eSefarad Noticias del Mundo Sefaradi
Keridos amigos,
En este kanton vo partajar mis eskritos ke ize por anyos para la emisión de radio Muestra Lingua ke ya no sale mas por la radio djudiya de Fransia.
Saludes a todos
Edmond Cohen
Paris – Fransya
____________________________________________________________
EL KALENDARYO DJUDYO
De lo mas leshos ke puedemos irmos al empesijo de la istorya del ombre, vemos ke este kijo syempre kontar i kalkular el tyempo ke pasa. I de una manera ke sea la misma para dos personas o mas, si kyeren azer kozas en djuntos o tomar randevu.
Para el tyempo kurto, se puede tomar una kupa de agua o de safra, i kontar kuanto tyempo mete a inchirse, a kondisyon ke la agua o la safra kayga de manera regular, i ke kada uno inche la misma kupa ke los otros en el mismo tyempo.
De toda manera, para tyempo largo la agua o la safra no abasta. Kale topar otra koza ke sea regular i ke sea la misma para todos. I la koza la mas evidente para todos es el tyempo ke va de una noche a otra, i diré de una medya noche a otra, porke la noche puede ser korta en enverano, larga en invyerno, de toda manera del medyo al otro medyo, es syempre el mismo tyempo, ke se yama un diya.
Para tyempo mas largo, se puede mirar la luna. De una luna a otra, es kaji a kada vez el mismo tyempo, ke se yama un mes. Seriya kolay si un mes era una kantidad exacta de diyas. Ama malorozamente no. La luna torna al deredor de la tierra sin okuparse de ke la tyerra, de su lado, torna sovre si mismo en un diya i abolta al deredor del sol, en un tyempo ke yamamos un anyo. La luna torna al deredor de la tyerra en mas o menos 29 diyas i medyo. De tal manera ke si keremos ke un mes empese a kada vez por la mueva luna i ke tenga un nombre entero de diyas, kale dizir ke un mes tendra 29 diyas, i el de despues 30, i ansina a kada vez.
Kuando se mira la luna, es kolay de ver ke troka de forma kadal diya. Al empesijo aze un kresyente komo una D, despues de 7 diyas se ve una medyaluna en forma de D. Despues de 15 diyas la luna se ve entera, despues de 21 o 22 diyas no se ve mas ke yene una mitad, ama la otra mitad, esta vez en forma de C. De tal manera ke mirando la luna, kada uno puede saver mas o menos en ke diya estamos. Por egzemplo, en el mes de Nisan, si la luna se ve entera, estamos en medyo del mes, dunke en Pesah. En Tishri, si la luna empeso ay diez diyas i agora esta entre medya i entera, estamos el diez del mes, dunke en Kipur, ets.
Ya savesh tambyen ke la tyerra torna al deredor del sol en 365 diyas i un kuarto. Mismo si no saviyan ke la tyerra torna, los ombres ya aviyan kontado el tyempo ke se va de un invyerno a otro, en 365 diyas i un kuarto, dunke 12 diyas i un kuarto de mas ke dodje lunas, ke azen solo 354 diyas. Los krystyanos yaman anyo este tyempo ke va de un invyerno al otro, i lo kortan en dodje pedasos ke no tyenen nada ke ver kon la luna, i ke azen sigun el pedaso 30 o 31 diyas, 28 o 29 en fevrero, i yaman mes este pedaso. Ama es manera de avlar, porke en vedra el mes devriya ser el tyempo de una luna, i un mes krystyano no va kon la luna.
Los muzulmanos kyeren ke kada mes sea kon la luna, i yaman anyo el tyempo de dodje lunas, dunke un tyempo de 354 diyas, ke no va kon el sol i ke dunke no es un haliz anyo, porke faltan dodje diyas i un kuarto a kada vez, de tal manera ke kuando se pasaron 19 anyos para los kristyanos, se pasaron 19 anyos i syete mezes para los muzulmanos.
Los djudyos, eyos, tyenen un kalendaryo, ke, por lo ke se, es oy uniko en el mundo, porke es el solo ke kamine i kon la luna i kon el sol. Los mezes de muestro kalendaryo se van kon la luna, i tenemos dunke anyos de 354 diyas komo los muzulmanos, ama para segir tambyen el sol, adjuntamos 7 lunas en dizimueve anyos. Es un grego ke se yamava Meton el ke disho (en 432 antes del Kristo) ke 19 anyos solares aziyan kaji djusto 235 mezes lunares, ma en vedra parese ke los Kaldeanos ya lo aviyan topado antes de el. 235 es 19 vezes dodje, i mas 7. Kyere dizir ke para adjuntar estos syete mezes sovre 19 anyos djudyos, tenemos, en dizimueve anyos, syete anyos de 13 lunas. Una anyada de tredje lunas se yama en ebreo meuberet (prenyada) i en espanyol embolismika. Esta tredjena luna a sido metida despues de adar, entre adar i nisan, i por esto es yamada veadar.
Si eran 6 vezes en 18 anyos, iva ser mas kolay, seriya un anyo de 13 mezes kada tres anyos, ama 7 en 19 es mas entrafikado: ay sinko vezes tres anyos i dos vezes dos anyos, de la manera siguiente:3,3,2, 3,3,3,2, o, para ser mas klaro, diremos ke en una sira de 19 anyos, los anyos kon veadar seran el treser, el sejen, el ochen, el onzen, el katorzen, el diisyeten, enfin el dizimueven. El anyo 5780, por egzemplo, es un anyo sin veadar, ama el anyo antes, 5779, era un anyo kon veadar porke fuimos en 5777 en el empesijo de una sira de 19 anyos i dunke de la sira de tres vezes tres, i ke el anyo 5779 fue el treser de la sira de dizimueve. El anyo de despues, 5780, es sin veadar komo lo va ser el anyo 5781, ama el anyo mas dospues, 5782, sera kon veadar porke sera el sejen de la sira de 19.
I kon esto todo ya vos dishe ke 19 anyos eran KAJI 235 lunas. Kaji solo, porke ay entre 19 anyos solares i 235 lunas una diferensya de una ora i medya. Una ora i medya en 19 anyos, no es muncho, ama la istorya djudiya es larga, i en miles de anyos aze muncho (6 diyas i 6 oras en 1.900 anyos, lo ke, en 2.000 anyos, mos aze 6 diyas i mas de dodje oras). Los hahamim se tomaron la kavesa i ke disheron? Disheron ke kuando vendra el Mashiah, el mos va topar la solusyon!
Penso ke lo ke vos esto dizyendo vos parese entrafikado, ama esto no es nada; vo lo ize kolay, porke en vedra es muncho mas entrafikado ke lo ke vos dishe. Por egzemplo no vos dishe ke, en vedra, los anyos de dodje lunas no son siempre de 354 diyas (o 383 kuando ay veadar). Ay anyos de 353 diyas (o 382) i anyos de 355 (o 384). Un anyo normal (shana kesidra en ebreo, année commune en franses) de 354 diyas (o de 383 si es embolismika) tiene 29 diyas en heshvan i 30 en kislev. Ama ay anyos ande kislev tambyen tyene 29 diyas en lugar de 30, dunke el anyo tyene un diya manko, i se yama
shana hasera (anyo faltante, année défective en franses) i ay anyos ande heshvan tambyen tyene 30 diyas en lugar de 29, dunke el anyo tyene un diya de mas i se yama shana shelema (anyo kompleto, année abondante en franses). Esto lo izyeron los hahamim para pueder trokar Rosh ashana de un diya, de tal manera ke Kipur no salga ni un vyernes ni un alhad, ni Hoshaana Raba un shabat.
I en vedra ay munchas otras komplikasyones tambyen ke no vos vo dizir aki, no tanto porke tengo piyadad de vozotros, ma porke yo mismo no las entyendo bastante para darvolas a entender. Ama yene kale le sepash ke se kontan no manko de 14 posibilidades diferentes de anyos djudyos. Por esto ay muy poka djente kapache de dizir kualo va ser el kalendaryo del anyo ke vyene. Yo tengo un livro eskrito en 1891 por un franses, Emile Lacoine, ke lavorava al Observatoryo Imperial de Estambol, i ke eskrivyo: «le calendrier israélite, qui est luni-solaire, est un des plus élégants, et des plus exacts, mais il est très compliqué.» (el kalendaryo djudyo, ke es a la vez lunar i solar, es uno de los mas elegantes, i de los mas egzaktos, ma es muy entrafikado). Kon pokas palavras, todo esta dicho!
Si vos keresh dar una chika idea de lo ke es la komplikasyon del kalendaryo djudyo, puedesh i a mirar sovre Wikipedia Calendrier hébraïque en franses, o Calendario hebreo en espanyol, o Hebrew calendar en ingles. I pishin veresh ke lo ke vos konti es solo una parte muy muy chika de todo lo ke ay de dizir sovre muestro kalendaryo, ke vyene de los lavoros de algunos hahamim komo Rabbi Hillel, Rabbi Shemuel, del kyen diziyan ke konose los kaminos del syelo tan byen komo los kaminos de su sivdad, Rav Ada Bar Ahuva, i otros. Ama yo miri solo sovre dos estudyos en franses: un livro de Roger Stioui «Le calendrier hébraïque» éditions Colbo, i un sitio internet «le calendrier juif» de Gabriel Zerbib.
Edmond Cohen
Paris, Fransya
