Muestra lingua: LA MATANSINA DE MUNICH por Edmond Cohen

Keridos amigos,
Mi emisyon de radyo del djueves ke vyene va ser sovre la matansina ke se paso aze 41 anyos en Munich durante los djugos olimpikos.

El program se puede sintir por Internet kada djueves a las 4 H O6 PM, ora de Paris, indo al sityo  RADIO – la fréquence juive. Kale tener pasensya i asperar un poko, no se oye pishin.

Saludos a todos!
Edmond Cohen
Paris, Fransya

LA MATANSINA DE MUNICH

Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.

Despues de dos djueves sin emisyones por modo de las fiestas de Sukoth i Shemini Atsereth, me alegro de toparvos de muevo, keridos oyentes.

Ay unos 41 anyos de esto, se tuvo la matansina de los atletos djudyos en los djugos olimpikos de Munich, i pensi ke seriya byen de avlarvos un poko de todo lo ke se paso en estos diyas pretos.

Kale akodrarse ke, el 30 de mayo 1972, tres terroristos japonezes lavorando para el FPLP kometyeron un atentato en el aeropuerto Ben Gurion de Lod i mataron a 26 personas, lo mas pelegrinos venidos de Porto-Rico.

Dunke ya se saviya, kuando se tuvyeron a la fin de agosto de este mismo anyo 1972, los djugos olimpikos en Munich en Almanya, ke kaliya tener muncho dikat (tino) kon los terroristos verso los israelyanos venidos partisipar a estos djugos.

La polisiya almana saviya ke un Palestinyano yamado abou Daoud i un nazi yamado Willi Pohl, se enkontravan regularmente, i pensava ke estavan preparando un atentato.

Halbuki, asigun lo ke oyi, la delegasyon israelyana a los djugos olimpikos de Munich no resivyo dinguna proteksyon de la polisiya almana, i le dyeron un sityo muy kolay de atakar. Lo ke es siguro, es ke despues de unos diez diyas de djugos, kijo dizir el 5 de septyembre 1972 verso las 4 i medya de la manyana, dunke en medyo de la noche, los atletos ombres estan durmyendo en sus kamas kuando ayegan ocho terroristos palestinyanos de la organizasyon Septyembre preto.

Kale saver ke si la matansina de Lod, en mayo, fue organizada por el FPLP dirijido por Georges Habache, la operasyon organizada por Septyembre preto veniya de otra vanda, el Fatah, kijo dizir Yasser Arafat i Mahmud Abbas. Es Mahmud Abbas, aktual prezidente de la Otoridad palestinyana, ke pago la organizasyon de este atentato, asigun lo ke disho mas tadre Abou Daoud el mismo, el organizador del atentato.

Uno de los Israelyanos, Yosef Gutfreund, 40 anyos, arbitro de lucha, se esperta, entyende pishin lo ke se esta pasando, i se mete a la puerta para aprovar de impedir a los terroristos de entrar i grita: «Dikat! Terroristos!» Esto va dar a su kompanyero de kamareta, Tuvia Sokolovsky, coach de alteras, el tyempo de fuir en saltando por una ventana despues de romperla.

Ayega Moshe Weinberg, 32 anyos, coach de lucha, ke aprova de luchar. Los terroristos le travan un kurshum en la kara, el kontinua de luchar, lo ke da a un otro atleto, Gad Tsobari, el tyempo de fuirse. Esta vez los terroristos matan al korajozo Weinberg. Un otro atleto, Yosef Romano (ke deviya ser, asigun su alkunya, uno de los muestros) 32 anyos, alterofilo, toma un kuchiyo para fruta i kon esto se echa sovre un terroristo i lo fire, antes de ser matado el tambyen.

A la fin, los palestinyanos, ke ya mataron a dos israelyanos, Moshe Weinberg i Yosef Romano, toman mueve israelyanos komo rehenes. Estos mueve son: Yosef Gutfreund, el primero ke grito, 40 anyos, arbitro de lucha, komo vos dishe, i tambyen Kehat Shorr, 53 anyos, coach de travar fuego, Amitsur Shapira, 40 anyos, coach de atletismo, André Spitzer, 27 anyos, coach de espada, Yaacov Springer, 50 anyos, coach de alteras, Eliezer Halfin, 24 anyos, luchador, i Mark Slavin, 18 anyos, luchador tambyen, enfin David Berger i Zeev Friedman, 28 anyos los dos, alterofilos los dos. Los otros ombres de la delegasyon israelyana reushen de eskabuyirse. Las mujeres, morando un poko mas leshos, no son tokadas.

A las sinko i ocho, los terroristos azen saver a la polisiya almana ke kyeren la liberasyon de 234 palestinyanos detenidos en Israel, i mas Andreas Baader i Ulrike Meinhof, los kapos de la Rote Armee Fraktion (Pedaso de la armada korolada) mas konosida komo la banda de Baader, detenidos en Almanya. Kale akodrar ke Baader aviya sido aferrado en avril 1970, ke se aviya fuyido un mes despues, i ke fue aferrado de muevo en junyo 1972, tres mezes dunke antes del atentato de Munich.

Los terroristos adjustan ke si no obtyenen lo ke demandan, van a matar los rehenes uno despues de otro, empesando a las mueve de la demanyana. Golda Meir, primo ministro de Israel, metida al koryente, aze pishin saver ke no va negosyar. La repuesta de los terroristos, para amostrar ke eyos tampoko no van a trokar de idea, es de echar por la ventana el puerpo del desmazalado i korajozo Moshe Weinberg.

Los Almanes ofresen paras a los terroristos, ama eyos refuzan, dizyendo ke no son las paras ke los interesan. Yene, achetan sinko vezes de alargar el tyempo del ultimatum. A las sinko de la mediodiya los terroristos demandan un avyon para irse al Cayro kon los rehenes. Los Almanes demandan de avlar kon los rehenes para saver si dainda biven. Spitzer i Shorr, ke saven avlar alman, vyenen a la ventana i avlan un poko, menasados por los tufenkes de los terroristos, ke aharvan a Spitzer porke avlo de maziya.

Los israelyanos embiyan en Almanya al kapo del Mosad, Zvi Zamir, para ver lo ke se puede azer. Moshe Dayan, ministro de la Defensa, pensava venir kon el ama se supo i se espanto ke su venida aga la situasyon peor, dunke Dayan se keda en Israel. De toda manera, Zamir es resivido por los Almanes kon muncho desplazer, i no tyene dingun derecho sino mirar lo ke azen los Almanes.

Hans-Dietrich Genscher, ministro de la Defensa, i Walter Tröger, mayor del kazal olimpiko, son otorizados por los terroristos a ver los rehenes. Ven ke unos kuantos an sido aharvados i ke Berger resivyo un kurshum en el ombro. Sovre todo, miran kuantos son los terroristos, i kontan entre kuatro i sinko. En vedra, eran ocho, ama esto los Almanes no lo saven. Van a pensar ke no son mas de sinko.

Los terroristos obtyenen un otobus para irsen kon los rehenes asta dos elikopteros ke los van a yevar al aeropuerto militar del OTAN serka de Munich, ande los aspera un Boeing de la Luftansa. Los almaanes metyeron, en vez de pilotos, sinko pulizes armados vestidos de pilotos. La polisiya almana pensa ke no es posivle atakar a los terroristos ni en la kaza olimpika, ni en el otobus, ni entre el otobus i los elikopteros. Kale asperar ke se topen en el aeropuerto, i atakarlos entre los elikopteros i el avyon.

Salvo ke entremyentres la noche ya kayo, ke los polizes almanes no tyenen tufenkes, solo revolveres, no tyenen antojos para ver de noche, ni tyenen radyo para avlarse entre eyos, ni djaketas anti kurshumes, ni ay dinguna araba blindada pronta. El desmazalado de Zamir, kapo del Mosad, vyendo esto, se aranka los kaveyos, ama no puede azer nada.

I en esto todo los Almanes pensan luchar kontra sinko ombres kuando en vedra son ocho…

Kuando ven ke los Palestinyanos son ocho i no sinko, los polizes del Boeing, sin orden de sus kapos, deshan su misyon i se van, deshando solo en el aeropuerto a sinko snipers almanes armados solo de revolveres.

A las diez i medya de la noche los elikopteros ayegan al aeropuerto, kon kuatro rehenes en el uno i sinko en el otro. Dos palestinyanos se kedan en los elikopteros, para menasar los rehenes i los pilotos de elikoptero. Kale dizir ke los rehenes son atados el uno al otro. Oyi una vez a la televizyon ke ya aviyan empesado a dezazer sus kuedras, ama malorozamente ya era demaziya tadre, i no tuvyeron tyempo de fuirse.

Lo ke se paso despues es yuch (difisil) de saver porke lo ke meldi son kozas diferentes. Ama lo ke es siguro es ke nada fue echo kon preparasyon.

Los pulizes travaron i mataron a dos terroristos. Los otros korrieron refujyarse en los elikopteros. Kuando, despues de una ora, vinyeron enfin las arabas blindadas, los terroristos salyeron de los elikopteros: uno empeso por travar sovre los kuatro israelyanos de su elikoptero, matando a Springer, Halfin i Friedman, i firyendo a Berger. Despues echo una granada sovre el elikoptero, kemando a todos. El piloto alman del elikoptero, afillu kemado, se pudo fuir i kedo 20 minutos en basho sin ke dinguno se okupe de el.

En el otro elikoptero, el palestinyano mato a los sinko otros israelyanos, Gutfreund, Schorr, Slavin, Spitzer i Shapira.

La polisiya, en todo, mata a sinko de los palestinyanos i aferra a los tres otros, ke son dos ermanos: Jamal i Adnan Al Gashey, i el treser Mohammed Safady. Los pulises tyenen tambyen uno de eyos, matado sea por los palestinyanos, sea, por yerro, por los Almanes mismo.

Por siguro estos tres palestinyanos son metidos en prezo, i malgrado la demanda de Israel, ke aze aboltar a Israel a sus atletos, (inkluyendo a las mujeres entre las kualas una teniya una posibilidad de ganar una medaya, esto nunka lo savremos) los djugos olimpikos kontinuan kaji komo si nada se aviya pasado. Unos 80.000 djente vyenen a ver el match Almanya -Ungariya de futbol, i kuando unos kuantos alevantaron una bandyera dizyendo: «17 muertos ya son olvidados?» (17, sea 11 djudyos, 5 arabos i un alman) no solo la polisiya vino pishin tomar a la bandyera, ama los ke la aviyan alevantado fueron echados afuera…

Mismo 40 anyos mas despues, en los djugos de 2012, kuando los israelyanos demandaron un minuto de silensyo en memorya de sus onze matados, la repuesta fue no…Kale akodrarse ke los paizes muzulmanos son unos 40, kon una povlasyon de un milyarda i medyo, i el estado de Israel uno, kon una povlasyon de syete milyones…Komo aravyar a un milyarda de djente ke alava alos matadores de Munich komo si fueron giborim…Lo ke es siguro, es ke los kapos del komitado olimpiko no se amostraron muy korajozos, ni en 1972, ni en 2012 …

En kuanto a la Gazeta franseza Le Monde, ke yo yamo gazeta de medra, lo ke topo de dizir es ke Golda Meir no deviya kesharse del terrorismo komo lo izo, syendo ke el estado de Israel el mismo aviya sido kreado grasyas a su terrorismo.

Komo a kada vez, la birra me suvyo meldando esto, i embiyi a la gazeta una letra dizyendo ke un estado ke dainda no egziste no puede azer terrorismo, i ke de toda manera, antes ke ayga un governo de Israel, la Adjensiya Djudiya no izo terrorismo tampoko.

El diya despues, miri ke mi letra era puvlikada en entero en la gazeta…en mismo tyempo ke otra letra de una organizasyon pro-palestinyana dizyendo ke todo lo ke afito era la kulpa de los Israelyanos i de la polisiya almana…

Esto dicho, Israel embiyo, el 9 de septyembre, dunke 4 diyas despues de esta matansina, avyones ke bombardaron las bazas de la OLP en Syria i en Levanon. A lo ke se dize, uvo 200 muertos.

En repuesta, los terroristos atakan, el 29 de oktovre, a un avyon alman de la Luftansa, i demandan la liberasyon de los tres terroristos en prezo. Pishin, los Almanes achetan, i los tres son liberados i se van en Libiya ande Khadafi, ke los resive komo koza grande.

No tengo menester de dizir la birra de Golda Meir ke dechida de dar orden al Mosad de bushkar en kualkyer lugar ke se topen a los ke izyeron o ordenaron o organizaron el atentato de Munich, i de matarlos. Esta aksyon del Mosad kedo mas o menos sekreta, i dainda oy no se save todo; ama lo siguro es ke esta aksyon se tuvo i se yamo «Zaam Hael» (Birra del Dyo).

Los del Mosad bushkaron anyos enteros, i por empesar Abou Daoud, el ke aviya todo ordenado i organizado. Ama son los fransezes los primeros ke lo afferraron en 1977. Kuando digo los fransezes, kyero dizir la polisiya franseza kuando se ambezo ke Abou Daoud aviya entrado en Fransya. En vedra el Governo franses no keriya del todo de esta mesele i dyo orden a la djustisya franseza de embiyar pishin Abou Daoud afuera de Fransya, antes ke los Israelyanos tengan el tyempo de demandar su ekstradisyon. La Corte de Cassasyon, ke mete en jeneral unos kuantos mezes, sino anyos, para djusgar, dyo una desizyon el 11 de janvier, sea solo 5 diyas despues del afferramyento, para ordenar ke Abou Daoud sea liberado, i lo fue pishin i metido en un avyon, en primera klase, a destinasyon de la Aljeriya…

Los israelyanos toparon yene a Abou Daoud en Polonya en 1981, i esta vez le travaron syete kurshumes en la kara i el puerpo, ama fue kurado (en Almanya!) i no se muryo. Se fue a bivir en Damas ande se muryo de si mismo solo en 2010.

Ama los otros ordonadores del atentato, inkluyendo Abou Iyad, fueron matados uno detras de otro, unos diez en todo, en Roma, Paris, Chypre, Athena, Beyruth, Tunis. Los Israelyanos mataron tambyen, ama esta vez por yerro, a un marroki en Lillehamer en Norvejya, ke aviyan tomado por Ali Hassan Salameh. Este Salameh sera yene matado mas despues.

En kuanto a los tres terroristas liberados por los Almanes i resividos por Khadafi, dos a lo manko muryeron matados, ama no se save byen por kyen.

Keda Willi Pohl, el nazi alman ke ayudo Abou Daoud para preparar i organizar el atentato. Fue solo kondenado a dos anyos de prezo por los Almanes, i oy dainda bive. De mismo dainda bive Mahmud Abbas, prezidente de lo Otoridad Palestinyana, el kual, komo lo dishe mas arriva, era el ke se okupo de las paras para esta matansina.

Todo se paga un diya, kale asperar…

Entremyentres yo vos digo al djueves ke vyene, si kyere el Dyo!

Edmond Cohen