eSefarad Noticias del Mundo Sefaradi
Keridos amigos, aki toparash el teksto de la emisyon de esta semanada.
El program se puede sintir por Internet kada djueves a las 4 H O6 PM, ora de Paris, indo al sityo RADIO – la fréquence juive. Kale tener pasensya i asperar un poko, no se oye pishin.
Aki toparesh el teksto de mi emisyon, ke va ser sovre la topada de Ruth i Boaz tal i komo esta kontada en ladino en la Biblia de Ferrara, kon un komentario de un pasuk solo por el Meam Loez.
Saludos a todos
Edmond Cohen
Paris, Fransya
LA TOPADA DE RUTH I BOAZ
Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Komo a kada vez, vos akodro ke el proksimo atelye de konversasyon de la Asosyasyon Vidas Largas se tendra el martes 19 de junyo, de las dos i medya asta las sinko, al muevo adereso del 17 rue Pierre Semard Paris (9°), arriva del Square Montholon, métro Cadet. La entrada es la del lokal i no la del han.
Oy pensi de avlarvos de la topada de Ruth i de Boaz, tal i komo esta kontada en el Tanah i komentada en el Meam Loez por Rafael Isaac Meir Benveniste en 1882.
Vos akodro ke Ruth es la ermuera de Naomi. Son bivdas las dos. Ruth es ajena, Moabita, ama se keda kon su suegra, dizyendole: tu puevlo mi puevlo i tu Dyo mi Dyo.
Agora meldaremos el Tanah, Livro de Ruth, kapitulo 2.
Primer pasuk (traduksyon en ladino de la Biblia de Ferrara (1553):
Y a Nahomi, pariente de su marido, varon barragan de fonsado, de linage de Elimelech, y su nombre Boaz.
En el teksto ebreo no ay verbo, dunke en ladino tampoko.
Dos kuestyones. Primera kuestyon: Syendo ke Elimeleh era el marido de Naomi ke se muryo, deke dizir dos vezes ke Booz era pariente de su marido i de linage de Elimeleh, lo ke es la mizma koza?
A mi me parese ke la repuesta vyene de los byervos ebreos ke no son los mismos. Elimeleh era de la mishpaha, la famiya, de Elimeleh, el marido de Naomi. Ama era tambyen mida, o muda, ke no es paryente ama persona konosida, de la rais ledaat, saver, konoser, de este marido. Esto kyere dizir, asigun mi, ke uno puede ser de la misma mishpaha ke alguno, ama por lo tanto no se konosen i no son amigos. Ama se puede a la rovez muy byen konoser i ser amigo kon un paryente, no es la misma koza, i por esto es, asigun mi, ke el tanah lo dize de dos maneras diferentes. No solo Booz era paryente de Elimeleh, ama tambyen se konosiyan. Chouraqui, en vez de trasladar muda por paryente, lo traslada por connaissance (konosensya) i a mi me parese mijor.
La biblia del Rabinato va mas leshos: traslada Naomi se connaissait un parent de son mari (se konosiya un paryente de su marido) komo si era eya ke lo konosiya. No es lo ke dize el tanah. El tanah dize solo: A Naomi (aviya) mida leishah, konosensiya de su ombre (marido). Aki el teksto ebreo ni dize ke era konosido de Naomi, ni dize ke era paryente de su marido. Solo mos dize ke era konosido de su marido. Es solo despues ke mos dize ke era de su mishpaha.
Sigunda kuestyon: Ke kyere dizir varon barragan de fonsado? En ebreo, es ish gibor hail.Varon es el byervo ladino para el ebreo ish, es un ombre. Barragan es el ladino por el ebreo gibor. En franses se diriya héros, ombre novle, alto, fuerte. Fonsado es el ladino para el ebreo hail, ke topamos al kavo de los proverbos de Shelomo: eshet hail, ke se traslada en jeneral por mujer valyente. La Biblia de Ferrara la yama muger de fonsado. Kualo es hail en lashon? Es un byervo ke tyene munchos sentidos: puede ser koraje, puede ser rikeza, puede ser reushita, puede ser armada, rais de hayal, asker. El ladino eskojo fonsado, vyejo byervo ke parese venir de Leon o Aragon, i ke kyere dizir armada.
Kon tantos sentidos para un mismo byervo, no kale enkantarse si unos traduktores en franses eskojen tal sentido i otros tal otro.
Biblia del Rabinato: un homme considérable par sa richesse (un ombre muy importante por su rikeza).
Chouraqui: un homme, un héros de valeur (un ombre, un gibor de valor)
Second (protestanto): un homme puissant et riche (un ombre poderozo i riko)
Jerusalem (katoliko): un homme de condition (un ombre de kondisyon)
Mas serka de las raises, la Biblia de Ferrara aze de este ish gibor hail un varon barragan de fonsado, ke se puedriya meldar un ombre gibor de armada. Ama kuando Shelomo avla de la eshet hail, es siguro ke hail no tyene en este kavzo el sentido de armada, afillu si el ladino, ke guadra syempre el mismo byervo para trasladar un byervo ebreo kual ke sea su sentido, mantenga muger de fonsado, komo si era mujer de armada. Mijor seriya me parese, de trasladar aki hail por koraje. Eshet hail: mujer de koraje. Ama en kuanto a Booz, no es tan siguro ke hail tenga el mismo sentido ke para la mujer. En ebreo, ben hail es un gerrero. Indimas, asigun mi, gibor hail. Para mi gibor hail puedriya ser un eroe de armada, lo ke no impide ke sea tambyen un ombre fuerte (gibor) por su rikeza (hail). Vos desho eskojer.
Agora me vo direktamente al pasuk 4, porke si me tomo un kuarto de ora para kada pasuk, ya se va eskapar la emisyon sin ke ayege a la topada de Ruth kon Booz…
He Boaz vinyendo de Beth Lehem, i dixo a los segadores: Adonay kon vos. Y dixeron a el: bendigate Adonay.
Esto no vos akodra nada? Son los byervos ke se dizen kuando uno se suve a la teva para la meldadura de la perasha. El ke suve empesa por dizir Adonay imahem, el Dyo le sea kon vos. Il el haham le responde Yevaraheha Adonay: el Dyo ke te bendiga.
Agora meldaremos kualo eskrive Benveniste en el Meam Loez a propozito de este pasuk. Lo travi de la trasliterasyon en karakteres latinos ke izo Michael Molho en su livro Literatura sefardita de Oriente, koeditada por la Alliiance Israélite Universelle i La Lettre Sépharade.
Agora es Benveniste ke avla:
Para esto savras ke el pasuk mos esta dizyendo la grande ashgaha (vijilansya divina) de el Dyo Baruh u ke uvo en este echo de Boaz kon Rut, ke puediya ser ke Boaz no iva en el mismo dia ke Rut vino en el kampo, enrriva de todo esto, por ser ke la koza era de los syelos a ke se izyera este kazamyento, el Dyo Baruh u le mityo en el korason de Boaz a ke fuera en akel diya en el kampo, i esto es lo ke dize ve hinne Boaz ba, ke supeto ek vino Boaz, i lo ke mos disho el pasuk ke Boaz les dyo shalom a los kortadores es, sigun te tuve avizado, ke syendo Boaz en akel diya se alevanto de los syete diyas de avelut (luto) de su mujer, i ke la ley es ke el demande en la paz de los otros i otros no demanden en su paz, a esta razon fue menesterozo de empesar el i dar a eyos shalom emprimero i despues le dieron eyos; si tambyen por dar un kastigeryo a la persona a ke embeze a sus echos de Boaz, ke akel ombre ke tyene sirvidores o travajadores es menester de azer la regla i la ombriya de darles shalom, sovre ke el amo sera muncho estimado, enrriva de esto es menester de darles shalom. I lo embezamos de aki ke enrriva de los kortadores eran sus mosos, i de Boaz se estavan mantinyendo, enrriva de todo esto el dereh erets (el uzo de korteziya) es de akonantar a eyos shalom (akonantar es dar la prioridad, el ke akonanta es el ke pasa en primero) , syendo todos somos kriados de el Dyo Baruh u, sea riko, sea prove, sigun mos akavidaron nuestros sinyores hahamim: « Se akonantan en la paz de todo modo de persona », i disheron sovre Rabi Yohanan Ben Zakay ke era akonantan i dizyen shalom a todo modo de persona; i akel ombre ke le dan a el shalom i no responde, sovre el esta dicho: gezelat he-ani bevatehem: « rovo de el responder esta en guestras kazas », ke el byervo de ani es de lashon de anaya, ke es responder.
Aki yo Edmond Cohen, avro una chika paranteza para dar una eksplikasyon. En Yeshayau kapitulo 3, pasuk 14, esta eskrito lo ke oitesh: gezelat eani bevatehem. La koza arrovada al prove esta en vuestras kazas. Salvo ke si el byervo ani es prove, es vedra ke la rais vyene, o parese venir – no konosko bastante el ebreo para dizirlo – del byervo responder. I Benveniste djuga sovre el sentido de responder en vez de prove. El ke no responde al shalom, es komo si arrovava la repuesta. Syerro la paranteza, i kontinuaremos kon Benveniste.
I kuantas vezes akontese ke el prove da shalom a el riko, arrejistado (umilde, averguensado), kon boz basha, fin ke no le oye su boz, i el riko shishereado (byervo ke no vos puedo dar a entender porke no lo konosko) i pensando en sus echos i non le responde, o ke ya responde avagariko, i vyenen por sospecharlo i avlan de el lo ke non es de avlar.
Pero esto kuanto bueno es a ke akonante el riko para dar shalom a todo modo de persona kon facha allegre i kon avla klara, i ke demande por pas de todo modo de persona, ande mas a akel prove i dezeozo ke le diga a el: « Komo estas de la salud? Ke estas azyendo? I por grande mitsva se le konta, ke alegra el korason de akeyos disdichados, i onorar se onoran kon el; i kuanto muncho se engrandese la pena a kyen non sospecha para azer nahat ruah (plazer) a las kriansas, ande mas a los proves, en una koza ke non ay en eya mankura de moneda, si non solamente unas avlas, esto no es salvo ke malisya de korason, ke se vistyo kon el manto de la gaava (orguyo). Ma si (es) verdad ke non es el uzo de los chikos por dar shalom a los grandes, lo mizmo tambyen no es el uzo de los grandes de dar shalom a los chikos muncho, ke son menesterozos a uzar partida de silsul (grandeza), porke sea su temor echada sovre las kriansas; i mas, ke una koza ke non es regla de el mundo es fea la koza en ojos de todo el ke ve. Ma para resto de todo modo de persona es menesterozo a ke akonante i ke diga shalom. I es menester kuando da shalom ke sea su boka i su korason iguales, i non sea de akeya djente ke esta dicho por eyos: « Kon su boka avla de pas, i de dyentro de su korason va bushkando por aseladarlo (azerlo kaer para aferrarlo) », ke estonses se entropeza ke es gonev daat a beriot (arrovador de la konosensya de las kriansas, kijo dizir enganyador). Ke ansi lo bueno ke es de dar shalom a todo modo de djente, i ke sea su boka i su korason igual, sigun lo vemos de aki en Boaz, ke el kual era un sinyor grande , kon todo esto les akonanto el a dar shalom a sus travajadores.
Ansina Benveniste eskapa su komentaryo de este pasuk.
Ya vitesh kuanto tyempo se tomo para una koza ke a mi nunka me paresyo importante: kyen saluda a kyen en primero. Benveniste, i antes de el los hahamim, pensaron ke la manera de avlar al prove es muy importante, i empesa por palavras amavles.
Kuando lavorava, mi mujer no soportava ke el direktor de la eskola ande eya era maestra, portanto haham el mismo, no le respondiya a su saludo. I yo me enkantava i le diziya: a ti ke te sale si te saluda o si no te saluda? I eya me respondiya ke no soportava de toparse arrebashada por un ombre orguyozo sin dinguna razon de serlo.
Agora, despues de tener meldado Benveniste, entyendo mijor a mi mujer.
Esto dicho, aboltaremos agora al tanah, i veremos komo se va pasar la topada de Booz kon Rut. Booz demanda a su moso kyen es esta mujer i el moso le da a entender.
Pasuk 8: Y dixo Bohaz a Ruth: Si no oyes mi ija? No andes por coger en campo otro, y tambien no passes de aqui; y aqui te ayuntaras kon mis moças. Tus ojos en el campo que segaren, y andaras detras dellas; de cierto, encomendé a los mocos por no te tocar; y si uvieres sed, y andaras a los vasos, y beveras de lo ke apozaren los mocos. Y echose (Ruth) sovre sus fazes (panim, su kara) i encorvose a tierra, y dixo a el: por que fallé (topi) gracia en tus ojos para conoscerme, y yo estrangera? Y respondio Bohaz, y dixo a ella: denunciando fue denunciado a mi todo lo que feziste con tu suegra despues de morir tu marido, y dexaste tu padre y tu madre, y tierra de tu nascimiento, y anduviste a pueblo que no supiste de ayer tercero dia (de antiyer, manera de dizir ke konosiyas de muy poko). Pague Adonay tu obra, y sea tu precio perfecto de con Adonay, Dio de Ysrael, que veniste por abrigarte debaxo de sus alas. Y dixo (Ruth): fallaré gracias en tus ojos , mi senyor, porque me conortaste (me konsolates), y porque fablaste sobre coraçon de tu sierva, y yo no soy komo una de tus siervas. Y dixo a ella Bohaz: a hora de la comida, allegate a delante y comeras del pan, y entenyiras (untaras) tu pedaço en el vinagre. Y sentose de lado de los segadores, y dio a ella (trigo) tostado; y comio, y artose, y sobro. Y alevantose para coger, y encomendo Bohaz a sus moços, por dezir: aunque entre las gavillas coja, y no la avergoncedes ( en jeneral no se cojiya entre las gaviyas ( el trigo kortado i atado). Y tambien dexando dexaredes a ella de los manojos (esto kyere dizir: vaj a azer maksus de deshar en basho trigo ya atado, lo ke por siguro es mas ke la mitsva de deshar el trigo pedrido sin atar) y dexaredes y cogera, y no reprehendades en ella.
Me kedo aki de mi meldadura sovre la topada de Ruth la Moabita y Booz el barragan de fonsado, porke ya vino el tyempo de desharvos, keridos oyentes, dizyendovos al djueves ke vyene, si kyere el Dio!
Edmond Cohen
