amigos,
En este kanton vo partajar mis eskritos ke ize por anyos para la emisión de radio Muestra Lingua ke ya no sale mas por la radio djudiya de Fransia.
Saludes a todos
Edmond Cohen
Paris – Fransya
LOS DJUDYOS DE FRANSYA I LA REVOLUSYON (2)
La semana pasada, vos dishe ke me topava ovligado de kontinuar mi istorya, porke no kale pensar ke todo se izo kyeto para los djudyos de este diya del 27 de septyembre 1791, kuando los deputados de la Asamblea Constituanta votaron la sivdadaniya franseza para todos los djudyos. Vos dishe ke para los djudyos los dertes vinyeron pishin, i lo vo kontarvos oy.
Vos dishe la semana pasada ke si la ley fue votada el 27 de septyembre, era porke los deputados alzasyanos no eran este diya en la Sala, salvo Rewbell. Kuando se ambezaron lo ke se paso fueron medyo lokos, i se arrekojeron para dechidar kualo azer. Ya vos akodro ke la Asamblea deviya de separarse el 30 de septyembre, i ke mos topavamos a la tadre del 27. Ke azer ? Van a ver al deputado Duport, el ke prezento i izo votar la ley, para obtener de el ke no se oponga a una mueva diskusyon sovre la ley. Despues de dos oras i medyo de peleo, Duport acheta de kayarse el diya de despues kuando los Alzasyanos van a propozar de trokar la ley.
Sin pedrer tyempo, el diya despues, 28 de septyembre, el konde de Broglie, uno de los enemigos de los djudyos, demanda ke sea votado un amendamyento a la ley del diya antes, i ke sea dicho ke en azyendo la djura sivika, el djudyo renunsya a sus leyes siviles i politikas. Este amendamyento es votado, ama vyene otro deputado, yamado Prugnon, ke aze valer ke las leyes djudiyas syendo relijiozas, no pertenese a la Asamblea de tokar a la relijyon de los djudyos. I de muevo es votado un amendamyento dizyendo ke en vez de leyes siviles i politikas, los djudyos renunsyan a sus privilejyos en azyendo la djura sivika. Ama kualos son sus privilejyos ? Si las leyes siviles de los djudyos no son privilejyos, la renunsyasyon a los privilejyos no kyere dizir nada. Los deputados Alzasyanos se renden kuenta ke no obtuvyeron grande koza este 28 de septyembre kontra la ley del diya antes, ama pishin van a aprovar otra koza, i esta vez no va ser de Broglie ke va tomar la palavra, ama el Alzasyano Rewbell.
Asigun Rewbell, kale azer una koza para impedir ke los kazalinos de Alsace ataken a los djudyos, i en el propyo interes de los djudyos, kale blokar los kreditos djudyos, prezentados komo uzuraryos.
I Rewbell obtyene el voto de esta ley, sin ke los deputados se rendan kuenta ke esta ley iva a la kontra no solo de la ley del diya antes, ama de la Constitusyon. Lo ke kaliya blokar eran los kreditos uzuraryos, no los kreditos djudyos, konsiderados komo uzuraryos porke djudyos.
Ama es klaro ke este 28 de septyembre los deputados eran tan apresurados de eskapar todo lo ke mankava dainda de ver antes el 30 – aviya dainda, entre otras, la kuestyon de los esklavos pretos – ke ya se ve ke lavoraron a la kuturu, sin tomarse el tyempo de la refleksyon.
No es en una vente minutos ke se puede azer un estudyo istoriko de esta kuestyon de los kreditos djudyos, mas interesante va ser de avlarvos de lo ke se paso durante la Terror, sovre todo en Alsace ande los ke teniyan el poder eran de un antisemitismo ke no se puede imajinar.
Se puede dizir ke la Terror, en la Fransya revolusyonarya, sureo un anyo, del enverano 1793 al enverano 1794. Fue, komo su nombre lo dize, una epoka terrivle, kon unas 100.000 a 300.000 arrestasyones y unos 35.000 a 40.000 matados.
No se puede dizir ke los djudyos sufriyeron tanto de kondanasyones a muerte. Uvo en vedra muy pokas. Ama vos kyero amostrar komo se avlava de los djudyos en Alsace, a partir de unos kuantos dokumentos ofisyales. Es muy interesante de ver komo avlavan los jakobinos de Alsace, mesklando en una mizma avla los prinsipyos de la Revolusyon, libertad i djustisya, i del otro lado una aborrisyon rasista i antisemit mas fuerte ke todo.
Vos daré por egzemplo un dokumento embiyado en 1793 a la Convensyon, kijo dizir a la Asamblea de los deputados, en favor de los djudyos de Alsace, por el avokato ke aviyan tomado para esta okazyon, un avokato muy korajozo yamado Chauveau-Lagarde, ke tyene una kaye a su nombre en Paris porke defendyo, entre otras, Marie-Antoinette i Charlotte Corday delantre el Tribunal Revolusyonaryo. El mismo fue aferrado i echado en prezo. La kurtareo de baldes. Malesherbes, el ministro de Louis XVI del kual vos avli la semana pasada porke se teniya okupado de los djudyos un anyo antes de la Revolusyon, no tuvo el mazal de Chauveau-Lagarde : fue guillotinado en mismo tyempo ke su mujer i su ija, despues de verles kortar la kavesa.
Ama aboltaremos a Chauveau-Lagarde kuando era avokato de los djudyos. Ke mos dize este avokato ? Ke esta denunsyando a la Convensyon, la Asamblea de los deputados , un prodjeto de desizyon tomado por los kapos del departamento del Haut-Rhin (la parte sur de la Alsace, ande se topan Colmar i Mulhouse) ke, asigun este avokato, « nada puede egalar su barbariya sino su enganyo, i ke parese aver sido diktado por el fanatismo a kanibales ».
Deke ? Porke, mos konta el avokato, el prodjeto pinta a los djudyos komo – i aki el avokato emplea los byervos ke meldo sovre este dokumento ke esta atakando – « ombres perversos », sin zahutes, sin onestad, sin uzansas, « ensuzyados de krimenes », komo « monstres ke paresen perteneser solo por el eksteryor a la espesye umana », komo una « RASA » arrebashada i mamzer (une race dégradée et abâtardie). « Su EGZISTENSYA es un pezgo indinyo a ombres liberos, una desgrasya publika ke no se puede SIN KRIMEN tolerar en un govyerno popular ». Esto, eskrive kon muncha razon el avokato, es un enkorajamyento a la matansina de los djudyos. Grasyas a este avokato, el prodjeto denunsyado no pudo ser puvlikado, i en vedra no lo tengo visto, lo konosko solo por la intervensyon del avokato, ama ya vos amostra la manera de pensar i de avlar de los ofisyales lokales.
Esto ke vos konto se pasava, komo vos dishe, en el sur de Alsace. Ama en el norte, departamento del Bas-Rhin, ande se topa Strasbourg, era la misma manera de avlar. El 21 de novyembre 1793, los djudyos los mas nombrados de Strasbourg, entre los kuales Cerf Berr el mismo, son aferrados i echados en prezo. El prokurador eskrive : « Ay ande estos ombres la ley inumana de operar kon sangre sovre la kriatura macho ke nase, komo si la natura no era perfekta.Es una ofensa a la Divinidad. Yevan barba larga por ostentasyon i para imitar a sus padres sin tener eredado de sus zahutes. Praktikan una lingua ke no konosen i ke ya no es uzada desde largo tyempo. En konsekuensa demando a la Komisyon de proibir estos uzos a los djudyos i de ordenar ke un autodafe sera echo a la Verdad de todos los livros ebreos i sovre todo del Talmud, ke el ke lo eskrivyo fue bastante ladron para permetirles de prestar moneda kon uzura a los ke no son de sus relijyon ».
I la komisyon ordeno, komo era demandado, un autodafe de todos los livros ebreos inkluyendo el Talmud (komo se izo muncho durante la Edad Medya).
En la misma epoka, ay una vendita puvlika de vakas por los administradores de Strasbourg : « Komo deven sirvir a la propagasyon del revanyo (propagation du bétail) no seran admitidos los kasapes… i los djudyos ! » Los kasapes, ya se puede entender. Ama ke vyenen azer los djudyos aki ? Parese una shaka, ama no es una shaka. Es un dokumento administrativo autentiko.
El 2 de fevrero 1794, el direktoryo de Distrikto de Strasbourg eskrive ke son proibidas las reunyones tenidas por, ansina avla el dokumento, « sivdadanos ke tyenen la ozadiya de ensuzyar el ermozo byervo de sivdadano i de mesklarlo kon el de djudyo, se arrekojen en sus kales de antes i aya selebran sus antiguas hadras (leurs anciennes simagrées), en una lingua deskonosida, kon la kuala seriya kolay de azer danyo a la sigurita jenerala. … »
El 17 de djunyo 1794, los kapos del departamento eskriven a los kapos del distrikto :
« Una mueva prova mos fue dada de la obstinasyon fanatika i superstisyoza de los djudyos ; la pulisiya vyene de aferrar en Rosheim el puerpo de un djudyo muerto en Strasbourg, ke los djudyos yevavan a Rosenweiler, para ser enterrado aya asigun las bovanchonas leyes (les imbéciles lois) del rabinismo. Estos ombres no kyeren avrir sus ojos a la luz de la razon. Sus prinsipyos antisosyales son todo para eyos, i kuando los sivdadanos sigen kon amor leyes echas por un puevlo libero, eyos tyenen dainda la ozadiya de persistir en los aktos de una sekta absurda i barbara…
… Dadmos a konoser vuestras keshas ; las meteremos basho los ojos de la Convensyon Nasyonala, i obtendremos de eya las medidas las mas duras kontra los kusures detestados de un puevlo de todo tyempo aborresido i menospresyado (les restes détestés d’un peuple de tout temps haï autant que méprisé) »
El 20 de djulyo 1794, la Senyora Auerbach, ija del haham David Sintzheim, el ke va ser tredje anyos mas tadre, en 1807, el prezidente del Sanhedrin konvokado por Napoleon, se ve konvokada delantre del Tribunal de la Pulisiya de Strasbourg, por aver yevado un fostan « ke amostra su atadijo a una sekta relijyoza i fanatika ». Avro yo aki una paranteza para dizir ke kuando oigo komo se avla oy en diya en Fransya de la manera en la ke se vistan syertas mansevikas muzulmanas, penso a la senyora Auerbach. La istorya no troko tanto…Syerro la paranteza.
Esto todo es negro, por siguro, ama no se puede avlar de terror .
Otros dokumentos dan mas espanto :
El 19 de novyembre 1793, Baudot, reprezentante del puevlo para las armadas del este, eskrive a un amigo, avlandole de los djudyos : « en todos lugares meten la kupidita en lugar del amor de la patria i sus ridikolas superstisyones en lugar de la razon….No seriya bueno de okuparse de una rejenerasyon guiyotinyera (regenération guillotinière) sovre eyos ? »
El 27 de djunyo 1794, los Administradores del Departamento del Bas-Rhin embiyan dos letras a Hentz, reprezentante en misyon, kijo dizir deputado embiyado en provinsya :
En la primera, empesan por dizirle :
« En aleshando los djudyos de una sosyeta ke entosigan de sus reflo matador, vas a sekar la primera fuente de la kupidita ; ama kale sekarlas todas en djuntas. »
En la sigunda, dizen, avlando yene de los djudyos :
« En vano una nasyon djeneroza i sensivle los admityo en su pecho…arrepushan la mano apiadoza ke la filantropiya les tendiya, i persistyendo en sus aboresyon fanatika, sus korason se syerra a la gratitud para solo avrirse …a la estruisyon de este mizmo puevlo ke keriya abrasar en eyos a muevos ermanos…El rovo, la inaktividad i la inutilidad tyenen syempre formado el esprito insosyal de esta nasyon barbara…Todos los esfuersos, todos los kudyados, todos los modos de konvensimyento, mismo de vyolensya se rompyeron frente a la ramayud, los fitiles i la negrigura del puevlo del Dyo. Agora kale arrankar plantas parazitas de la tyerra de la libertad. Te propozamos dunke, sivdadano reprezentante, de ordenar :
– primo, ke todos los djudyos los mas rikos seran metidos en prezo asta la paz, i despues echados de Fransya por syempre
-sigundo, ke todos los otros, ombres komo mujeres, seran embiyados en los kazales del interyor, metyendo en kada uno lo mas poko posivle, ovligandolos de no pueder, kon la menasa de las penas las mas duras, irse mas leshos ke kuatro kilometros, forsandolos de prezentarse kadal diya a la munisipalidad, al komite de sorvelyansa, ovligandolos a los lavoros de los kampos, de las karreteras i de los atelyes, asigun sus fuersas i sus sekso ;
3, ke todas sus kriaturas machos o embras, (mâles ou femelles, dize el teksto komo si se tratava de animales) desde dodje anyos i menos, seran embiyados en kazas i ospisyos publikos, para resivir una edukasyon nasyonala, para ambezar artes i ofisyos, enfin para adkirir un diya zahutes i talentos ke agan olvidar a los krimenes de sus padres. Las kriaturas, en una Republika, no pertenesen a sus padres, pertenesen a la patria. Las medidas ke te propozamos de tomar son duras, sivdadano reprezentante, ama no kale ezitar entre ombres i la patria, entre una nasyon fanatika i barbara i el saludo de un puevlo libero. »
Lo ke vos vengo de meldar no es un artikolo de gazeta, es un dokumento ofisyal…
Orozamente para los djudyos, i para munchos otros fransezes inosentes, la Terror se eskapo un mes despues esta menasa mortala, kon la kaida de Robespierre el 28 de djulyo 1794, este mismo Robespierre tanto amigo de los djudyos en 1789, i ke aziya en este tyempo diskorsos a la Asamblea Constituanta para la abolisyon de la pena de muerte…
Venido en Alsace al empesijo de septyembre 1794, un muevo reprezentante de la Convensyon yamado Foussedoire izo en la semana de su yegada una proklamasyon dizyendo :
« Libertad Igualidad
Fraternidad o la Muerte
Foussedoire, reprezentante del puevlo en los Departamentos del Haut i del Bas-Rhin
Sivdadanos,
Es kon el aksento de una profunda kolora ke devo kesharme de las persekusyones egzersadas en estos Departamentos kontra ombres ke la negrigura o la bovedad se esfuersan syempre de meter basho el nombre de djudyos .
…Sivdadanos, ke la reprobasyon publika sea kontra todos los ke, a la kontra de los prinsipyos, persekutan a sus ermanos por aboresyon o por inyoransa ; i de mi lado, uzando de la otoridad ke me a sido konsentida, no olvidaré nada para azer respektar a la ley ke kudya de manera iguala todos los Fransezes.»
Kon esta proklamasyon ke trusho un poko de konsolasyon a los djudyos, vos tengo de deshar, i vos digo al djueves ke vyene, si kyere el Dyo !
Edmond Cohen
Paris, Fransya
