eSefarad Noticias del Mundo Sefaradi
Ver todos los artikolos de esta seksion
Saludes a todos
Edmond Cohen
Paris – Fransya
______________________________________________________________
14. La chikez i la mansevez de Betty
La chika Bertha crese, engrandesida por su vava. Un diya, se aoga kon un aakide, ke no pasa. Esta serka de murir kuando vyenen azerle los djestos salvadores ke la azen regoldar el bonbon.
Entremyentres, la Turkiya a pedrido la gerra, i se topa okupada por los alyados fransezes i inglezes. La Burgershule tuvo de serrar sus puertas, i Mina de pasar de la eskola almana a la eskola britanika protestante de la Scottish Mission. Es tambyen a esta eskola ke Bertha es metida kuando ayega a la edad.
Aze todos sus estudyos en ingles, inkluyendo el ambezamyento de la Biblia. Es « girl guide ». Tyene ocho anyos kuando Mustapha Kemal aze su entrada triunfala en Estambol, en 1923. En mizmo tyempo, el funda la republika, i poko tyempo despues, ordena el trokamyento de alfabeto, adoptando el alfabeto latino en vez del alfabeto arabo.
En 1926, tyene onze anyos kuando asiste a dos kazamyentos kaji en mismo tyempo : su padre Willy se kaza de muevo, kon Rose Cohen (dingun atadijo kon mi famiya paternala) nasida en Port-Saïd (Ayifton) ma instalada en Turkiya. Era sefardiya, i avlava kon su marido en fransez, en vez en grego, syendo ke eya no saviya el alman ni el el djudeo-espanyol. Lo kuryozo es ke nunka los oyi avlar turko entre eyos, i portanto uvyeran podido. Puede ser avlavan turko entre eyos en Turkiya…
El sigundo kazamyento, zaten probavlemente el primer en el orden kronolojiko, porke selebrado el 12 de fevrero de este mismo anyo 1926, es el de Mina, ke eya tambyen se kaza kon un sefardi, Rodolphe Garih, ke por las maneras del estado sivil turko, se va topar yamarse Garé. Este kazamyento es muy importante, porke sin el yo no seriya por siguro, ni por konsekuensa dinguno de mis ijos i inyetizikos.
A kontinuar…
Edmond Cohen
Paris, Fransya
Fuente: LK/eSefarad
