El Kanton de Edmond: LA GERRA DE INDEPENDENSYA DE ISRAEL (2) por Edmond Cohen

Ver todos los artikolos de esta seksion

Saludes a todos
Edmond Cohen
Paris – Fransya

____________________________________________________________

LA GERRA DE INDEPENDENSYA DE ISRAEL (2)

Ya vos avli aki de los akontesimyentos militares ke se pasaron antes de la proklamasyon del Estado de Israel el 14 de mayo 1948. Agora vos avlare de la gerra entre Estados ke se paso despues de esta deklarasyon.

Para preparar esta emisyon, lavori sovre el livro de Jon i David Kimché La première guerre d’Israel 1948.

Ya vimos ke kuando Ben Gourion, el 14 de mayo 1948, meldo la deklarasyon de Independensya de Israel, no era en una atmosfera de paz en el pais, ama al kontraryo en medyo de una gerra sin piadad entre los djudyos i los arabos de Palestina, o ke no eran de Palestina, komo los de la Armada de Liberasyon Araba, ke veniya del Levanon.

I vimos ke mas o menos, al presyo de grandes esfuersos i de munchos muertos, no solo dingun kibuts, dinguna sivdadika ke se topava en la parte de Palestina atribuida a los djudyos por el plano de espartimyento de la ONU aviya sido tomada por los arabos, ama en sima las sivdades grandes komo Haïfa, Yafo, Ako, Safed, eran todas en las manos de los Djudyos, i los arabos se aviyan fuyido.

Malorozamente, vimos tambyen ke los kuatro kibutsim del Gush Etsion, ke se topavan en la parte de Palestina atribuida a los arabos, al lado de Hebron, kayeron en manos de los arabos , i toda la povlasyon de Kfar Etsion , salvo kuatro personas,fue masakrada.

Por lo ke es de Yerushalaïm, la bataya era terrivle sovre esta sivdad ke no era en el plano de espartisyon, ni para los djudyos, ni para los arabos, i los djudyos de Yerushalaïm, ke sea la vyeja sivdad o la mueva, eran enserrados por los arabos sin ke sea kolay para los otros djudyos de ayudarles, syendo ke los arabos kontrolavan el kamino de Yerushalaïm.

Vimos tambyen ke los djudyos teniyan muy pokas armas, i ke no solo kaliya paras i vendedores para merkar armas, ama tambyen aviya el blokus de los Inglezes ke las armas deviyan traversar a eskondidas. Por esto es ke los djudyos, al empesijo de esta gerra, teniyan grande koraje, teniyan ombres i mujeres de grande valor, ama poko armas, i solo armas chikas.

Agora ke Israel se izo un estado ofisyal i ke los Inglezes se fueron, Israel va pueder merkar i fabrikar armas, i kale azer presto, porke los paizes arabos ya izyeron saver ke no van a akseptar al renasimyento de Israel i van a atakarlo.

Para Ben Grourion, todos los esfuersos deven de ir a la defensa de Yerushalaïm, porke, asigun el, si kae Yerushalaïm, todo va kaer despues. Para los militares de basho de sus ordenes, es el kontraryo : todos los esfuersos deven ira la defensa del pais, porke si el pais reziste, Yerushalaïm va kaer de suyo en las manos de los israelyanos.

Malorozamente, los djudyos no tyenen bastante ombres i armas para defender los dos en djuntos. A kada vez, kale azer un eskojimyento, i no yerrarse.

En frente de la armada de Israel, ke dainda no esta unida, dainda ay Hagana, Palmach, Irgun i grupo Stern, ay munchas armadas arabas.

Los askeres Israelyanos son 35.000 sovre los kuales ay 25.000 kombatantes. Los arabos no son mas muncho.

Los israelyanos tyenen tres brigadas al norte : Yftah, del Palmach, komandada por Ygal Alon ; Golani, de la Haganah, komandada por Montag. I Carmeli, de la Haganah, komandada por Moshe Carmel.

En el sentro, dos brigadas : Alexandroni, hagana, Dan Even. Kiryati, Michael Ben Gal

En el Sur, dos brigadas : Givati, Hagana, Shimon Avidan. Hanegev, Palmach, Nahum Sarig

En Yerushalaïm, Etsioni, David Shaltiel, in el el kalejon verso Yerushalaïm, Harel, Palmach, Yosef Tabenkin. Para atakar Latrun, va aver otra brigada Hagana komandada por Shlomo Shamir.

Mas tadre va aver otras brigadas komandadas por Haïm Laskov, Mordehai Makleff, Itshak Sadeh i Moshe Dayan.

Los arabos tyenen las armadas de Ayifton : 10.000 ombres, Transjordaniya 9.000 ombres de la Lejion araba komandada por un zabit ingles, John Glubb, yamado Glubb Pasha ; Sirya 3.000 ; Irak 3.000 i Levanon 3.000, entre los kuales 2.000 de la ALA.

La diferensya no es en el nombre de askeres. La diferensya es en las armas. Los djudyos no tyenen avyones ni tankes, i muy poko artiyeriya. Los arabos, sovre todo los Ejypsyanos, tyenen esto todo.

Ama, afillu los esfuersos de los militares, los politikos arabos no son d’akodro entre eyos, no tyenen los mismos butos. El rey de Transjordaniya, kyere Yerushalaïm, i la parte Cisjordaniya de la Palestina. Los Egypsyanos kyeren la parte sur para eyos. Dingunos de los paizes arabos atakantes kyeren luchar para un estado arabo en Palestina. Solo kyeren echar los djudyos a la mar i tomar una parte de la Palestina para eyos.

Para Ben Gourion, kale atakar para guadrar Yerushalaïm para los djudyos, kual ke sea el presyo, i dunke el kalejon de Yerushalaïm. Ama komo atakar kuando tu sos atakado por kuatro vandas ?

En el Sur, los Ejipsyanos avansan en dos direksyones. Verso el norte i Tel Aviv, la armada komandada por Mohamed Negib (el ke tomara el poder en 1952, kuatro anyos mas despues) entra en Gaza, toma el kibuts Yad Mordehaï despues de una rezistansya de sej diyas de este kibuts ke tyene el nombre de Mordehaï en rekodro de Mordehaï Anielewicz, el kapo de los ombres del Ghetto de Varsovia), i se aserka de Ashdod. Verso Ber sheva i Beth Lehem, la armada ejypsyanana komandada por Abd el Azis se aserka del sur de Yerushalaïm.

Aki se van a topar el 11 de junyo, kuando va vinir la primera tregua (trêve) de la ONU.

En el norte, el peligro vyene de los Siryanos ke bashan de Kuneitra en el Golan para atakar los kibutsim de Shaar agolan i Massada ke son evakuados , i atakan i toman a Samakh, al Sur del lago de Tiberiade. La bataya de Samakh fue terrivle. En la kalé de la polisiya los 42 ombres de la Hagana ke defendiyan la pozisyon rezistyeron tres diyas antes ke mueren todos los 42.

Fuertes de sus viktoryas, los Siryanos atakan al kibuts Deganya, defendido por los del kibuts i por unos kuantos ombres de Moshe Dayan venidos para ayudar kon kuatro kanones vyejos de la gerra de 1870 ke veniya de resivir por un vapor sekreto.

Kon estos kanones i cocktails Molotov echados por los kibutsnikim, aharvan a los tankes siryanos, i a la sorpreza jenerala, los Siryanos se van. Fuertes de esta viktorya, los djudyos los atakan i toman de muevo a Samakh, ke les aviya tanto kostado.

Vyendo esto, el 10 de junyo los Siryanos atakan en el Lago Huleh i toman el kibuts de Mishmar Hayarden.

En kuanto a los Irakyanos, eyos atakan en la zona del kibuts Gesher, ama son arrepushados, i los djudyos abashan verso Djenin ke no pueden tomar.

Ama las haliz bataya, para Ben Guryon, es la bataya de Yerushalaïm, i dunke tambyen del kalejon verso Yerushalaïm.

Abdallah a dado a Glubb Pasha el orden de tomar Yerushalaïm. Aya se topa lo mijor de la Lejyon araba de Transjordaniya. El 19 de mayo, atakan i toman la male djudiya de Sheikh Jarrah. Despues la Lejyon ataka las males norte i la bataya surea munchos diyas, kazas son tomadas i pedridas, i tomadas de muevo. Los arabos atakan el konvento de Notre Dame de France, defendido por los djudyos komandados por el profesor Bodenheimer, de la Universidad ebraïka. 100 arabos son matados en esta ataka, ke no reushe.

Ama los Egipsyanos de Ahmed Abd el Aziz venidos del Sur, azen la jonksyon kon los de la Lejyon araba i atakan en djuntos a Ramat Rahel, ke tres vezes va trokar de maestro.

Entremyentres 1.700 djudyos son enserrados en la vyeja sivdad. En la noche del 17 al 18 de mayo el Palmach toma el monte Sion i yeva ayudo a los enserrados por la puerta de Sion. Malorozamente, los arabos toman de muevo la puerta de Sion i los djudyos son yene enserrados, kon 87 askeres de mas, ama de sigunda linea. Se van a defender ansina durante diez diyas, ama el 28 de mayo, son ovligados de renderse.

En la mueva sivdad, los arabos ke eyos tyenen kanones, echan 8.000 obuses en tres semanas, i matan a 400 siviles, kon mas de 1.000 firidos. No ay de komer, no ay de bever, no ay elektrik, ni benzina, ni gazetas. I sovre todo, no ay muncho munisyones. Las mitrayadoras deven travar una bala despues de otra, i los morteros sinko obuses al diya.

Entre tanto, no ay bastante koordinasyon entre la Hagana de David Shaltiel, ke lucha en la sivdad, i el Palmah de Itshak Rabin i de Tabenkin, ke luchan alderedor.

Kale absolutamente yevar fuersas muevas i por esto avrir el kalejon serrado en Latrun. Kale atakar Latrun. La primera ataka fue arrepushada por los arabos i los djudyos tuvyeron munchos muertos. El 30 de mayo, sigunda ataka , sigunda pedrita kon muertos. El 9 de junyo, tresera operasyon. Tresera pedrita, yene kon munchos muertos.

Ama los djudyos konstruyen un kamino de derivasyon para yevar ayudo a Yerushalaïm sin pasar por Latrun, i esto salva a la sivdad kuando intervyene la primera tregua de la ONU, el 11 de junyo 1948.

Durante esta tregua, kada partido aprova, afillu los embargos, de merkar i traer armas para su kampo. Los djudyos lo azen, i pueden tanbyen batirear un vapor de armas para los arabos, i rekuperar las armas. El govyerno Tcheko esta d’akodro para vender armas a los djudyos, salvo un solo ministro ke esta kontra, es el djudyo Slansky, ke por tanto sera despues kondenado a muerte i egzekutado komo syonisto. Ironiya de la istorya…

Ben Gourion aprovecha tambyen la tregua para reorganizar la armada en una sola, lo ke va krear una opozisyon de syertos zabites, ama Ben Guryon kyere una armada moderna, i no mas komandos de geriyeros, para azer una gerra klasika i moderna.

Esta primera tregua se eskapa el 8 de julyo, i va empesar, asta la segunda tregua, lo ke se a yamado la gerra de diez diyas, del 8 al 18 de julyo.

Agora los djudyos pasaron de 25.000 a 60 .000 kombatantes, los arabos 40.000. Agora los djudyos tyenen muncho mas armas, i mismo unos kuantos tankes i avyones.

En el norte, los israelyanos aprovan de arondjar a los syryanos de Mishmar a Yarden i no reushen. Vyendo esto atakan a Nazareth i aya tyenen la viktorya : la mayor parte del Galil se topa agora en las manos de los Israelyanos.

En el sentro, Moshe Dayan toma Lod i Ramla entre el 11 i el 12 de julyo. Los djudyos kyeren atakar a Latrun, ama vyene la sigunda tregua de la ONU , i Latrun keda a los arabos. Ama yene los djudyos pueden pasar por el otro kamino ke fraguaron.

La sigunda tregua va ser rumpida por los Ejipsyanos el 15 de oktovre, kuando van a atakar a un konvoyo djudyo otorizado por la Onu. Los djudyos estan tresalidos, porke esto es lo ke keriyan komo razon para pueder atakar a los egipsyanos. No se puede permetir de deshar a los Ejipsyanos a unos kuantos kilometros tan de Tel Aviv komo de Yerushalaïm. Del otro lado, tambyen, es ovligado de atakar a los Ejipsyanos para salvar a todos los kibutsim del Negev, ke sino van a morir aogados.

Igal Alon, ke era kapo del Palmach en el Norte, agora es kapo de la Armada Israelyana en el Sur.

El mismo 15 de oktovre, los Israelyanos atakan a los Ejiypsyanos por todas vandas. I el 16 atakan Iraq el Manshia, ama son arrepushados por los Ejypsyanos. Alon troka, i ataka a Faluja, i por esto kale tomar a la kalé de Huleikat. El 21 de octovre, Huleikat kae. Vyendo esto, los Ejipsyanos se renden kuento ke se van a topar kortados de Ayifton. Ashdod i Majdal, oy Ashkalon, kaen kaji sin batalya entre las manos de los Djudyos. Los djudyos atakan i toman a Beer Sheva .

Los djudyos atakan tambyen a los Ejypsyanos en la rejion de Hevron i Beth Lehem, ama aya los Ejypsyanos son ayudados por la Lejyon Araba i arrepushan a los Israelyanos.

En el Norte, tomando preteksto de las atakas en Galilea de Kaukaji, los Israelyanos azen una ataka yamada operasyon Hiram. El 31 de oktobre, todo el Galil kae en las manos de los Israelyanos.

Una mueva tregua es kortada por los Israelyanos kontra los Ejypsyanos, es la operasyon Horev, para arrondjar por entero los Ejypsyanos del Negev, i destruir a la armada ejypsyana. Va ser una viktorya istorika de Igal Alon, ke puediya konkistar el Sinaï, ama tuvo de kedarse por modo de la menasa de gerra kontra los Inglezes, ke keriyan amostrarse amigos de los Ejypsyanos.

Lo ke kedo, es la tomada de Elath kontra los Transjordanyanos. Ansina s’eskaparon las gerras de 1948. Se puede dizir ke los Djudyos las ganaron todas salvo una : la de Yerushalaïm, ke kedo kortada en dos, i sin ke los djudyos puedan guadrar la Vyeja sivdad i el Kotel. Esto sera la viktorya de 1967, ama dainda en esto no estamos. ..

Otro diya lo kontaré !

Edmond Cohen
Paris, Fransya

Fuente: LK/eSefarad