Muestra lingua: ESTER LA REYNA por Edmond Cohen

Keridos amigos, komo ya mos topamos muy serka de Purim, me pensi de azer mi emisyon de djueves sovre Ester la reyna en el Meam Loez

El program se puede sintir por Internet kada djueves a las 4 H O6 PM, ora de Paris, indo al sityo  RADIO – la fréquence juive. Kale tener pasensya i asperar un poko, no se oye pishin.

Saludos a todos!
Edmond Cohen
Paris, Fransya

ESTER LA REYNA 

Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.

Komo a kada vez vos akodro ke el proksimo atelye de konversasyon de la asosyasyon Vidas Largas se tendra el martes 18 de marso, de las dos i un kuarto asta las sinko, en el Centre Communautaire, 119 rue Lafayette Paris (10°). Metro Poissonnière o Gare du Nord.

El djueves pasado, kuando eskapi mi emisyon sovre los djudyos de Ukranya, la sekretarya de Radio J me disho ke durante mi emisyon uno telefoneo para kesharse ke lo ke yo diziya no teniya interes, ke mijor seriya si yo avlava de muestras kostumbres i orasyones, i no de Wagner.

Me enkanti un poko porke nunka avli de Wagner, ni en esta emisyon ni en otra por lo ke me akodro. Esto dicho, no so kontra avlar de muestras kostumbres i orasyones, sovre todo un diya komo oy ande estamos en el tanith de Esther. Por esto vo avlar oy de la reyna Esther, ama antes tengo un anunsyo de azer:

Al derredor de la ekspozisyon Selanik, sentro de la destruksyon de los djudyos de Gresya, el Memoryal de la Shoah en Paris prezentara el djueves 20 de marso a las syete de la tadre, un filmo de 48 minutos intitolado En présence de mes voisins (en prezensya de mis vizinos). El filmo sera en ingles i grego, ama kon subtitolos en franses. El filmo a sido sponsorizado por el Memoryal de la Shoah i la asosyasyon Judeo Espanyol en Auschwitz. Este filmo, inedito en Fransya, a sido prezentado el 16 de oktovre 2013 en Selanik a la komunidad djudiya.

El autor, George Gedeon, sera prezente, vendra espesyalmente de Toronto ande mora. Es un ombre eksepsyonal ke a konsagrado mueve anyos de su vida a este filmo. Es el egzemplo mizmo del kristyano ke no saviya nada de la desgrasya ke aharvo a la komunidad djudiya durante la gerra, i ke, en un momento de su vida, se dyo kuenta de la gravidad de la koza i izo todo para azerlo saver a los gregos, al governo grego, i a todos los ke kyeren oirlo en el mundo.

Despues del filmo se tendra una meza redonda kompozada de Paul Hagouel, injenyor i militante de la Memorya ke bive en Selanik, Georges Prevelakis, profesor en la Universidad Paris I,  i Joël Kotek, profesor en la Universidad libera de Bruxelles, espesyalisto del antisemitismo en Evropa.

La meza redonda sera animada por Michel Azaria, vise-prezidente de JEAA (Djudeo-espanyol en Auschwitz).

Djueves 20 marso a las syete de la tadre. Kale rezervar al Memoryal: telefon 01 42 77 44 72.

Esto dicho, mos estamos aserkando muncho de Purim, ke va kaer este anyo shabath 15 a la tadre, dunke en vedra despues de shabath. Oy estamos en el tanith de Ester, i por esto es ke me pensi de azervos una meldadura de lo ke mos konta el Meam Loez sovre Ester la reyna.

Kuando digo Meam Loez, agora no avlo mas de Yaakov Huli, porke el komentaryo de la megila de Ester a sido eskrito en 1864, mas de un siglo despues de la muerte de Huli, por el haham Rafael Hiya Pontremoli. Ama para dizirvos la vedra, yo lavori sovre la transliterasyon ke izo en 1974 Pascual Pascual Recuero de la ovra de Pontremoli, syendo ke malorozamente no pude topar sovre internet el orijinal eskrito en rashi, komo era por Bereshit.

Lo ke vos vo meldar oy es el komentaryo sovre el pasuk 7 del kapitulo 2 de la Megila: Vayehi omen et Hadassa (Y fue crian a Adasa)

I agora do la palavra al haham Pontremoli:

Mos aviza el gran rejo ke estuvo rijendo Mordehay a la senyora de Ester de su chikes. Sigun el padre dotrina a sus ijos i los enkamina en kareras del Shem Itbarah, ansi estuvo kriando Mordehay a Ester, ke era ija del ermano del padre. Ke syendo era guerfana, la tomo Mordehay por ija a enbezarle dotrinas buenas, i de ke empeso a avlar Ester, le embezava Mordehay ke respondyera amen.

Ke esto es ovligo al padre i la madre ke gien a sus ijos en syendo chikos, i kuando empeso la kriatura a avlar, deve el padre de embezarle Tora shiva lanu Moshe (Ley encomendo a nos Moseh) i Shema Israel (Oye Israel). I azyendose mas grande,  le enbeza unos kuantos pesukim de kavesa, i yevarselo al kal i enbezarle a responder amen kon boz alta. Ke savresh ke la kriatura ke se muere, para ke tenga zehut de tehiyat metim i olam aba (merito para arrebivimyento de los muertos i mundo el vinyen), es de edad ke responde amen en el bet akeneset (el kal); i por esto tyene hiyuv (karga) el padre de enbezar a su ijo a responder amen  kuando empesa a avlar. I esto mizmo aziya Mordehay atsadik (el djusto) a perkurar kon Ester a enbezarle a responder amen. I por esto disho vayehi omen et Hadassa, ke el byervo de omen esta haser vav (sin vav), keryendo dizir ke la akavidava a dizir amen. (Aki yo Edmond Cohen avro una paranteza para dizirvos ke en jeneral el byervo omen, ke kyere dizir edukador, se eskrive kon una vav entre alef i mem, i en la megila no ay vav. I si no ay vav, sin las nekudot omen se puede tambyen meldar amen. Por esto el Meam loez mos dize ke si no ay vav es para darmos a  entender ke Mordehay enbezava a Ester de dizir amen. Syerro la paranteza).

I su nombre ikari (prinsipal) de Ester era Hadassa, syendo era vedrunya (vedre, vedrika) kon grasya komo la murta (la myrte en franses) ke se yaman en lashon akodesh ( la lingua santa) hadas, i los tsadikim (djustos) son enshemplados a la murta, i por esto se yamo Hadassa. Syendo todos los arvoles estan freskos en enverano i se sekan en invyerno, ma la murta esta freska en  invyerno i en verano, i ansi era Ester syempre tsadeket (djusta), tanto en lo ke estava en kaza de Mordehay, tanto en lo ke se fue ande Ahashverosh. I asigun la murta tyene buen guesmo i su savor es amargo, ansi Ester fue dulse para Mordehay i amarga para Haman. I mas ke, sigun la murta parese ke no tyene guesmo de enfrente, ma en estregandola (fregandola) byen, amostra su buen guezmo.

Ansi Ester, aun ke paresiya ke no izo bueno lo ke se kazo kon Ahashverosh; ke kaliya ke izyera modos de injenyos para ke no la vyeran, i mas ke no mankariya ke le dariyan a komer en kaza de Ahashverosh komidas issurot (defendidas) has ve shalom. I mas paresiya ke no izo byen Ester de konbidar a Haman al kombite en ora de la fortuna, ke estavan Israel en angustya grande. Ma en parando myentes i eskarvando byen, vemos ke todo lo ke izo Ester fue derecho, ke si no se kazava kon Ahashverosh, era destruida la uma israelit (la nasyon de Israel). I esto ke se kazo, se lo konto el Shem Itbarah por mitsva grande, syendo el Shem Itbarah save los korasones i la entisyon de kada uno i uno. I mas ke no kijo komer de sus komidas de Ahashverosh, otro ke legumbres. I tambyen lo ke kombido a Haman al kombite fue por provecho de Israel, ke no se enfeuzyaran en Ester sino ke izyeran teshuva, sigun se avizara de largo, be ezrat ashem (kon ayudo del Dyo).

I byen se aplika komo Ester estuvo tsadeket (djusta) de prisipyo asta el kavo. I por dita razon la yamaron Hadassa, enshemplarla a la murta, ke estregandose se ve su buen guesmo, lo ke no se gole de enfrente. I syendo ke Hadassa es nombre de djudiya, i Mordehay ya teniya avizo por suenyos ke lo avizaron de los syelos ke Ester teniya ke ir a la kaza de Ahashverosh, i keriya enkuvrir su puevlo i su nasimyento de Ester para ke no supyeran ke es djudiya, sigun veresh adelantre beezrat ashem. Por esto le enkuvriyo el nombre de Hadassa i la yamo Ester, ke es lashon de enkuvrir. I tambyen en lashon arami (en arameo) yaman a la murta ista. I en lashon yovani (grego) la yamaron Istar, ke entendyeron ke era de su umma (nasyon), i les plazyo muncho, syendo eyos yaman Istar por kavza de la estrea de Nogah, ke se yama ansi.

I tambyen Israel les plazyo a yamarla por nombre de Ester, por kavza ke no supyeron ni pudyeron dar kredito por Ester si era tsadekket o no; i era la koza enkuvyerta en sus ojos asta al kavo, por razon ke syempre teniyan una hakira (una bushkedad) por la im na (si es verdad) ke era buena djudiya i tsadeket komo lo ke era kriada de Mordehay i nyeta de Sara, ke bivyo 127 anyos. I por esto tuvo zehut de enreinar en las 127 sivdades, sigun se avizo en primer pasuk.

Si es esto, no se entyende komo no izo enjenyos a no kazarse kon Ahashverosh, i aun ke era be’ones (por fuersa). Ma syendo tsadeket, no la deshava el Shem Itbarah ke se enkonara tala tsadeket, ke ya vimos tantas yagas grandes ke trusho el Shem Itbarah a Paro i a su djente porke tomo a Sara, mujer de Avraham, i la tuvo una noche en kaza, a tanto ke la mando a Sara i le dyo prezentes a Avraham para ke le emprezentara, sigun se avizo en el deklaro (komentaryo) de la peraha de Leh Leha. I si Ester era tsadeket komo Sara, ya le aziya el Shem Itbarah komo este nes a mandarle yagas a Ahashverosh, porke tomo a Ester syendo djudiya i mujer de Mordehay, asta ke la mandava a la kaza de Mordehay. I vyendo ke no le akontesyo ningun dezastre a Ahashverosh, da a amostrar ke, has veshalom, no era Ester tan tsadeket, i aun ke el Shem Itbarah la enkuvriyo a Ester i metyo sida (manseva) en su lugar i en su forma, esto no lo saviyan ninguno, sino todos entendiyan ke Ester era ke se adjunto kon el rey i komiya de sus komidas, . I por esto no davan kredito ke era tsadeket, ni menos diziyan ke has veshalom no era tsadeket.

Por esto la yamaron Ester, ke era la koza enkuvyerta en sus ojos, asta ke se izo el nes de Israel. Estonses entendyeron ke  fue rejido el Shem Itbarah ke se kazara Ester kon Ahashverosh para eskapar a la uma israelit, i por esto no tuvo Ahashverosh ninguna pena, sigun tuvo Paro. I akea ora dieron kredito ke Ester fue tsadeket de prisipyo asta el kavo, i todos sus rejos fueron kon gran djudezmo. I por avizo de esto disho el pasuk: hi Ester bat dodo (ella Ester, hija de su tio), ke tambyen en la ora ke se yamo Ester, ke es en tyempo ke la tomo Ahashverosh, ke de estonses le trokaron el nombre de Hadassa i la yamaron Ester, kon todo esto fue bat dodo (ija de su tio) ), ke se alinajava ke era sovrina de Mordehay i kriada suya, ke asemejava a el en los maasim tovim (buenas aksyones).

I syendo ke la rikeza i el repotreo (plazer) lo trae a el ombre a enyegar en el Shem Itbarah, diran la djente ke estando Ester kon tanto repotreo i rikeza, syendo una reyna grande ke nada no le mankava, avra safek (shupe) ke se olvidariya del djudezmo has ve shalom estando en la kaza de Ahashverosh, por esto disho ki en la av vaem (que no a ella padre ni madre).

Ke savresh ke, asigun la natura i el teva (naturaleza) ke se uzo la presona en su chikes, ansi kamina asta su vejes.Ke si el ombre yevo tsaar (angustya) de aniyut (povreza), o galut i yisurin  en su chikes, ya se le akevranta su korason i esta muy abatido toda su vida, i aun ke terna rikeza denpues de tyempo, no ay ke pensar ke va tomar gaava (orguyo, arogansya) i kontenerse en su dinero, i kafrar (ir a la kontra) en el Shem Itbarah, has veshalom, syendo ya se le izo teva la manya ke tuvo en su chikes a estar kevrantado i abatido, i syempre se akodra lo ke era mas antes. Lo kual, si algun tuvo rikeza en chiko i se embezo en repotreo, ya kovra la mida (el karakter) de la gaava de su chikes, i puede enyegar en el Shem Itbarah, has ve shalom, i despues, aun ke deskae, has veshalom, no keda su korason kevrantado, syendo la manya ke kovro syendo chiko le keda por kavod, i se yama dal gea (prove i gavyento).

I por avizo de esto mos disho el pasuk ke no ay safek en Ester amalka (le reyna) , ke por tener muncha rikeza perdyo has ve shalom algo del djudezmo, syendo ke de su chikes era guerfana, ki en la av vaem (que no a ella padre ni madre). I ya se save ke en ke no tyene arimo de padre ni madre esta su korason muy kevrantado i va de lugar en lugar si avra alguno ke lo apanyara a su kaza. I syendo yevo este shiur (lisyon) de apreto i galut, ya le kedo el korason kevrantado i no ay haluka (kontraversya) ke podra kontenerse kuando enreino, syendo ya se le izo teva (naturaleza). I de aki veresh komo syempre fue temyente del Shem Itbarah.

I syendo va a kontar la ermozura de Ester, por esto disho ke fue kativada de Yerushalayim kon Mordehay, ke la ermozura se topa en Yerushalayim. Ke savresh ke 10 kashikas de ermozura abasharon al olam (al mundo), las 9 tomo Yerushalayim, i 1 se espartyo en todo el mundo. Por esto tuvo hehreah (menester) de dizirmos ke la raiz de Ester fue de Yerushalayim, para kontar la maala (grandeza) de Erets Israel ke da ermozura a sus moradores.

I por ke no entendash ke la guerfandad le danyo la ermozura de Ester, sigun vemos kuantas mosas ermozas ke, por ser guerfanas sin tener ken las gie, van yorando i penando i se meten a lazrar en kazas de la djente, i se demudan sus fases, i no les keda ermozura, por esto mos konto el pasuk ke en Ester amalka no uvo este safek. Ke aun ke era yetoma (guerfana) de padre i madre, kon todo esto era ermoza de forma i buena de vista, i le turo su ermozura.

Aki me vo kedar de mi meldadura, dezeandovos, keridos oyentes, hag Purim sameah, i…al djueves ke vyene, si kyere el Dyo!

Edmond Cohen