eSefarad Noticias del Mundo Sefaradi
Keridos amigos, aki toparash el teksto de la emisyon de esta semanada.
El program se puede sintir por Internet kada djueves a las 4 H O6 PM, ora de Paris, indo al sityo RADIO – la fréquence juive. Kale tener pasensya i asperar un poko, no se oye pishin.
Aki toparesh el teksto de mi emisyon de este djueves, la ultima ke vo azer antes de mis vakansas de julyo i agosto (en estos dos mezes va ser redifuzyones). Para esta emisyon me tomi koraje i vo avlar del Talmud, una ovra monumentala eskrita por munchos i munchos durante munchos siglos ( a lo manko sinko, sino mas) ke aze mas de 5.000 pajinas. No vos espantesh: no las vo meldar todas. Solo dos chikitikos pedasikos.
Vamos a ver lo ke van a pensar de mi lavoro el haham Farhi, i tambyen Tito Jacob, el kunyado de Liliane.
Saludos a todos
Edmond Cohen
Paris, Fransya
ENTEBBE
Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Komo kada semana, vos akodro ke el proksimo atelye de konversasyon de la asosyasyon Vidas Largas se tendra el martes 8 de janvier, de las dos i un kuarto asta las sinko, en el Centre Communautaire, 119 rue Lafayette, Paris (10°) métro Poissonnière o Gare du Nord.
En la noche del 3 al 4 de djulyo 1976, la armada de Israel, Tsahal, reusho una koza ke ni eya ni dinguna otra armada reusho en la istorya, kyero avlar de la operasyon de salvamyento de los rehenes (otages) djudyos detenidos en el aeropuerto de Entebbe. Asta oy, los ke lo izyeron dainda se demandan komo pudyeron reushirlo. I por tanto, reusheron.
Kale akodrarse ke, desde el anyo 1968 i despues en los anyos setenta, los Palestinyanos , en vez de atakarse a la armada israelyana, toparon mas kolay de atakarse a avyones siviles, sea ke los destruiyan en el syelo, metyendo bombas arryentro, sea ke tomavan rehenes.
En janvier 1976, la FPLP (Frente Popular de Liberasyon de la Palestina) aprova, en el momento ande esta ayegando al aeropuerto de Nairobi en el Kenya, de destruir kon roketas suelo-ayre un avyon de linea yeno de siviles djudyos. Ama al ultimo momento la polisiya del Kenya lo ambeza, i aferra a los Palestinyanos en sus araba antes del atentato.
El aferramyento keda sekreto, los palestinyanos son endormesidos kon drogas por la polisiya del Kenya i dados a los serbvisyos sekretos israelyanos ke meten los palestinyanos durmyendo en serkolyos i los yevan kon avyon ande Israel, ande se espertan en prezo.
Esto todo keda sekreto, ama los kapos de la FPLP se dan kuenta ke sus matadores dezaparesyeron, son lokos de birra i kyeren vengarse.
Lo van azer al kavo del mez de djunyo del mismo annyo 1976. El 27 de junyo, un avyon Airbus de Air France se va de Tel Aviv verso Paris, azyendo una eskala en Atena, en Gresya, para tomar unos 58 viyajadores. A la diferensya de lo ke se pasa en Paris i Tel Aviv, no ay kaji dingun kontrolo en el aeropuerto de Atena, i esto los Palestinyanos lo saven. Kuatro terroristos entran el el avyon, dos almanes de la Rote Armee Fraktion (Fraksyon de la Armada Kolorada, mas konosida komo Banda de Baader) ke eran Wilfried Böse i Brigitte Kuhlmann (su mujer), i dos Palestinyanos de la FPLP.
Kaji pishin toman el kontrolo del avyon, i ovligan al komandante del avyon, Michel Bacos, de irse en Benghazi, en la Libiya de Khadafi. Todos pensan ke se van a kedar aya, ama no. Despues de tener tomado benzina, se van de Benghazi, deshando libertad a una sola rehena, una Ingleza, Patricia Heiman, ke se korta la tripa eya misma asta la sangre, i enganya a los terroristos dizyendoles ke esta prenyada i ke tyene menester de ser kurada. Se va de Benghazi a Londres, i aya los del Mosad la peshkuzan i obtyenen de eya presyozos haberes sovre kyen son los terroristos, kuantos son, kuantas armas tyenen, ets.
Esto dicho, los terroristos ovligan al Komandante Bacos de irse de Benghazi a Entebbe, el aeropuerto del Uganda, el pais de este loko de diktador, Idi Amin Dada.
Direktamente de Tel Aviv a Entebbe, ay unos 3.600 km, ama no es posivle de ir direktamente, porke seriya pasar por paizes enemigos. Kale pasar por la Mar Kolorada, el Oseano Indyano, esto todo en sekreto, i yene no se puede ir en Uganda sin traversar a lo manko un pais, el Kenya. Ansina el kamino es de mas de 4.000 km. Parerse imposivvle de aprovar kualkyer koza tan leshos en medyo de los enemigos.
Las dos primeras kozas ke aparesen, es de una parte ke tres muevos terroristos se aunen en Entebbe a los kuatro primeros, i de otra parte ke la armada de Uganda, a los ordenes de su kapo Idi Amin Dada, esta al lado de los terroristos para ayudarlos.
En el aeropuerto, los terroristos empesan una seleksyon: de un lado metenlos rehenes israelyanos, unos syen, del otro lado los otros, entre eyos los dodje del ekipaje franses. Esta seleksyon akodra a algunos el tyempo de Auschwitz. Uno de los rehenes amostra a Wilfried Böse, el Alman, su numero de deportado eskrito por la vida sovre su braso. Böse responde ke el no es nazi.
Los terroristos dan la libertad a los rehenes ke no son israelyanos (fransezes, amerikanos, inglezes, gregos, ets). I una Israelyana hazina de 75 anyos, Dora Bloch, es yevada al ospital de Kampala. De su lado, el Komandante Bacos no acheta de irse sin los rehenes israelyanos, i todo el ekipaje se dize d’akodro kon el para kedar prezoneros kon los Israelyanos. Una relijyoza kristyana kyere azer lo mismo i trokar su liberasyon en favor de un rehen israelyano para ke sea liberado en su lugar, ama los terroristos no achetan para eya i la liberan por fuersa, si se puede dizir ansina. No konosko el nombre de esta relijyoza, i es pekado, porke mereseriya de ser nombrada.
Los terroristos demandan la liberasyon de 40 Palestinyanos detuvidos en Israel i de 13 otros detuvidos en Kenya, Fransya, Suisa i Almanya Federala. Si no obtyenen satisfaksyon el primo de julyo por lo mas tadre, van a empesar de matar a los rehenes.
El kapo del governo, Itshak Rabin, el ministro de la Defensa, Shimon Peres, el kapo del Estado Major, Motta Gur, todos saven ke no es posivle de negosyar kon los terroristos, porke mismo si eyos achetan de deshar a sus prezoneros, los otros paizes no son dispuestos de deshar los suyos.
Ama de otra vanda, komo topar una solusyon militar? Lo primero de todo es ganar tyempo. Entre los Israelyanos ay un zabit retirado, Baruch “Burka” Bar Lev, ke konosyo Amin Dada del tyempo ande era amigo de Israel. El telefonea a Amin Dada ke responde ke, entre varyas kondisyones, kyere un premyo Nobel. Rabin da instruksyones a Bar Lev de achetar todo lo ke demnda Dada, ama kale ke les de tres diyas mas. Al kavo, Amin Dada i los terroristos achetan de asperar otros tres diyas antes de matar a los rehenes.
Los ministros del Governo de Israel azen las dos kozas en djuntos: negosyar komo si la negosiasyon era la sola solusyon, i aparejar una aksyon militar en el tyempo de la negosyasyon . I la vedra es ke astal kavo, ni eyos saven si va ser la negosyasyon o si va ser la aksyon militar. Komo disho Yoshua Shani, el kapo de los pilotos ke se fueron a Entebbe, “toda la operasyon fue planeada en 48 oras. Planear una tala operasyon uvyera tomado a una otra armada un mez, dos mezes, sesh mezes o mas, ama mozotrsos tenyamos dos diyas. Por esto segimos a lo mas 2 per syen del plano, deshando 98% para la improvizasyon…”
Komo planear tala operasyon? Kale tener el maksimum de haberes sovre los terroristos, los askeres ugandezes, kuantos son, ke armas tyenen, ande se topan, ets. Por esto, los ombres del Mosad peshkuzan en Paris a los rehenes liberados. Uno de estos, un franses djudyo ke tyene una eksperyensa de la armada i una memorya fenomenala, da a los ombres del Mosad informasyones muy presizas sovre las armas de los terroristos. Esto, por siguro, va ayudar a la preparasyon del plano.
Kale tambyen konoser el aeropuerto por el klavo i el burrako. Por mazal, es una kompaniya israelyana, Solel Bone, ke fraguo este aeropuerto, i los militares israelyanos tyenen los planos kon los lugares ande se topan las puertas, por ke vanda se avran i se serran, ets. Ama aze tyempo ke fue esta fragua. Kale estar siguro ke no troko despues. Para esto kale fotografyar kon presizyon el aeropuerto komo esta oy. Los israelyanos topan un amigo ingles ke tyene un avyoniko ke se va ensima del aeropuerto, sözde para kedarse aya, ama dize a la radyo ke tyene difikultades para volar, i entremyentres torna i torna ensima del aeropuerto, tomando fotos, i despues dize ke seriya mijor ke abolte sin kedarse, i se va…para dar las fotos a los Israelyanos. I eyos pishin las embiyan en Israel.
Los Israelyanos fraguan en unas kuantas oras una replika del aeropuerto, i los ke van a atakar – si van a atakar, asta el ultimo momento no saven – se auzan a atakar de noche para ser prontos, i ke kada uno sepa lo ke tyene de azer.
La sorpreza as indispensavle. Si no son sorprendidos, los terroristos tendran tyempo de matar a los rehenes, komo lo izyeron en los djugos Olympikos de Munich en 1972. Si todo no se pasa komo kale, se pueden morir todos, inkluyendo los salvadores, los dozyentos mijores de toda la armada israelyana. Kale saver ke los ke van a atakar a los terroristos i a los askeres ugandezes son de la Sayeret Matkal, las fuersas espesyales, komandadas por un Lugartenyente-Koronel de 30 anyos, Yonatan Netanyahu, ke es, komo ya lo savesh, el ermano mayor de Binyamin Netanyahu, ke va ser mas despues i asta agora el Primo Ministro de Israel.
Para obtener la sorpreza, los komandos israelyanos se meten boya preta sovre la kara, se visten komo askeres ugandezes i toman kon eyos una Mercedes komo la del Prezidente Amin Dada i dos Land Rover. Esto todo es yevado en sekreto a Sharm el Sheikh, ke dainda aze parte de los territoryos de Ayifton konkistados en 1967 por Israel sovre los Ejipsyanos, i ke no pudyeron tomar atras kon la gerra de Kipur en 1973.
Es de Sharm El Sheikh ke se van a ir kuatro avyones Herkules kon los komandos, las armas i todo lo ke va ser menester para traer atras en Israel los rehenes.
Estamos en la noche del 3 al 4 de julyo 1976. El ultimatum se va eskapar a las 11 de la demanyana. Todo deve ser eskapado i reushido de antes. Por esto kale bolar 8 oras sovre la mar serka de la agua para no ser reperado por los radares de los paizes de al lado, todos enemigos.
El kapo de los pilotos, el ke yeva el avyon de delantre, no puede ver si los otros son detras, ni les puede avlar, por modo del silensyo radyo. De vez en kuando, uno de los avyones detras de el se mete delantre, djusto para ke sepa ke estan dainda kon el. El piloto pensa a una sola koza, byen pilotar sin azer dingun yerro, porke el mas chiko yerro puede ser la muerte de todos.
Esto todo es bueno, ama Entebbe es en medyo de las tyerras, al bodre del lago Victoria. No se puede ir a Entebbe, mismo vinyendo por la mar, sin pasar a lo manko por un pais, el Kenya. Durante los tres diyas antes, los Israelyanos lasdraron para obtener en sekreto el akodro del Kenya para bolar ensima del pais, i tambyen, a la buelta, de irse al aeropuerto de Nairobi para tomar mueva benzina. I al kavo del kavo, obtyenen este akodro sin el kual nada era posivle.
En medyo de la noche, los kuatro Herkules ayegan a Entebbe. Komo azen para ke los terroristos i los Ugandezes del aeropuerto no oygan estos kuatro avyones, no se. Aparejando esta emisyon, bushki en varyos artikolos i emisyones, ama no topi nada. Dainda ay munchas kozas ke kedan misteryozas, i komo azer sorpreza kon este ruido de los avyones es uno de estos misteryos ke no vos puedo eksplikar.
Lo ke es siguro es ke de uno de los avyones sale la Mercedes ke parese ser la del Prezidente Ugandeze, i las dos Land Rover. Estas tres arabas son yenas de komandos de la Sayeret Matkal paresyendo a askeres ugandezes. Ay dos sentinelas ugandezas ke demandan a las Land Rover de kedarse. Los israelyanos travan kon armas kon silensyozos ama no los matan i vyendo esto un otro trava kon ruido. Esta vez kale azer presto , i los komandos korren en travando , entran en el aeropuerto, matan a Wilfried Böse antes ke tenga tyempo de matar a los rehenes. Malorozamente son los komandos ke van a matar a un mansevo djudyo de 19 anyos, Jean-Jacques Maimoni, ke no se echo a basho pishin kuando los komandos gritaron en ebreo i en ingles: “echadvos a basho! Semos Tsahal! Un otro ombre i una mujer kayeron tambyen muertos, puede ser mas despues. Ande estan los otros? demandan los komandos. Los rehenes amostran una puerta: los komandos entran i matan a todos los terroristos , syete en todo.
Ama esto no abasta: ay los askeres ugandezes ke estan de todo lado i ke no kedan de travar. Los komandos matan a munchos ugandezes ama eyos, los komandos, tambyen tyenen un muerto, el kapo Netanyahu, i unos kuantos firidos ; entre los firidos ay un komando ke es ferido a la koluna vertebrala, i va kedar tetraplejiko. Se yama Sorin Hershko, i el komandante Bacos, ke agora tyene 88 anyos i konto sus rekodros el anyo pasado, mos dize ke guadro kontakto kon el i ke es un ombre korajozo ke sonriye syempre afillu su estado.
Los komandos korren asta los avyones kon los rehenes, ama el lavoro no esta eskapado: ay onze MIG ugandezes, guadrados el uno al lado del otro, ke reprezentan la fuersa aeryana de Uganda. Kale destruirlos, para ke los Ugandezes no puedan atakar a los avyones djudyos en su buelta a kaza.
La birra de Idi Amin Dada va ser terrivle. Va embiyar a sus soldados para matar a la povereta de Dora Bloch en su ospital. I meldi ke tambyen izo matar a miles de kenyanes bivyendo en Uganda, djusto para vengarse del ayudo dado a Israel por el Prezidente del Kenya.
El Uganda va aprovar de kesharse a la ONU, ama el oksidente va defender a Israel por una vez. Los Rusos, los Kinezos i los arabos van a kondenar la agresyon israelyana.
Munchos filmos van a kontar esta istorya, kon grandes aktores komo Burt Lancaster o Charles Bronson, i tantos otros.
La operasyon turguelo a trokado de nombre en onor al kapo matado en Entebbe. Los Israelyanos la yaman agora operasyon Yonatan.
Un anyo despues, en 1977, kuando tuve un ijo, lo yami Jonathan. Ya se ke no tyene dingun interes para vozotros, ama yene…es por dizir.
Al djueves ke vyene, si kyere el Dyo!
Edmond Cohen
