Muestra lingua: LOS DJUDYOS DE ALGERIA por Edmond Cohen

Keridos amigos, aki toparash el teksto de la emisyon de esta semanada.

El program se puede sintir por Internet kada djueves a las 4 H O6 PM, ora de Paris, indo al sityo  RADIO – la fréquence juive. Kale tener pasensya i asperar un poko, no se oye pishin.

Saludos a todos
Edmond Cohen
Paris, Fransya

LOS DJUDYOS DE ALGERIA 

Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.

Komo kada semana, vos akodro ke el proksimo atelye de konversasyon de la asosyasyon Vidas Largas se tendra el martes 8 de janvier, de las dos i un kuarto asta las sinko, en el Centre Communautaire, 119 rue Lafayette, Paris (10°) métro Poissonnière o Gare du Nord.

I agora dos byervos en franses para un anunsyo:

Le dimanche 13 janvier à 14 h 30, l’Amicale des Anciens et sympathisants de l’OSE – je pense que je n’ai pas besoin de vous rappeler ce qu’est l’OSE, Œuvre de Secours aux enfants à laquelle j’ai consacré toute une émission il y a juste un an – organise au Théâtre de Neuilly167 avenue du Général de Gaulle à Neuilly, un Yiddish Festival avec la chanteuse et danseuse Isabelle Georges et le Sirba Octet, sous le parrainage de Stéphane Freiss. Le prix des places est compris entre 20 et 80 €. Les gens intéressés peuvent téléphoner pour réserver en appelant le 01 53 38 20 09.

Agora es tyempo de empesar mi emisyon de oy, avlandovos de los djudyos de Algeria,  ke en vedra biven agora en mayoriya en Fransya, ama ke tyenen en Algeria una istorya de unos 2.000 anyos.

En vedra no se save de manera sigura de kuando vinyeron djudyos en Algeria ama lo ke es siguro, es ke munchos vinyeron kon los Romanos. Se topan kales, tombas, i otras provas arkeolojikas, sin avlar de los eskritos de los kristyanos de estos tyempos, komo San Augustin o San Jerome, el ke traslado el Tanah del ebreo (i no del grego, lo ke no plaziya a San Augustin) al latino, lo ke se yamo la Vulgata.

No me vo muncho apesgar sovre esta epoka porke mos intéressa mas la prezensya de djudyos en Algeria para luchar kontra los arabos kuando ayegaron en los anyos 650. Lo ke parese es ke munchos berberos se aviyan echo djudyos. Es el famozo istoryano arabo Ibn Khaldun el mismo ke lo dize. La mas famoza kapo de gerra de los berberos ke afrentaron a los arabos konkistadores fue Dihya, yamada la Kahina. Munchos pensan ke era djudiya, afillu si no es koza sigura.

De toda manera, malgrado la rezistensya de los berberos, ke sean kristyanos, djudyos o paganos, lo ke savemos es ke son los arabos ke eskaparon por ganar esta gerra, i konvertir de fuersa a la mayoriya de los moradores de Algeria al islam. Ama, komo syempre, los djudyos kedaron djudyos en medyo de los muzulmanos.

En una rejyon del Sahara, al sur de Algeria, yamada Tuat, parese ke uvo djudyos desde los anyos 130, del tyempo ande los Romanos izyeron sal i siniza a la Djudea. Los djudyos tuvyeron un kal en la sivdad de Tamentit. Kedaron aya durante toda la Edad Medya, ama tuvyeron de fuir despues. Son sus desendyentes ke tyenen la alkunya Touati o Touitou.

Durante toda la Edad Medya araba, ay djudyos en kaji todas las sivdades de Algeria. Tyenen libertad de relijyon, ama kon la kondisyon de kedarse basho los muzulmanes en tanto ke dhimmis. Kon esta kondisyon kedan mas o menos kyetos, astal siglo 12 ande vyenen los Almohades. Ya vos avli de estos fanatikos kuando vos avli de los djudyos de Espanya, syendo ke los Almohades konkistaron tambyen la Andaluziya. Es en este tyempo, por egzemplo, ke Rambam tuvo de fuirse de su morada en Cordoba para ir a bivir en Fes en el Maroko, i despues en Fostat, serka del Kairo, en Aifton.

Los Almohades tyenen una politika de konversyon por fuersa, i es una epoka terrivle para los djudyos de Algeria, ke deven o kedarse djudyos a eskondidas, o fuir komo Rambam.

La situasyon se va amahar en el siglo 13, de una parte porke los Almohades se van a azer menos duros, i de otra parte porke van a ser eyos mismos  echados en basho.

A la kontra, son los djudyos de otras vandas ke van a venir refujyarse en Algeria para fuir las persekusyones kristyanas, i sovre todo los djudyos de Espanya, despues de las matansinas de 1391 i la ekspulsyon de 1492. De la misma manera ke los djudyos espanyoles se mesklaron kon los Romanyotes en el Imperyo osmanli, los djudyos espanyoles se mesklaron kon los djudyos de Algeria, kon esta diferensya ke en el Imperyo osmanli los romanyotes se metyeron a avlar en espanyol, kuando en Algeria los espanyoles se olvidaron la lingua espanyola, lo ke no izyeron los djudyos espanyoles en el Maroko.

De otra parte, si estos espanyoles se olvidan la lingua, no se olvidan la liturjiya dicha sefaradita – el byervo ebreo para dizir espanyola – i son los djudyos de Algeria ke van a adoptar asta oy la liturjiya sefaradita. Los djudyos de Algeria no son sefaradim komo mozotros por la lingua, ama son sefaradim komo mozotros por la liturjiya.

Son hahamim venidos de Espanya ke van  a toparse a la kavesa de las komunidades de Alger, Constantine o Tlemcen.

Kon la venida del poder osmanli en el siglo 17 pokas kozas trokan para los djudyos. A parte de unos kuantos rikos merkaderes venidos de Evropa (Livourne) el kusur de la povlasyon djudiya es muy prove.

Los djudyos en jeneral biven en armoniya kon los muzulmanos. Ama es una armoniya ke konose varyas eksepsyones. De vez en kuando, ay un pogrom kon matansina de djudyos. En 1805, el consul de Fransya salva a 200 djudyos de matansinas en Alger. El kapo de la komunidad de Alger es matado. Diez anyos mas despues, es al haham bashi de Alger ke le kortan la kavesa.

Del tyempo de la Revolusyon, dos merkaderes djudyos, Bacri i Busnach, orijinaryos de Livourne, tyenen buenas relasyones kon el Rey de Alger. Emprestan paras al Rey de Alger, lo ke les permite de vender trigo a las armadas fransezas del Directoire en 1795 i 1796. Ama nunka van a ser pagados, salvo un poko en la Restaurasyon. El Rey de Alger kyere sus paras atras, ke Bacri i Busnach no le pueden pagar, syendo ke eyos mismos no son pagados por la Fransya. Este echo va surear unos trenta anyos, asta ke el Rey de Alger se inyerve i da al Consul de Fransya, en 1827, un golpe de abaniko. Por pizma de esta injurya la Fransya konkisto la Algeria en 1830.

En 1811, sovre orden del Dey de Alger, no es un golpe de abaniko ke aviya aharvado al Consul de Fransya. Le kortaron la kavesa, sin ke la Fransya, governada por Napoleon, ke por tanto no era ombre kolay, se arravye mas ke esto. Una kortadura de kavesa, nada. Un golpe de abaniko, la gerra. Es vedra ke el Konsul kon  la kavesa kortada era un djudyo de Algeria yamado Bacri, i el Konsul chapteado por el abaniko un kristyano de Fransya yamado Deval…

De toda manera, es vedra ke, ofisyalmente, la konkista de la Algeria por la Fransya tyene su orijen en un echo kon dos merkaderes djudyos.

Tengo de avlarvos agora de la sivdad de Oran, porke su kavzo es diferente de las otras sivdades de Algeria, syendo ke a sido okupada por los Espanyoles kristyanos, de 1509 asta 1708. Al empesijo, los djudyos se pueden kedar en la sivdad, ama por eskapar son echados afuera en 1609. Un siglo despues, en 1708, los Osmanlis toman a Oran i los djudyos pueden venir de muevo, ama esto tura poko tyempo (24 anyos) porke yene vyenen los Espanyoles en 1732 i se van los djudyos, asta 1792, kuando los Osmanlis vyenen de muevo en Oran. Vyenen los Osmanlis, i vyenen los djudyos. Kuando oygo, estos tyempos, los kristyanos dizir ke el Islam es intolerante (kale entender a la diferensya del muy tolerante katolisismo) me parese ke las kozas son mas komplikadas… i ke, komo se dize en franses, mijor es barrir delantre su puerta.

Kon la venida de los fransezes en 1830, los djudyos no son mas dhimmis i tyenen los mimos derechos ke los fransezes.  Basho los Osmanlis, los djudyos eran djuzgados por tribunales djudyos si el echo era entre djudyos, i tribunales muzulmanes si el echo se pasava kontra un muzulmano. Agora son tribunales fransezes ke djuzgan, ama si el echo es entre dos djudyos, es djuzgado asigun la ley djudiya, kon el ayudo de un haham.

Los chikos se van en las eskolas fransezas.

Vyendo esto, el Govyerno fransez dechida el 24 de oktovre 1870 de dar la nasyonalidad franseza a los djudyos de Algeria. Es lo ke se yama el décret Crémieux. Crémieux keriya dar tambyen la nasyonalidad franseza a los muzulmanes, ama los militares fransezes i los fransezes venidos kolonizar no kyeren, i solo los Djudyos son echos fransezes, lo ke va dar selo a los Muzulmanos.

Los djudyos de Algeria se van a fransizar grasyas a las eskolas fransezas ( la Alliance Israélite Universelle no ve tanto ke tenga menester de intervenir, a la diferensya de lo ke aze en el Maroko o enTunisia). Azen el askerlik en la armada franseza. I sovre todo, son los djudyos de Fransya ke vyenen inkluir los djudyos de Algeria en el djudaismo franses. El Consistoryo se aze Consistoryo de Fransya i de Algeria. El haham bashi es Grand Rabbin de France et d’Algérie, ets.

Los djudyos, ke se vistiyan a la araba, agora, kijo dizir a partir de 1870, se visten a la evropea. No son travados por el syonismo, a la diferensya de los djudyos de Maroko o de Tunizia. Esto dicho, se kedan entre eyos i son mas relijyozos ke los djudyos de Fransya, ke azen mas kazamyentos mikstos, kijo dizir kon kristyanos.

Ama no kale pensar ke los fransezes de Algeria se tresalen de esta fransizasyon de los djudyos. Al kontraryo, el antisemitismo enflorese, al punto ke Drumont, el mas famozo de los antisemites por su livro La France juive, ke tendra 48 edisyones, vyene de Paris en Alger en 1898, en medyo de l’affaire Dreyfus, para prezentarse a la deputasyon en Alger., komo “antidjudyo” Es resivido por los fransezes de Algeria komo un gibor, i eligido komo deputado.

En toda la Algeria ay en esta epoka solevantamyentos antesimitos (kon munchos feridos i mismo muertos), no por los arabos, ama por los fransezes de Algeria, mismo si, por dizir la vedra, ay arabos ke se mesklan a los pogromes.

No tengo menester de dizir ke la venida del Mareshal Pétain al poder en 1940 no va enderechar las kozas para los djudyos. La primera koza ke aze Petain es, el 7 de octovre 1940, de abrogar el décret Crémieux. Los djudyos de Algeria no son mas fransezes. I todas las negriguras de Vichy kontra los djudyos de Fransya valen tambyen kontra los djudyos de Algeria, salvo ke no son aferrados komo en Fransya para ser dados a los Almanes. Esto dicho, si no son aferrados para ser dados a los Almanes, unos kuantos son yene aferrados para lavorar en kampos de lavor.

El 8 de novyembre 1942, 70% de los 400 rezistantes, komandados por José Aboulker, ke van a permeter a los Amerikanos de debarkar en Alger (operasyon Torch) son djudyos. Por lo tanto, ni Darlan, ni despues  el jeneral Giraud, van a tokar a la ley de Petain kontra los djudyos. Es solo kuando de Gaulle podra tomar el poder en Alger ke la ley kontra los djudyos va ser abrogada, i el décret Crémieux va entrar de muevo en vigor. I José Aboulker va ser echo Compagnon de la Liberasyon, la mas alta medaya franseza.

Kuando va empesar la Gerra de Algeria en 1954, los djudyos van a aprovar de kedarse afuera, ama no va ser posivle, i se van presto apersever ke no ay esperansa de kedar kon los arabos. En 1962, kaji todos los 150.000 djudyos se van en mismo tyempo ke los fransezes kristyanos, i kaji todos eskojen de venir a morar en Fransya. Pokos son los ke pensan irse en Israel. Oy no kedo kaji ni un djudyo en toda la Algeria, i los kales an sido transformados en meshkitas.

En Fransya, los djudyos de Algeria an traido kon eyos un ayre fresko de djudaismo, i eyos son ke inchen, kon los del Maroko i de Tuniziya, los kales fransezes. Sin eyos, me demando lo ke seriya el djudaismo fransez.

Al djueves ke vyene, si kyere el Dyo!

Edmond Cohen