Muestra lingua: PESAH, SHEMOT I ARKEOLOJIYA por Edmond Cohen

Keridos amigos, vos do el teksto de la proksima emisyon del programa. 

El program se puede sintir por Internet kada djueves, indo al sityo RADIO – la fréquence juive. Kale tener pasensya i asperar un poko, no se oye pishin. 

Saludos a todos 
Edmond Cohen
Paris, Fransya 

PESAH, SHEMOT I ARKEOLOJIYA

Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.

Komo a kada vez, vos akodro ke el proksimo atelye de konversasyon de la asosyasyon Vidas Largas se tendra el djueves 5 de mayo, de las dos a las kuatro i medya-sinko, en el Centre Communautaire, 119 rue Lafayette Paris (10°) métro Gare du Nord o Poissonnière.

El lunes ke vyene, 18 de avril a la tadre, tendremos el primer seder de Pesah, i komo oy es la ultima vez ke vos avlo antes de la fyesta, me alegro de dezearvos a todos, mis keridos oyentes, ande ke vos topesh, i ya se ke tengo oyentes en varyas partes del mundo, el Texas komo el Peru o la Turkiya, Pesah alegre kon toda vuestra famiya i vuestros amigos.

Afillu ke no so haham i ke no so el mijor para avlar de fyestas relijyozas, aprovi kada anyo de avlarvos de la fyesta, i del seder, lo ke ize por egzemplo el anyo pasado. Este anyo, para trokar sin deshar de avlar de Pesah, me pensi de avlarvos de lo ke dizen los syentifikos, istoryanos i arkeologos, sovre lo ke se save de un punto de vista istoriko, de la istorya tal ke mos esta kontada en el Tanah,  en el livro de Shemot.

Si meldamos el livro de Shemot, todo se paso en Ayifton, i los arkeologos konosen agora bastante byen lo ke se paso en Ayifton, porke no kedan de topar rekodros materyales, eskritos, monumentos, ovras de arte o de la vida de kadal diya, de la istorya de Ayifton.

Ama de la fuyida de un puevlo entero de sheshentas mil famiyas, kaji el tyerso de la povlasyon total del Imperyo, los istoryanos no toparon ni un byervo en los eskritos ejipsyanos. I asigun lo ke se save oy de la vida en Ayifton del tyempo de los reyes faraones, no aviya syervos.

De toda manera, no ay dingun byervo en todos los eskritos ejipsyanos sovre bene israel o ivrim bivyendo en Ayifton. El byervo Israel no aparese nunka. Solo se topo una sola vez el byervo Israr, ke da a pensar a Israel, es sovre lo ke se yama la stela de Menephta (ijo i suksesor de Ramses II) faraon ke bivyo en los anyos 1210 antes del Kristo. Esta stela kanta viktoryas de este faraon, i se puede meldar :

« Libya esta desolada, Hatti esta pasifikada,
Canaan pedriyo todo lo ke teniya de negro,
Askalon esta deportada, Gezer esta tomada,
Yenoam parese komo si uvyera nunka ekzistido,
Israr (Israel ?) es destruido, no tyene mas desendensya,
Sirya se izo una bivda para Ayifton.
Todas las tyerras estan unidas ; estan en paz. »

En kuanto al byervo ivrim (ebreos en lashon), si no se topa en los eskritos ejipsyanos, se topa el byervo Apiru, i munchos pensaron ke son los Ebreos. Ama vamos a ver mas leshos ke esto no es siguro.

Por dizir la vedra, no ay nada de provado i de siguro al diya de oy. Ama es klaro ke de lo ke no ay oy prova ke una koza egzistyo no es la prova ke la koza no egzistyo. Por egzemplo, se melda en el livro de Jules Cesar De bello gallico ke obtuvo la viktorya kontra los Gallos en una bataya ke se paso en 52 antes del Kristo en la sivdad de Alesia. Ama ande estava esta sivdad ? Dainda oy no ay nada de siguro. Los istoryanos se pelean. I por tanto, esta bataya se paso en 52 antes del Kristo, kijo dizir unos mil i dozyentos anyos despues de la salida de Ayifton, asigun la tradisyon djudiya. De lo ke no se save ande  uvo la bataya no kyere dizir ke no uvo bataya, i ke Cesar mos konto una bavajada.

Entre la tradisyon djudiya, asigun la kuala todo lo ke esta kontado en la Tora es vedra, i la mayoriya de los arkeologos, asigun los kuales todo es falso i leyenda, ay puede ser un medyo kamino, ke syertos aprovaron de bushkar. Ama kale dizir ke no es kolay.

Mos tenemos de demandar a lo manko kuatro kuestyones :

– Kualo se paso ?

-Kuando se paso ?

– Kon kyen se paso ?

– Ande se paso ?
Primera kuestyon : kualo se paso ? Lo ke se paso, el livro de Shemot mo lo konta : los djudyos eran syervos. Lavoravan a fraguar las sivdades de Pitom i Ramses. Vino un djudyo kriado por los Ejipsyanos, ke se yamava Moshe, el kual demando a Paro de embiyar atras al puevlo de los bene Israel. Paro no acheto, Ayifton fue aharvada de diez feridas. Al kavo acheto, los djudyos se fuyeron sin tener tyempo de azer alevantar el pan, se toparon frente a una mar yamada Yam Suf, i los Ejipsyanos trokaron de idea i vinyeron para aferrarlos. La mar se avriyo en dos, los djudyos pasaron, i los Ejipsyanos vinyeron detras, ama la mar se serro i los ejipsyanos se muryeron aogados. I los djudyos kaminaron el el dizyerto de Sinaï i Moshe suvyo a la montanya de Sinaï i aya el Dyo le dyo la Tora.

Esto todo es muy byen, ama en esta istorya, sin avlar de los nisim, los mirakolos, ay munchas kozas ke los istoryanos dizen no ser posivles.

En primero mos dizen ke no aviya syervos en Ayifton, asigun lo ke se melda en los eskritos ejipsyanos. Sigundo, no konosemos oy sivdades yamadas Pitom i Ramses. Los eskritos ejipsyanos avlan, es vedra, de Pi Ramses, ke era la kapitala del imperyo del tyempo de Ramses II, ke bivyo noventa anyos entre los anyos 1300 antes del Kristo i 1210. Lo ke los arkeologos pensan ser las ruinas de Pi Ramses se topan al lado de la sivdad de Qantir, en el delta del Nilo.

Por lo ke es de Pitom, ay shupe…En 1883, el arkeologo Edouard Naville topo, no leshos de Pi Ramses (Qantir), en una sivdad yamada Tell el Maskhuta, los restos de una vyeja sivdad ejipsyana kon munchos monumentos de Ramses II, i  una pared echa de adobes (briques) lo ke le dyo a pensar ke era la sivdad de Pitom (Pi Atom en ejipsyano). Agora, los arkeologos no son siguros ke sea Pithom. 

De aya se fueron los Bene Israel i traversaron la mar yamada Yam suf. Sovre esto, no tenemos nada sino en el tanah.

Sigunda kuestyon : kuando se paso esta fuyida de Ayifton ? Los eskritos ejipsyanos no avlando de esto, kale bushkar en los eskritos ebreos, kijo dizir el tanah. Salvo ke el tanah no mos da una data. La sola koza ke tenemos, es ke el faraon Menephtah se glorifika en su stela ke vinsyo a Israr. Si vinsyo a Israr, i si Israr es Israel, kijo dizir ke los bene Israel ya aviyan aboltado en Kenaan del tyempo de Menephtah, ijo de Ramses II. I si los djudyos fraguaron la sivdad de Ramsses II su padre, se da a pensar ke la fuyida de Ayifton se paso del tyempo de Ramses II,   ke bivyo, komo lo dishe, en el siglo XIII antes del Kristo.

Tresera kuestyon :Kon kyen se paso la koza?

Kon Moshe Rabenu, kon los bene Israel, i kon Paro.
 
 Empesaremos por Moshe Rabenu. No se topa nada en los eskritos de los Ejipsyanos. Ama no kale olvidar ke los Ejipsyanos teniyan el uzo de destruir todo lo ke puediya akodrar a una persona ke no les plaziya. Lo izyeron para munchos de sus faraones.

Por lo ke es de los bene Israel en Ayifto, no ay ni un byervo en los eskritos ejipsyanos. La sola vez ke se topa un byervo ke se asemeja a Israel, es Israr, i no estan en Ayifton, ama en Kenaan.

Por lo ke es del byervo Ivrim, es vedra ke topamos el byervo Apiru en los eskritos ejipsyanos. Ama asigun arkeologos, el byervo Apiru en ejipsyano trata de djente en un largo tyempo i en munchos lugares. Para syertos arkeologos, se trata de un grupo sosyo-ekonomiko de negra djente, i no de una etniya. Agora ay ke pensan ke los Apiru no tyenen nada de ver, salvo una syerta semejansa de nombre, kon los ebreos.

Por lo ke es de Paro, el byevo kyere dizir faraon, ama el tanah no mos dize komo se yama. Solo savemos ke no konosiya – o no keriya konoser – a Yosef i al byen ke aviya echo a Ayifton. Asigun lo ke dishe mas arriva, podriya ser Ramses II, salvo ke no tenemos dinguna prova ke tuvo un pleto kon syervos bene Israel.

Kuatrena kuestyon : ande se pasaron las kozas?

El tanah es yeno de byervos de sivdades, de lugares, de mar i de montanyas, de desyerto. Ama es komo para Alesia : Ande esta Alesia?

Empesaremos por la mar ke traversaron los djudyos. De kuala mar se avla ? El tanah, sea , las mas munchas vezes, dize solo la mar, sea, kuando kuatro vezes mos da un nombre, la yama Yam Suf. La tradisyon dize la mar kolorada, porke no ay otra mar de traversar para ir de Ayifton a Sinaï i a Kenaan. Ama en vedra Suf no kyere dizir kolorado. Kyere dizir kanya. Yam Suf se traslada agora por Mar de kanyas. No ay kanyas al bodre de la Mar Kolorada. A la roves, ay kanyas al bodre de los lagos salados o amargos ke ay entre el delta del Nilo i el dezyerto de Sinaï. I no kale olvidar tampoko ke Yam, en ebreo, vale tan para una mar komo para in lago ; por egzemplo, el lago de Tiberiade se yama Yam Kineret en ebreo.

Por esto ay arkeologos ke pensaron ke lo ke traversaron los djudyos, no es la mar kolorada, ama uno de estos lagos amargos i salados : esto seriya Yam Suf.

Para dar una eksplikasyon de lo ke se avriyo la mar por konsekuensa de un ayre fuerte venido del este, komo esta dicho en el tanah, sin ke ayga nes, ay istoryanos ke bushkaron i pensaron ke seriya la konsekuensa de la erupsyon mayor ke se paso en la isla de Santorin. Parese siguro ke esta erupsyon de Santorin tuvo konsekuensas sovre Ayifton. Ama yene ay dos kozas ke no van kon esta eksplikasyon : la primera, es ke Santorin se topa al norte de Ayifton i no al este. El ayre uvyera vinido del norte i no del este. De otra parte, la erupsyon de Santorin, asigun los syentifikos, se paso verso los anyos 1600 i mas antes del Kristo, dunke unos 400 anyos antes de Ramses II, o mismo de Ramses I. Komo los djudyos podriyan fraguar en 1600 antes del Kristo una sivdad yamada Ramses, ke dainda no nasyo ? Es komo si se fraguava una sivdad yamada Stalingrad o Leningrad en los anyos 1500, 400 anyos antes del nasimyento de Staline o Lenine.

Por esto un arkeologo yamado Ron Wyatt mos da una otra ipoteza : si es vedra ke suf kyere dizir kanya, kale yene saver  ke en el livro primero de los Reyes, Kapitulo 9, pasuk 26, el Tanah mos dize : « I nave fizo el rey Selomoh en Hezion-Gheber, que cerca Eloth, sobre orilla del mar Suph, en tierra de Edon ». Si, komo parese, Eloth no es otra koza ke Eilat, lo ke el Tanah yama Yam Suf no es aki una mar de kanyas : es la Mar Kolorada, o por ser mas presizo, el golfo de Akaba.

Ron Wyatt pensa ke los djudyos traversaron la Mar Kolorada en el golfo de Akaba, indosen de la playa de Nuweiba, en el Sinaï, asta la otra vanda de la mar, en Arabiya Saudita. I mos da sus argumentos :

– en primero, ay un kamino i un solo ke traversa la montanya para ayegar a la playa de Nuweiba. De tal manera ke la kolona de fuego del Dyo puediya impedir a los Ejipsyanos de atakar a los Djudyos sin ke puedan  pasar al lado.

-en sigundo, Wyatt topo ke la mar es muncho menos profunda entre Nuweiba i la otra vanda ke en las otras partes. I agora se entyende ke si vyene un ayre del este , va kortar la mar en dos, i se va pueder pasar al seko.

– en treser, Wyatt topa al fondo de la mar, en lo ke pensa aver sido el kamino de los djudyos, i detras de eyos de las arabas ejipsyanas kon sus kavayos, ruedas de arabas, ansi ke uesos de ombres i de kavayos.

– en kuatren, topo de kada parte del kamino dos kolonas eskritas en karakteres fenisyanos, ke son tambyen los del ebreo antiko, ande se puede meldar los byervos Mitsraïm, Shelomo, Edom, Paro, Moshe, i el nombre del Dyo. Estas kolonas paresen aver sido metidas por el rey Shelomo para akodrar el nes del kamino aya de los djudyos en medyo de la mar.

Esto todo es muy interesante, ama yene ay shupe, por una razon : Nuweiba es muy leshos del deltado del Nilo : para ayegar a Nuweiba, kale traversar todo el dezyerto del Sinaï. Komo izyeron los djudyos kon los Ejipsyanos detras ?

I segundo : Entre el delta del Nilo i Kenaan ay el dezyerto de Sinaï, i su montanya ande Moshe Rabenu resuvyo la ley . Ke ir a bushkar en Arabiya Saudita?

Komo estash vyendo, keridos oyentes, no es koza kolay de topar rekodros de lo ke mos konta el Tanah. Por esto ay munchos arkeologos ke pensan ke todo lo ke es kontado en el Tanah es una ermoza leyenda, sin nada de vedra istorika. Asigun estos istoryanos, el puevlo djudyo nunka fue en Ayifton, nunka konkisto Kenaan. Los djudyos seriyan un puevlo kenaani ke se izo djudyo de si para si en su tyerra de Kanaan.

Yo no so ni istoryano ni arkeologo. No puedo saver yo mijor de los syentifikos. Ama de una koza so siguro : de lo ke los arkeologos no toparon dainda provas siguras de lo ke mos konta el Tanah, esto no kyere dizir ke todo es falso. No entyendo por ke razon unos eskriviriyan un tanah kon una istorya entera falsa.

De toda manera, mismo si estos 430 anyos pasados en Ayifton seriyan una mintira, seriya una mintira ke mos dyo un tan ermozo pasuk : « Y amaredes al peregrino, que peregrinos fuestes en tierra de Egypto » (Devarim, kapitulo 10, pasuk 19)

Sovre este tan ermozo pasuk del Tanah me vo kedar, dezeandovos, kual ke sea la istorya, una fyesta dulse i alegre de Pesah, i al djueves ke vyene, si kyere en Dyo!