eSefarad Noticias del Mundo Sefaradi
Keridos amigos,
Mi emisyon de oydiya djueves va ser sovre Joseph Nehama, una glorya de la Selanik djudiya. El 28 no vo azer emisyon porke un haham vendra avlar de Pesah en mi tyempo de emisyon.I mismo el ( de mayo no so siguro de azer una emisyon, syendo ke kaye el yom Ashoa i ke es muy posivle ke yene la radyo tenga menester de mi tyempo de avla, komo ya afito otros anyos
Los ke van a kerer oirme en direkto lo podran indosen a las 4 h 06 PM, ora de Paris, sovre www.radioj.fr Kale klikar arriva a la derecha sovre Ecouter Radio J en direct. I si no es en direkto, abasta asperar un diya o dos, i despues ir a oirme en redifuzyon sovre http://www.radioj.fr/node/145
Saludos a todos
Edmond Cohen Paris Fransya
JOSEPH NEHAMA
Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina
Por empesar, vos akodro ke el proksimo atelye de konversasyon de Vidas Largas se tendra el martes 10 de mayo, de las dos a las kuatro i medyo, en el Centre Communautaire.
Vos akodro tambyen ke agora las emisyones de Radio J se pueden oir sovre internet. Si el tekniko lo kyere byen, i estos tyempos lo kyere byen, mi emisyon se puede oir sea en direkto, sea kuando se kyere, eya sola, kale klikar en el sityo de Radio J, sovre Emissions, i irse en pajina 5, aya se topa la miya.
http://www.radioj.fr/node/145
Amanyana vyernes a la tadre va empesar la fyesta de Pesah kon el famozo Seder, i kon esta okazyon vos dezeo a todos, keridos oyentes, una fyesta alegre kon los vuestros. A propozito de Pesah, syendo ke un haham vendra avlarvos en mi lugar el djueves ke vyene, no me oiresh el djueves 28 de avril, mi proksima emisyon va ser solo el djueves 5 de mayo.
Para oy vos kyero avlar de una glorya de Selanik del siglo 20, un ombre de muy alta kultura ke kedara en las memoryas, Joseph Nehama. Joseph Nehama en Gresya i Avraham Galante en Turkiya son por empesar ama no por eskapar dos istoryanos de muy alto nivel, sin los kuales no va mas ser posivle de estudyar la istorya de los djudyos del imperyo osmanli en jeneral i de Selanik en partikolar.
Para oy vamos a deshar a Galante ke merese por siguro otra emisyon, i mos interesaremos solo a Joseph Nehama, sovre el kual Avraham Elmaleh, otro savyo nasido en Yerushalayim, eskrivyo en 1965 un artikolo en franses sovre el kual lavori para aparejar esta emisyon, intitolado Joseph Nehama, éducateur, écrivain, historien et homme d’action (edukador, eskrivano, istoryano i ombre de aksyon). Ama vamos a ver ke en mas de esto todo, Nehama fue un muy grande leksikografo, lo ke no puediya dizir Elmaleh en 1965 porke Nehama lo fue despues, i de este artikolo, i mismo de la muerte de Avraham Elmaleh ke afito en 1967.
Joseph Nehama nasyo en Selanik el 17 de marso 1881, kijo dizir del tyempo ande Selanik aziya dainda parte del imperyo Osmanli. Su famiya ya era famoza en Selanik, i su padre Juda Nehama era un haham moderno i savyo, avyerto a la Haskala, las luzes del Oksidente. Eskrivano, era el kapo redaktor de la revista El lunar, istoryano kon una rika i importante biblioteka. Rabbi Juda Nehama era tambyen uno de los fundadores de la primera eskola moderna en Selanik, era myembro del komitado sentral de la Alyansa Israelita Universala de Selanik.
En 1890 – tyene dunke 9 anyos – despues de una eskolika ebraika, l chiko Joseph entra en la eskola de la Alyansa, i despues se va eskapar sus estudyos en la Eskola Normala Israelita Oryentala ke forma los profesores de las eskolas de la Alyansa. Aya resive un ambezamyento por altos profesores (Colejyo de Fransya, Sorbona). En 1897, (a 16 anyos) funda la asosyasyon de los ansyanos elevos de la Alyansa, i va azer de esta asosyasyon un ogar ardyente de vida intelektuala asta la yegada de los Almanes en Selanik en 1940. Ama dainda no estamos en esto.
Sale de la ENIO de Paris en 1901, tyene dunke 20 anyos.
Abolta komo profesor en la eskola de la Alyansa de Selanik i la aze eskola de ambezamyento segundaryo, lo ke kyere dizir ke da posibilidad al ke sale de esta eskola de entrar en las Universidades i Grandes Eskolas, no solo de Turkiya, ama tambyen de Evropa i Amerika. Un alay de mansevos ke sigieron el ambezamyento de Nehama van a salir medikos, avokatos, injenyeres, i de esta manera alsar muncho el nivel de la manseves selanikliya.
En 1910, es echo direktor de la eskola, kuando tyene solo 29 anyos, lo ke da una idea del alto nivel de Joseph Nehama.
En 1919, va mizmo ser Inspektor Jeneral de todas las eskolas del Oryente serkano, ama por razones familyalas no va pueder azer este lavoro. I el anyo despues va ser echo myembro del komitado sentral de la Alyansa, es el solo profesor ke va resivir tala promosyon.
Lo ke bushkava Joseph Nehama kon ardor era la emansipasyon ekonomika i politika de los selaniklis.
En su artikolo sovre el kual lavori para aparejar esta emisyon, Abraham Elmaleh mos konta ke en los anyos 1902-1910, el era profesor para chikos en Yerushalayim, myentres Nehama era profesor para mas grandes en Selanik, i un diya Elmaleh melda en la Revue des écoles, la Revista de las eskolas, un artikolo muy dokumentado de 35 pajinas, solo firmado N, sovre Sabbataï Cévi i los Sabbatyanos de Selanik, istorya de la sekta djudeo-muzulmana de los dönmes» (Paris, 1902). Este artikolo, no solo es eskrito en un franses maraviyozo, ama tambyen es muy riko i da informasyones ke no se topan en otro lugar.
Tan le plaze este artikolo a Elmaleh ke, sin saver kyen es este N ke lo eskrivyo, lo traslada en ebreo para meterlo en su gazeta Haherut puvlikada en Yerushalayim. I ansina se ambeza ke este misteryozo N es Joseph Nehama.
No solo Nehama fundo en Selanik el primero liseo djudyo i una eskola de altos estudyos komersyales, ama tambyen organizo un kurso espesyal de pedagojiya i de metodolojiya para los maestros del famozo talmud tora de Selanik.
Ama esto dicho, este grande savyo i intelektual lavoro tambyen para si mismo komo bankero, prezidente de la Unyon bankera.
A parte de esto todo, Nehama fue eskrivano basho otros nombres ke se eskojiya el mismo. En la gazeta Le journal de Salonique puvlika kon el nombre Clopinal varyas kronikas eskritas en franses, un franses perfekto, tan rikas i savyas ke la djente uzava de yamar a Nehama una biblioteka ambulanta…
Nehama no se kontenta de eskrivir para los Selaniklis; puvlika tambyen en la famoza revista franseza syentifika i literarya Le Mercure de France.
Nehama eskrive en franses, ama eskrive tambyen en djudeo-espanyol. Entre 1902 i 1910, eskrive dos livros: Las leyes del komersyo, i Los uzos del komersyo. En 1908, puvlika La salud, sovre la ijyena para todos. Eskrive tambyen, para las eskolas, una adaptasyon en djudeo-espanyol del Avare (eskaso) de Molière. Tambyen para las eskolas eskrive en franses un livro Biographie des hommes célèbres (Vida de los ombres famozos).
Nehama nunka se kansa, i eskrive syenes de artikolos kon el nombre de Yachar (komo estash vyendo, Nehama amava trokar de nombre ) . Eskrive en franses o en djudeo-espanyol asigun la gazeta ande eskrive: Le Progrès de Salonique i L’Indépendant en franses, La Epoka i El Liberal en djudeo-espanyol.
I tambyen da syenes de konferensyas en el Club de los ansyanos elevos de la Alyansa de Selanik, ke el mismo a fundado, ama tambyen en varyos otros lugares de Selanik o de Paris.
En 1913, Nehama puvlika en Paris el livro, kon el nombre, esta vez, de P. Risal, La Ville Convoitée (la sivdad kovdisyada). En 1965, kuando Elmaleh eskrivyo su artikolo, el livro ya aviya tenido ocho edisyones, oy no se, ama a lo manko una mas, en 2004.
Su estudyo sovre Karaghieuz, el Guignol turko, va ser trasladado en diez linguas.
Ama la ovra la mas importante de Nehama (al lado de su diksyonaryo, del kual vamos avlar mas despues) es su Histoire des Israélites de Salonique, en syete volumenes:
- La komunita romanyota
- La komunita sefaradiya; tyempo de su instalasyon (1492-1536)
- La komunita sefaradiya; edad de oro (1536- 1593)
- La komunita sefaradiya; edad de oro (kontinuasyon)
- El tyempo de stagnasyon; la tormenta sabbateana (1593 – 1669)
- i 7. puvlikados en 1978, kijo dizir despues i de la gerra i de la muerte tan de Elmaleh komo de Nehama: el tyempo de despues 1669 asta despues de la gerra.
Yo no meldi esta suma, ama tuve una chika idea de este lavoro meldando una bastante larga resensyon eskrita por Beatrice Leroy, de la Universidad de Bordeaux III, en el Bulletin hispanique de 1979, n° 3-4, de la misma Universidad.
Kon los solos sinko primeros volumenes, Elmaleh yama este lavoro de Nehama su «opus magnum» (grande ovra, en latino). Esto era meresido kon los 5 volumenes, lo es indimas kon los syete. Esta ovra kedara no solo por su valor propya, ama tambyen, malorozamente, por una otra razon ke mos dize Beatrice Leroy: » antes de analizar en detalye esta ovra tan rika, kale apesgarse sovre una muy grande kualita: a sido eskrito por un istoryador ke teniya a su dispozisyon una dokumentasyon magnifika, oy travada de los bushkadores. Joseph Nehama eskarvo los arshivos de Selanik, ke kemaron durante la sigunda gerra mundyala. Meldo ovras lokales, kronikas i tratados rabinikos, eskritos del siglo XVI al siglo XX, en ebreo i en djudeo-espanyol, tekstos dezaparesidos en los egzodyos o las matansinas, o de konsultasyon muy yuch para los Oksidentales. Lavoro kon Michaël Molho en el egzamen de las tumbas de los semetaryos de Selanik, enteramente derrokados despues, lo ke adjunta al interes de las puvlikasyones de Molho i del Israelyano Immanouel».
Kuando Beatrice Leroy mos avla de tekstos «de konsultasyon muy yuch para los oksidentales», esto se ve kuando mos avla del Meam Loez, ke yama «traduksyon espanyola de la Biblia, en primero meldada en sekreto por espanto de los hahamim, despues espandida ofisyalmente despues de 1800». Yo seriya muy enkantado ke un savyo komo era Nehama tenga echo tantos yerros en tan pokos byervos: en primero, el Meam Loez no es una traduksyon de la Biblia, sino un komentaryo muncho inspirado de los midrashim. Sigundo, ya egzistiyan traduksyones en ladino de la Biblia desde la Edad Medya, eskritas por Hahamim. Tersyo, los hahamim izyeron un grande sukseso al lavoro de Yaakov Huli i de los ke vinyeron despues de el, i esto desdel empesijo (1730). Kuarto, afillu si el Meam Loez es «de konsultasyon muy yuch para los Oksidentales», yene dos savyos espanyoles i dunke oksidentales, Maeso i Recuero, estudyaron i transliteraron el Meam0Loez. Esto todo, ya lo saviya Nehama mijor de los otros (salvo puede ser el kuarto, ke vino despues de su muerte) i no se ande Beatrice Leroy meldo lo ke eskrivyo…
Mos vamos a kedar aki sovre la ovra istorika de Nehama para ayegar a su istorya personala, en partikolar su istorya politika. Es konosido ke, komo la mayoriya de los kapos de la Alyansa, ke veiyan la salvasyon de los djudyos de Turkiya grasyas a la Fransya i al oksidente, Joseph Nehama, antes de la gerra, no veiya de un buen ojo los movimyentos syonistos, pensando ke kaliya kedarse en la sivdad de Selanik, i no irse en Palestina, ande asigun el los djudyos no puedriyan fraguar un estado.
Por siguro, el povereto de Nehama no puediya endevinar ke vendriya la gerra i ke los Almanes entrariyan en Selanik i matariyan, komo lo izyeron, kaji toda la povlasyon. El, ke aviya enkorajado los djudyos selaniklis a no oir a los syonistos i a kedarsen en Selanik, se dyo kuenta de su yerro, ama era demaziya tadre.
El mismo se fuyo de Selanik para ir en Atenas, ama esto no lo salvo, i fue aferrado kon su mujer i su ija i yevado el 25 de marso 1944, no en Auschwitz, ama en Bergen-Belsen, lo ke lo salvo, syendo ke, si no me yerro, no aviya kamaretas de gaz en este kampo (solo la ambre, la kanserya, la hazinura venida, entre otros, de las pulgas ke davan el tifus; esto todo yene mato a 70.000 personas). En Auschwitz, penso ke Nehama, ke ya teniya 63 anyos kuando fue deportado, uvyera sido pishin embiyado a la kamareta de gaz.
Nehama abolto bivo de Bergen Belsen, i tuvo el menester de kontar lo ke fue la shoa en su sivdad, i lo eskrivyo en los anyos 1947 i 1949, kon el haham Michaël Molho, en un livro intitolado In memoriam.
Por siguro, dandose kuenta de su yerro, desde la shoa defendyo el movimyento syonisto i el estado de Israel kuando renasyo. En 1962 izo un viyaje en Israel para ver de sus ojos lo ke se aviya realizado: Israel no era una utopiya, komo lo aviya pensado en su manseves.
I agora komo eskapar esta emisyon sin avlar de su sigundo kapolavoro, su «Dictionnaire du judeo-espagnol», ke eskrivyo en los ultimos anyos de su vida, i ke malorozamente no pudo ver puvlikado el dainda bivyendo. El livro tuvo dos edisyones, la primera en 1977, la sigunda en 2003.
Este livro es una suma de kinze anyos de lavoro sovre la lingua djudeo-espanyola en jeneral i de Selanik en partikolar. En este diksyonaryo no toparemos la anchusa, una koza de orno kon espinaka ke konosen todos los Estambollis, ama toparemos el esfongato, los chapines, byervos ke nunka oyi de mi vava…
Para la ke mozotros estambollis yamamos la ermuera, Nehama el Selanikli la yama la nuera. A la kontra, para la ke mozotros estambollis yamamos la suegra, el la yama esjwegra (pronunsyar eshuegra).
En vedra el livro de Nrhama es muncho muncho mas ke un diksyonaryo. En vedra es mas una ensiklopediya. Porke se keda sovre un byervo i a partir de este byervo, es la istorya de Selanik, la vida komo se pasava antes ke la shoa izo dezapareser esta vida.
Keresh un egzemplo? Tomaremos el byervo manyanada. Despues de trasladar por matinée, mos da un rekodro: «la manyanada de saba (Nehama dize saba a la selanikliya, i no shabat) se pasava, al tyempo, en vijitas a la parentera». Manera de ambezarmos un uzo de los djudeo-espanyoles…
Otro egzemplo? Al byervo esjwegra, Nehama no se olvida la dicha «lo ke ve la esjwegra». Lo traslada por «ce qui est apparent» (lo ke se ve). Ama aya no se keda. Adjunta (en franses, so yo ke traslado): «Se dize de un lavoro echo kon deskuydo, echo a la kuturu, sin konsyensya, echo solo para no tener keshas. Las esjwegras son travadas a despresyar sus ermueras, a akuzarles de haraganut, de indolensya. Por esto, munchas vezes, las ermueras se kontentan de kumplir el lavoro ke tyenen de azer, ke pareska byen de leshos sin mirar kon tino, sin korason ni kalor.»
Otro egzemplo? Kabadayi (matamoro) Nehama no se kontenta de trasladar.Avre una paranteza para kontarmos kualo era un kabadayi. Era la terror de su male i kada male teniya el suyo. Egzijiya paras de los ke kaminavan dainda en la noche. Despues Nehama mos konta kon detalyos komo era vestido. Dava espanto kon su kuchiyo. Unos le davan una semanada parar kedar kyetos. La polisiya serrava los ojos…Vo lo konti korto, ama Nehma toma todo su tyempo…Por esto es ke vos dishe ke su lavoro no es solo un diksyonaryo: es una ensiklopediya de grande valuta.
Joseph Nehama se muryo el 29 de oktovre 1971. Es una grande pedrita para mozotros.
Al djueves 5 de mayo si kyere el Dyo!
Edmond Cohen
Paris Fransya
