eSefarad Noticias del Mundo Sefaradi
Keridos amigos,
Mi ultima emisyon en direkto asta el mes de septyembre va ser la del djueves ke vyene, i va ser konsagrada a Flavius Josephe.
El program se puede sintir por Internet indo al sityo RADIO – la fréquence juive.
Saludos a todos
Edmond Cohen
Paris-Fransya
FLAVIUS JOSEPHE
Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Vos akodro ke agora Radio J tyene un sityo internet. Agora mis emisyones se pueden oir en el mundo entero indose sovre Radio J kon internet (http://www.radioj.fr/node/145) sea en direkto, sea kuando se kyere: mis emisyones son enrejistradas a mi nombre.
Antes de empesar mi emisyon de oy, tengo un anunsyo de azervos:
Yo ize la konosensya de una mujer ke mora en Nice i ke se yama Linda Calvo-Sixou. Profesora de espanyol i tresalida por las muzikas djudeo-espanyolas, vino a vermos en muestro penultimo atelye de konversasyon. Kon dos otros amigos i una amiga, fundyo un grupo de muzika djudeo-espanyola ke yamaron el Ensemble Al’ Indaluz. Es Linda ke kanta en este grupo, el kual va avrir el 20 de julyo a las sinko de la tadre en el kal de Carpentras el tredjen Festival de Muzikas Djudiyas. Akonsejo a los ke se toparan serka del Kondado Venaissin el 20 de julyo de ir a oir los kantes djudeo-espanyoles de este grupo.
Esto dicho, oy estash oyendo mi ultima emisyon en direkto antes de las vakansas de enverano. En julyo i agosto van a ser redifuzyones.
Pensi de avlarvos oy de un istoryano djudyo muy famozo ke bivyo en Judea i en Roma en el primer siglo de la era kristyana, konosido kon el nombre de Flavius Josephe.
Kale dizirvos ke kaji todo lo ke savemos de el es por el mismo, ke eskrivyo su vida i su istorya. De la misma manera, kaji todo lo ke savemos de la primera rebuelta kontra los Romanos, ke s’eskapo por la estruisyon del Bet aMikdash en el anyo 70, la savemos solo por lo ke konto Favius. De la misma manera, todos lo ke savemos de la gerra de los Romanos kontra los Gayos (antepasados de los Fransezes de oy) lo savemos solo por lo ke eskrivyo Julius Cesar, kapo de la armada romana. Konoser una istorya solo por un lado no es buena koza, ama ke azer? Ansina es.
Yo vos vo kontar sovre Flavius lo ke el mismo konto. Nasyo en Yerushalayim serka del anyo 37 de la era kristyana. En 37, aze un siglo ke los djudyos no tyenen mas sus independensya. La Judea es okupada por los Romanos, i el halis poder, es el governador romano ke lo tyene. Esto dicho, los Romanos desharon en Yerushalayim un rey djudyo, amigo de los Romanos. En 37 se yama Herodes Agrippa I. El emperador de Roma, muy negro i medyo loko, se yama Caligula. Keda tambyen en Yerushalayim el Bet aMikdash, el Templo, dirijido por los Cohanim.
Djustamente Flavius Josephe, kuando nase, dainda no se yama ansina: se yama Yosef Ben Matityau aCohen, syendo ke su padre es un Cohen, i no kualsikyer Cohen, mos dize Flavius. Entre las 24 lineas de Cohanim, pretende ser de la primera, la linea ande es tomado el Cohen gadol, kapo en el Templo de los otros Cohanim. I por su madre, adjunta Flavius, desende de los Hashmonaim, la famiya de los reyes ke reynavan en Judea del tyempo de su independensya.
Flavius es dunke, asigun el, de alta noblesa. Fui edukado, mos dize Flavius, desde mi chikez en el estudyo de las eskrituras, i el Dyo tuvyendome dado muncha memorya i bastante sehel, ize tales progresos ke, a la edad de katorze anyos, los Cohanim i los kapos de Yerushalayim me aziyan la onor de demandarme mi sentimyento sovre kozas de la Ley.
Asigun lo ke mos dize, desde los tredje anyos, kijo konoser a los Pharizyanos, Saduseanos i Esenyanos, las tres sektas djudiyas, para eskojer la mijora. I mismo, dize ke paso tres anyos en el dezyerto kon un syerto Banus ke biviya aya, solo vestido de kashkaras de arvoles. A los 19, abolto en Yerushalayim ande eskojo los Pharizyanos, porke asigun el son los mas serka de los Stoikos ande los Gregos.
Despues, a la edad de 26 anyos, se va kon una nave en Roma para obtener del emperador Neron el pardon por syertos Cohanim akuzados por el Governador Antonius Felix de «koza muy livyana», asigun Flavius. La nave se batirea en medyo de la mar kon 600 personas, i Flavius tyene de nadar noche entera asta ser enkontrado por otra nave ke tomo a 80 sovrebivyentes. Los otros ya eran muertos aogados. En Italya, Flavius aze la konosensya de un komedyante djudyo ke lo prezente a Popea, la emperatriz mujer de Neron i famoza por tomar banyos de leche de azna. Grasyas al ayudo de Popea, Flavius obtyene de Neron el pardon para los Cohanim akuzados. I de esta manera puede aboltar en Yerushalayim, despues de tener visto kuanta rika i poderoza es Roma. Flavius se konvinse ke dinguno sera kapache de venser a Roma en estos tyempos i ke por sedaka no kale atakarlos.
Halbuki, kuando abolta en Judea, topa un pais al bodre de una rebuelta jenerala. Munchos son konvensidos ke ya vinyeron los tyempos anunsyados por las profesiyas, i ke el imperyo romano va ser destruido por los Djudyos kon el ayudo del Dyo. Otros mas sezudos pensan komo Flavius ke dainda no es posivle de atakar a los Romanos, i esto por dos razones: en primero porke los Romanos son mas fuertes ke kuasikyer armada kontra eyos, i en sigundo porke los djudyos, de toda manera, tyenen una grande flakeza: no son aunidos. El puevlo no es aunido kon su rey, ke es agora Herodes Agrippa II, ijo de Herodes Agrippa I, porke este rey es amigo de los Romanos. El puevlo djudyo no es tampoko aunido kon el mismo, syendo separado entre Pharizyanos, Saduseanos, Esenyanos, etc. I mismo los zelotes no son aunidos entre eyos: kada kapo zelote es enemigo de los otros kapos. Komo ganar una rebuelta en estas kondisyones tan negras?
Flavius mos dize ke izo todos sus esfuersos para dar a entender a los rebeldos ke no teniyan dinguna posibilidad de ganar, i ke mijor seriya de asperar otro tyempo. Ama, dize Flavius, «todos mis esfuersos kedaron vanos, i no pude kurarlos de esta manya». Flavius se va a ver los Cohanim i los kapos Pharisyanos, ke eyos pensan komo el ke esta rebuelta no podra reushir, ama no saven komo impedirla.
Embiyan Flavius en Galilea para «konvenser los rebeldos de dar atras sus armas»… No tengo menester de dizir ke esto no fue posible. Uno de los prinsipales kapo de la rebuelta en Galilea, yamado Yohanan de Giskala (Gush Halav), rezistyo kontra Flavius i se izo enemigo de el, sospechado de ser amigo kon los Romanos.
I de fakto Flavius no era amigo kon los rebeldos: el mismo mos konta, kon orguyo, ke izo venir ande el «el mas rebeldo de todos», lo izo asotear, despues le izo kortar la mano, enkolgar a la garganta, i aboltarlo ansina a sus amigos. Esto para amostrarvos ke estamos en tyempos muy salvajes ande la djente se matan entre eyos sin dinguna piadad.
En vedra lo ke mos konta Flavius de la situasyon en Galilea es tan entrafikado ke no so kapache mismo de kontarlo en korto. Lo ke sale de lo ke mos konta es una gerra entre djudyos: los Romanos no tyenen dainda nada de ver en esto todo. Ama asigun Flavius, el guadra la konfiansa de los kapos de Yerushalayim ke lo mantyenen komo sus reprezentante en Galilea.
Entremyentes el jeneral Vespaziano, embiyado por el Emperador Neron, se aserka de la Judea, i kon el vyene el peligro romano. Entra en Judea i empesa una gerra ande toma kada kale una despues de otra, empesando por la Galilea, ande se topa Flavius. El komanda la defensa de la kale de Jotapat kontra las armadas de Vespasiano. Aze alsar las paredes de la kale, i lo konta en su livro La gerra de los Judyos, ande avla de el a la tresera persona, yamandose Yosef.
La flakeza de Josapat, es ke sus askeres djudyos no tyenen agua de bever. La sola solusyon es de salir de la kale i atakar a los Romanos, lo ke azen. Flavius mos konta kon detayes esta lucha terrivle kontra los Romanos, komo los Romanos uzavan de makinas de gerra, komo los djudyos kemavan i destruiyan estas makinas, ama los Romanos teniyan el tyempo para eyos, i a poko a poko reusheron a destruir la pared de la kale. Flavius aze echar sovre los Romanos azete buyendo, i mos konta la ardor de los kombatantes djudyos.
Malorozamente, un traisor djudyo ambeza a Vespasiano ke los djudyos son muy flakos i durmidos i se pueden atakar por sorpreza, lo ke aze. I ansina eskapa por tomar, despues de 47 diyas de rezistansya, la kale i la sivdad, i mata todos los ombres.
Flavius mos konta ke el pudo eskaparse de la sivdad i eskonderse al fondo de un pozo muy profundo ande aviya una kaverna ke no se veiya de arriva. Otros kuarenta ombres son kon el. Al kavo de tres diyas los Romanos lo topan i le demandan de renderse. El acheta, ama los otros kuarenta ombres le dizen ke lo konsideran komo traisor i ke lo van a matar. Ya salen sus espadas para esto. El parvyene a konvenserlos de no lo matar ama de matarse entre eyos, kada uno matando a su vizino, lo ke achetan. Kedan bivos solo Flavius i un otro, » sea , mos dize Flavius, ke afito por azardo, sea ke el Dyo lo kijo ansina.» Azardo? Puede ser…Komo saver lo ke se paso en vedra?
Lo ke vos tengo yene de dizir, es ke los matematikos se demandaron komo azer para toparse el ke no es matado, i topi sovre internet ke ay una solusyon matematika de este problema! No la diré aki porke es un poko entrafikada, ama kyen save? Puede ser ke Flavius konosiya de antes este problema i komo rezolverlo.
Lo ke es siguro, es ke no fue matado, i kayo entre las manos de Vespasiano. El keriya embiyarlo a Neron el emperador, ama Flavius le dize ke es el, i despues de su ijo Titus, ke van a ser emperadores de Roma. I Vespasiano lo kree.
Esta istorya de Flavius anunsyando a Vespasiano ke va ser emperador en un tyempo ande no se puediya pensar – vos akodro ke despues de Neron uvo Galba, Othon i Vitellius ke fueron emperadores, es vedra poko tyempo, ama yene… komo endevinar ke iva ser emperador solo un anyo despues de kuatro emperadores en sira? – esta istorya no vos akodra otra, keridos oyentes?
Lo mismo izo Yohanan Ben Zakay kuando kayo entre las manos de Vespasiano, fuyendo de Yerushalayim komo sözde muerto. El Talmud mos konta ke Yohanan Ben Zakay anunsyo a Vespasiano ke iva ser emperador. Ama en vedra Vespasyano ya era Emperador en Roma kuando fue enserrada Yerushalayim, no por el, ama por su ijo Titus. Es posible ke el Talmud, kuando fue ekrito munchos anyos despues, konfundyo Flavius Josephe i Yohanan Ben Zakay.
Esto dicho, la gerra kontinua i, a poko a poko, los Romanos konkistan todo el pais, solo kedando Yerushalayim. Entremyentres Vespasiano, echo emperador, se abolta en Roma i es su ijo Titus ke kontinua la lucha. Aki no vos vo kontar esta gerra , solo vos kyero meldar lo ke mos konta Josephe sovre su propyo rolo: Titus aprova de konvenser los djudyos de renderse, i pensa ke Josephe es el mijor para avlarles, syendo ke avla la lingua djudiya.
Josephe eskoje un lugar alto desde puediya, sin resivir filechas, ser oido de los kombatantes djudyos de Yerushalayim. I les dize ke mijor es de renderse, ke no vale la pena de kombatir mas, no tyenen dinguna posibilidad de ganar.
I el mismo mos konta:»Munchos ke oiyan a Josephe (avla de el a la tresera persona) se burlaron de el. Otros le disheron insultas, unos le embiyaron filechas.»
Ya savesh komo se eskapo la koza. Yerushalayim kayo entre las manos de los Romanos, i el Bet aMikdash fue kemado i derrokado. En kuanto a Josephe, mos dize ke Titus le ofresyo varyas vezes, despues de la estruisyon de Yerushalayim, de «tomar kualkyer parte ke keriya en lo ke kedava de las ruvinas de mi pais». El kijo solo unos kuantos livros sagrados i la libertad de unos kuantos amigos. Lo ke Titus acheto.
I kuando Titus abolta en Roma, toma a Josephe kon el. Vespasiano lo aze sivdadano romano, i le paga una renta. I despues de Vespasiano i Titus, el emperador Domitiano le guadro amistad.
Por esto es ke Joseph tomo el nombre de Flavius, ke era el nombre de los emperadores Vespasiano, i sus ijos Titus i Domitiano.
Flavius Josephe se va kazar tres vezes, tyene un ijo de su sigunda mujer i dos ijos de la tresera.
Va konsagrar su vida en Roma para eskrivir kuatro ovras:
1) En primero, entre 75 i 79, kijo dizir solo dos anyos despues de la kaida de Masada , la Gerra de los Djudyos kontra los Romanos. Lo eskrivyo en arameo, su lingua, ama fue tradusido i puvlikado en grego. La traduksyon en franses ke tengo yo es de Arnauld d’Andilly, un eskrivano franses del siglo 17, ermano del famozo jansenisto dicho le Grand Arnauld.
2) En sigundo su autobiografiya, sovre la kuala lavori para aparejar esta emisyon.
3) En tresero, las Antikidades Judaikas, puvlikadas en 93, ande Flavius konta la istorya de los Djudyos desde Bereshit. Ama despues de tener kontado el Tanah, mos konta la istorya del puevlo djudyo despues del Tanah, i mos ambeza muncho, ke no supyeramos sin el.
4) Enfin i en kuarto, verso el anyo 95, Flavius eskrive Kontra Apion, ande defende el djudaismo kontra los ke lo atakan. Esto es interesante, porke mos amostra ke Flavius se kedo djudyo astal kavo, i kedo orguyozo de serlo.
Se muere a la edad de mas o menos 63 anyos verso el anyo 100, kijo dizir del tyempo del emperador Trajano, este mismo Trajano ke aviya kombatido al lado de Titus kontra los Djudyos en la armada romana trenta anyos antes.
Kualo dizir de este ombre, para eskapar esta emisyon? La difikultad, es ke lo konosemos kaji solo por lo ke el mismo mos konta.
Asigun la akdama de Valentin Nikiprowetzky en mi edisyon de las ovras de Flavius Josephe, Josephe no era un traisor. No se puede sitar un echo ande se izo el djugo del enemigo en dandole sus ermanos. Ama se puede mijor dizir ke era un «djudyo de korte».
De toda manera, mismo si Flavius Josephe aze mas pensar, en vezes, a Petain ke a Jean Moulin, kale a lo manko rekonoser ke su ovra istorika es irremplasavle. No tenemos otra koza ke sus eskritos, i a kada vez la arkeolojiya vino konfirmar ke diziya la vedra.
Agora no me vash a oir en direkto astal mes de septyembre, ama me oiresh en redifuzyones. Vos dezeo a todos buenas vakansas, i vos digo al mes de septyembre, si kyere el Dyo!
Edmond Cohen
