eSefarad Noticias del Mundo Sefaradi
Keridos amigos
Despues de kuatro emisyones trajikas sobre los Djudyos de Polonya, sovre todo la ultima la semana pasada, kon la eksterminasyon kaji entera de una komunidad de tres milyones i medyo de ombres, mujeres i kriaturas, tuve la gana de trokar de lakirdi i de avlar djueves de muestro kerido Djoha, de orijen muzulmana, ama adoptado por los djudyos.
Saludes a todos
Edmond Cohen
Paris – Fransya
——————————————————————————————
Djoha
Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Vos akodro ke agora las emisyones de Radio J se pueden oir sovre internet sea en direkto, el djueves a las 4 h 06 despues de mediudiya, ora de Fransya, sea kuando se kyere, kale klikar en el sityo de Radio J, i irse sovre las emisyones de despues de medyudiya.
http://www.radioj.fr/node/55
De otra parte, vos akodro ke el proksimo atelye de konversasyon de Vidas Largas se va tener el martes 11 de desyembre, en el Centre Communautaire, a las dos i medya (asta solo las tres, porke despues va ser la Siduta djenerala de Vidas Largas).
Esto dicho, despues de kuatro emisyones de apretamyento de korason, kontandovos la istorya de los djudyos de Polonya i komo una komunidad de tres milyones i medyo de djente, ombres, mujeres i kriaturas, dezaparasyo en los umos de la gerra, tuve la gana de trokar un poko, i oy de avlarvos de koza mas livyana, kijo dizir avlarvos de Djoha.
No tengo menester de dizirvos kyen es Djoha, ya lo konosesh todos, es un ombre ke aze parte entera de la vida de todo osmanli, ke sea djudyp o no. Si vos interesash a las orijenes de muestro Djoha, vos konbido de meldar dos artikolos ke topi sovre internet, los dos eskritos en el mismo numero (77/78) de la mizma revista, intitolado l’humour en Orient, paresido en 1995 en la Revue des mondes musulmans et de la Méditerranée (revista de los mundos muzulmanos i del mediterraneo). El primer artikolo, de Jean Déjeux, es intitolado Djoha et la nadîra (Djoha i la shaka) el sigundo de Marie-Christine Bornes-Varol, intitolado Djoha juif dans l’Empire ottoman (Djoha djudyo en el imperyo osmanli).
Jean Déjeux mos konta la orijen muzulmana de Djoha, ke aparese desdel siglo 9 en livros arabos, i ke parese ser otra persona ke Nasreddin Hodja, ke, el, aparese bastante mas tadre en la literatura de los turkos, i ke es un hodja, ombre relijyozo. A poko a poko los dos ombres se izyeron un solo ke se yamo Djoha.
Por su parte, Marie-Christine Bornes-Varol se interesa a la manera komo los djudyos travaron a si el personaje muzulmano para azerlo un haliz djudyo, ama no en todas las shakas. Asigun lo ke eskrivyo en 1994 Matilda Cohen Sarano sitada por Marie-Christine Bornes-Varol, solo son unas trenta kosejikas ande Djoha es dicho ser djudyo ( se va al kal o se vista de Shabat en diya de semana, ets). En munchas otras shakas no se puede saver si es djudyo o no, ama lo ke es siguro es ke los djudyos izyeron suyos este muzulmano, salvo ke, asigun Marie-Christine Bornes-Varol, el Djoha muzulmano no es tan bovo ke parese, a la kontra tyene buelta de meoyo, kuando el Djoha djudyo es solo bovanchon.
Yo no so tan konvensido de esto, porke asigun mi los djudyos tomaron el Djoha de los turkos i arabos tal i komo esta, ke sea meoyudo o ke sea bovo. Lo ke kale, es ke sea koza de reir.
Aki me vo kedar sovre las orijenes muy entrafikadas tan de Djoha komo de Nasreddin Hodja, i vos kyero sovre todo englenear un poko kon las shakas de Djoha, las ke oyi en mi kaza de mi famiya, ama tambyen las ke meldi aki o aya, ke sea en el livro del profesor Haïm Vidal Sephiha intitolado Du Miel au Fiel, o sovre internet en lo ke se yama Contes de Nasreddin Hodja, ke, komo vos dishe al empesijo, se konfunde agora kon Djoha.
Arrekoji estas istoryas en tres partes : Djoha solo, Djoha kon su mujer, o en vezes sus mujeres (kuando es muzulmano), Djoha i su azno.
Empesaremos por Djoha solo :
Una de las primeras istoryas ke me ambezi de chiko es la de Djoha ke pyedre todo, i para no pedrer, eskrive kuando se echa todo lo ke tyene sovre un papel ; no tyene tantas kozas el povereto, ama eskrive todo, afillu su kama, i mizmo Djoha en la kama. Kuando vyene la demanyana, se alevanta, bushka i bushka, ya topa todo, mizmo la kama ; ay una sola koza ke ne reushe de topar : Djoha en la kama !
En una siduta de ombres, kada uno konta las kozas ke reusho de azer. Vyene el torno de Djoha. Estavamos en gerra, konta Djoha, enserrados por el enemigo. No aviya mas nada de azer sino travar su espada i luchar kontra el enemigo. I Djoha se keda de kontar. I tu kualo izites, le demandan los otros. Atakimos a los enemigos, i yo korti la pacha de alguno. Deke la pacha i no la kavesa ? le demandan los otros. Ke keresh, amigos, uno antes de mi ya le teniya kortado la kavesa !
Otra ke me ambezi de chiko : Djoha topa en basho un fyerro de kavayo, i se tresale : puede ser vo topar otros tres fyerros, i mizmo un kavayo. Ama mi puerta esta demzaiya chika para mi kavayo, i Djoha derroka la pared de su kaza para engrandeser a la puerta para kuando topara un kavayo.
Ay una dicha kon la mizma idea, ke me ambezi meldando el livro del profesor Haïm Vidal Sephiha, Du miel au fiel : Djoha, antes de kazar, merko la kuna…
Djoha suve a la teva i kada uno aspaera lo ke va dizir. Es ke savesh lo ke vo dizir ? No, responde la djente. Estonses, si no savesh, ke keresh ke vos diga ! i Djoha se va. El shabath de despues, Djoha suve yene a la teva, i yene demanda : savesh lo ke vo dizir ? Esta vez, para trokar, la djente le responde : si, ya savemos. Bueno, les responde Djoha, si ya savesh, no es menester ke avle. I se va Djoha. Los del kal, ke kyeren oir a Djoha, se demandan kualo responder a Djoha si una tresera vez vyene i demanda si saven lo ke va dizir. I dechidan ke en este kavzo, le van a responder ke una parte save, i otra no. I ansina se pasa. Djoha demanda : Savesh lo ke vo dizir ? I le responden : una parte save, la otra no. Muy byen, dize Djoha, los ke saven, ke ambezen a los ke no saven. I se va !
Agora una muy kurta, ke me agrada muncho : Djoha ambeza a su amigo ke el, Djoha, vyene de ser padre. Felesitasyones, responde el amigo. Un ijo o una ija ? Si, responde Djoha, ama komo lo saves ?
Otra konseja kurta: Djoha en durmyendo se suenya ke le dan 99 dukados. Es kontento, ama yene se kesha ke keriya syen, I sovre esto se esperta. Vyendo ke su mano kedo vaziya, pishin serra los ojos para durmir de muevo, dizyendo : Ayde, kon 99 ya me abasta !
Un diya, Djoha se va en su uerta, un kuvo en la mano, para travar agua del pozo. Abasha el kuvo en el pozo, se aboka para ver si se yeno, i kualo ve ? La luna en la agua del pozo ! Atyo santo, la luna se kayo en el pozo ! Korre a su kaza, toma un kuvo mas grande, para travarla de aya. Trava i trava, ama la kuedra se rompe, i el se kae atras. Un poko mareado, serra los ojos, i kuando los avre, ve la luna ke esta en el syelo. Oooh, ke plazer ! No embarasa ke me endjidei, ya reushi a meter de muevo la luna en su lugar !
Djoha da una tinaja a su ija para ke ayga inchirla a la fuente, i le da dos shamares, dizyendole : az dikat de no romper la tinaja ! I su ija se va yorando kon la tinaja. Alguno, vyendo esto, le demanda a Djoha : deke aharvates a esta povereta ke no izo dingun mal ? I Djoha de responder : A kualo serviriya de aharvala una vez ke ya estariya la tinaja en pedasos en basho ?
Una istorya ke kreo bastante konosida es la de Djoha ke se va al hammam. Es tratado muy mal, tovajas suzyas i yeladas, dinguna sonriza de los ke se okupan de el, dinguna palavra amavle. I yene, kuando se va, Djoha da a kada uno un bakshish de rey. Vyendo esto, kuando Djoha vyene al hammam la semana de despues, es tratado komo un rey, kada uno vyene a avlar kon el, le sonriye, le da las mijores tovajas. I kuando se va, Djoha da a kada uno un bakshish de mizerya. Los otros no entyenden deke esta diferensya a la rovez de lo ke asperavan. I Djoha les da a entender en turko : o para, bu hammam, o hammam, bu para ( los bakshishes de la semana pasada eran para oy, los bakshishes de oy son para el hammam de la semana pasada…)
Es un poko la misma idea ke la de la tinaja: lo ke aze Djoha no es para agora, es para otro tyempo…
Agora Djoha i su mujer…o sus mujeres, kuando es muzulmano :
En la istorya del hammam ke vengo de kontar Djoha tyene bastante paras para pueder dar bakshishes de rey. Ama en jeneral Djoha es muy prove. Es tan prove ke, una noche, su mujer lo despyerta dizyendole : Djoha ! Djoha ! Ay un ladron en la kaza ke esta bushkando en todos lugares ! I Djoha responde a su mujer : Deshalo bushkar. Kyen save ? Puede ser mos va topar kualkyer koza !
En una otra istorya muy konosida eya tambyen, Djoha esta echado en su kama, ama no puede durmir. Se abolta en la kama i se abolta, sin topar el eshuenyo. Tanto se menea le eskapa por despertar a su mujer, ke le demanda : Asi bivas Djoha, deke no durmes ? Kualo se pasa ? I Djoha responde a su mujer ke no topa el eshuenyo porke deve paras a su amigo i vizino Moshonachi, ke le deve render amanyana demanyana, i estas paras, no las tyene. Kualo azer ? Aspera, le dize su mujer. Se alevanta la mujer, i en medyo de la noche, avre la ventana i grita por la ventana : Moshonachi ! Moshonachi ! Tanto grita ke Moshonachi se despyerta, avre su ventana, i demanda kualo ay ? Es Djoha mi marido, le grita la mujer, ya saves ke te deve paras ke deviya pagarte amanyana. Ama el dezmazalado no te va pueder pagar, las paras se las komyo…Dize esto, i serra la ventana, dizyendo a Djoha, su marido : Durme tu ; agora es Moshonachi ke no va pueder durmir…
Kale ke vos diga, keridos oyentes, ke yo, kuando era avokato, konosi muy byen lo ke ay de vedra en esta shaka. Tuve komo mushteris kapos de sosyetas ke no biviyan tanto se sikileavan de no pueder pagar a todas las devdas de la sosyeta. Una ves en fayito, puediyan durmir kyetos. Era al sindako de pagar kon lo ke topava en la kasha de la sosyeta. I eran los kreditores ke yoravan de no ser pagados…Syerro la paranteza.
Djoha teniya dos mujeres, la una vyeja i fea, la otra manseva i ermoza. Un diya, las dos vyenen i le damandan : la kuala de mozotros dos kyeres lo mas ? Kualo responder ? Djoha responde ke las kyere a las dos lo mizmo. Ama las dos no se kedan ansina. Si estamos en un kaik i mos kaemos a la agua, la kuala vas a salvar ? Djoha se abolta verso la vyeja i le dize : tu, ya saves nadar, no ?
Una noche, la mujer de Djoha – en esta istorya, Djoha tyene una sola mujer – lo esperta i le demanda de darle la kandela ke se topa a su syedra. I Djoha de responder : komo yo puedo saver, en esta eskuridad, ande estan mi derecha o mi syedra ?
Un diya el vizino de Djoha le dize : Ayer tadre, oyi bozes vinyendo de tu kaza, despues gritos, i despues un patirdi de kaida. Kualo se paso ? I Djoha de responder : me pelei kon mi mujer. De la birra, mi mujer tomo mi palto i lo echo en las eskaleras. El vizino : komo es posivle, Djoha, ke un palto aga tanto patirdi ? Djoha : yo estava en el palto…
Agora Djoha i su azno :
Vos dishe ke Djoha era prove. Yene teniya un azno. Ama este azno le kostava muncho kon lo ke kaliya darle de komer kadal diya. Djoha se disho : lo vo auzar, a poko a poko, a komer menos. I kadal diya, Djoha dava a su azno un poko manko de komer. I el diya de despues, yene un poko manko, tanto ke un diya, no le dyo de komer del todo, i el povereto de azno, de tanto no komer, se muryo . Ke pekado ! se disho Djoha. No tengo mazal : djusto kuando mi azno se dezuzo de komer, na ke se muere !
Un vizino demanda a Djoha de emprestarle su azno. No lo puedo, le responde Djoha, mi azno se muryo. Djusto kuando dize esto, el azno se mete a gritar. Deke me enkashates una mintira ? le demanda el vizino. Djoha menea la kavesa kon tristeza i responde al vizino : Ke aver pezgado sos ! No me krees a mi, tu vizino kon barba larga i blanka, i krees a un azno ijo de hamor !
Un diya, el azno de Djoha dezaparesyo en la sharra. Djoha lo bushkava, alevantando las manos i orando : Grasyas al Dyo ! Gasyas al Dyo ! Un kazalino lo ve ansina i le demanda : pyedres tu azno i rengrasyas al Dyo ? Deke ? I Djoha de responder : i si me teniya topado sovre el azno, ande estariya agora ? Grasyas al Dyo ! grasyas al Dyo !
Djoha aboltava a kaza vinyendo del charshi, kon delantre de el su azno kargado de todo lo ke teniya merkado. En supito, el azno se metyo a korrer muy presto. Para no pedrer su azno i lo ke yevava, Djoha se metyo a korrer detras. Ama el azno iva mas presto ke Djoha i djente vyendo solo a Djoha le demabdaron : Asi bivas tu, ande estas korryendo ansina ? I Djoha de responder, korryendo : Ke me demandash a mi, demandaldo a mi azno !
Kon esto vos desho i vos digo al djueves ke vyene, si kyere el Dyo !
Edmond Cohen
Paris, Fransya
