eSefarad Noticias del Mundo Sefaradi
Keridos amigos
Mi emisyon va ser, por siguro, konsagrada a este grande amigo de los djudyos i de Israel ke fue Charles Aznavour, ombre de grande valor umana. Teniya un punto komuno kon los prezidentes Sarkozy i Trump: los tres kristyanos, ma los tres kon un inyeto djudyo.
Saludes a todos
Edmond Cohen
Paris – Fransya
——————————————————————————————
CHARLES AZNAVOUR
Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Vos akodro ke agora las emisyones de Radio J se pueden oir sovre internet sea en direkto, sea kuando se kyere, kale klikar en el sityo de Radio J, i irse sovre las emisyones de despues de medyudiya.
http://www.radioj.fr/node/55
De otra parte, vos akodro ke el proksimo atelye de konversasyon de Vidas Largas se va tener el 6 de novyembre 2018, en el Centre Communautaire, a las dos i medya (asta las kuatro i medya – sinko).
Esto dicho, mi emisyon de oy no puediya ser otra koza ke avlarvos de este grande kantador, poeta, muzikante, aktor i, esto se save menos, produktor de azete ke era Charles Aznavour, ke se muryo en su banyo el primo de oktovre. Nasido en Paris el 22 de mayo 1924, teniya 94 anyos.
Mi eskopo oy no es de avlarvos de su vida entera ni de su ovra entera. Mismo kon una ora yena no seriya bastante tyempo para esto, indimas en los 20 minutos ke tengo. I de toda manera, todas las gazetas, todas las radyos ya lo izyeron antes de mi. Solo vos avlaré oy, porke esta emisyon es una emisyon djudiya en una radyo djudiya, del ondo atadijo de amistad ke lo aunava a los djudyos i a Israel, no solo en palavras i kantes, ama tambyen en aksyon.
Me akodro por egzemplo tenerlo visto en un gala en Paris organizado por una ovra djudiya (deviya ser el FSJU, fundo sosyal djudyo unifikado). Estava kantando kon Sammy Davis Junior, i deke me lo akodro ? Porke disheron : « Tenemos los dos un punto komuno : los dos somos Suedanos…por muestras mujeres !» De ver estos dos Suedanos, el moreniko ermeni i el preto djudyo (vos akodro ke Sammy Davis era djudyo), me kedo en la memorya…Agora me ambezi ke Sammy aviya sido el testigo de Charles para su kazamyento en Las Vegas. Dunke saviya de kualo avlava !
Ama lo mijor es de empesar por el empesijo , el nasimyento en Paris, en 1924 komo dishe, de Charles Aznavourian, en una famiya de imigrantes ermenis ke asperavan un visa para la Amerika.
Charles es una kriatura muy espyerta, i va empesar a lavorar la noche komo kantador i baylador kuando tyene solo 9 anyos. El es ke va yevar paras para la kaza kuando vyene la gerra en 1939.
Komo izyeron munchos djudyos ajenos, el padre de Charles, Mamigon dicho Misha Aznavourian, entra komo veluntaryo ajeno en la armada franseza, kon unos kuantos amigos ermenis komo el. Va aboltar tres mezes despues, kon el armistisyo, solo sovrebivyente de todos sus amigos. Su kaza va servir de eskondijo, asigun lo ke konta Charles, para rezistantes i djudyos. El mas konosido
es Missak Manouchian, ke fue fuziyado el 21 de fevrero 1944, kon 21 otros haverim komunistos, entre eyos munchos djudyos, ama tambyen espanyoles, italyanos, otro ermeni, i mismo fransezes. Missak era amigo kon los Aznavourian, ke despues eskondyeron a Melinee, la bivda de Missak, eya tambyen rezistante i bushkada por la gestapo. Si vos akodrash, ize el 3 de mayo pasado una emisyon entera sovre el grupo Manouchian, i ya teniya a esta okazyon kontado el rolo de la famiya Aznavourian para eskonder a Melinee, ke sovrebivyo a la gerra.
Kale ke sepash ke ay kaji un anyo, el 27 de oktovre 2017, Charles Aznavour i su ermana Aida Garvarentz resivyeron en Yerushalayim, en la kaza del Prezidente Rivlin i de su mano, la medaya Wallenberg para sus famiya i para lo ke izyeron para los djudyos en estos tyempos pretos. Charles konto ke en vezes el, ke ya teniya entre 18 i 20 anyos, i su ermana durmiyan en basho tanto aviya djente eskondida.
Entremyentres kontinua su vida de kantador. En 1941, Aznavour kanta en un espektakolo, i un syerto Pierre Roche, muzikante komo el, kanta el tambyen. La mujer ke tyene de prezentarlos al publiko, uno detras del otro, se yerra i los prezenta en djuntos. Ansina se konosen, i en djuntos van a azer kantikas swing. Yo me akodro tener oido a la radyo, verso 1946, kuando teniya yo unos 9 anyos i Aznavour unos 22, la kantika ke izyeron en djuntos Le feutre taupé (el chapeo peludo). Me plazyo muncho, ama no saviya ke era de Aznavour, ke de toda manera ni yo ni dinguno dainda konosiya. No aviya televizyon, era solo la radyo.
Si vos vash sovre youtube, la puedesh oir kantada por Aznavour solo :
Empesi de konoser Aznavour komo tal, kuando eskrivyo para Gilbert Becaud, en los anyos 1953, las kantikas Mais qué mais qué o Viens . Por dizir la vedra, las konosiya mas kantadas por Becaud, ama yene las oyi por un mansevo kon una boz kuryoza, i ke era un syerto Charles Aznavour.
Si vos demandash deke vos konto esto ke no tyene nada de ver kon los djudyos i Israel, no se kualo responder, sino ke tengo esta manya de meterme en las istoryas ke konto…
Ama mos aboltamos a los djudyos i a Israel si vos digo ke me ambezi ke la primera vez ke Aznavour se fue en Israel, es en 1949, kuando la gerra de independensya sea no era dainda eskapada, sea djusto veniya de eskaparse. Komo vos dishe, en estos anyos, muy poka djente lo konosiya, sovre todo afuera de Fransya, ama yene se fue a kantar aya, syendo uno de los todos primeros.
Despues va ser mas i mas konosido asta azerse una star mundyala, ma el kontinuo vida entera de ir en Israel para kantar i sostener el pais.
Agora vino la ora de avlar de las kantikas ke izo en atadijo kon Israel. La primera de todas la ke izo en 1967 intitolada Yerushalaim (tal i kual en ebreo, i no Jerusalem), ke se puede oir sovre youtube :
https://www.youtube.com/watch?v=8MRVM76CgVc
La kantika es en franses, ama vo aprovar de trasladarlavos en muestra lingua :
De vez en kuando,
Komo una kriatura,
Mi penseryo te dezenya
Yerushalayim
De tadre en tadre
No sos mas ke un
Suenyo ke kaye en rovina,
Yerushalayim.
Tales estos olim
Kon los ojos kemando
Avriendosen al oido de tu nombre
De lo leshos de las mares,
Akorruto a traves
Malkerentes i duras rejyones.
Teniya venido,
Manos vaziyas i pyes desnudos
A ti Yerushalayim.
Para guadrarme
Enklavates
El amor en mi pecho
Yerushalayim
Ande estan mis alegriyas,
Es ke no ay
felisidad sin espinas ?
Yerushalayim,
Todo se se esforso
Para arrasgarmos
I el duman de muestros yoros
A truvyado el syelo
Alsando una pared
Entre su korason i mi korason.
Ama tengo en mi
La esperansa yene
Ke el amor de muevo
Renaska i biva yene
Para mozotros en
Yerushalayim
Esta kantika, komo vos dishe, la izo en 1967, el anyo de la gerra de los sesh diyas. En estos tyempos, todos los kantadores fransezes eran amigos de Israel. Entre eyos Johny Halliday, ke kijo mismo irse kombatir komo veluntaryo, ya lo konti aki . Ama Aznavour kedo amigo de Israel todo el tyempo asta su muerte. En 2017, kijo dizir sinkuenta anyos mas tadre, kuando se fue en Israel a la vez por la medaya Wallenberg, komo ya lo konti, i para dar un konserto, tuvo estas palavras en su repuesta al Prezidente Rivlin : « Tenemos tantas kozas en komuno, los Djudyos i los Ermenis, en la desgrasya, en la aftaha, en el lavoro, en la muzika, en los artes. Tengo un poko la impresyon ke vengo en un rinkon de mi famiya miya porke tenemos la misma manera, tambyen, de bivir i de komer i de bever . »
Aznavour kanto en yidisch, lo puedesh ver kantar (kon Enrico Macias) si vos vash sovre internet i bushkash Aznavour i Enrico Macias.
https://www.youtube.com/watch?v=zVEqFmeR25U&list=RDzVEqFmeR25U&start_radio=1#t=94
Lo podresh ver – i oir, por siguro,- kantar una kantika alegre en yidisch, ke no konosko, una kantika en ebreo : hava nagila, i otra, eya muy famoza, kantika en yidisch : A yidische mame.
No solo kanto A Yidishe Mame en yidisch, ma sovre esto, topando ke la traduksyon egzistante en fransez no valiya nada, izo su propya traduksyon, i la kanto tambyen en su versyon franseza suya.
Aki tambyen es kolay de toparla indose sovre youtube Aznavour La yidische mama :
Aki vos do las palavras de Aznavour, trasladadas por mi en muestra lingua:
La yiddische mama
Tyerna fuersa de la natura
La yiddishe mama
Es amor al estado puro
Pronta para sus kriaturas
Para azer munchos sakrifisyos,
Velando komo puede
Sovre sus ansyas, sovre sus kaprichos
Tambyen.
Fuerte frente a los dramas,
Ma muy flosha kon sus chikos
En la agua o en las flamas,
Para eyas djugariya su vida,
Atyo santo, kualo uvyera echo de byen, diga-me,
Sin la kalor, sin la fuerte fey en mi
Sin el amor de mi yiddishe Mama
Mama
La yidishe Mama,
Guardyana de la tradisyon
La yidische Mama,
Es el trezoro de la kaza,
Desde muestro primero grito
Eya rije, eya dechida
Todo a lo largo de su vida
Mos empoya ma mos giya
Tambyen
Es la luz
Ke briya kuando te syentes pedrido
Es la orasyon
Ke se dize kuando no esta mas.
Yo ya sé ke astal kavo de mis diyas,
Guadraré gravado en mi para syempre
Todo el amor de mi yiddishe Mama
Mama.
Aznavour dyo munchos konsertos en Isael, i se aparejava para ir dar un muevo en djunyo 2019. No se asperava de morir tan presto, el ke keriya morir a los 100. Ke keriya…ke keriya …en vedra, komo lo atorgo, no keriya morir del todo, i esto es un punto komuno ke tengo kon el. Konto Aznavour ke kuando era chiko sus amigitos djudyos de su male le diziyan ke sus madres diziyan ke oravan para ke biva asta syen i vente. I el les respondiya ke no keriya deziluzyonarlas…
Kale dizir ke las mas ermozas kantikas de Aznavour fueron trasladadas en ebreo por varyos eskrivanos israelyanos, i kantadas por el kantador israelyano Avi Toledano. Kuando Toledano izo en Israel un konserto enteramente konsagrado a las kantikas de Aznavour en lashon, el vino espesyalmente en Israel komo spektator. No se kontento de oir i de dar palmas, Toledano le aviya dado a entender, palavra por palavra, komo su ovra aviya sido trasladada, i le konvino.
Esto dicho, Aznavour no era solo kantador, era tambyen aktor de sinema. Djugo en mas de ochenta filmos. I komo era chiko i moreno, kara de djudyo teniya i le dyeron munchos rolos famozos de djudyo.
Empeso por ser el asker djudyo Samuel Goldman en el filmo Un taxi pour Tobrouk. Son kuatro askeres fransezes en el dezyerto de Libiya. Matan a almanes en una araba, lo ke les permite de arrovar esta araba, ama toman kon eyos un prezonero alman. Los otros lo topan bastante simpatiko (el aktor alman era Hardy Kruger) salvo el djudyo Aznavour- Goldman, a kyen el Alman no le abasha…
Djugo en 1982, en el filmo Qu’est-ce qui fait courir David, (kualo aze korrer David), el rolo de Leon, el padre djudyo de David (interpretado por Francis Huster, el halis djudyo)
Aznavour djugo tambyen un rolo de djudyo en el Mangeclous de Moshe Mizrahi. Mizrahi izo maksus de no tomar aktores djudyos para su filmo entero de rolos de djudyos, i lo dishe aze poko aki, penso ke era un yerro . Ama no era un yerro en kuanto a Aznavour, el mas djudyo de los ermenis…Djuga el rolo de Jérémie, un vyejo djudyo sorreter, i kuando l oves, no puedes imajinar ke Aznavour no sea djudyo.
Ama Aznavour izo mas : eskrivyo el senaryo de un filmo, intitolado Yiddish Connection, filmo realizado por Paul Boujenah, el ermano de Michel. En este filmo djuga el rolo de Aaron Rappoport. Es la istorya de djudyos ke arrovan muncha para a la Mafia, i por siguro no es la mijor idea ke sea…
Esto dicho, despues de todo lo ke vos konti, agora penso ke ya entenditesh ke, en pedriyendo Aznavour, los djudyos an pedrido un grande amigo.
En 2010, Aznavour respondiya ansina a una entrevista :
« Yo kyero byen al puevlo djudyo. Engrandesi en una malé de Paris ande biviyan munchos djudyos. Mi mijor amigo, el famozo kuzendero Ted Lapidus, ke mos desho en 2008, era djudyo.
(…)
« Kuando Israel fyesto los 2.000 anyos de Yerushalayim, yo fui el solo artisto franses a ser prezente en estas seremoniyas. Mismo los artistos djudyos de Fransya no izyeron el viaje.
(…)
« Me do kuenta ke entre los kreadores kulturales o artistikos ke me agradan, munchos son djudyos. La kontribusyon famoza del puevlo djudyo al eslancho de la kultura, de la muzika, de los artes, de la medikeriya, de las syensyas no es mas de demostrar. Los Fransezes no son antisemites ni rasistos, son solo envidyozos de los otros, de los immigrados ke reusheron kon briyo en munchos dominyos profesyonales.
(…)
« No so muy relijyozo. Si mi puevlo no aviya sido viktima de un jenosid, puede ser uvyera eskojido una otra relijyon ke la gregoryana. Ama los Ermenis fueron masakrados porke no kijeron renegar sus relijyon. No va ser yo ke vo renegarla oy.
(…)
« Miro todos los alhades demanyana a la televizyon el ekselente programa sovre la Biblia i el judaismo del haham Josy Eisenberg. Ke maraviyozo pedagogo.
« Kuryozamente, los dos mijores programas sovre kuestyones relijyozas en la televizyon franseza son las de los djudyos i de los muzulmanes. No ay una sola emisyon katolika o kristyana ke vayga la pena de ser mirada…»
http://www.juif.org/blogs/23105,une-entrevue-avec-charles-aznavour.php
(Si me puedo permeter de ir a la kontra de Aznavour, diré ke me parese muy severo verso la emisyon Fey i tradisyones de los kristyanos oryentales, una vez al mez, avlando de vez en kuando de los Ermenis, ke yo miro kon interes).
Una vez, en novyembre 2013, Aznavour disho tambyen lo ke sige : « Mi mujer es protestante, yo so kristyano, mi inyeto es djudyo, mi inyeta es muzulmana, kualo ay ke mos manka ? So del partido de la toleransya, mi famiya es la famiya Benetton ! »
I es vedra ke su ija Katia tyene una ijika yamada Leila, muzulmana, i ke otra ija le dyo un inyetiziko ke se yama Jacob i ke izo su bar mitsva…ande ? Al Kotel en Yerushalayim !
Ke deskanse en paz este Aznavour ke meresiya el premyo Nobel de la Paz.
Al djueves ke vyene, si kyere el Dyo !
Edmond Cohen
Paris, Fransya
