El Kanton de Edmond: PASTOR ANDE LOS DJUSTOS Kapitolo 9 – El ritorno en Turkiya por Edmond Cohen

Ver todos los artikolos de esta seksion

Saludes a todos
Edmond Cohen
Paris – Fransya

______________________________________________________________

9. El ritorno en Tyrkiya

Los amigos fransezes de Albert, despues de sus tezis, se atakavan al konkorso de la agregasyon, sus eskopo syendo de ensenyar en una eskola de derecho. Mi padre uvyera pagado karo para pueder segir kon eyos, se tresaliya por el ambezamyento, komo ya lo dishe. Ma para ser profesor, kale ser fransez, i no era su kavzo… Albert ayudava a sus amigos para aparejar sus konkurso, ma tuvo de kedarse frente a la puerta. De toda manera, kaliya apresurarse de saludar a su amo Marcilhacy, de azer sus validjas i de aboltar en Turkiya para instalarse komo avokato internasyonal.

Esto es lo ke izo, entrando komo kolavorador en el ofisyo del Sr Naar, avokato de orijen selanikliya. Tomandose de amistad verso el, Naar kombida a Albert para senar. I le syerve un biftek sangriyente…Mi padre no se pensava espesyalmente travado sovre la kasherut, yene era la primera vez de su vida ke komiya karne sangriyente…

Otro rekodro ke me konto mi padre sovre este tyempo : aviya en el ofisyo Naar, en mas de Albert, otros kolavoradores, entre eyos un muzulmano. Un diya, en gran sekreto, este kolavorador muzulmano konta a Albert muy enkantado ke, es vedra, es muzulmano… ma no un muzulmano komo los otros : es dönme, lo ke, en turko, kyere dizir konvertido, ama aki tambyen, no es tan kolay : no es el ke se konvertyo, son, en el siglo XVII, sus antepasados djudyos, adeptos de Shabetay Tsevi. Aze parte de lo ke se yama el sabatyanismo, del kual mi padre nunka teniya oido avlar. Albert deskuvre kon enkanto ke egziste turkos muzulmanos separados de los otros, ke, un poko a la manera de los maranos, praktikan en sekreto un kulto djudyo mesyaniko. No solo se kazan solo entre eyos, ma ensima se dividen eyos mismos en tres grupos ande en kada uno se kazan tambyen solo entre eyos…Ama afuera nada aparese.

I mos topamos agora en 1922, kon la suvida del nasyonalismo i las viktoryas militares de un muevo ombre fuerte en Turkiya, kijo dizir Mustafa Kemal. Mi padre se espanta. La manera kon ke fue tratada la minoridad ermeniya en 1915, solo syete anyos antes, no apromete muy bueno para esta otra minoridad ke son los djudyos. I na ke en septyembre 1922, los Turkos toman Izmir a los Gregos, i azen, asigun los testigos, atrosedades verso, komo a kada vez, los Ermenis, ma tambyen los Gregos. El arkiovispo ortodokso de Izmir, Msr Chrysostomos, es aferrado, echado al povlacho, ke le arasga la barva, le korta las orejas i la nariz, lo kuchiya i lo echa a los perros… Miles de kristyanos, ermenis i gregos, son asasinados en este mez de septyembre. A la kontra, no parese ke uvo viktimas djudiyas.

Portanto yene uvo rumores de matansinas de djudyos, i mi padre, ke ya se espantava de antes, dechida de fuir myentres ke las autoridades fransezas kedan dainda, ama para kuanto tyempo, en Turkiya, i ke son dispuestas a dar, a el i a su famiya, kijo dizir sus padre i madre i sus dos ermanos, una autorizasyon – syendo la tradisyon franseza de proteksyon de las minoritades en el Levante – de entrar en Fransya komo « israelitos del Levante ».

A kontinuar…

Edmond Cohen
Paris, Fransya

Fuente: LK/eSefarad