eSefarad Noticias del Mundo Sefaradi
Keridos amigos,
Despues de tres semanas sin emisyon por modo de Sukot i Simhat Tora, vo azer amanyana djueves una emisyon ke va ser de muevo sovre la etika djudiya, esta vez la de la famiya i de la edukasyon. Me demando si no es la importansya dada por muestra etika, desde miles de anyos, a la edukasyon ke da lo mijor a entender deke ay tantos premyos Nobel ande los djudyos
Los ke van a kerer oirme en direkto lo podran indosen a las 4 h 06 PM, ora de Paris, sovre www.radioj.fr Kale klikar arriva a la derecha sovre Ecouter Radio J en direct.
I si no es en direkto, abasta asperar un diya o dos, i despues ir a oirme en redifuzyon sovre http://www.radioj.fr/node/145
Saludos a todos
Edmond Cohen Paris Fransya
——————————————————————————————
LA ETIKA DJUDIYA (5)
Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Pasaron tres semanas desde mi ultima emisyon, syendo ke el djueves pasado, estavamos en Shemini Atseret, i el djueves antes en Sukot.
Auguro ke pasatesh buenas fyestas, porke agora no vamos mas tener fyestas asta Hanuka…i en Hanuka no se keda el lavoro, ni tampoko en Purim…Se keda en Pesah, ama el djueves va kaer en Hol Amoed, se keda en Shavuot, ama Shavuot no va kaer en djueves, lo ke kyere dizir ke tengo interes de tener la fuersa i la salud, porke no va aver mas fyestas astal verano proksimo para kedarme de azer mis emisyones…
Antes de empesar mi emisyon de oy, tengo de eskapar la ultima ke vos ize sovre la Kompaniya Naftali Botwin, porke no tuve el tyempo de azerlo en su tyempo. Kuando me kortaron la palavra, vos estava dizyendo ke la istorya de estos ombres de la Kompaniya Botwin es una istorya a la vez eroika i trajika. Eroika i trajika, porke los djudyos van a luchar komo leones, i pedrer sus chefes uno detras de otro: el primero Karol Gutman es matado en fevrero 1938. Despues de el Leon Rubinstein es kodja ferido i remplasado por Michal Sapir, ferido i muerto al ospital. Despues de el Israel Halbersberg es matado, despues Emanuel Mink es ferido i remplasado por Albert Szerman, ke el va ser embiyado en otra unitad, i va ser remplasado por Tadeusz Szlachta i Samuel Alcalai (un nombre de los muestros) ke van a ser matados los dos.
Oitesh ke Emanuel Mink, ke era yamado Mundek, nasido en 1910 en Polonya, i ke teniya dunke 28 anyos, fue solo ferido, i el sovrebivyo, al punto ke se muryo solo en 2008, a la edad de 98. Ama entremyentres, kale saver ke a la venida de los Almanes en Fransya se fuyo del kampo franses ande se topava enserrado, entro en la rezistansya, komo munchos de sus kompanyeros, por egzemplo en el grupo Manouchian, fue aferrado en agosto 1941 i embiyado en Drancy, i de aya en Auschwitz kon el primer treno ke partyo de aya el 27 de marso 1942. En Auschwitz va reushir a tomar fotos para ke los Alyados sepan lo ke se pasa. Va despues, en oktovre 1944, ser embiyado en el Struthof i de aya a Natzweiler, de ande va ser liberado en avril 1945, azyendo parte de los 24 sovrebivyentes ke van a aboltar sovre los mil deportados. Despues va aboltar en 1949 en Polonya, ke va fuir en 1968, kon el antisemitismo de Gomulka, para bivir en Paris.
Ansina se teniya de eskapar mi emisyon del 28 de septyembre, i agora puedo venir a la de oy.
Oy tengo la entisyon de aboltar a mis emisyones sovre la Etika djudiya, de la kuala no vos avli desde el 22 de djunyo pasado, kyere dizir kaji kuatro mezes, porke el 29 de djunyo arresivi Alain de Toledo, despues tomi dos mezes de vakansas, despues tuve de avlar de los ke mos desharon este enverano, despues uvo Rosh Ashana, despues kije avlarvos de la Kompaniya Naftali Botwin en mi emisyon de ay tres semanas.
Vos akodro ke lo ke vos esto dizyendo sovre la Etika djudiya es travado de un artikolo del haham liberal en Genève François Garaï, ke el mismo lo traslado i adapto de un artikolo del haham liberal ingles John D. Rayner.
Asigun estos hahamim, la etika djudiya se manifesta en onze direksyones: de la persona, sosyala, familyala, de la edukasyon, de la ekonomiya, la etika medikala, de las gazetas, de las leyes, de la politika, de las relasyones internasyonalas, del entorno.
Kon las kuatro emisyones ke ya ize sovre la etika djudiya, solo vimos en djuntos dos de estas etikas sovre onze, la de la persona, i la sosyala. Mos keda mueve, i por empesar la etika familyala. Vos akodro de muevo ke lo ke vos esto meldando es la etika djudiya asigun hahamim liberales. Afillu si penso ke los hahamim ortodoksos seriyan de akodro kon la mayoriya de lo ke ya vos meldi i vo kontinuar de meldarvos, es siguro ke seriyan opozados sovre syertos puntos. De vez en kuando, si tanto es ke esto siguro de la opinyon kontrarya de los ortodoksos, lo vo senyalarvos.
Esto dicho, vengamos a la etika de la famiya.
I por siguro, kale empesar por marido i mujer.
Rekomendasyon del kazamyento
Es rekomendado de fundar un ogar, asigun esta eskrito en Bereshit II, 24: » Dexara varon a su padre i a su madre, y apegarse a (se apegara) con su muger, y seran por carne una.» En muestra tradisyon, el kazamyento tyene tres eskopos: el fraguamyento de un ogar djudyo, la vida en djuntos i la prokreasyon. El kazamyento es muy enkorajado i los hahamim famozos kedados solteros son muy muy pokos (as Ben Azzaï, cf Yevamot, 63b). Ama yene es permetido de kedar soltero al ke no puede topar su felisidad kon el kazamyento.
El kazamyento es la mijor koza para los pares eteroseksuales
Es dezeavle ke las relasyones eteroseksuales fundadas sovre el amor i el apalavramyento de parte i otra sean sanktifikadas por el kazamyento. El djudezmo kyere un ekilibrio al seno de un par, i el refuzo del akto seksual puede ser una kavza de divorsyo. De otra parte, el ekilibrio de la vida seksuala kae a los dos kazados, i dinguno puede reklamar una relasyon seksuala sin el akodro del otro (Rambam, Mishne Tora, ihot ishut, XV, 17)
El kazamyento demanda amor, respekto, i fidelidad mutuales
Es una mitsva de no azer adulteryo, asigun esta eskrito: «No forniques» (Shemot XX, 13) Esto vale oy tan para un ombre, kazado o no, kon una mujer kazada, komo para una mujer, kazada o no, kon un ombre kazado. Asigun el Talmud, «el ke kyere a su mujer tan komo el mismo i le da kavod mas ke para el mismo, el tanah dize sovre el » Y sabras que paz tu tienda (Iyov, V, 24)» (Yevamot 62b)
El kazamyento puede ser baldado
El kazamyento es komparado a la Alyansa eternala ke ata el Dyo al puevlo de Israel, asigun esta eskrito: «Y desposarte e (te desposaré) a mi para siempre» (Osea II, 21) i idealmente se deve de turar vida entera. Ama este adadijo puede ser baldado. En tal kavzo es una mitsva de azerlo por divorsyo, asigun esta eskrito: » y escrevira a ella carta de apartimiento y dara en su mano» (Devarim, XXIV, 1) En muestras komunidades, eskrive el haham Garaï, konsideramos ke el ombre no es el solo ke pueda uzar de este derecho. Despues de un divorsyo sivil, eskrive tambyen el haham Garaï, es rekomendado de azer un divorsyo relijyozo kon un get mutual.
(Aki tengo de akodrarvos ke no es lo mismo para los hahamim ortodoksos: solo el marido puede dar el get a su mujer. La mujer no puede dar get a su marido. Es vedra ke si la mujer lo demanda i si el Bet Din djuzga ke tyene razon, el Bet Din puede ovligar al marido de dar el get a su mujer. Ama si no se save ande esta el marido, o si el marido refuza de dar el get afillu el djuzgamyento del Bet Din, el Bet Din, a lo manko afuera de Israel, no tyene la kapachedad de forsar el marido a dar el get, de tal manera ke el divorsyo no se puede azer. Estas mujeres ke kedan kazadas sin pueder divorsyar se yaman agunot. Me ambezi ke ay tambyen en Israel unos kuantos ombres ke no pueden tampoko divorsyar porke sus mujeres refuzan de resivir el get…Si la mujer no tyende su mano avrandola, komo puede azer el marido para darle el get en su mano, komo dicho en Devarim?)
Tener kriaturas
Es una mitsva de tener kriaturas, asigun esta eskrito: «Fruchiguad i muchiguad» (Bereshit, I, 28) i komo lo akodra Yeshayau: «el Dio (…) no para vacuydad la crio (la tierra)» (XLV, 18). En la Mishna, esta ovligasyon a sido vista komo un dever de kada ombre de tener un ijo i una ija (Yevamot VI, 6).
El haham Garaï mos dize despues: Mozotros no vemos mas esto komo una ovligasyon i el ombre no es mas el solo tokado por este mandamyento ke toka a todo par eteroseksual en edad de dar kriaturas. Otros parametros pueden ser tomados en kuenta i trokar esta ovligasyon. Los pares ke no pueden tener kriaturas pueden uzar las teknikas de prokreasyon ayudada.
Kontrolo de los nasimyentos
El Talmud mos da tres kavzos de mujeres ke pueden refuzar la konsepsyon: las chikas, las prenyadas (aki no entyendo byen ke menester tyene la prenyada de refuzar mueva konsepsyon, ke de toda manera no se puede azer), i las mujeres ke alechan (Yevamot, 12b). Konsideramos, eskrive el haham Garaï, ke toda persona ke dezea de manera responsavle utilizar un modo de no konsever puede azerlo, i ke, en syertas sirkonstansyas, es mismo rekomendado de azerlo (surpovlasyon, hazinura ereditarya grave…)
La movedura (avortement) es permetida
La vida de la madre prevale sovre la de la kriatura ke yeva en eya (Oholot VII, 6). Komo la kriatura en la tripa de su madre no es konsiderada komo un ser entero, una movedura puede azerse kuando la vida de la madre se topa en sekana. Esto dicho, las kondisyones para esto deven ser klaras. Afillu si la movedura no puede ser konsiderada komo una matansa, ay una vida de tener en kuenta i la desizyon de azer la movedura deve ser tomada en el respekto de kada uno i despues de muncho pensar. Si las kondisyones medikalas son klaras i sovre todo kuando la vida de la madre se topa en sekana, se deve de azer si tadrar.
En syertas sirkonstansyas, i mismo si la vida de la madre no se topa direktamente en sekana, otras konsiderasyones pueden ser tomadas en konsiderasyon para permeter una movedura (por egzemplo, eskrive el haham Garaï, en kavzo de vyolasyon).
Djenitores i kriaturas
Ovligasyones de los djenitores verso sus kriaturas
El profeta Malahi, avlando de la venida del grande diya del Senyor, kijo dizir de la era mesyanika, mos dize ke en este diya el profeta Eliya «fara tornar coraçon de padres sobre hijos, y coraçon de hijos sobre sus padres» (III, 24). Este pasuk amostra las relasyones ideales entre los jeneransyos, relasyones fraguadas sovre el amor mutual, el respekto i la konfyensa. El Talmud deklara ke los deveres ke pesgan sovre el padre verso su ijo son los sigyentes: azerle mila, liberarlo de aferramyento (pagando un reskate, ama solo por el bohor), ambezarle la Tora, toparle una mujer, ambezarle un ofisyo, i algunos adjustan ambezarle a nadar (Kidushin 29a). A estos deveres Yeuda Anassi adjunta de ambezarle sus deveres de sivdadano (Mehilta Bo, 18). Oy, eskrive el haham Garaï, estos deveres kaen sovre la madre komo sovre el padre, tanto por la ija – aparte de la mila – komo por el ijo, ke sea bohor o no. Es siguro ke esta lista no se keda ansina, ama yene da una idea ke kale adaptar al mundo de oy.
Respekto de las kriaturas verso sus djenitores
Es una mitsva de dar kavod a sus djenitores, asigun esta eskrito: «Honrra a tu padre y a tu madre» (Shemot XX, 12) i tambyen: «Varon su madre y su padre temeredes» (Vayikra XIX, 3). De estos dos pesukim, los hahamim travaron ke estos deveres kaiyan tambyen sovre la ija, i verso la madre komo el padre. De aya tambyen la ovligasyon para las kriaturas de sostener a sus djenitores kuando eyos mismos no lo pueden mas azer (Kidushin 31b).
Derecho a eredar
En la Tora, las ijas pueden eredar de sus padre si no tyenen ermanos, asigun esta eskrito: «varon quando muriere, y hijo no a el, y faredes passar a su heredad a su hija» (Bamidbar, XXVII, 8). La ley rabinika espandyo el derecho de eredar a las ijas solteras, ama agora, eskrive el haham Garaï, el derecho deve ser el mismo para todas las kriaturas.
Etika de la Edukasyon
Maestros i elevos
La edukasyon deve prevaler sovre todo.
Los hahamim an insistido sovre la preeminensya ke deve ser dada a la edukasyon. Ansi es ke dizen ke el ensenyamyento de la Tora vale todas las mitsvot (Peah I, 1) porke permite de fraguar un kuadro etiko i kultural. El djudezmo syempre metyo en valor el estudyo, no solo relijyozo, sino tambyen profano, para ke kada uno pueda ambezar un ofisyo i obtenga la maduridad nesesarya para pueder dirijir su egzistensya asigun los kriteryos morales de muestra tradisyon. No kale konfundir ambezar i adotrinar. El primer es byen, el sigundo no.
La edukasyon deve ser para los dos seksos
La Tora parese pensar solo a los mansevikos kuando dize: «Y abezaredes a ellas a vuestros hijos» (Devarim, XI, 19) i en mayoriya los hahamim del Talmud pensavan ke el dever de ambezar valiya solo para los mansevikos. Solo una minoridad diziya ke kaliya tambyen ambezar a las ijas. Oy el ensenyamyento deve ser tan para los ijos komo para las ijas.
La edukasyon deve ser avyerta a todos
El profeta Yeshayau ya diziya ke todos deviyan resivir una edukasyon: «Y todos tus hijos abezados de Adonay» (LIV, 13). I los hahamim insistyeron sovre la igualidad ke deviya egzistir en la edukasyon. La komunidad deviya eya misma kargarse de la edukasyon de los uerfanos, i si aviya gastos, los ke no puediyan pagarlos teniyan de ser egzentados. Esto vale tambyen oy.
Los maestros deven ser tratados kon kavod
Teilim mos dize: «Si Adonay no guardare ciudad, en vano vela guardador» (CXXVII, 1), i los hahamim pensaron ke el «guardador» es el maestro (Haguigah I, 7). Los dishiplos, sus djenitores i la sosyedad deven tratar a los maestros kon kavod i asegurarles una egzistensya dinya.
Los dishiplos deven ser tratados kon kavod
Rabi Eleazar ijo de Shamua diziya: «Ke sea el onor de tu dishiplo tan presyozo komo el tuyo» (Avot IV, 15). Es grasyas al kavod del maestro verso su dishiplo ke el dishiplo puede ambezarse el kavod verso el otro. Este respekto mutual permite la egzistensya de una relasyon fundada sovre la konfyensa desde la kuala el dishiplo se aze mas avyerto al ambezamyento ke resive. El numero de los dishiplos puede ser un elemento importante en esta relasyon i, asigun el Talmud, un maestro no deve tener mas de 25 dishiplos (Baba Batra 21a)
La edukasyon no tyene kavo
Rambam mos dize ke «todo Djudyo tyene la ovligasyon de estudyar (…) ke sea mansevo o aedado» (Mishne Tora, Ilhot Talmud Tora I, 8). La sosyedad deve organizar un sistema de edukasyon kontinua, ke vayga para todas las edades.
Aki me tengo de kedar, i vos digo: al djueves ke vyene si kyere el Dyo!
Edmond Cohen
Paris Fransya
