eSefarad Noticias del Mundo Sefaradi
Ver todos los artikolos de esta seksion
Saludes a todos
Edmond Cohen
Paris – Fransya
______________________________________________________________
28. Marc Levy
Es durante sus peregrinajes en la Fransya okupada ke mi padre se va en Lyon, ande topa su primo Marc Levy, konsejero juridiko komo el, arresentado aya. Marc kontinua de morar en su kaza. No tyenes espanto de ser aferrado ? le demanda mi padre. Marc, kon una boz kyeta, le responde : « En primero, me prokuri un revolver i kurshumes. Si vyenen a aferrarme, mataré unos kuantos por empesar. Despues, me fuiré por los tejados : tengo un itineraryo de fuida ». I Marc avre la ventana i amostra a Albert, ke ya se esta esmayando, el kamino shishereador i atletiko ke tyene previsto para sovrebivir…
Marc no kedara kon esto. Entrara en la rezistansya, i partisipara a los kombates de la Liberasyon. Muncho despues de la gerra, vyene un diya a vijitarmos en Juan les Pins, sivdadika de vakansas al bodre de la mar Mediterranea, i mira los vapores kon turbin desde muestro balkon. « Tyenes ermozo turbin, le digo kon admirasyon. Me responde : « son turbines almanes, los mijores. Pertenesiyan a un alman ke mati kuando andava sovre su moto. Guadri su moto i su turbin. Dainda tengo la moto en mi kava… » Por siguro, oyendo esto, no me kedo ayi : « Ma… matates munchos almanes, ansina ? » « No sé, me responde, no los konti. Un diya yo teniya de traer un mesaj a un grupo de partezanes en aselada. Teniyan una mitrayadora. El ombre a la mitrayadora me ofresyo de travar. Una tala okazyon, no se refuza ; travi en medyo de los Almanes… Penso ke mati unos vente, ama en vedra no puedo saver… »
Despues de la Liberasyon, kuando tuvo de tomar atras su apartamento okupado despues de su ida en la Rezistansya, no se embaraso de largos prosesos (komo tuvyeron de azer munchos djudyos en el mismo kavzo) : dyo vente minutos a los okupantes para vazyar el lugar, despues de kualo uzariya de su mitrayadora. Penso ke era solo bluff… en todo kavzo arrekavdo su morada en vente minutos.
Se kazo kon una kristyana de la kuala tuvo dos kriaturas, un ijo i una ija. El ijo, Gérard, yamandose Levy, tuvo despues de la gerra, en la eskola, peleos kontra antisemites. Era koza frekuente en los anyos despues de la Liberasyon. El tosigo rasisto no se derrityo komo por fado. I un diya Gérard embiyo el antisemit en basho, i mismo al oshpital. El direktor de la eskola yama Marc en su kualidad de padre. I Marc, muy kyeto, desklara kara kon kara al direktor : « So yo ke dishe a mi ijo ke puediya aharvar al otro, so asigurado por tal koza… » Es ke fue su estado de rezistante ke djugo, es ke es su ozadiya ke empresyono al direktor, de toda manera Gérard no fue kastigado.
Marc Lévy era el inyeto de una ermana de Nissim Cohen mi papu. No es mas de este mundo, a la diferensya de su medya-ermana Renée Naar ke dainda bive i mora en Neuilly. Por lo ke es de Marc, tuvo inyetos, entre los kuales un inyeto avokato ke se yama Marc Levy komo el.
A kontinuar…
Edmond Cohen
Paris, Fransya
Fuente: eSefarad
