eSefarad Noticias del Mundo Sefaradi
Keridos amigos,
En este kanton vo partajar mis eskritos ke ize por anyos para la emisión de radio Muestra Lingua ke ya no sale mas por la radio djudiya de Fransia.
Saludes a todos
Edmond Cohen
Paris – Fransya
____________________________________________________________
YOM AATSMAUT
Muestra jenerasyon, en unos pokos anyos, diremos entre 1941 i 1948, en estos ocho anyos tuvo de ver la Schoa i el renasimyento de un Estado djudyo sovre su tyerra. El peor de los suenyos malos, i el mijor de los suenyos ermozos. Ke dizir ? No se. Ansina es.
Aki no vos puedo kontar toda la istorya de este renasimyento. Keriya solo kontarvos komo se paso este diya del 14 de mayo 1948, 5 yar 5708.
Ya savesh ke, el 29 de novembre de 1947, sinkuenta anyos despues del primer kongreso sionisto de 1897 (aviya dainda sovrebivyentes de este kongreso en 1947) la Asamblea jenerala de las Nasyones Unidas tomo, a la mayoriya de los dos tyersos, una rezolusyon dechidando la kreasyon en Palestina de dos estados, un djudyo i un arabo, asigun un plano de espartimyento.
Ya savesh ke, a la tadre del kongreso de 1897, Theodor Herzl, ke lo aviya organizado, eskrivyo en su tefter personal : « Oy, krei al estado djudyo. Si lo diziya a boz alta, kada uno se rieriya, ama en sinko anyos puede ser, en sinkuenta anyos por siguro, esto sera una realidad. » Herzl era un grande profeta.
Ya savesh ke el Mandato britaniko sovre la Palestina se deviya eskapar el 15 de Mayo 1948, o por ser mas presizo, el 14 a medianoche.
La idea era de deklarar el muevo Estado el diya 15, despues de la fin del Mandato. Ama este 15 de mayo 1948 kaiya en shabath, i los syonistos relijyozos no puediyan achetar de firmar kualkyer dokumento en shabath. Por esto fue dechidado de azer la deklarasyon en el vyernes antes, antes de la kaida del shabath, ke orozamente no kae tan presto en mayo, ama yene, para ke todo sea eskapado antes de shabath, a las dos de la mediudiya.
Ama nada era pronto. El tredje de mayo, dainda no se saviya komo se yamariya el muevo estado : Sion ? Erets-Israel ? Yehuda ? Ever (de ande vyene ivri) ? Por esto es ke los primeros pules se aparejaron de antes sin saver el nombre del pais, i metyeron doar ivri : posta ebrea.
No se saviya tampoko komo seriya la bandyera. Se adopto finalmente la bandyera syonista, blanka kon un Magen David mavi en medyo, entre dos bandas mavis.
I sovre todo, los dirijantes, ke ivan del komunisto Wilner a los Agudat Israel, ultra relijyozos, no se aviyan metido d’akodro sovre los byervos de la Deklarasyon. Esta deklarasyon deviya ser eskrita i firmada sovre pergamino. Ama el ke teniya la karga de eskrivir el pergamino no saviya kualo eskrivir. I Ben Gurion meldo finalmente un papel eskrito kon una makina de eskrivir emprestada al ultimo momento…
Por egzemplo, los relijyozos keriyan una deklarasyon relijyoza ke avlariya de la providensya i del Dyo. El komunisto diziya ke no puedriya firmar un texto ansina. Finalmente, se metyeron d’akodro para no impedir la unyon de todos, i tomaron el byervo Tsur Israel, la Roka de Israel, ke es el Dyo sin dizir ke es el Dyo.
Ande azer la deklarasyon ? Lo mijor uvyera sido de azerla en Yerushalayim. Malorozamente, la parte djudiya de la sivdad era enserrada por los arabos, i por esto fue dechidado de azerla en Tel Aviv. Se tomo una sala del muzeo de Tel Aviv, i detras de los firmadores i de Ben Guryon, se metyo una grande foto de Theodor Herzl, ke lo meresiya. I sovre las paredes, kuadros de pintores djudyos.
I Ben Guryon empeso de meldar, en ebreo naturalmente, esta deklarasyon muy ermoza ke yo vos vo meldar en djudeo-espanyol. So yo ke la trasladi a partir del teksto ebreo, ama no konosko malorozamente bastante byen el ebreo, i me ayudi de traduksyones en franses i en espanyol.
« En Erets-Israel nasyo el puevlo djudyo. Aki tomo forma su identidad espirituala, relijyoza i politika. Aki obtuvo por primera vez su soveraniya, kreo valores kulturales de importansya nasyonala i universala i dyo al mundo entero el Livro de los livros.
Despues ke fue arrondjado de su tyerra, el puevlo djudyo le guadro su fieldad afillu todas sus dispersyones, i nunka se kedo de orar por su retorno a eya, i de esperar el renasimyento de su libertad nasyonala.
Empushados por esta atadura istorika i tradisyonala, los djudyos se esforsaron en kada jenerasyon de estableserse de muevo en sus antigua patria. En las ultimas dekadas, aboltaron en masa. Pioneros, imigrantes i defensores izyeron enfloreser el dizyerto, arrebivir la lingua ebrea. Fraguaron kazales i sivdades, i krearon una komunidad kresyendo, ke kontrolava su ekonomiya i kultura propyas, amante de la paz, ama kapache de defenderse de si para si, traendo las bendisyones del progreso para todos los moradores del pais, keryendo la independensya nasyonala.
En el anyo 5657 (1897) se arrekojo el kongreso sionisto yamado por la boz del padre espiritual del estado djudyo Theodor Herzl i proklamo el derecho del puevlo djudyo a su renasimyento nasyonal en su propyo pais.
Este derecho fue rekonosido por la Deklarasyon Balfour del 2 de novyembre 1917 i afirmado de muevo por el mandato de la Sosyedad de las Nasyones ke rekonosyo ofisyalmente i internasyonalmente el atadijo istoriko entre el puevlo djudyo i Erets-Israel i el derecho del puevlo djudyo de fraguar de muevo su ogar nasyonal.
La shoa ke aharvo al puevlo de Israel este ultimo tyempo, kon la matansina de milyones de djudyos en Evropa, fue otra demostrasyon klara de la adjile de topar una solusyon al problema del manko de ogar, kon el renasimyento del estado djudyo en Erets-Israel ke tendriya de avrir anchas las puertas de la patria a todo djudyo i dariya al puevlo djudyo la situasyon de myembro rekonosido en la famiya de las nasyones.
Los sovrebivyentes del olokosto nazi en Evropa i djudyos de otros paizes no kedaron de ayegar a Erets Israel, afillu las difikultades i el peligro, i nunka kedaron de afirmar su derecho en una vida digna, libera i kon onor en la patria de su puevlo.
Durante la sigunda gerra mundyala, los moradores ebreos en el pais partisiparon en plena parte en la lucha de las nasyones ke defendiyan libertad, paz i amor kontra la negrigura de las fuersas nazis, i kon la sangre de sus soldados i su esfuerso militar ganaron el derecho de toparse entre los puevlos ke fundaron la Organizasyon de las Nasyones Unidas.
El 29 de novyembre 1947 la Asamblea Jenerala de las Nasyones Unidas tomo una rezolusyon disponyendo el establesimyento de un estado djudyo en Erets-Israel. La Asamblea Jenerala demando a los moradores de Erets Israel ke tomen en sus manos las medidas nesesaryas para meter este plano en ovra. Este rekonosimyento por parte de las Nasyones Unidas del derecho del puevlo djudyo de estableser su propyo estado es irrevokavle.
Ademas es el derecho natural del puevlo djudyo de ser maestro de su propyo destino komo todas las otras nasyones, en un Estado soverano propyo .
En konsekuensa, mozotros, myembros del Consejo del puevlo, reprezentantes de la komunidad djudiya de Erets Israel i del movimyento sionisto, estamos reunidos aki en el diya del eskapamyento del mandato britaniko sovre Erets Israel, i, asigun los derechos naturales i istorikos del puevlo djudyo, i tambyen la rezolusyon de la Asamblea jenerala de las Nasyones Unidas, proklamamos el establesimyento de un estado djudyo en Erets Israel, es el Estado de Israel.
Declaramos ke, desde el momento ke se eskapa el Mandato , a medyanoche, noche del shabath 6 iyar 5708 (15 de mayo 1948), antes del establesimyento de las otoridades del Estado regularmente elijidas en akodro kon la Constitusyon ke devera ser adoptada por la Asamblea konstituyente elijida no mas tadre ke el primo de oktovre 1948, el Consejo del Puevlo se va azer Asamblea provizorya del Estado, i su organo egzekutivo, la Administrasyon del Puevlo, se va azer Govyerno provizoryo del Estado de Israel.
El Estado de Israel sera avyerto a la imigrasyon djudiya i al arrekojimyento de los egzilados, desvelopara el pais para el byen de todos sus moradores; sera fundado sovre los prinsipyos de libertad, de djustisya i de paz ambezados por los profetas de Israel ; dara una igualidad kompleta de derechos sosyales i politikos a todos sus sivdadanos, sin konsiderasyon de relijyon, rasa o sekso. Akordara la libertad de relijyon, konsyensya, lingua, edukasyon i kultura, defendera los lugares sagrados de todas las relijyones i sera fiel a los prinsipyos de la Karta de las Nasyones Unidas.
El Estado de Israel esta dispuesto a kooperar kon las Ajensiyas i reprezentasyones de las Nasyones Unidas para egzekutar la rezolusyon de la Asamblea generala del 29 de novyembre 1947, i adoptara todas las medidas nesesaryas para la unyon ekonomika de todo Erets-Israel.
Yamamos a las Nasyones Unidas para ke ayuden al puevlo djudyo en la fragua de su Estado i para ke resivan el Estado de Israel en la famiya de las Nasyones.
Yamamos – afillu en medyo de la agresyon sangrienta ke mos aharva desde mezes – a los ijos del puevlo arabo bivyendo en el Estado de Israel para ke guadren a la paz i partisipen en el fraguamyento del Estado, sovre la baza de sivdadaniya plena i igual i de una reprezentasyon korespondyente en todas sus institusyones provizoryas i permanentes.
Tendemos una mano de paz i de buen vizindaryo a todos los Estados vizinos i a sus puevlos, i los kombidamos a estableser atadijos de kooperasyon i ayudo mutual kon el puevlo djudyo soverano asentado en su tyerra. El Estado de Israel esta dispuesto a realizar su parte en el esfuerso komun para el progreso de todo el Medyo Oryente.
Yamamos a todo el puevlo djudyo en la diaspora para ke se adjunte alderedor de la komunidad del Estado en el lavoro de imigrasyon i de fraguamyento i para ke sea unido a eya en la grande lucha para realizar el suenyo de tantas jenerasyones : la redempsyon de Israel.
En la seguridad del Tsur Israel, metemos muestros firmamyentos sovre esta Deklarasyon en esta sesyon del Consejo provizoryo del Estado, sovre el suelo de la patria, en la sivdad de Tel Aviv, en este tyempo antes de Shabath, el sinko de Yar 5708 (14 de mayo 1948). »
I komo el desmazalado ke teniya de eskrivir la deklarasyon sovre el pergamino no pudo azerlo, syendo, komo vos dishe, ke al ultimo momento el teksto dainda no era pronto, kada uno de los 37 firmadores firmo sovre un pedaso vaziyo de pergamino ke fue despues kuzido al kusur una vez ke todo fue eskrito…
Todos los djudyos del pais oyeron a la radyo esta deklarasyon i despues empesaron los bayles en las kayes i la fyesta.
Ama Ben Gurion el mismo no era tan alegre. Porke el saviya ke una gerra terrivle iva empesar el diya despues, i ke la armada djudiya era muy muy flaka i sin armas.
Pishin despues de este firmamyento se fue a su kaza kon Israel Galili i Igal Yadin, kapos de la Hagana. I diskutyeron noche entera de la situasyon militar.
Un diya, si kyere el Dyo, vos kontaré esta gerra de independensya, i komo la viktorya de los djudyos fue un nes inkreivle.
Ama por oy me vo kedar aki sovre este espanto de los dirijantes de Israel esta noche sin durmir entre el 14 i el 15 de mayo 1948.
Edmond Cohen
Paris, Fransya
