eSefarad Noticias del Mundo Sefaradi
Keridos amigos, aki toparash el teksto de la emisyon de esta semanada.
El program se puede sintir por Internet kada djueves a las 4 H O6 PM, ora de Paris, indo al sityo RADIO – la fréquence juive. Kale tener pasensya i asperar un poko, no se oye pishin.
Aki toparesh el teksto de mi emisyon de este djueves, la ultima ke vo azer antes de mis vakansas de julyo i agosto (en estos dos mezes va ser redifuzyones). Para esta emisyon me tomi koraje i vo avlar del Talmud, una ovra monumentala eskrita por munchos i munchos durante munchos siglos ( a lo manko sinko, sino mas) ke aze mas de 5.000 pajinas. No vos espantesh: no las vo meldar todas. Solo dos chikitikos pedasikos.
Vamos a ver lo ke van a pensar de mi lavoro el haham Farhi, i tambyen Tito Jacob, el kunyado de Liliane.
Saludos a todos
Edmond Cohen
Paris, Fransya
NOVYEMBRE 1942 PARA LOS DJUDYOS GREGOS DE PARIS
Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Komo kada semana, vos akodro ke los atelyes de konversasyon de la asosyasyon Vidas Largas empesaron por de muevo el martes 13 de novyembre, i ke el proksimo se tendra el martes 27 a las dos i medya. Dikat : los atelyes no se tyenen mas en el lokal ande estavamos el anyo pasado. Se tyenen agora al mismo adereso ande estavamos antes, kijo dizir en el Centre Communautaire, 119 rue Lafayette, Paris (10°) métro Poissonnière o Gare du Nord.
Estamos agora en novyembre 2012, i mos akodramos ke, ay de esto djusto setenta anyos, en novyembre 1942, los djudyos gregos de Paris konosyeron una trajediya ke se puede komparar, en mas chiko, a la trajediya del 16 de julyo, los aferramyentos del Vel d’Hiv (el velodromo de invyerno).
A mi no me plaze tanto avlarvos syempre de la shoa i darvos a kada vez apretamyento de korason, ama ke azer ? Mis amigos me disheron ke no era posivle este mez de no avlar de lo ke se paso aki ay 70 anyos. I es vedra ke tyenen razon. Kualo keda de los ke se fueron en umo, sino muestra memorya i muestra boz kuando los membramos ? Sus nombres son la sola koza ke kede de eyos. Membrar sus nombres me parese ser lo mas poko ke puedamos azer para eyos, poveretos…
Esto dicho, antes de avlar de los aferramyentos de djudyos gregos en la noche del 4 al 5 de novyembre 1942, tengo de akodrarvos lo mas kurto posivle komo empesaron las kozas.
En mayo 1940, los almanes entran en Fransya, i muy presto konkistan la mayor parte de la Fransya. El 14 de junyo, entran en Paris. Vyendo esto, el Prezidente de la Republika yama el 17 de junyo al mareshal Pétain komo kapo del Governo, i el mismo diya Petain aze un diskorso dizyendo ke va kedar la lucha.
Un diya despues, el 18 de junyo, el jeneral de Gaulle, ke aziya parte del governo de antes i ke se fue a Londres, de aya yama el puevlo franses para kontinuar la lucha a su lado i al lado de los Inglezes.
El 22 de junyo, Pétain firma el armistisyo kon Hitler. Una parte sur de Fransya keda non okupada por los almanes. No ay nada en el teksto del armistisyo kontra los djudyos.
El 10 de julyo 1940, el parlamento da todos los poderes al mareshal Pétain.
Menos de dos mezes despues, el primo de oktobre 1940, sin ke los almanes tengan demandado kualkyer koza, indimas ke no ay nada de esto en las kondisyones del Armistisyo, el consilyo de los ministros toma una ley kontra las personas de « rasa djudiya ». Asigun los almanes, son de rasa djudiya los ke tyenen mas de dos abuelos djudyos. Asigun la ley franseza, mismo los ke tyenen solo dos abuelos djudyos son djudyos si ensima son kazados kon un djudyo. De esta manera los fransezes van a aharvar komo djudyos a algunos ke los almanes eyos mismos no konsideran komo djudyos.
Un ministro eskrive en sus notas :
« Durante dos oras lavorimos sovre los djudyos.
Es el mareshal ke se amostra el mas duro. En partikolar mete inat ke no ayga dingun djudyo ni en la djustisya ni en la edukasyon. »
Ay poko de esto los istoryanos toparon un papel de la ley anotado por Pétain, i amostrando ke es vedra ke es el mismo ke keriya mas fuersa kontra los djudyos.
Poko despues, el 24 de este mismo mez de oktobre, el mareshal va saludar kon punyada de mano a Hitler en Montoire, i sesh diyas mas despues, el 30 de oktobre 1940, aze a la radyo un diskorso dizyendo : « Es en la onor i para mantener la unidad franseza(…) ke entro oy en el kamino de la kolaborasyon (…) Esta kolaborasyon deve ser sinsera… »
De este diya la Administrasyon del estado franses se va meter a ayudar ofisyalmente a los almanes, i los ke van a pagarlo lo mas karo van a ser los djudyos.
Son los fransezes ke van azer los aferramyentos de djudyos en 1941, i eyos tambyen ke los van a meter en kampos fransezes. En Paris uvo en 1941 tres aferramyentos de masa de djudyos : el primer el 14 de mayo 1941 : 3.710 ombres ; el sigundo entre el 20 i el 25 de agosto 1941 : 4.232 ombres, entre eyos munchos djudeo-espanyoles aferrados en el onzen arrondissement, en la male yamada « la chika Turkiya ». Eyos fueron los primeros djudyos yevados en Drancy. Entre eyos tambyen 1.500 fransezes inkluyendo 40 avokatos, entre eyos el avokato i senador Pierre Masse, sovre el kual ya ize una emisyon el 8 de avril 2010. El treser aferramyento de masa en Paris aharvo a 743 djudyos, lo mas fransezes, otros avokatos, ombres politikos, ets.
Estos todos aferramyentos de 1941 son solo de ombres. Las mujeres i las kriaturas no se pensan ser en sekana. I estos ombres son en Fransya, en kampos guadrados por los Fransezes.
Las kozas van a trokar en 1942. Los prezoneros de los kampos empesan de ser, en trenos en jeneral de 1.000 ombres a kada vez, deportados verso una destinasyon deskonosida, ke oy savemos ke fue por la mayoriya el kampo de Auschwitz. El primer treno es embiyado el 27 de marso 1942, i el sigundo el 6 de junyo. En el treser, por la primera vez, 66 mujeres en un treno kon 934 ombres. Esto amostra ke syertas mujeres aviyan sido aferradas aki i aya, i ke no solo fueron aferradas, ama tambyen deportadas.
Ama esto no se saviya tanto, i mismo en 1942, las mujeres i indimas las kriaturas se kreiyan sin sekana de aferramyento i deportasyon.
Ama, komo ya lo savesh, los 16 i 17 de julyo 1942 va empesar en Paris el mas grande i famozo aferramyento de masa, ke va tokar 12.884 personas, entre las kualas 3.031 ombres, 5.802 mujeres, i 4.051 kriaturas. Mas mujeres i kriaturas ke ombres, porke los ombres sea ya aviyan sido aferrados de antes, sea ya se aviyan eskondido ama solos, no pensando ke sus mujeres i kriaturas eran tambyen en sekana. Los mas de los aferrados son polonezos.
Un diya, puede ser, si tengo el koraje, vos azere una emisyon sovre este aferramyento yamado el aferramyento del Vel’ d’Hiv. Ama dainda este koraje no lo tengo. Ya me abasta de avlarvos agora de un otro aferramyento de masa, el de los djudyos gregos, lo mas selaniklis, en la noche del 4 al 5 de novyembre 1942.
El 4 de novyemre 1942 a las onze de la noche, los almanes demandan a la polisiya franseza de aferrar a la una de la noche, dunke en dos oras, a los djudyos gregos, ombres, mujeres i kriaturas.
Esta noche fue una de las mas trajikas ke tuvyeron los djudyos de Paris . Mas de 5.000 pulizes fransezes se echaron komo salvajes en las moradas de los djudyos gregos sorprendidos en medyo del suenyo. Los aferramyentos turan toda la noche, kon gritos, yorros, yamadas por ayudo…ama kyen puediya ayudar ? Unos djudyos kayen lokos. Mujeres paryendo, vyejos hazinos, syegos, son yevados, syertos kon sedyas, al karakol i de aya, poko tyempo despues, al kampo de Drancy.
Golpes, gritos, kavesas rompidas, kon una negrigura salvaje. Djente kaiya para no alevantarse mas. Los goim, espertados por los gritos, miravan por las ventanas i yoravan de ver en ke hal estavan sus vizinos, las kriaturas aharvadas i yevadas komo behemot, travadas en pijama de la kama, piezes desnudos en la entezador de novyembre.
David Sauleman, ke teniya diez anyos en 1942, eskrivyo kon su mujer Fanny sus rekodros en un livro ke tyene por titolo Deux mètres carrés (dos metros kuadrados, la superfisiya de la tomba ke no tuvyeron sus paryentes). En este livro mos konta lo ke fue para el esta noche de terror, ande fue espertado en supito por la boz de la kapidjiya anunsyando la vijita de la polisiya en su kaza, dos polizes orguyozos i abistrus, ke dyeron solo a su madre i a el unos pokos minutos para vestirse i emburujar unas kuantas kozas. No deshan a su madre ni de tomar de komer, ni mismo de aparejar un biberon para su ermaniko bebiko. Kon la entezador de la noche, estava titireando, sin saver asta oy si era mas del frio o del espanto.
Todos, por la mayoriya mujeres i kriaturas, son yevados al karakol ke se topava muy serka. I David Sauleman mos konta : « El dezorden provokado por los gritos de los pulizes, las keshas de los viejos ke no yegavan de suvir en los otobuses, los gritos de las madres i los yorros de las kriaturas muertas de sar, por las validjas ke kada djudyo teniya de yevarse, aziyan una meskla de tou vavou i de lokura. »
Mos konta los pulizes « borrachos de krueldad », gritando i aharvando kon punyos i bastones a vyejos i mujeres para azerlos korrer mas presto, las validjas mal serradas avriendosen en medyo de la kaye, la djente en kamiza de noche o en pijamas. Komo dize David Sauleman, estos fransezes no teniyan nada mas de ambezar de los nazis por lo ke es de la krueldad.
Si David mos puede kontar esto oy, es porke su madre, en el momento de suvir en el otobus, metyo su bebiko en los brasos de David ke teniya diez anyos, i los arrepusho en supito verso una puerta de han, salvandoles la vida a los dos.
Kuando meldi esto, me akodri de lo ke mos aviya kontado el senyor Benshoan en el kal de la Roquette kuando resivimos el ijo del konsul espanyol Bernardo Rolland en novyembre 2008. Ansina konti en Ladinokomunita lo ke oyi de este ombre :
« En 1940, su padre se aviya ido a la gerra, deshando a su mujer solika kon dos ijikos. En1942, afillu kel marido se aviya batido por la Fransya, la polisiya franseza vino aferrar a su mujer i sus dos ijikos de 8 i 5 anyos. Los yevaron al karakol kon un alay de otros djudyos, echados en basho en este karakol demaziado chiko para tanta djentorya de «kriminales»: vyejos, mujeres, kriaturas… La madre belledeo ke la puerta del karakol se avriya i serrava syempre kon las idas i vinidas i disho a su ijo bohor (8 anyos), este Benshoan ke lo estava kontando: «Kuando la puerta se va avrir, toma tu ermaniko i fuidvos presto presto». Lo ke izyeron, i se eskondyeron al lado del karakol. Vyeron ayegar un otobus, i toda la djente fue echada en el otobus…»Vide mi madre kon eyos, i eya me vido tambyen; me izo una sonriza. Es la ultima vez ke vide mi madre. »
Tengamos un penseryo para estas dos madres, Sauleman i Benshoan, ke tuvyeron la ozadiya de azer un tal sakrifisyo, i ke se muryeron sin saver si finalmente, pudyeron o no salvar la vida de sus kriaturas.
En todo, la polisiya reusho 1.060 afferamyentos en esta sola noche, lo ke valyo a Bousquet los komplimentos del kapo SS Heinz Röthke por el ermozo lavoro ke aviya kumplido.
Los djudyos aferrados esta noche no van a kedar muncho tyempo en Drancy. Van a ser echados en un primer treno n°44 de 1.000 djudyos ke se va ir de Drancy el 9 de novyembre 1942. Sovre estos 1000, unos 900 eran de los gregos aferrados kuatro diyas antes. Solo 15 sovrebivyeron en 1945.
I esto no abasto : el 11 de novyembre, otros 745 djudyos se fueron por el treno n° 45, entre eyos unos 300 djudeo-espanyoles. Solo 2 sovrebivyeron.
Este anyo, selebramos el setenten aniversaryo de estos diyas de afrisyon. Serge Klarsfeld, el avokato istoryano prezidente de la asosyasyon ijos i ijas de deportados djudyos de Fransya, demando a muestra asosyasyon Muestros Dezaparesidos de selebrar kon eyos estos aniversaryos. I por esto, afillu si yo personalmente no tuve paryenté en los desmazalados de estos dos trenos, me fui kon mi mujer para partisipar a la meldadura de sus nombres, dizyendo tambyen la edad de las kriaturas.
El 9 me dyeron de meldar un alay de alkunyas Cohen, ama el 11 tuve de meldar alkunyas lehliyas kon s,z, y, k, i me esforsi de no bozdear estos nombres sagrados, ke son la sola koza ke kede de estos djudyos ke se fueron en umo.
Las seremoniyas fueron muy esmovyentes. Unos meldavan un nombre, dizyendo era mi padre, o mi papu, o mi bispapu.
Al kavo de las seremoniyas el haham Daniel Farhi disho un kaddish.
Este anyo 1942 fue el mas terrivle para los djudyos de Fransya. Sovre los 76.000 djudyos deportados, unos 44.000 lo fueron en este solo anyo 1942.
Despues fue mas yuch para la polisiya de aferrar a los djudyos porke se metyeron a eskondersen ande kristyanos askeados de ver lo ke se estava pasando. Mismo los papazim kristyanos petainistos disheron sus asko al governo franses, i a poko a poko la polisiya franseza desho los Almanes azer eyos mismos el suzyo lavoro. Esto dicho, yene uvo en 1943 i 1944 trenos ke se fueron de Drancy asta en agosto 1944.
La semana proksima, vo aprovar de avlarvos de kozas mas livyanas. Mi mujer lehliya ke se va en un atelye de konversasyon en yiddisch, me disho ke aya es proibido de avlar de la gerra i de la shoa, porke sino se avla solo de esto. 70 anyos se pasaron, ama esto keda en muestro puerpo komo una yaga avyerta. Mi ijo me dize : « biva mas en el prezente, desha un poko este pasado ». Ama komo azer ?
Al djueves ke vyene, si kyere el Dyo !
Edmond Cohen
