eSefarad Noticias del Mundo Sefaradi
Keridos amigos,
Esperando ke no enfasya esta istorya sin eskapasyon de la atadura de Itshak kontada i komentada en el Meam Loez, la mas grande ovra de muestra cultura djudeo-espanyola, vo kontinuar este djueves la meldadura ke ya empesi desde unas kuantas semanas. Esta vez va ser mas kurto, porke syendo las eleksyones para el Konsistoryo de Paris, la radyo me va tomar de mi tyempo, i tendre, a lo ke me disheron, entre 12 i 15 minutos
El program se puede sintir por Internet kada djueves a las 4 H O6 PM, ora de Paris, indo al sityo RADIO – la fréquence juive. Kale tener pasensya i asperar un poko, no se oye pishin.
Saludos a todos!
Edmond Cohen
Paris, Fransya
MEAM LOEZ ATADURA DE ITSHAK – 5
Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Komo a kada vez vos anunsyo ke el proksimo atelye de konversasyon de la asosyasyon Vidas Largas se tendra el martes 3 de desyembre, de las dos i un kuarto asta las kuatro i medya-sinko, en el Centre Communautaire, 119 rue Lafayette Paris (10°). Metro Poissonnière o Gare du Nord.
Komo ya lo savesh, empesi aze tres semanas la meldadura de un pedaso bastante largo del Meam Loez en su komentaryo de la atadura de Itshak, meldadura ke me va tomar unas kuantas semanas.
Kuando vos deshi la semana pasada, me kortaron la palavra antes ke eskape mi emisyon por entero. Vos vo dunke meldar lo ke no pude dizir, i despues vo kontinuar mi meldadura, ke va ser mas kurta ke las otras, syendo ke, por modo de las eleksyones al Konsistoryo de Paris, esta emisyon va ser eya misma mas kurta. Empesaremos por lo ke no vos pude meldar el djueves pasado:
I (Avraham) tomo kon el a 2 sus muchachos Ishmael i Eliezer, i se fue kon eyos al lugar ke le disho el Santo Itbarah. El treser diya ke salyo Avraham, ke era diya de Rosh hashana, also Avraham a sus ojos i vido el lugar de leshos. I syendo vido una nuve eskura i demudada (estranya) mas ke resto de las nuves, ke estava embolvida i arrodeada dredor (al deredor) de la montanya, disho entre si: parese ke esta montanya es el lugar ke me disho el Dyo. Ma ainda no lo tuvo por siguro, ke puede ser algun mikre (azar). Por esto le demando a Itshak, dizyendo: Ijo miyo, ves tu lo ke yo veo? Disho Itshak: Si senyor. Torno i demando a los muchachos si vyeron algo; eyos disheron: no vimos nada. De esto prevo ke en akeya montanya deve de ser la akeda, ke por ser koza valutada no tuvyeron zehut (merito) de verla, ke si era mikre (por azar) ke abasho una nuve eskura deviyan de verla todos, syendo koza demudada (estranya).
Ansina se eskapava mi emisyon del djueves pasado. I agora kontinuo mi meldadura:
I ay kyen dize ke Avraham vido klaro ke la shehina estava ayi en dita montanya, i a ditos muchachos ke no atinaron nada les disho Avraham: Syendo ke el hamor no ve i tambyen vozotros no vistes, asentavos aki kon el hamor ke es guestro par igual . I asperavos aki, kuanto vamos yo kon Itshak aki serka, i mos enkorvaremos i boltaremos ande vozotros.
I el ruah akodesh (el Espiriritu Santo) le kavzo ke dishera i boltaremos, i no atino lo ke disho. Ke kuantas vezes avlan los tsadikim byervos kon la nevua (dono de profesiya) ke eyos propyos no saven lo ke dizen, asigun toparesh en la perasha de Beshalla, sovre el pasuk ke dize: Teviemo vetitaemo behar nahalatha (traerlos as – traeraslos – y plantarlos as en monte de tu heredad, Shemot, kapitulo 15, pasuk 17). ( Aki so ovligado de dar una eksplikasyon ke Khuli no da, tan la koza le parese evidente: este pasuk aze parte de lo ke kantaron Moshe i los ijos de Israel despues ke pasaron la Mar Kolorada i ke se serro sovte los Ejipsyanos. No dizen mos traeras i mos plantaras; porke ni Moshe ni la jenerasyon del dizyerto iran en el monte de sus eredad. Dizen los traeras i los plantaras, kijo dizir no mozotros ama los ke vendran despues de mozotros. Por tanto, dainda no lo saven, i azen profesiya sin saver ke lo azen. Syerro la paranteza).
I algunos dizen ke demudo la avla para enkuvrir la koza de los muchachos, ke no sepan lo ke kere azer. Ke se puede demudar la avla por darhei shalom (por kaminos de paz, para mantener la paz) asigun avizimos arriva en el kapitulo primero. Ma eyos ya lo entendyeron, i ansi se odreno pleito entre los dos; ke Ishmael diziya: agora va mi padre a degoyar a Itshak por korban, i syendo yo su ijo behor, sere yoresh (eredero de) su dinero. Le respondyo Eliezer dizyendo: Ya te echo de kaza i no te tyene por ijo. Pero yo ke so esklavo neeman (de konfyansa) suyo, ke lo servi de diya i de noche, a mi konvyene de eredarlo.
I tambyen se puede dizir ke penso Avraham de traer los guesos de Itshak para enterarlos, i por esto disho venashuva aleihem (i tornaremos a vos).
I apartandose de eyos, tomo Avraham dita lenya i la puzo ensima de Itshak; i la lumbre kon el kuchiyo de shehita tomo Avraham en su mano, ke syendo Itshak no saviya ainda para ke era akel viaje, i no le vino derecho a Avraham de dizirselo klaro ke lo va a degoyar, ke por esto lo kargo kon la lenya en su ombro para ke lo entyenda. I si tambyen para ke resiva tsaar ke syendo konosiya su hasidut no tuvo myedo kisas le refuzara su palavra. I ansi tan alegre estava Avraham komo si fuera a la boda de su ijo. I por esto dize el pasuk: Vayelhu shenehem yahadav (y anduvieron ambos a una). Ke es avizo ke asigun no teniya Itshak ningun tsaar por no saver ke es el metsiut (kavzo ), lo mizmo Avraham no teniya ninguna mofina (pena). Le demando Itshak a Avraham su padre dizyendo: Sinyor, aki veo lumbre i lenya, i aonde esta el karnero para korban? Kere dizir syendo tuvistes kargo de trayer lenya aun ke se topa muncho en la montanya, porke no trushistes karnero ke es koza ke no se topa en kual kyer lugar? Le disho Avraham El Dyo Baruh hu (Bendicho el) amostrara el karnero por alsasyon, mi ijo. Kere dizir ke si no avra karnero seras tu por alsasyon.
I ay kyen dize ke el taam (la razon) es ke syendo Itshak era mansevo i kaminava koryendo, lo kual Avraham, ke era vyejo, i su kaminar era devegar i no pudiya alkansarlo, por esto lo kargo kon la lenya para ke no pudyera korrer syendo estava kargado. I kon esto kaminavan los dos djuntos, i esto es lo ke dize el pasuk Vayelhu shenehem yahadav (y anduvieron ambos a una).
Le respondyo Avraham dizyendo hinneni beni (He mi, mi ijo).Kere dizir adraba (djusto al kontraryo) kon esto prevaran ke tu eres mi ijo; ke si fueras vinido de Avimeleh, syerto ke yo no akometiya de ayegarte por korban delantre del Santo Itbarah; ke afillu si tyene el karnero alguna makula chika es pasul (impropyo) para korban; kuanta mas kuando se endjendro kon avera (pekado) has veshalom. De ke vyene a ser ke kon azer el komando del Santo Itbarah ke me disho ke te degolye, kon esto konoseran todo el mundo ke tu eres mi ijo, i este es lo ke dize Hinneni beni (Heme, mi ijo) Kere dizir yo esto pronto de azer el komando del Santo Itbarah, i kon esto gano otra koza ke lo ternan (tendran) la djente por siguro ke tu eres mi ijo. I lo ke dize el pasuk Vayomer Itshak el Avraham aviv, vayomer avi vayomer hinneni beni (Y dixo Yshac a Abraham su padre, y dixo: mi padre. Y dixo; heme mi ijo) ansi es su deklaro (komentaryo) ke ya avizimos arriva: ke la mala djente dizen ke de Avimeleh se kedo meuberet (prenyada) Sara, agora le pezava a Itshak por lo ke lo keriya degoyar, i su tsaar era muncho, dizyendo agora asertaran la djente en akel lashon hara (mal avlar) vyendo ke Avraham me degoyo kon su mano i ternan (tendran) ke dizir: syerto ke es verdad akeya fama ke salyo por el mundo; ke si Avraham era su padre, no teniya korason de degoyarlo, ke ningun padre akomete maldad a su ijo, i esto es lo ke dize vayomer avi (Y dixo: mi padre) . Kere dizir es razon ke desh a entender a la djente ke vos sosh mi padre i yo so guestro ijo. Ma azyendo lo ke pensash, no avra presona ken krea ke vos sosh mi padre, i syerto ke no me peza por lo ke me matash, syendo ansi es la veluntad del Santo Itbarah, sino lo ke me peza es por la mala djente ke meteran hotam (meteran firma, tomaran por lira syen) en akel lashon hara (mal avlar) viendo ke me degoyash kon guestra mano.
I estando kaminando se le aparesyo el Satan delantre de Avraham, komo un ombre vyejo, i le demando: Onde vas, Avraham? – Aki vo a dizir tefila. – Si era esto, ke hehreah (menester) tyenes de yevar lenya i lumbre i kuchiyo? – Kisas nos deternemos (detendremos) un diya o dos, por esto es bueno tener todo el aparejo ke se tyene de menester para komer.
Disho el vyejo: A mi me enganyas, pensas ke so algun bovo. I avriyo su boka i le disho estas propyas avlas:
Kualo disho el Satan a Avraham? Esto es lo ke savresh al djueves ke vyene, si kyere el Dyo!
Edmond Cohen
