eSefarad Noticias del Mundo Sefaradi
Keridos amigos, el djueves pasado, no vos pude embiyar el teksto de mi emisyon porke fue improvizada, syendo ke resiviya a mi amigo espanyol Eliseo Pardo. Para este djueves, vos avlare sovre gazetas i Sefarad.
Saludos a todos
El program se puede sintir por Internet kada djueves a las 4 H O6 PM, ora de Paris, indo al sityo RADIO – la fréquence juive. Kale tener pasensya i asperar un poko, no se oye pishin.
Saludos a todos
Edmond Cohen
Paris, Fransya
GAZETAS I SEFARAD
Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Komo a kada vez, vos akodro ke el proksimo atelye de konversasyon de la Asosyasyon Vidas Largas se tendra el martes 18 de junyo, de las dos i un kuarto asta las sinko, en el Centre Communautaire, 119, rue Lafayette Paris (10°), métro Cadet o Poissonnière. Va ser el ultimo atelye antes de las fyestas de tishri i el anyo djudyo muevo.
Oy me pensi de avlarvos de las gazetas del mundo entero avlando de los sefaradim i de muestra lingua, i mismo, por algunas, en muestra lingua.. Kale saver ke ya s’eskapo el tyempo ande aviya gazetas en muestra lingua salyendo kadal diya. Antes de la Gerra, aviya, asigun lo ke eskrivyo el profesor Haîm Vidal Sephiha, unas 300 gazetas en djudeo-espanyol, sovre todo en Selanik, ama tambyen en munchos otros lugares; Asta el empesijo del siglo vente, eran eskritas en karakteres rashi. Despues vinyeron las gazetas en karakteres latinos. Komo lo dishe, paresiyan kadal diya. Estas todas gazetas dezaparesyeron una detras de otra, i agora no ay mas ni una en el mundo entero. Lo ke keda es Shalom en Turkiya, ke parese kada semana, ama todo en turko a parte de una sola pajina en djudeo-espanyol. El nes fue el renasimyento de una gazeta entera en djudeo-espanyol komo suplemento de Shalom, kyero avlar de El Amaneser. Ama parese solo una vez al mes, i yene es un nes grande. Tambyen parese dos vezes al anyo (avril i oktovre) Aki Yerushalayim, ke parese en Yerushalayim (Israel), komo su nombre lo da a entender. I parese kada dos mezes Erensia sefardi en los Estados Unidos.
Esta trajediya de la agoniya i de la muerte de las gazetas en muestra lingua es la trajediya mal jeneral de la agoniya de muestra lingua eya misma. Ya avli aki de esta agoniya, no tengo menester de avlar de muevo sovre esto.
Por lo ke es del pasado de las gazetas djudeo-espanyolas, vos akonsejo de meldar el kapitulo La presse judéo-espagnole en el livro del Profesor Sephiha L’agonie des judéo-espagnols.
Oy no vos vo avlar de lo ke no egziste mas, vo aprovar de avlarvos de lo ke mos keda.
Por lo ke es de las gazetas eskritas enteras en djudeo-espanyol sovre papel, kreo ke kedan solo tres gazetas ke ya nombri: Aki Yerushalayim, El Amaneser, i Erensia sefardi. Demando pedron si me yerro i si ay otra ke no konosko. No tengo la ozadiya de pretender saver lo ke se pasa en el mundo entero. Digo solo lo ke yo kreo saver.
Afillu si parese kada sesh mezes kuando El Amaneser parese kada mes, kale empesar por avlar de la revista Aki Yerushalayim, Revista Kulturala Djudeo-Espanyola, porke es la mas vyeja (33 anyos, mashalla mashalla, kontra mueve anyos al Amaneser) i ke ande mozotros los djudyos se da la primera onor al mas ansyano.
Aki Yerushalayim fue fundada en Yerushalayim en el anyo 1979 por Moshe Shaul, ke se okupava en mismo tyempo de la radyo despues de la muerte de Isaac Levy en 1977. Es dainda el ke dirije esta revista.
Por siguro, esta revista tyene munchos interesos, el primero syendo la lingua en la kuala esta eskrita, i un otro de sus interesos es su grafiya en karakteres latinos. A poko a poko, esta grafiya, adoptada por el foro de internet Ladinokomunita del kual vo avlar mas leshos, se jeneralizo i es la ke yo uzo para eskrivir el teksto de mis emisyones. Ke la grafiya sea la misma en el mundo entero me parese, komo lo paresyo a Rachel Bortnick kuando fundo Ladinokomunita, muy importante.
Despues de esta revista, komo lo dishe, fue fundada en Estambol en marso 2005, aze dunke mas de ocho anyos, la revista El Amaneser, un suplemento mensual de la gazeta Shalom. Por esto, afillu si la gazeta Shalom no esta eskrita entero en djudeo-espanyol, vos tengo de avlar en primero de esta gazeta, antes de vinir a El Amaneser.
Esta gazeta Shalom, ke en vedra se eskrive a la turka Salom, kon una sediya basho la S, fue fundada en oktovre 1947 en Estambol por el gazetero Avram Leyon, ke aviya lavorado en Cumhuriyet. Al empesijo, era eskrita entero en djudeo-espanyol. Ama, a poko a poko, las ojas en turko se izyeron mas i mas, i las ojas en espanyol menos i menos, asta ke agora ayga una sola oja en djudeo-espanyol sovre 20. En esta oja ay la perasha de la semana por el rav Yeuda Adoni, un artikolo eskrito por Coya Delevi, i otros ke inchen la oja.
I el nes fue el nasimyento, kon una ekipa de veluntaryos yevados por Karen Gerson Sarhon (la tan simpatika kantadera de los ¨Pasharos sefaradis), del suplemento mensual de Salom, la gazeta mensual El Amaneser, eskrita entera en djudeo-espanyol. Ya dishe munchas vezes aki todo el byen ke penso de esta gazeta. Yo le tomo munchas vezes artikolos para azer mis emisyones, eya me toma munchas vezes el teksto de una emisyon miya para meterlo komo artikolo en la gazeta. Antiyer martes resivi el numéro de junyo, ke es el numero syen, de esta gazeta.
Al lado de Aki Yerushalayim i de El Amaneser, ay una tresera gazeta ke, por lo ke se, es tambyen entera eskrita en djudeo-espanyol, es Erensia sefardi, revista istorika ke parese en los Estados Unidos, fundada i dirijida por el Dr Albert de Vidas.
Esto dicho, si no me yerro, no ay mas otra gazeta en papel en el mundo ke sea entera eskrita en djudeo-espanyol.
Lo ke egziste, syerto, son unas kuantas otras gazetas, en jeneral de interes sefaradi, ande ay un rinkon en djudeo-espanyol. Es el kavzo, komo ya lo dishimos, de la gazeta semanala Salom.
Es el kavzo tambyen de la gazeta Los Muestros, la boz de los Sefaradim, editada en Bruxelles (Beljika) i ke parese kada tres mezes. Los artikolos no son todos en djudeo-espanyol, lo mas son en franses, ingles, kasteyano. Esta revista kulturala es dirijida desde su empesijo en 1990 por Moïse Rahmani. En el numero de este mes, ke es el numero 91, topi un artikolo en djudeo-espanyol, ke es la traduksyon al djudeo-espanyol por Matilde Gini Barnatan de un eskrito de Fernando Carbonell.
Parese kada mes en el Brasil una gazeta yamada El djudio, eskrita sovre todo en portuges, ama tambyen un poko en kasteyano, en ingles, i, por esto vos avlo de esta gazeta, en djudeo-espanyol. Por egzemplo, tengo en mano el numero de janvier:kaji todo es en portuges, ama yene ay, sovre 32 pajinas, una pajina kon poeziyas de Isahar Avzaradel en muestra lingua, una medya pajina kon refranes de Enrique Saporta, i una pajina de umor ande se puede topar a basho desenes komikos de Irvin Mandel, tradusidos en djudeo-espanyol por Karen Gerson Sarhon. Yo no konosiya esta gazeta asta ke me eskriva para demandarme la otorizasyon de publikar una shaka ke yo aviya kontado en El Amaneser.
Al lado de las gazetas sovre papel, ay tambyen las gazetas sovre internet, en vezes las mismas, kyero dizir ke se puede topar sovre internet lo ke ay sovre las gazetas papel: es el kavzo de Aki Yerushalayim, ke es puvlikado sovre el sityo kon el mismo nombre, de Salom, ke se puede meldar sovre el sityo kon el mismo nombre, El Amaneser i Erensia sefardi, ke se pueden meldar indose sovre eSefarad, o Los Muestros ke se puede meldar indose sovre sefarad.org.
Ama en mas de esto, ay munchas gazetas ke no son del todo sovre papel, solo sovre internet.
La ke me parese la mas importante, afillu si no es una haliz gazeta, ama un foro, es el foro Ladinokomunita, fundado en fin 1979 por Rachel Bortnick, ke bive en Dallas (Texas), en los Estados Unidos. Este foro aune djente del mundo entero, i kada uno vyene kon su pyedrizika, i todos en djuntos fraguan una haliz ensiklopediya del sefaradismo. Para avlar solo de mi, en el kanton de los « files », kijo dizir los tefteres, se pueden topar a mi nombre Edmond Cohen el teksto de unas 150 emisyones ke ize en Paris. I lo ke vale para mi vale tambyen para los otros: por dar un solo egzemplo, en klikando sovre files i despues perashas Yehuda Hatsvi, tenesh los komentaryos ke izo Yehuda Hatsvi de kada perasha, ets.
Desdel empesijo, fue la regla en este foro ke kada uno eskriva solo en djudeo-espanyol.
Asemejante a este foro ay tambyen el foro Sefaradimuestro, fundado en junyo 2008 en Estambol por Sharope Blanko, ke responde personalmente a kaji todos los mesajes embiyados. A la diferensya de Ladinokomunita, se puede eskrivir aya en otras linguas ke djudeo-espanyol, afillu si el djudeo-espanyol es la mayoriya.
En Buenos Aires, aviya la revista Sefaraires, kon syertos artikolos en djudeo-espanyol. Malorozamente esta revista se kedo en desyembre 2008, ama dainda se pueden meldar los 78 numeros ke paresyeron entre mayo 2002 i novyembre 2008.
En lugar de esta revista, agora nasyo este mismo mes de desyembre 2008 en Buenos Aires, una mueva gazeta sovre internet, es eSefarad, fundada por Liliana i Marcelo Benveniste. Este sityo es sovre todo eskrito en kasteyano, ama ay yene munchos eskritos en muestra lingua. Aya tambyen se puede topar el teksto de munchas emisyones miyas de radyo. I aya tambyen, lo ke vale para mi vale para los otros: kada semana ay un rinkon para Rivka Abiry, Rachel Bortnick i munchos munchos otros.
Otra gazeta solo de internet, i ke toma mas i mas importansya, es Diyalog, fundada en Izmir (Turkiya) por Rafael Algranati. Eya esta eskrita sovre todo en turko, ama yene ay una « seksion » dicha « en ladino » kon munchos eskritos interesantes. Se puede meldar indo al sityo ladino-biu.com.
Otro sityo, es sefarad.org, el sityo de Moîse Rahmani i de los Muestros. Aya tabyen ay un alay de artikolos en varyas linguas, entre las kualas el djudeo-espanyol. I aya tambyen ay un kantoniko de las emisyones de Edmond, kijo dizir unas kuantas miyas.
En las gazetas de solo internet, ay tambyen el sityo Anajnu, fundado en el Chile. El tambyen parese eskrito solo en kasteyano, ama si se bushka byen, se topa un rinkon Mundo judio, i en este rinkon a basho, ay un rinkon todo Mundo Judeo-Espanol, i aya se topa un alay de eskritos en muestra lingua, inkluyendo munchas konsejikas de Rivka Abiry.
Kedandomos en Amerika del Sur, tengo tambyen de nombrar diariojudio.com, una gazeta internet djudiya de Mexico, ke no kale konfundir kon eldiariojudio.com, ke parese ser de Chile tambyen, ama, por lo ke pude ver, no tyene dingun rinkon djudeo-espanyol.
En la gazeta de Mexico diariojudio.com, ke parese eskrita solo en kasteyano, ay un rinkon idiomas, i en este rinkon, ay un rinkon « ladino » ande se pueden topar, entre otras kozas, munchas poeziyas de Haïm Vitali Sadacca.
I agora kale avlar de las gazetas por radyo.
Me puedo yerrar, ama no kreo ke egziste una radyo ke sea syen por syen djudeo-espanyola. Ay en el mundo munchas radyos djudiyas, i mismo, komo en Espanya, djudiyas sefaraditas, ama azen emisyones en otras linguas, i algunas tambyen en djudeo-espanyol.
Empesaré por la radyo Kol Israel, en Israel, ke emete kadal diya en djudeo-espanyol entre 19 h 45 i 20 h, ora de Israel
De la misma manera, la radyo exterior de Espana emite en « sefardi », komo dize, kada lunes verso el Oryente Medyo entre 14 h 25 i 14 h 55, kada martes verso la Amerika del sud entre 1 h 15 i 1 h 45 i la Amerika del Norte entre 4 h 15 i 4 h 45.
En Espanya tambyen, ay Radio Sefarad. Emite en espanyol, ama si se bushka byen sovre internet, se topa otros idiomas, i klikando sovre otros idiomas, se ven los « javeres del kurtijo » la emisyon en djudeo-espanyol del Cidicsef de Buenos Aires.
Komo me keda dainda un pokitiko de tyempo vo aprovar de kontarvos un egzemplo ke bivi yo mismo.
Mi amigo Miguel Velazquez, ke bive en Orizaba, provinsya de Vera-Cruz, en Mexico, eskrive a Ladinokomunita, dirijida por Rachel Bortnick ke bive en Dallas en los Estados Unidos, ke ay una ermoza piesa de teatro ke se puede oir indo sovre Radio Sefarad, ke esta en Espanya. Yo, ke me topo en Paris, en Fransya, meldo esto i me vo sovre el sityo de Radio Sefarad ke me embiya en Arjentina, en Buenos-Aires. I de aya oygo una piesa de teatro aparejada por Matilda Koen Sarrano i djugada i enrejistrada en Yerushalayim. Me parese ke esto es lo ke se yama la mundyalizasyon!
Esto kontado, no eskapi de nombrarvos las radyos ande se puede oir djudeo-espanyol. Ya vos dishe el Cidicsef, son los Javeres del kurtijo.
En Fransya, sovre la radyo Judaïques FM, Bella Lustyk i Lise Gutmann prezentan un djueves al mes, de 10 h 30 a 11 h, la emisyon intitulada la voix du judéo-espagnol, Aki Estamos. Esta emisyon es en franses, ama puede azer oir syertas kantikas en djudeo-espanyol.
Agora tengo de eskapar esta emisyon avlandovos de eya. Se yama Muestra lingua, sovre Radio J, surea solo 20 minutos kada djueves, de las 4 h 06 a las 4 h 26. Es entera en djudeo-espanyol, el miyo, kon mi aksento franses, ago lo ke puedo. Es una vyeja emisyon ke bive desde unos 33 anyos. Es el profesor Haïm Vidal Sephiha ke la izo durante 25 anyos, i la azeriya dainda si su salud se lo permetiya, i so yo ke vine en 2005 detras de el, aze dunke ocho anyos.
I para oy me keda de desharvos, dizyendovos: astal djueves ke vyene, si kyere el Dyo!
Edmond Cohen
