eSefarad Noticias del Mundo Sefaradi
Keridos amigos,
Vos aprometi, aze poko, de embiyarvos otra traduksyon miya de poeziya de Aragon, ama teniya una shupe por el byervo d’al kavo. Komo trasladar tu voudras? Al empesijo, eskrivi kereras. Ama no me plaziya, i me demandava si no era kerras. Komo saver? Mi kerido Haim Vidal Sephiha dbm no esta mas aki para darme la repuesta. Me kedavan dos maneras de topar la repuesta, la yuch i la kolay. La yuch, era de irme kon mi baston de mi kama asta mi buro, kinze metros mas leshos, de bushkar mi diksyonaryo de espanyol, arriva de mi biblioteka, i de mirar si por mazal se topa al kavo, en la parte de gramatika, el verbo querer al futuro. La manera kolay? Demandar por mail a una prima miya ke mora en Lima, en el Peru. Es lo ke ize, i resivi pishin mi repuesta…Esto no era posivle ay unos 20 anyos…
Travi del kapolavoro de Aragon Le fou d’Elsa un poema bastante kurto, ke tyene por titolo Vers à danser (versos de baylar) ke Jean Ferrat metyo en muzika i kanto el mismo:
Saludes a todos
Edmond Cohen
Paris – Fransya
____________________________________________________________
VERSOS DE BAYLAR
Ke sea alhad o lunes
Tadre o demanyana medyanoche o medyudiya
En Geinnam o en Ganeden
Los amores a los amores asemejan
Era ayer kuando te dishe
Durmiremos en djuntos
Era ayer i es amanyana
No tengo mas ke ti por kamino
Meti mi korason entre tus manos
Kon el tuyo komo va djunto
Todo lo ke tyene de tyempo umano
Durmiremos en djuntos
Mi amor lo ke fue sera
El syelo’s sovre mos kom’ una savana
Enserri sovre ti mis brasos
I tanto te amo ke tyemblo
Tanto tyempo ke kerras
Durmiremos en djuntos
Edmond Cohen
Paris, Fransya
Fuente: LK/eSefarad
