eSefarad Noticias del Mundo Sefaradi
Keridos amigos, aki toparash el teksto de la emisyon de esta semanada.
El program se puede sintir por Internet kada djueves a las 4 H O6 PM, ora de Paris, indo al sityo RADIO – la fréquence juive. Kale tener pasensya i asperar un poko, no se oye pishin.
Aki toparesh el teksto de mi emisyon de oy djueves, ande vo meldar una konsejika travada del Meam Loez, aki de Isaac Magriso en su komentaryo de Bamidbar (1754).
Saludos a todos
Edmond Cohen
Paris, Fransya
EL KASAP MODESTO
Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
El ultimo atelye de konversasyon de 5772 de la Asosyasyon Vidas Largas se tuvo antiyer martes 19 de junyo, i agora se va kedar para las vakansas. Empesara por de muevo, si kyere el Dyo, el martes 13 de novyembre al vyejo adereso del Centre Communutaire ande estavamos antes. Ama dainda manka…
De kualo avlarvos oy? De muevo vos kyero avlar de una koza ke me tyene al korason, de la kuala ya vos avli munchas vezes, kijo dizir el Meam Loez.
Ay adjile. Afillu si ay de los muestros ke no kyeren dainda ver la realidad en frente, la realidad es ke muestra lingua se esta muryendo, i muryendo muy presto. En el atelye de konversasyon, estamos todos nasidos de Fransya, ograsheando para avlar en la lingua ke oyimos de muestras vavas i madres, ama agora no ay mas dinguno ke avlava esta sola lingua kuando era chiko. Todos avlimos franses kuando eramos chikos, i todos agora bushkamos los byervos para avlar en la lingua de muestros antepasados.
Yo aki vos avlo en la radyo, ama dainda no topi dinguno para remplasarme mismo una sola vez si kaygo hazino o me syento kansado i me vo en vakansas.
Ay adjile. I asigun mi la adjile es, entre otras, de puvlikar muestras propyas ovras, i por empesar el kapolavoro de muestra lingua, el Meam Loez. El Meam Loez se puede topar en ebreo, en franses i no se mas en kuantas traduksyones, ama si lo keresh meldar en muestra lingua, no es posivle, o si lo es, es en karakteres rashi sovre internet, ama por lo ke kreo, no en entero.
So muy kontento de pueder toparlo en karakteres rashi, syendo ke es ansina ke fue eskrito, i la primera koza ke kaliya azer era de publikarlo tal i komo fue eskrito, lo ke no se topava antes.
Ama agora, ay adjile de trasliterarlo en karakteres latinos, para ke munchos de los muestros, i de los estudyantes ke vendran despues de mozotros kuando no estaremos mas de este mundo, puedan meldarlo i konoserlo de manera mas kolay, ama yene en su lingua de orijen.
Saludo komo se deve el lavoro ke izyeron Pascual Pascual Recuero i Gaetano Maeso, dos profersores espanyoles ke empesaron este lavoro aze unos trenta anyos de esto, ama malorozamente me ambezi ke este lavoro fue destruido por el editor mismo, porke no se vendiya. Es una verguensa.
Es vedra ke no es kolay de azer tal lavoro, porke no es bastante de transliterar solo, kale tambyen dar a entender al meldador byervos de vyejo espanyol mesklados kon munchos byervos ebreos i unos kuantos byervos turkos.
Vos kombido, keridos oyentes, de irvos sovre internet en Sefarad.org a meldar lo ke eskrivyo Karen Gerson Sarhon, ke todos konosemos komo la kapo gazetera del Amaneser i la kantadera de los Pasharos sefaradis. En un artikolo intitolado Salvaremos el Meam Loez del olvido, ke malorozamente no tengo tyempo de meldarvos oy – si kyere el Dyo lo meldaré en una otra emisyon – mos dize los esfuersos ke munchos estan azyendo al lado de eya para transliterar el Meam Loez.
Kale dezearles koraje i ayudarlos. Es menester no solo para mozotros, ama sovre todo para los ke vendran despues de mozotros.
Esto dicho, tengo la gana de meldarvos agora una konsejika travada del Meam Loez, del komentaryo de Bamidbar del haham Isaac Magriso ke lo puvliko en 1754. Vo meldarlo, no direktamente en karakteres rashi asigun fue puvlikado, ama en la transliterasyon ke izo el profesor Pacual Pascual Recuero en su livro intitolado Antologia de cuentos sefardies, editado en 1979 en Barcelona por Ameller Ediciones.
Recuero intitolo esta konsejika El karnisero modesto, ama yo me permiti de intitolarla El kasap modesto. Si me lo permiti, es porke Magriso nunka avla de karnisero, solo de kasap.
Asigun Recuero, esta konsejika fue travada por Magriso del livro Meil tsedaka (el palto de karidad), de Jonah Landsofer (1678 – 1712).
Otra koza vos tengo de dizir antes de empesar mi meldadura: Recuero, en su transliterasyon, eskrive: Kombidé, aparejé, ets, en vez, asigun mi, de kombidi, apareji, ets. En karakteres rashi, la yod se puede meldar o e o i. Recuero, ke es espanyol, melda la yod komo e, porke ansina se avla oy en kasteyano, ama asigun mi aki kale meldar la yod komo i, porke los djudyos no dizen aparejé, dizen apareji. Yo dunke lo meldaré apareji, afillu lo ke eskrivyo Recuero.
I agora empeso mi meldadura:
Un talmid haham, hassid i anav…Del empesijo i en sira kuatro byervos en ebreo, ansina es en el Meam loez. Kale entender un ombre savyo, sufu i umilde, dunke un talmid haham, hassid i anav bushko del Senyor Yitbareh ke le dishera ke sera su haver (su kompanyero) en olam haba (en el otro mundo), i izo taaniyot (munchos tanit) i muchiguo kon tefila i tahanunim (orasyon i suplikasyones), asta ke le disheron una noche bahalom (en suenyo):
-Savras ke el haver tuyo ke demandas ken es el ken tyene de ser en olam haba, es tal fulano el kasap.
I se desperto el dito talmid haham mal triste i suspirando por el suenyo ke vido, ke komo el kasap, ke es un pedrido i am aarets (ombre sin edukasyon),teniya de ser su haver en olam haba, syendo el tan hassid?
I torno otra vez kon taaniyot i tefillot (tanites i orasyones), i le tornaron a dizir bahalom (en suenyo):
– Ya te dishimos ke tal kasap fulano tyene de ser tu haver en olam haba.
Syendo ke oyo otra vez el dito talmid haham (ombre savyo) la avla primera, empeso a yorar yoro grande del sar ke sintyo, i no lo podiya tomar a pasensya komo un pedrido, un am harets teniya de ser su haver en olam haba. I en lo ke estava triste i yorando, oyo una boz de los syelos, ke le deziyan:
– Si no fuera ke eres buen ombre i hassid, i teniyas maasim tovim (ovras buenas), meresiyas muerte por esto ke estas azyendo. I porke lo teniyas de tomar a fuerte por lo ke te dishe ke tu haver tyene de ser tal kasap? Ya saves ke los maasim ke tyene el kasap fulano echo, ke no ay ombre ke alkanse a azer los maasim de tal kasap, i su maala (altura) de akel kasap en olam haba tyene de ser muy grande?
Komo oyo el talmid haham tales avlas, se alevanto demanyana i se fue a la botika del kasap i le dyo shalom, i se le asento ayi i le disho:
-Kero ke me digas tus maasim i tu hasidut (tus ovras buenas i tu devosyon) ke azes en este olam (en este mundo).
Le disho a el:
– Savras, Senyor, ke yo mi trato kon munvha derechedad, ke manko no do, i al ani (prove) le miro de darle lo mijor de la karne asigun le do al riko; i de lo ke gano, do la meatad a la sedaka, i la otra meatad me mantengo yo i los de mi kaza.
Le disho el dito talmid haham:
– Esto ke azes no es tanto de alavar, syendo ke kualsikyer ombre lo puede azer tambyen esto. I esto no me inche lo ke me dizes, sino lo ke kero ke me des a saverr es si alguna koza grande tyenes echo, ke no lo puede azer kualker ombre.
Se kedo kayado el kasap una buena ora, i despues le disho:
– Savra, mi Senyor, ke agora me akodri una koza ke ize agora tantos anyos.
Le disho a el:
– Ke es la koza ke izites?
Le disho a el:
– Savras ke un diya, estando en mi melaha, se desho de venir una karavana de goyim, i aviyan dyentro de la karavana munchos sevuyim (prezoneros), i bihlalam (entre eyos) aviya una muchachika yorando kon muncha amargura; me aserki a eya i le dishe: « -Mi ija, deke yoras kon tanta amargura? » I me disho a mi: « – Ke te dire, mi Senyor? Yo so djudiya i me espanto no sea ke me kiten de mi ley estos goyim; i keriya ke me yevaran en lugar de djidyos para ke me arezgataran (merkaran kontra reskate – rançon) de mano de estos arelim (insirkonsizos) i kedar en djudesmo ». I komo oyi las palavras de la muchachika, me se kevranto el korason de oir sus palavras i me apiyadi de eya, i le dishe: « – Estate kayada, ke yo no te desho en manos de goyim, i yo te aresgataré ». I fui onde el amo, i le akompanyi muncha moneda para tomarla, mas de lo ke era en mi poder, i la arezgati, i la yevi a mi kaza. I la muchacha era de edad de dodje anyos. I la vesti asta ke se izo bogeret (mujer). I teniya yo un ijo regalado de edad de vente i un anyo; i un diya lo tomi a mi ijo i le avli en sekretamente kon munchas buenas, dizyendole:-« Ijo miyo, kero ke me tomes mi konsejo i agas mi palavra i me kumplas mi veluntad de lo ke te vo a rogar, i tengas byen en este olam i en el otro olam ». Me respondyo mi ijo, dizyendo: « Aki esto, mi Senyor, a azer guestro komando de lo ke komandaresh sovre mi, i no refuzaré guestra palavra. » Le dishe a el: « – Ijo miyo, lo ke te kero rogar es ke a esta muchacha ke la tomes por mujer, i yo te aré vestidos i djoyas de lo ke me demandaras por boka ». I me disho mi ijo; « – Aki esto, senyor, a azer su komando ». Estonses me alegri muncho, i le ize todo lo ke me demando de vestidos i djoyas, i le apareji muncho aparejo para la boda; i ordeni la boda i kombidi a la sivdad entera, i no uvo presona de la sivdad ke no kombidi.. I tambyen kombidi a los aniyim (proves) ke aviyan en la sivdad; i a los aniyim los assenti kon la djente de mi kaza, para ke no se averguensaran, i les meti a los aniyim en su meza de kuantas komidas buenas ke meti a los gevirim (ombres importantes); i komyeron i bevyeron, i se alegraron demazyadamente. Pero estuve mirando una meza ke no komiyan ni beviyan, i les dishe a eyos: « – Mis ermanos, ke es el kavzo de esto, ke no vos veo komer ni bever? Kisas algunas mankuras vistesh en la komida de algun modo de koza? » Me disheron: « – Mijor ke esta meza no puede aver, ke todo esta djusto i bueno sin ninguna mankura.Pero los ke mos se kito la gana del komer es ke este ani (prove) ke lo asentastes kon nozotros, mos kito la gana del komer de verlo yorar i sospirar kon muncha amargura, i de verlo a el mos se kito tambyen a mozotros la gana del komer. » Komo oyi esto, lo tomi akel ani de la mano i lo kiti afuera, i lo yevi en un lugar sekretamente, dizyendole: « – Ijo miyo, porke me azes este disgusto en mi fyesta, de yorar i amofinar (azer pena) a todos los kombidados? Dime, ke es el mal ke tyenes? Si es alguna devda ke tyenes, te la pagaré; o si es ke keres alguna moneda emprestada, te emprestaré ». Me respondyo, dizyendo: « – No tengo ninguna devda, ni kero ke me emprestes moneda, sino lo ke esto yorando es ke esta novya ke va a dar kidushim (ke va kazar) oy tu ijo, ke es de tal sivdad, es mi novya, ke esta despozada kon mi de agora tanto tyempo, i vez ayi el setar (dokumento) de kidushim ke tengo ke le di yo kidushim i es mi despozada ». I me kito el setar i me amostro; i vide komo era verdad lo ke diziya. I le dishe a el: « -Ijo miyo, tyenes alguna senyal en la muchacha? » I me disho a mi: « – Savras ke una vez la vide en la kaza de su padre ke teniya tal senyal en tal lugar ». I vide ke era verdad lo ke diziya; i le dishe a el: « – Ijo miyo, tu estate gustozo i no yores, ke yo te kumpliré tu dezeo i te daré a tu novya ». Me alevanti i yami mi ijo aparte, i le dishe: « -Ijo miyo, ya me izistes mi veluntad de lo ke te dishe ke tomaras a esta muchacha por novya; i agora kero ke me agas otra veluntad ke te vo a demandar, i no kero ke me refuzes en lo ke te vo a dizir ». Respondyo mi ijo i me disho: « – Asigun no te refuzi i ize tu komando en lo ke me demandastes, lo mezmo agora no te refuzo en lo ke me komandas ». Le dishe a el: « – Savras, ijo miyo, ke esta novya ke vas a dar kidushim ya esta despozada de mas antes kon otro, i agora lo alkansi a saver; i ya vide el setar de los kidushim ke tyene, komo ya esta despozada kon otro. I syendo ainsi, es asura (proibida) agora para ti, ijo miyo, i kero ke me agas mi veluntad ke se la des a la muchacha a su marido, ke esta aki, kon todos los vestidos i las djoyas ke le ize; i tu seher (pagamyento) sera muy grande de azer esta mitsva, i yo te daré otra novya mijor ke esta i te aré dos tanto de lo ke te ize agora. » I me respondyo mi ijo ke ya estava kontente en lo ke aziya. i lo pasi a el ani i lo vesti i lo pasi a la hupa en lugar de mi ijo, i le dyeron su sheva berahot; i estuvyeron alegres i kontentes todos los ocho diyas de la hupa kon el gaste ke gasti para mi ijo. I estuvyeron muncho tyempo kon mi, marido i mujer, alegres i kontentes sin ninguna falta de lo ke me demandavan por boka asta ke kijeron irsen a su sivdad. I kuando ya kijeron irsen a su sivdad, les apareji su tseda ladereh (provizyones de viaje) de vestidos i komidas, i munchas matanot (regalos) i los embiyi leshalom. Esto fue lo ke me akodri ke ize agora tantos anyos.
Komo oyo esto el talmid haham, le disho al dito kasap:
– Bendicho a Ashem, ke me alegrastes i me arepozastes mi korason de tener un haver komo este en olam haba.
Ansina s’eskapa esta konsejika, i kon eya mi emisyon, i vos digo al djueves ke vyene, si kyere el Dyo!
Edmond Cohen
