eSefarad Noticias del Mundo Sefaradi
Keridos amigos, Ize ayer djueves mi emisyon sovre las kriaturas djenyos, komo Mozart por egzemplo, vos do aki el teksto.
El program se puede sintir por Internet kada djueves a las 4 H O6 PM, ora de Paris, indo al sityo RADIO – la fréquence juive. Kale tener pasensya i asperar un poko, no se oye pishin.
Saludos a todos!
Edmond Cohen
Paris, Fransya
KRIATURAS DJENYOS
Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Komo a kada vez vos akodro ke el proksimo atelye de konversasyon de la asosyasyon Vidas Largas se tendra el martes 4 de marso, de las dos i un kuarto asta las sinko, en el Centre Communautaire, 119 rue Lafayette Paris (10°). Metro Poissonnière o Gare du Nord.
Estos diyas, resivi por internet de mi amigo Eliseo Pardo, ke bive en Madrid, el avizo de ir a mirar sovre youtube una video konsagrada a una ijika maraviyoza yamada Alma Deutscher.
Los ke kyeren ver esta video maraviyoza la pueden topar indosen sovre Google i demandan Alma Deutscher youtube Arik. La video tura unos vente minutos i mos amostra un ombre bastante aedado i kalavasudo, el profesor Arie Vardi, yamado Arik, azyendo una entrevista kon una ijika de 8 anyos. El le avla en lashon i eya, afillu si se ve ke entyende todo i mismo, de vez en kuando, responde en ebreo, avla en jeneral en ingles. (Despues mos va dar la razon: su padre es israeli, ama su madre ingleza, i eya misma bive en Ingletyerra).
I a poko a poko mos damos kuenta ke no solo djuga pyano kon livyanez, ama ensima kompoza para pyano i mismo aze improvizasyon sovre notas eskojidas a las siegas. Despues vemos ke eya mizma desino la ilustrasyon del CD ke salyo de eya. Su desen no tyene nada de ver kon lo ke aze mi inyetiziko, afillu si, por siguro, es el mas maraviyozo de todas las kriaturas. El desen de Alma tyene a la vez la freskor de una kriatura i la madurez de una profesyonala del desen. Despuez mos embezamos ke no solo djuga pyano, ama tambyen djuga vyolon. I ke kompoza sonatas para vyolon i pyano. I al kavo mos ambezamos ke kompozo un chiko opera. Vemos mizmo una parte de este opera. I vos akodro ke en esto todo, tyene solo 8 anyos. Komo no pensar a Mozart?
Es lo ke ize. Pensi a Mozart, i de manera mas jenerala a las kriaturas tan adelantadas sovre sus edades ke se puede avlar de djenyo. I me dishe ke seriya puede ser interesante de avlarvos oy de estas kriaturas ke, de vez en kuando, se amostran, a la edad ande los otros pensan solo a djugar kon kuklas, komo djenyos en su dominyo.
Syempre uvo djenyos, i syertos empesaron muy pronto. Por egzemplo, vos nombraré Leonardo da Vinci. Teniya tales donos para el desen ke su padre lo metyo de chiko para ambezar la pintura en el atelye del pintor Verrochio, ke zaten no era solo pintor, ama aziya munchos otros artes. Leonardo se aziya el mizmo kuklas ke vestiya kon teshidos para ambezar a desinarlas komo modelos.
Verrochio, vyendo el talento de su elevo, le dyo a pintar un andjel en una ovra ke teniya de azer, el baftismo del Kristo. Vasari, el ke konta esta istorya, mos dize ke kuando vido lo ke aziya su elevo, Verrochio fue tan abatido ke mas nunka pinto!
De la misma manera, el chiko Blaise Pascal empeso muy pronto kon las matematikas. Se konta ke tanto le plaziya lavorar sovre las matematikas ke, para ke lavore un poko sovre otras kozas komo el grego i el latino, su padre le tomo sus livros de marematika; ama se konta ke sin livros, de kaveza rekonstituyo las 36 primeras propozisyones de Euclides, i de si mismo topo la demonstrasyon de la 32ena. Teniya 12 anyos.
Kuando vos ize aki una emisyon sovre Binyamin de Tudela, ke fue tradusido en franses por Jean-Philippe Baratier, yo eskrivi lo ke sige:
Una de las traduksyones las mijores va ser la traduksyon en franses, echa en 1734 no por un franses, ama por un alman de orijen franseza ama nasido en Almanya, yamado Jean-Philippe Baratier. Lo ke es muy kuryozo, es ke me apersivi ke este Baratier, ke izo un lavoro muy savyo i syentifiko, teniya onze anyos kuando izo este lavoro.
Kale dizir de esta kriatura ke, a 3 anyos, ya saviya eskrivir. No esto avlando de meldar a tres anyos, ama de eskrivir. A los 4, avlava latino kon su padre, franses kon su madre, i alman kon los mosos. A los 7, ya saviya el grego i el ebreo. A 9 anyos, eskrivyo un diksyonaryo de los byervos ebreos i gregos los mas yuches del vyejo i del muevo testamento, kon komentaryos, de 300 a 400 pajinas kada uno.
A onze anyos, komo lo dishe, izo la traduksyon del livro de Binyamin, kon dodje komentaryos ke amostran su syensya tan de la lingua ebrea ke de la istorya del mundo del dodjen siglo.
Despues de esto, kontinuo sus lavoros en teolojiya, en matematika, en astronomiya, ets. Aviya empesado de estudyar la eskritura ejipsyana (los yeroglifos) kuando se muryo en 1740, a la edad de 19 anyos.
Por dizir la vedra, empesi por interesarme al haham djudyo, ke eskrivyo en lashon el livro de su viaje ekstraordinaryo, ama despues me enteresi mas muncho al ke lo traslado en franses a onze anyos.
Esto es lo ke vos dishe kuando ize mi emisyon. Lo ke no tomi tyempo de dizirvos es ke no solo se amostro mijor traduktor ke los otros, vyendo i senyalando los yerros de traduksyon de sus predesesores, ama sovre todo izo un estudyo kritiko de la ovra trasladada, amostrando los yerros de Binyamin i korrijyendolos, kon una syensya de la jeogarafiya i de la istorya del dodjen siglo en el Medyo Oryente ke desha enkantado.
Ama la mas konosida de todas las kriaturas djenyos es de manera sigura el chiko Wolfgang Amadeus Mozart. Toda la djente ya save ke empeso a djugar klavesino a la edad de tres anyos, i ke a los sinko anyos, se metyo a kompozar ovras para el piano. Al lado de esto es un virtuoz del klavesino, al punto ke su fama korre la Evropa entera.
Mozart no tyene dainda 8 anyos kuando su padre yeva su ijiko a la corte del rey Louis XV, en Versailles, i aya Mozart djuga delante del rey, de la reyna i de la corte. Todos son enkantados del talento de esta kriatura. Aki esto avlando de la Fransya, ama kale saver ke Mozart se va ir en la Evropa entera.
A esta misma edad de 8 anyos Mozart kompoza la primera de sus 55 sinfoniyas (savyendo ke se muryo a la edad de 35, mos damos mas kuenta de lo ke pudo lavorar, i esto solo avlando de sinfoniyas, ama no kale olvidar todo lo ke izo al lado, i por empesar operas). Los ke por kuryozidad se demandan a kualo asemeja una sinfoniya kompozada a 8 anyos pueden oir su empesijo indosen sovre Google i demandando Mozart premiere symphonie Mahler Academy youtube.
A la edad de onze anyos, kompoza su primer opera, Apollo i Hyacinthus. Aki tambyen, los ke kyeren oir un pedasiko para azerse una idea pueden ir sovre Google i demandar Apollo et Hyacinthus youtube.
I un anyo despues, dunke a la edad de 12 anyos, kompoza otros dos operas, Bastien i Bastienne i La finta semplice.
Me kedo aki kon Mozart, porke ya se ke todos mis keridos oyentes ya konosiyan, sin menester de mi, la prekosidad ekstraordinarya de este djenyo.
Ama no fue el solo. Kale saver ke el chiko Beethoven dyo su primer konserto a la edad de syete anyos, su padre keryendo azer de su ijo un muevo Mozart. A onze anyos kompoza 9 varyasyones por piano sovre una marcha de Ernst Christoph Dressler. A los 17, Beethoven djuga una improvizasyon delantre djustamente de Mozart, ke dize a sus amigos:» tened tino kon este, va azer avlar de el en el mundo!» Mozart no se yerro.
Vos akodro de lo ke vos aviya dicho kuando ize aki una emisyon sovre el Gaon de Vilna, de su nombre Eliya ben Shelomo, un ijiko muy espyerto i meoyudo ke va enkantar a la djente al deredor, syendo ke, a lo manko asigun lo ke se konta, a tres anyos ya konosiya el Tanah de kavesa. Es puede ser una leyenda, ama en todas las leyendas ay una parte de vedra. I ya savemos ke syertas kriaturas son kapaches de kozas inkreivles.
La lista de las kriaturas djenyos es muy larga, en todos las partes del mundo i en todas las djentes.
Ay, por siguro, los muzikantes, ama ay tambyen los savyos, los matematikos, los djugadores de echecs, se puede mizmo ver sovre internet un ijiko de dos anyos yamado Titus ke djuga a echar balones de basket ball en el sesto…i reushe muy byen.
Kualo puede eksplikar ke ayga ansina djenyos ke salen tan pronto de la norma? En vedra no se save, i los syentifikos no tyenen eksplikasyon. El profesor David Feldman, ke estudya el desvelopamyento de las kriaturas, pensa ke para ke ayga estas kriaturas, kale la kombinasyon de tres elementos: el talento, por siguro, ama no abasta; kale tambyen ke la kriatura sea ayudada en su dono, por egzemplo Mozart o Beethoven teniyan un padre ke konosiya i ensenyava la muzika, Baratier un padre ke le ensenyo desde muy chiko el latino, el grego i el ebreo, i esto es lo ke permityo ke los chikos se ambezen muy presto. Enfin, tresera kondisyon, kale ke esto todo ture a lo manko unos diez anyos.
Esto es muy byen, ama ya entenditesh ke estamos yene alderedor de la kuestyon. El korason, el djiger, de la kuestyon, keda: de ande vyene un tal talento? I a esto, dinguno save responder.
Antes de eskapar mi emisyon, vos keriya avlar de tres otras kriaturas de oy, komo ya vos avli, al empesijo de mi emisyon ,de la chika Alma Deutsher. Kualo van a dar en el futuro, kuando seran adultos? Dainda no lo savemos, ama es siguro ke daran kualkyer koza.
Vos vo avlar de dos amerikanos i un ingles. El ingles es un pintor, la amerikana es a la vez muzikante i syentifika, el amerikano es a la vez muzikante, syentifiko i djugador de echecs.
Empesaremos por el ingles, ke se yama Kieron Williamson. Nasyo verso 2003, kijo dizir ke oy tyene unos diez anyos. Empeso a pintar a la edad de 5 anyos, i sus padre i madre fueron enkantados de ver komo, empesando por desinar naves ke veiya delantre sus ojos, despues se metyo a desinar tambyen la mar, los pasharos, la djente, i todo lo ke veiya. Su manera de pintar es impresyonista a la manera de Monet. Los ke tyenen la kuryozidad de ver sus ovras pueden ir sovre Google i demandar Kieron Williamson gentside. A la edad ande mi kerido inyetiziko desina una kaza kon su chimenea ke inventa, el ya pintava montanyas, riyos, kazas ke se topavan delantre sus ojos, i ya se save ke no es kolay de pintar en la natura: el sol se mueve, se eskonde, las solombras trokan, i lo ke el pintor tyene delantre sus ojos kuando eskapa su lavoro no tyene muncho de ver kon lo ke era al empesijo de su lavoro.
Agora esta kriatura es konosida en el mundo entero, sus ovras se venden a presyo de oro, i ya se izo rikinyon.
Agora vo deshar el ijiko ingles para dizirvos dos byervos sovre una pretika de Amerika, ke se yama Jessica Constant. Si keresh verla, vos vash sovre Google, i demandash enfants prodiges ce phenomene. Es mijor entender el franses, porke es una video reportaj en franses sovre Jessica, ama tambyen sovre Albert Wong, al kual vendremos despues.
Esta Jessica entro a la Universidad a dodje anyos para estudyar mikrobyolojiya i psikolojiya infantil. Ama al lado de esto, djuga vyolonselo kon sus dos ermanos ke djugan el vyolon, i me enkanti de oirlos los tres en djuntos, los mas enkantados syendo sus padre i madre ke no son muzikantes ni el uno ni la otra.
Jessika Constant es una preta. El otro amerikano, ke se yama Albert Wong, uvyera sido dicho amariyo del tyempo de mi chikes, syendo su orijen ke se ve kineza, sovre todo kon su alkunya Wong.
Los ke se iran sovre internet ande vos dishe (Google, i despues enfants prodiges ce phenomene), mizmo si no entyenden el franses, a lo manko veran i oiran este chiko djugar pyano, i seran tresalidos. Komo Mozart, empeso de djugar pyano a la edad de tres anyos, i a los sinko gano un konkurso ande los otros partisipantes teniyan asta 18. Agora tyene unos dodje anyos, i se ambeza fizika kon un profesor partikular de fizika. Es tambyen un buen djugador de echecs.
No kyero enfasyarvos kon una lista de tantas otras kriaturas adelantadas. Ay unas kuantas en la Indya ama no tengo bastante tyempo para avlar de todas, i de toda manera noay kavo. Djusto kale saver ke estas kriaturas yevan un misteryo ke dainda los savyos no supyeron eksplikar.
I kualo azen los djudyos, i entre eyos los sefaradim en esto todo? Kaji nada, sino ke el padre de la chika Alma Deutscher es israelyano, ama no sefaradi…Ama kyen disho ke yo deviya syempre avlar sovre djudyos i Israel? Kuando vos ize una emisyon sovre las poeziyas de Victor Hugo, era sin relasyon kon los djudyos. Lo ke importa lo mas, no es ke vos avle sovre djudyos, lo ke importa es ke vos avle en muestra lingua, i kapara si no es sovre djudyos.
A la rovez, me parese interesante de ver ke el misteryo de la prekosidad de estos chikos djenyos se topa en kualkyer grupo: blankos, pretos, amariyos, indyos, chikos, chikas, es asigun kae. No es una kuestyon de rasa ni de sekso.
Agora ya yegimos al kavo de esta emisyon, i vos digo al djueves ke vyene, si kyere el Dyo!
Edmond Cohen
