El Kanton de Edmond: PASTOR ANDE LOS DJUSTOS Kapitolo 7 – Los estudyos superyores de Albert en Turkiya por Edmond Cohen

Ver todos los artikolos de esta seksion

Saludes a todos
Edmond Cohen
Paris – Fransya

____________________________________________________________

7. Los estudyos superyores de Albert en Turkiya

Victor Albert Léon en 1919

Unos kuantos anyos despues, myentres empesava la Grande Gerra, era tyempo para Albert de entrar komo estudyante en la Eskola de Derecho de Estambol ; por dizir la vedra, no era su primera entisyon ; keriya estudyar medikeriya. Ama uno tyene o no tyene el temperamento medikal. Parese ke el no lo teniya, porke no soporto la golor de las kalavrinas de kortar i mirar ; i presto entendyo ke era mas echo para el derecho ke para la medikeriya.

En el liseo, Albert aviya sido el solo djudyo. En la Eskola de derecho, no era mas el kavzo : eran dos ! El otro se yamava Salamon Adato. I por siguro, se izyeron amigos. Despues vinyeron en djuntos kontinuar sus estudyos superyores en Paris, los dos aboltaron despues en Estambol, para instalarsen el uno komo el otro komo avokatos, ma a la diferensya de mi padre, el se kedo en Turkiya ande izo despues una karrera politika, asta ke ser deputado en el Parlamento de Ankara, ma se muryo en un aksidente de avyon en 1954, a la edad de 60 anyos.

Keda una grande foto de grupo del ultimo anyo de Eskola de mi padre. Esta el primer a la derecha, asentado a la turka sovre un tapet, kon el fez sovre la kavesa. Estamos en 1917. Detras de el, asentados sovre siyas, son los profesores, syertos, kon turban blanko, profesores de derecho koraniko, otros kon fez, i mismo un profesor alman kon chapeo oksidental. Los estudyantes, en pye detras de eyos, son sea vestidos de sivil kon el fez (komo Adato), sea vestidos de militares; estamos en medyo de la gerra.

Sus estudyos syendo eskapados, mi padre tambyen es mobilizado en 1918. Aze su formasyon en kondsyones muy negras, i despues, deve ser en su kualidad de estudyante diplomado, es afektado a la intendansya komo aspirante zabit. Ama afita el armistisyo i la demobilizasyon.

Kon su diploma de doktor en derecho de la Universidad de Estambol, lo ke aze de el un pasharo raro para un djudyo, dechida, komo su amigo Adato, de mijorar su formasyon por un doktorato de la Universidad de Paris. Para pagar sus estudyos, ay su ermano Victor, i el tyene la entisyon de toparse un lavoro en Paris.

A kontinuar…

Edmond Cohen
Paris, Fransya

Fuente: LK/eSefarad