eSefarad Noticias del Mundo Sefaradi
Ver todos los artikolos de esta seksion
Saludes a todos
Edmond Cohen
Paris – Fransya
______________________________________________________________
11 Los antepasados Braun
Ya vino el tyempo, agora, de avlar de mi famiya maternala, i para esto de aboltar en Estambol, ande, verso 1865, un vyolonisto ostro-ungareze (pekado, no tengo otra indikasyon) ke se yamava Baruch Braun, veniya a vijitar a su novya Sarah Bernstein, ke teniya, eya, komo orijen la Bessarabiya (oy Moldaviya).
Por dizir la vedra, no se por ke razon prechiza la famiya Bernstein aviya emigrado de Bessarabiya para venir instalarse en Turkiya, ama asigun mi no deve ser sin atadijo kon un antisemitismo ke eskapara por dar mas despues los de maziya famozos pogromes de Kichenev, en 1903 i 1905.
De todo modo, la mansevika Sarah Bernstein teniya katorze anyos i morava en Estambol kuando se topo espozada kon este vyolonisto, i todo da a pensar ke se tratava de un kazamyento aparejado. Eya konto despues a Betty, su inyeta ke iva ser mi madre, ke se topava en vezes saltando kon la kuedra kon sus amigitas kuando se ambezava la vijita de su novyo, i pishin deshava todo para korrer ir a asentarse sovre una siya para resivir los omajenes de su novyo…
Mos keda, en la famiya, una foto del djoven par. Baruch ya es un ombre echo, en djaketa kon mustacho i barva a la Napoleon III, en pye serka de su mansevika de mujer asentada a su lado, ma un poko delantre de el, en fostan krinolin. La foto es en preto i blanko, ma estamos djusto en la epoka de las pinturas de Winterhalter.
Sé muy pokas kozas de mi bispapu Baruch Braun. Sé ke aziya parte del orkestro filarmoniko de Estambol, i ke por esto se fue kon este orkestro en Port Saïd, en Ayifton, a djugar para las seremoniyas de la inogurasyon del kanal de Suez, ke se tuvyeron del 17 al 20 de novyembre 1869, en prezensya de la Imperatrisa franseza Eugénie, ma tambyen de munchos otros soveranos ajenos, entre eyos Franz Josef de Austria. La mujer de mi bispapu, Sarah, lo akompanyava, i eya es ke lo konto a su inyeta Betty. Aviya fyestas i bayles ande aviya munchos zabites de armadas ajenas, entre eyos fransezes i inglezes, kon los kuales aviya baylado, dando selo a su marido. Se pretyende en la famiya ke es en esta okazyon ke fue djugado por la primera vez el opera Aïda, kompozado por Verdi prechizamente por esta okazyon, i ke es el orkestro filarmoniko de Estambol, kon mi bispapu Baruch Braun, ke djugava en la foya.
Es haliz vedra ke Verdi a kompozado Aïda en vista de las seremoniyas de inogurasyon del kanal de Suez, ma istorikamente el opera no era pronto para estos diyas. Se djugo solo mas tadre, el 24 de desyembre 1871 en el Opera del Kayro, basho la direksyon del kontrabasisto i maestro Giovanni Bottesini, kon la soprano Antonietta Anastasi-Pozzoni en el rolo de Aïda. Ama esto no mos dize kualo era el orkestro konduzido por Bottesini, i era posivle ke fuera el orkestro de Estambol ke seriya de muevo venido en Ayifton por la okazyon, i ke mi bispapu tuvyera en vedra kreado Aïda. Ma tengo de dizir ke despues de eskrivir mi livro en fransez, topi sovre Wikipedia ke seriya el orkestro del Teatro Italyano del Kayro. No tengo menester de dizir mi deziluzyon, ma la vedra antes de todo. Yene keda ke Baruch Braun i su mujer se fueron en Ayifton por la inogurasyon del kanal de Suez.
A kontinuar…
Edmond Cohen
Paris, Fransya
Fuente: LK/eSefarad
