eSefarad Noticias del Mundo Sefaradi
Keridos amigos,
En este kanton vo partajar mis eskritos ke ize por anyos para la emisión de radio Muestra Lingua ke ya no sale mas por la radio djudiya de Fransia.
Saludes a todos
Edmond Cohen
Paris – Fransya
____________________________________________________________
LA INKIZISYON ESPANYOLA
Oy pensi de avlarvos de una koza terrivle, ke fue la Inkizisyon espanyola, ke aharvo kon una krueldad sin dinguna piadad a miles de djudyos eskondidos komo kristyanos, i kemo bivos a miles de entre eyos, despues de averlos torturado en kondisyones ke desharon una mancha indelevil sovre la iglesia espanyola.
Kale saver ke la Inkizisyon no nasyo en Espanya kontra los djudyos, ama en Fransya en la Edad medya kontra la ereziya de los kataros.
Kale saver tambyen ke el byervo inkizisyon es un byervo de derecho ke en prinsipyo, no tyene ke ver ni kon tortura ni kon kemar bivo. La djustisya konose solo dos maneras de lavorar : sea aspera ke la djente venga delantre de eya para ser djuzgada : por egzemplo, uno vyene delantre del Tribunal para ser djuzgado sovre su demanda de pagamyento kontra alguno ke, asigun dize, le deve paras. Si el no vyene delantre del djuzgo, el djuzgo no se okupa. El djuzgo no bushka las provas ; aspera ke kada uno le de sus provas, en primero el ke demanda, despues el ke se defende. Esto se yama prosedura akuzatorya.
Si, a la roves, es el djuzgo ke va bushkar a kyen djusgar, i si es el djusgo ke bushka las provas, esto se yama la prosedura inkizitoryala. Oy mismo, en Fransya, la prosedura penala es inkizitoryala, es el djusgo yamado djusgo de instruksyon ke de si para si bushka las provas i demanda a la polisiya de aferrar a alguno para travarlo delantre de el. Esto para dizir ke el byervo Inkizisyon es un byervo de derecho ke no signifika tortura ni kemar bivos a la djente, signifika solo prosedura a la dilijensya del djuzgo.
Asta, vamos a dizir el anyo 1200, se diziya, asigun Bernard de Clairvaux, « fides suadenda, non imponenda », la fe deve ser koza de persuazyon i no de ovligasyon por fuersa. Ama tanto se espanto la iglezya katolika de la ereziya katara ke troko de idea i el papa Inosente III, ke no era tan inosente ke su nombre dariya a pensar, instituyo en los anyos 1200 la prosedura de Inkizisyon kontra los eretikos kataros. Kon el ayudo de los Dominikanos, van a aharvar los kataros asta matar i kemarlos fina ke no kede ni uno.
La inkizisyon se kedo en Fransya kuando no uvo mas dinguno de kemar, ama renasyo en Espanya en 1479 por desizyon de los reyes Katolikos Fernan de Aragon i Isabel de Kastiya su mujer, ke agora la Iglezya katolika kyere azer santa. Esta mujer ke puede ser sera dicha santa izo kon su marido renaser a la « Muy santa Inkizisyon », ansina yamada. No era dirijida kontra los kataros, ke aviyan sido todos matados, ni kontra los djudyos, ke eran konsiderados komo pertenesyendo a otra relijyon, i no komo eretikos. Era dirijida kontra los muevos kristyanos, djudyos konvertidos al katolisismo, en jeneral por fuersa despues de las matansinas de 1391, i ke kontinuavan de ser djudyos en sekreto.
En Espanya, los djudyos aviyan bivido en vezes muy byen, en vezes muy mal. Muy mal al empesijo de la Edad medya, kuando los kristyanos wizigotes okuparon a Espanya. Muy byen en jeneral, kuando vinyeron los Muzulmanos, ama syempre no. Del tyempo de los Almohados, en el dodjen siglo, los djudyos sufryeron muncho de los Muzulmanos. I tambyen sufrieron muncho kon los kristyanos en 1391, ande toda la Espanya kristyana fue el teatro de matansinas de djudyos por povlasyones kristyanas solevantadas por papazes fanatikos. Munchos djudyos fueron ovligados, para salvar sus vidas, de azerse kristyanos, sin haliz fe kristyana.
A eskondidas, kontinuavan a komer kasher, a azer shabat, ets. No vos ambezo nada, ya savej esto todo. I ya savesh ke, si era otorizado de ser djudyo (asta 1492) no era otorizado de ser falso kristyano. Por esto los reyes katolikos, en 1479, izyeron renaser a esta angusya de Inkizisyon, i el famozo Torquemada, de sinistra memorya, fue yamado komo grande inkizidor.
En 1492, los djudyos tuvyeron de eskojer entre fuir, deshando todo en Espanya, o kedarse komo kristyanos muevos. Munchos eskojeron de kedarse, azyendose kristyanos por ovligasyon, sin trokar de relijyon en el fondo de sus korasones. Otros se fuyeron en el Portugal, ama pokos anyos despues toparon en el Portugal la misma situasyon, i yene se toparon ovligados de azer kristyanos sin haliz fe. De toda manera, ke tengan haliz fe o no, estos muevos kristyanos eran konsiderados komo djente basha por los otros kristyanos, ke aziyan prevaler la limpieza de su sangre azul .Es kontra estos desmazalados ke los Tribunales de la Muy Santa Inkizisyon empesaron sus bushkedad.
Abastava ke kualkyer vizino selozo senyale a los inkizidores ke fulano metiya mantel mas ermozo sovre su meza el vyernes a la tadre, o no guizava en diya de shabat, o en diya de shabat se vestiya mijor de los otros diyas, o nunka guizava puerko, o saliya deskalso el diya de Kipur, o este diya demandava pedron a alguno, o bendiziya a sus kriaturas kon la mano sovre la kavesa sin azer el sinyo de la kruz, o se tornava verso la pared a la ora de murir, o mismo solo teniya buena golor porke se enshavonava mas ke un kristyano ordinaryo, i este fulano era aferrado i metido en carsel antes de verse travado delantre del tribunal inkizitoryal. Ya en el karsel el povereto se afloshava del espanto i teniya ke responder a las kestyones de los inkizidores.
Kale dizir tambyen ke no abastava de ser inosente. Los inkizidores demandavan a kada sospechado aferrado ke denunsye a todos los ke konosiya komo judaizantes o sospechava de ser djudaizante, ke sea su padre,su madre, su ermano o su ijo. Era torturado asta ke tenga dado todos los nombres ke konosiya, de tal manera ke kada tortura permetiya otras torturas de todos los ke aviyan sido denunsyados en tales sirkonstansyas.
Lo ke da lo mas asko es ke por empesar, kuando el desmazalado teniya bastante fuersa para responder, se le demandava sovre sus paras, todas las kozas ke teniya, de la mas grande a la mas chika, las kucharikas de plata. Ay dos anyos de esto, kuando uvo el sigundo festival de las kulturas djudiyas en Paris, me fui a una konferensya dada por la ermuera de Pierre Mendes-France. Pierre Mendes-France se intereso muncho a la orijen de su nombre i de su famiya, i se apersivyo ke su antepasado aviya fuyido la Inkizisyon en Portugal, bushko i topo todos los arshivos de la Inkizisyon sovre su famiya, komo fueron interojados kada uno, i torturados, inkluyendo la vava de mas de sesenta anyos. Ansina es ke me ambezi ke los Inkizidores empesavan por demandar sovre las paras ande estavan.
Kale saver ke la tortura, ke se yamava la kestyon, era praktikada sin limite de edad por un verdugo (un bourreau) delantre de un mediko (komo no pensar a los medikos de Auschwitz), de los Inkizidores, i de un notaryo, ke aki no kyere dizir notaire, ama greffier. Deke un mediko ? Porke ay una regla, es ke « ecclesia aborescet a sanguine », la iglesya aborrese azer korrer la sangre, i dunke la tortura no deviya azer korrer sangre, ni, ofisyalmente, turar mas de ora i medya. Ama si el sospechado no aviya avlado, se aziya una interupsyon fiktiva, i se empesava pishin mueva sesyon, en vezes tres vezes, lo ke da mas de kuatro oras de tortura.
Al sospechado le era demandado ke por amor del Dyo diga la vedra, ke sino lo ivan a tormentar, ama kon protestasyon de los Inkizidores ke si en el dicho tormento se muryera, u tuviyera ferida, efuzyon de sangre o mutilasyon de myembros, seriya su kulpa, por no aver kerido dizir la vedra, i no la de los Inkizidores.
Antes de empesar la tortura, el sospechado, ke sea ombre o mujer, era desnudado entero « salvo sus verguensas », komo diziya la regla. Porke kale akodrarse ke todo esto era legal, asigun reglas imajinadas por Torquemada, i despues por sus suksesores, a kada vez mas severas.
Asigun estas reglas, aviya dunke kuatro maneras de tortura sin azer korrer sangre : la garrucha, la toka, el potro, las vueltas de mankuerda o kordel.
La garrucha konsistiya en atar los brasos del sospechado detras de la espalda, i encolgarlo ansina por las manos, deshandolo ansina un tyempo asta ke avle. Si no avlava, lo azyan soltar, lo ke por siguro podiya desganchar sus ombros, ama sin ke korra una gota de sangre.
La toka era el tormento de la agua, ke konosen todos los ke vyeron a Fernandel en el filmo François Ier. En vedra no era koza de riza porke al sospechado le metiyan un handajo en la boka asta el garon, i a este ombre , o mujer, medyo aogado le vaziyan en la boka, a poko a poko, jarras de agua de mas de un litro, mas i mas asta ocho . El sospechado se podiya morir aogado, ama sin ke korra una gota de sangre.
El potro konsistiya en immobilizar el sospechado, i era atado kon una sola kuedra en varyas partes del puerpo, los brasos , las manos, los dizes, i despues, kon un sistemo de tornikete, se apretava mas i mas asta la dislokasyon de los membros.
La vuelta de kordeles era la misma koza ke el potro, salvo ke aviya una kuedra i un tornikete independyente por kada parte torturada. El verdugo empesava por un braso, i si no abastava, el sigundo braso, ets
Kale dizir ke estas torturas podiyan ser alternativas o kumulativas, por egzemplo la toka (el tormento de la agua) entre dos bueltas del tornikete del potro.
Una vez ke el desmazamalado de sospechado aviya atorgado (avoué) despues de oras de tortura, era kondenado, no syempre a muerte, depende de las epokas, ama se save ke del solo tyempo de Torquemada, tredje anyos, uvo mas de 2.000 kemados, kijo dizir kaji tres kemados kada semana durante tredje anyos, lo ke no kyere dizir del todo ke se eskapo al kavo de los tredje anyos. La inkizisyon sureo trezyentos anyos.
No se diziya ke era kondenado a muerte. Se diziya ke era livrado al braso sekular, manera de dizir ke la kemadura no era de la Iglesya ama de las otoridades siviles.
El kondenado era vestido de una kamiza amariya kon una kruz kolorada yamada san benito, i sovre la kavesa le metiyan un chapeo de papel puntudo komo los ke se visten asta oy en las feryas de Sevilla, i empesava en la plasa yamada el kemadero una prosesyon kon solanidad, kon kantos i djente venida por el espektakulo.. Si el kondenado diziya arrepintirse, podiya esperar obtener la grasya de ser aogado por el verdugo antes de ser kemado. Sino era kemado bivo.
Kale dizir tambyen ke un muerto puediya ser kondenado el tambyen si se saviya ke avya judaizado en sekreto. Sus uesos eran salidos de la tomba i kemados, sus byenes tomados a sus erederos i konfiskados para el rey. Puede ser ke un diya la reyna Isabel sera dicha santa, ama lo ke yo se , es ke izo ansina munchos krimenes krapulozos, kemar a la djente i arrovar sus paras.
Esto todo empeso antes de la ekspulsyon de 1492, i se kontinuo despues durante trezyentos anyos. Antes mismo de la ekspulsyon, un djudyo, Isaac Arama, eskriviya : « El umo de los kemaderos (bûcher) suve al syelo en todas partes de Espanya i en sus islas. Un tyerso de los marranos a sido kemado, un otro tyerso se fuyo, aprovando de eskonderse, i el kusur bive en la terror i el espanto de ser aferrado por la Inkizisyon. »
Kuando uvo el dekreto de ekspulsyon en 1492, uvo muncho mas marranos ke pensaron pueder kedarse en Espanya komo konversos. La Inkizisyon tuvo muncho mas mushteris.
Komo lo dishe, los djudyos o marranos ke se fuyeron en Portugal se kreeron salvados, ama no sureo mas de unos kuantos anyos, despues la Inkizisyon vino tambyen en el Portugal.
Despues de la deskuvyerta de Amerika, munchos djudyos o marranos aprovaron de eskapar kon la Inkizisyon fuyendo en las muevas koloniyas espanyolas de Amerika, ama aya tambyen vino la Inkizisyon i en Amerika uvo kemaduras.
Aki solo avli de los judaizantes, ama kale saver ke despues de kemar los judaizantes, la Inkizisyon aharvo a los islamizantes, a los protestantos, a los masones i libre pensadores, lo ke valyo a Espanya el asko de la Evropa entera, i sovre todo de los filozofos fransezes.
Kale akodrarse de las ojas maraviyozas eskritas por Montesquieu, askeado por la kemadura de una mansevika djudiya de 18 anyos. Al kapitulo 13 del livro 25 desu Esprit des Lois, Montesquieu eskrive una «Très humble remontrance aux Inquisiteurs d’Espagne et du Portugal » ke trava yoros i ke es una de la mas ermozas ojas de la literatura franseza.
Avra ke asperar asta 1808 para ke Joseph Bonaparte, ermano de Napoleon instalado sovre el trono de Espanya, mete kavo a la Inkizisyon. Ama kuando sera echado a basho en 1813, la Inkizisyon va ser reinstalada en Espanya, para ser definitivamente eskapada, solo en 1834.
La inkizisyon no egziste mas, ama la mancha kedara por syempre sovre la Espanya i sovre la Iglesya, savyendo ke todas estas negriguras ke dan asko an sido posivles solo por modo de la permisyon dada por los papas de Roma.
El vyernes 12 marso 2000, en la Bazilika san Piedro en Roma, el Papa a demandado pedron, no por los krimenes de la Iglesya, ke es santa i no puede pekar, ama por la kulpos de unos de la Iglesya.
Por siguro, tengo mas plazer de ambezarme este modo de haber ke si era el renasimyento de la Inkizisyon, ama por lo ke es del pedron, ya savemos ke el dyo pedrona los pekados kontra si, no los pekados kontra otro ombre, si el ombre no a perdonado en primero. Syendo ke los miles de kemados no puedran nunka pedronar nada porke fueron kemados, no so yo ke puedo pedronar en vez de eyos lo ke eyos sufriyeron. Dunke, asigun mi, pedron no es posivle. La sola koza ke pueda azer la Iglesya agora, es de no empesar por de muevo. Esto seriya lo mijor, i mos kedaremos kon esto porke ya vino el tyempo de eskapar esta emisyon.
Edmond Cohen
Paris, Fransya
