eSefarad Noticias del Mundo Sefaradi
Keridos amigos,
No vos puedo embiyar de antes, komo lo ago kada semana, el teksto de mi emisyon de djueves, porke no vo aparejar nada, syendo ke, para esta emisyon, vo azer una entrevista de mi amigo Alain de Toledo, prezidente de la asosyasyon Muestros Dezaparesidos, asosyasyon ke aune todas las asosyasyones djudeoespanyolas de Paris i ke tyene por eskopo de azer un livro memoryal sovre los djudeoespanyoles deportados, i tambyen los matados komo askeres, rezistantes, los ke muryeron en los kampos fransezes, ets.
Este lavoro, inspirado por lo ke izo Serge Klarsfeld sovre los djudyos de Fransya en jeneral, kyere dar la lus sovre lo ke sufriyeron los djudeoespanyoles en partikolar. Tanto fue grande la mayoriya de lehlis entre los deportados de Fransya ke lo ke no saven byen las kozas se kreen ke fueron todos lehlis. Ama en vedra, sovre unos 76.000 djudyos deportados de Fransya, unos 5.200 eran de los muestros, sovre todo gregos (selaniklis) ama tambyen djudyos de todas partes de lo ke aviya sido el imperyo osmanli, inkluyendo la repuvlika turka misma: turkos dichos no rekonosidos, i tambyen turkos dichos rekonosidos, ama ke no fueron protejados por la Turkiya antisemit de 1942, anyo del varlik vergisi, ke no fue solo un vergi, ama tambyen una deportasyon, organizada por el governo turko el mismo.
Sovre estos 5.200 djudeoespanyoles deportados, solo unos 300 sovrebivyeron.
El lavoro ya esta pronto de mas de la mitad, i si kyere el Dyo sera eskapado en djunyo, i el livro puvlikado al empesijo del otonyo de este anyo.
De esto todo vamos avlar djueves (en franses, porke Alain de Toledo entyende muestra lingua, ama se le teshe, komo a munchos, para avlarla).
Los ke son interesados, ke entyenden el franses i ke moran leshos de Paris podran yene oir la emisyon sovre internet, sea en direkto indose djuves 10 de marso a las 4 h 06 PM, ora de Fransya, sovre http://www.radioj.fr, aya abasta de klikar sovre Ecoutez Radio J en direct, sea en redifuzyon, indose sovre http://www.radioj.fr/node/55. Aya, es un poko mas entrafikado: tendresh ke ir sovre la rediduzyon del 10/03/2016, klikar, asperar (entre 1 i 4 minutos, depende no se de kualo) ke se karge, i meter el kursor a los 4 sinkenes de largura para toparse verso las 4 oras i 06.
Saludes a todos
Edmond Cohen Paris Fransya
